號稱「主宰世界」嘅任天堂居然曾經面臨倒閉危機！？最後關頭居然係靠一位神人幫手先起死回生！？｜米迦講兩句 #7 任天堂傳奇（上）：任天堂的崛起 The RISE of Nintendo｜

Happy Kongner | 娛樂類 | Apr 18, 2022

此影片謄本由紅貓＆米奇製作

★非作商業用途，本檔案版權歸版權持有人獨有★

大家好，我係米迦，今次又嚟同大家講兩句。今集嘅題目一如以往都係同上一集無關，亦都同前一集無關㗎。因為今集又會再開一個新題目，講一啲可能大家都會感興趣嘅嘢。而今次我哋嘅題目就係大家打開機都會好熟悉嘅「任天堂」喇！

（開場：講兩句 EP.7 任天堂傳奇(上)）

著名嘅美國遊戲評論人，自稱為The Angry Video Game Nerd嘅元祖級別YouTuber，James Rolfe曾經喺佢嘅節目度就有戲稱過「任天堂係世界嘅主宰」，呢句嘢喺華文化遊戲圈入面亦都廣為流傳。無錯，任天堂係的確可以稱之為呢個遊戲世界嘅主宰，原因係佢哋好似從來都無跟過呢個世界嘅潮流走，反而係用佢哋自己嘅創意，創造出一個又一個改變世界嘅劃時代作品。呢啲特質令到任天堂喺世界各地都有好多死忠，就好似我哋Kongner團隊入面就有兩個任天堂忠實擁躉。

下載檔案

所有資料非作商業用途，若有內容侵權，請即通知我們移除。

不過唔知大家又知唔知，其實任天堂都唔係一創立就係咁樣樣，佢哋曾幾何時都面臨過好多唔同嘅危機。咁究竟任天堂喺未踏入遊戲產業之前又係點嘅呢？佢哋又係從幾時開始「主宰」呢個世界嘅呢？箇中又有啲乜嘢風浪呢？欲知任天堂嘅發展過程，我哋嘅故事就要從呢一間百年老字號嘅第一個轉捩點，任天堂第三任社長山內溥遇上一個改變任天堂命運嘅後生仔開始講起喇。

時間返到去1966年，當時係山內溥接手任天堂嘅第十七年。任天堂係山內溥嘅家族生意嚟嘅，從佢太公山內房治郎喺1889年創立任天堂開始，及後經歷過佢阿爺山內積良嘅管理，去到山內溥接手嘅時候，佢用咗六年時間就令到任天堂成為佢哋行業入面嘅龍頭公司。而佢哋嘅主要業務就係做紙牌，例如日本傳統嘅花牌，又或者係歐美嘅啤牌咁樣。喺成為咗日本第一之後，有一次機緣巧合之下佢就去到美國嘅辛辛那提，參觀咗當時全球大嘅啤牌製造公司，United States Playing Cards Company。之後佢就發現咗一個問題，就係縱使USPCC係全世界最大嘅啤牌製造公司都好，佢哋嘅辦公室同埋廠房對比起其他行業嘅龍頭嚟講都可以話係豆膶咁細。咁就令到山內溥明白到做紙牌就算做到幾勁都好，始終都係會有極限，個市場係得咁上下大細，賺嘅錢始終都唔會多得去邊嘅啫。

咁所以喺山內溥返返去日本之後，佢就開始將任天堂放咗喺唔同嘅行業上面發展。任天堂玩過的士業，又開過時鐘酒店，甚至重玩埋即食食品。呢啲跨界別嘅發展不但止無為任天堂帶嚟新嘅利潤，反而重將公司嘅資源幾乎倒晒落海，面臨破產嘅邊緣。而喺任天堂風雨交加前途未卜之際，山內溥遇到一個啱啱畢業無耐入咗任天堂做嘢無耐嘅後生仔，就係呢個後生仔改寫咗任天堂嘅命運，日後成為咗任天堂嘅擎天之柱。而呢個後生仔就係—— 橫井軍平。

