奪命巨鑽消失神秘人現身升降機如何逃出生天？| 奇案調查 | 原子檔案 Mr. Atom

Mr. Atom 原子檔案 | 懸疑類 | Apr 18, 2022

此影片謄本由勤工獎得主＆Sa製作

★非作商業用途，本檔案版權歸版權持有人獨有★

我們幾乎每日都會使用到升降機，但係如果升降機門緊閉嘅一刻，你先發現危險正係身後面潛伏，你又點樣係呢個又密閉而且細小嘅空間逃出生天呢？大家好，我係原子。今日為大家帶嚟嘅係一宗發生係升降機嘅鑽石奇案，但係呢件案件直到2022年嘅今日（影片上載日期為15/4/2022）仍然有未破解嘅謎團。究竟呢件事嘅來龍去脈係點嘅呢？

下載檔案

所有資料非作商業用途，若有內容侵權，請即通知我們移除。

《手上的鑽戒》
本案兩個女主角係一對姊妹，分別係46歲嘅姐姐周台娟同埋妹妹周台婷，佢哋都係臺灣籍，係香港居住同埋從事中港貿易生意。姐姐周台娟嘅丈夫亦係一名商人，擁有多個豪宅單位，同兩姊妹一齊住係淺水灣。而兩姊妹為咗方便母親係市區出入，佢哋就俾母親入住咗銅鑼灣百德新街海濱大廈3樓嘅一個單位。兩姊妹不時到銅鑼灣探望母親，母女就算分開住，感情