橫井軍平出生喺京都市，畢業於關西著名大學同志社大學嘅電子工學系。橫井喺大學期間成績普普通通，但係佢有一個特質就係好鍾意整啲嘢出嚟玩。佢一無嘢做就會親手整嗰啲平時諗到嘅小玩意，所以喺同學入面都叫做幾有人氣，人人都叫佢做「天才發明家」。咁喺畢業前一年，佢哋學系嘅學生例牌都要去唔同嘅大企業度做實習。不過當時橫井唔知係咪因為近，所以就揀咗同樣位於京都，嗰陣都重算唔上係大企業而係一間小企業嘅任天堂。佢就喺任天堂嘅花牌工廠入面擔任設備維修員，平時得閒又整吓自己腦海入面嘅嗰啲諗法出嚟自娛吓啦。

有一日社長山內溥嚟到廠房巡視，佢就見到橫井用雕刻機整嘅一隻木製嘅手，呢一隻木製嘅手上面就有住彈弓，所以就可以伸縮咁樣彈出去。本身橫井整呢舊嘢出嚟純粹就係為咗喺休息時間嗰陣玩，但對於山內溥嚟講，呢個後生仔係一個不可多得嘅人才。所以佢就叫咗橫井去佢嘅office，然後同橫井講要求橫井喺聖誕節前基於呢個概念創造出一個新嘅玩具，以應付嚟緊聖誕節嘅賺錢熱潮。橫井當然不負所托，好快佢就改良好佢呢個創作，然後任天堂就將呢個玩具命名為「Ultra Hand 超級怪手」，好快就推出咗市場發售喇。結果呢個由橫井無無聊聊諗出嚟嘅發明，任天堂喺半年入面就賣咗一百二十萬隻出去，為任天堂踩入遊戲業打下咗基礎。

就係因為呢隻超級怪手，任天堂成立咗遊戲部門，安排咗橫井喺呢個新部門入面做發揮佢嘅所長，發明新嘅玩具。最終，憑住任天堂本身賣花牌同埋啤牌嗰陣搭嘅網絡，同埋橫井無窮無盡嘅創意，任天堂成功踩入咗玩具業，重成為咗玩具業嘅大企業之一。

任天堂以爆發性嘅突破踩入七十年代，志氣高昂諗住大展拳腳嗰陣，人算不如天算，再強大嘅企業都敵不過世界局勢嘅瞬息萬變。時間去到1973年嘅年尾，喺中東發生咗一場戰爭，由以色列大戰阿拉伯世界。呢一場被稱之為「贖罪日戰爭」嘅戰事驟眼睇好似都影響唔到千里之外嘅日本，但事實上對世界各國都造成好大嘅影響。原因就係伴隨住呢個戰爭，阿拉伯國家就決定以佢哋最大嘅資本—— 石油嚟報復支持以色列嘅國家。而呢個就係「第一次石油危機」。

石油危機所帶來嘅當然就係一眾國家嘅經濟衰退，當時嘅日本GDP係跌咗7%有多，作為玩具業大佬之一嘅任天堂亦都飽受衝擊。正常嚟講，經濟不景重邊會有人買玩具，所以任天堂又再次重返債務地獄。上次公司面臨財政危機就係因為錯誤投放資源喺一啲錯嘅產業上面，解決嘅方法就係將佢放返喺啲啱嘅地方。但今次係世界大勢，全日本都中伏，咁又可以點樣解決呢？個解決方法就係將個眼光放喺呢個世界。

當時全世界最大嘅資本市場就喺遠在大平洋彼岸嘅美國，而當時嘅美國最興嘅嘢係啲乜嘢呢？就係呢一部嘢喇。"PONG"係著名美國遊戲製造商Atari創造出嚟嘅全世界第一個街機遊戲。自從有咗PONG之後，遊戲產業就從此不一樣，發展出一個新嘅產業—— 電子遊戲產業。電子遊戲產業嘅出現為美國帶嚟咗一種新興嘅玩樂潮流，呢一樣嘢亦都畀山內溥睇中，所以佢就傾咗另一間美國遊戲製造商Magnavox所創造出嚟嘅Magnavox Odyssey遊戲主機嚟賣。佢亦都請咗幾個從SHARP過嚟嘅工程師成立咗任天堂開發第二部，開發出一個叫做Color TV-Game系列嘅遊戲主機喺日本本土度賣。Color TV-Game系列主機係任天堂發明嘅第一部家用主機，成個系列嘅總銷量都有三百萬部。

呢個Color TV-Game系列對於任天堂嚟講當然係一個突破啦，但呢個突破都重係解決唔到任天堂嘅問題。面對住債務壓力同埋眼見住外國發展嘅電子遊戲產業大有取代傳統玩具業嘅趨勢，如果任天堂趕唔上潮流嘅話，咁佢哋嘅下場就真係萬劫不復喇。任天堂再次嚟到風雨交加前途未卜之際，十幾年前改寫咗任天堂命運拯救咗任天堂嘅後生仔，喺十幾年之後又再次成為咗扶大廈之將傾嘅重要人物，用佢嘅創意再一次改寫咗任天堂嘅命運。

橫井當時係任天堂開發第一部嘅總監，有一日佢坐新幹線嗰陣就見到隔籬坐住一個玩LCD計數機嘅生意人，佢就忽發奇想「如果可以發明到一樣喺每個人無無聊聊嗰陣都可以用嚟打發時間嘅遊戲，咁一定都會有好多人有興趣去買。」所以佢之後有一日去一個同SHARP開嘅商務會議嘅車程入面，就同山內溥提出咗呢個諗法。山內溥當時就無畀到任何回應，及後山內溥同SHARP社長佐伯旭就傾過吓橫井呢個提議。無幾耐之後橫井就被邀出席一個任天堂同SHARP嘅聯合會議，就係當時，山內溥就批准咗橫井著手開發呢個佢坐新幹線嗰陣諗出嚟嘅嘢。

1980年4月28日，任天堂第一個主宰世界嘅發明，"Game & Watch"橫空出世。Game & Watch係任天堂嘅一大技術突破，因為佢係結合咗LCD電子遊戲同埋數字錶盤所創造出嚟嘅掌上遊戲機。僅僅喺1980年就已經喺全球賣咗接近六千萬套，不但洗清咗任天堂欠落嚟嘅債務，亦都為任天堂進軍電子遊戲市場打下咗重要嘅基礎。而喺同年，任天堂亦都正式進入北美嘅遊戲市場，成立咗美國分部。

任天堂北美分部一開始就喺美國最繁榮嘅都市-紐約落腳，主力就係做光槍型嘅街機遊戲。喺經過左一段時間之後都係浮浮沉沉，而佢哋當時最大嘅問題就係，佢哋開發咗一個賣唔出嘅作品 - Radar Scope。佢哋整咗3000部Rader Scope出嚟，二到最後只係賣得出1000步，仲有2000步塞死咗喺任天堂美國嘅倉庫度封塵。如果呢堆嘢賣唔出嘅話，任天堂北美分部可以話開業無耐就要面臨結業危機。當時任天堂北美分部嘅負責人就係山内溥女婿荒川實。為咗減輕成本，佢亦都將任天堂美國分部由紐約搬到去西雅圖，同時荒川實就問山內溥，可唔可以將呢一堆嘢改造成賣得出嘅嘢，以解決財政危機嘅問題？山內溥就深知道呢堆嘢都係賣唔出㗎啦，所以佢就向公司下令，要求公司將呢Radar Scope改造成喺美國賣得出嘅嘢。基本上如果唔得嘅話，任天堂向海外市場發展嘅扎根之旅可以準備擱淺都似。而喺呢個時候，又出現咗另一個後生仔，拯救左任天堂喺北美嘅業務，而佢後來亦都成為左任天堂另一支擎天之柱。呢個後生仔個名就係叫做宮本茂。

宮本茂出身喺京都府嘅船井郡，大學畢業於金澤美術工藝大學嘅工業設計係。1977年佢喺大學畢業之後，佢都係搵唔到工。有見及此，宮本嘅老竇就拜託佢嘅老友山內溥收留佢個仔。當時任天堂嘅發展方向都仲係以硬件為主，即係主力喺遊戲機嘅開發上面，而唔係遊戲設計。所以當時任天堂內部其實係冇任何適合宮本嘅工作。不過喺見面嗰陣，山內溥就對宮本帶嚟嘅嗰啲自製絨毛公仔感到興趣。可能都覺得呢一個小朋友有啲諗法，所以就暫時將宮本收編，將佢安置係一個企劃嘅工作上面，負責麻雀標籤設計呢類型小型玩具嘅生產工作。後來當任天堂開發街機遊戲嗰陣，宮本亦都幫唔少遊戲做吓美術設計之類嘅工作。而咁啱得咁橋，其中一個佢有份開發嘅遊戲，就係之前我講過蝕到入肉嘅Radar Scope。

雖然喺山內溥問宮本唔可唔可以擔當改裝Radar Scope嘅任務嗰陣，其實宮本都冇乜信心，不過好快佢就有一個概念。呢個概念就係來自一套美國動畫，而呢套美國動畫從文化上面亦都影響咗電子遊戲產業嘅發展好多，就係《大力水手》喇！喺《大力水手》入面，大力水手食菠菜變大力嘅呢一樣嘢，我諗都已經係20世紀流行文化嘅一個符號嚟㗎啦，而呢個亦都影響咗史上第一個電子遊戲角色嘅作品 - Pac Man色鬼嘅遊戲概念。就係主角「小精靈」食咗四個角嘅大力丸之後就可以食鬼呢一樣野。除此之外，《大力水手》亦都影響住任天堂嘅發展，原因就係任天堂當時係想傾《大力水手》嘅版權返嚟整遊戲，不過最後都係失敗咗。呢一樣嘢亦都激發左宮本茂創造出佢自己嘅角色故事，一個關於一隻星星、一個女人、同埋一個水管工嘅愛情故事。

心水清嘅你就會發現，其實呢個就正等同於《大力水手》嘅故事一樣，而由於呢個亦都係一個例子對於著名電影King Kong嘅致敬，所以宮本茂就將呢個遊戲命名為Donkey Kong。喺山內溥嘅授權下，同時喺橫井嘅監督同教導之下，宮本茂就好快整咗呢一隻劃時代嘅遊戲出嚟。起初呢一隻Donkey Kong由任天堂京都嘅母公司運到去美國任天堂西雅圖倉庫嘅時候，成個美國分部都因為咁而陷入一片混亂。公司入面嘅業務經理一聽到呢個叫做Donkey Kong嘅名以為山內溥失心瘋，因為佢哋根本唔明呢個名係點解，而且一啲英雄氣概都冇。試玩起嚟仲好似一隻俾小朋友玩嘅兒童卡通遊戲，一啲都唔型。而從當時對遊戲嘅理解來講，遊戲係應該令到玩家變成一個可以拯救世界嘅超級英雄，而唔係呢啲兒童故事嘅主角。所以當時任天堂美國分部都係哀聲連連，覺得今次都係冇得救㗎啦！不過山內溥，佢只係對班員工講話呢隻game係一隻好遊戲，所以班員工亦都無從選擇。不過美國嘅員工都爭取到一樣嘢，就係幫角色重新命名，就將遊戲入面被拯救嘅女人嘅名改成Pauline，而將入面嘅主角Jumpman改名，將Jumpman改做Mario。Mario呢個名亦都下啟咗另一個開天闢地嘅系列，不過呢個就係後話啦。

【講兩句 EP.7. 任天堂傳奇（上）】
由第一步Donkey Kong嘅機台正式放置喺大眾眼前嘅果一剎那， Donkey Kong就好似10年前嘅第一部街機，Atari嘅PONG一樣，令到所有美國人都大吃一驚。喺眾多嘅射擊同闖迷宮遊戲入面，Donkey Kong嘅出現就好似滿足左一個潛在體驗嘅需求一樣，一個宮本茂稱之為「跑、跳、攀爬遊戲」嘅體驗需求。由1981年7月31日喺美國市場推出之後，直到當年年底，美國任天堂已經賣出左6萬幾步Donkey Kong嘅機台，將呢間瀕臨破產嘅任天堂美國分部直接逆轉成為任天堂最賺錢嘅子公司。不過雖然當時喺美國每一個人都知道Donkey Kong呢個遊戲，但係佢哋亦仲係唔知道究竟任天堂係何方神聖。所以喺接住落嚟嘅幾年入面，任天堂美國分部嘅員工係同客戶介紹自己嗰陣，都係會用「我係嚟自創造出Donkey Kong嗰一間公司嘅員工」嚟自稱。

嚟到呢度，本來係由美國主導嘅電玩市場已經變成咗由日本主導，當時嘅三大街機遊戲都係來自日本。太東嘅《太空侵略者》、南夢宮嘅《食鬼》、同埋任天堂嘅《Donkey Kong》，就好似一班由各方人馬組成嘅日本創作者帶着佢哋嘅創意所匯聚而成嘅作品，直攻美國遊戲產業嘅心臟地帶。本來作為東道主嘅美國，理應同樣用佢哋嘅創意作出最有力嘅還擊，但接住落嚟發生嘅事，我諗當時冇人會預料到。就係美國遊戲廠商俾人打到一仆一碌，兵敗如山倒。

幾年之前，美國嘅遊戲製造商幾乎掌控晒全球嘅大型電玩市場。但去到1983年嗰陣，美國嘅遊戲產業原地自爆，由一個產值數十億美金嘅市場，喺短短幾個月之間，崩跌到只剩返1億美金嘅資產，呢場美國遊戲產業嘅大屠殺源自於曾經所向無敵嘅Atari。

Atari喺1982年投資咗一隻遊戲，一隻電影改編遊戲。呢套電影曾經被稱之為有史以來最偉大嘅科幻片，當年奧斯卡九項提名攞咗四個，可以話唔開名都會知道呢套作品係一套傳世之作。Atari就住呢套電影改編嘅遊戲亦都成為左傳世之作。不過係以爛game嚟講嘅傳世之作，而呢隻game就係比唔少人以為係有史以來最爛嘅遊戲 - 《E.T.》。

Atari係呢次炒粉之後從此就一蹶不振。財務狀況就好似跳水自由落體咁，直插池底仲要冇水花！由於今次炒粉炒成咁係一件好突然嘅事，令到佢嘅競爭對手都深感恐慌，一個接一個都退出咗呢個遊戲產業。最後呢一個原地自爆所帶嚟嘅後果就係，喺當時可預見嘅將來入面，冇任何一間美國公司咁生產家用遊戲機。Player One就已經收咗山啦，咁就到Player two發威嘅時間喇！而呢個Player two就係任天堂！

等我問大家一個問題先，仲記唔記得頭先我講過，山內溥一開始踏足家用機產業嗰陣，喺sharp嗰邊叫咗幾個工程師過嚟幫手開發家用機呢？冇錯！就係幫手開發Colour TV-game系列，來自任天堂開發第二部嘅嗰一班工程師。其中一位工程師後來亦都成為左任天堂開發第二部嘅部長添！開發第二部亦都喺佢嘅領導之下參與咗前面嘅Radar Scope嘅開發。而宮本茂亦都係開發第二部浸淫左幾年，而呢個部長亦都係改變任天堂命運嘅一員。但同橫山或者係宮本茂唔同嘅係，佢專注嘅係喺硬件設計嘅家用機上面，而佢亦都面對過唔少嘅失敗。但到最後佢依然都可以喺人手不足嘅情況之下，按照住山內溥嘅要求創造出一部毁天滅地兼創世，拯救當時因為Atari原地爆炸而委靡嘅家用主機市場，可以話係改變左人類命運嘅家用主機。而呢個人就係時任天堂開發第二部嘅部長 - 上川雅之。而呢一個家用主機就係堪稱遊戲史上最偉大嘅家用主機 - Famicom（紅白機）。

咁究竟上川雅之嘅故事又係點嘅呢？紅白機又係點樣被創造出來嘅呢？係創造出嚟之後，紅白機甚至係任天堂嘅發展又係唔係就此就一帆風順呢？我係米迦，我哋下一次返嚟再同大家講多兩句啦！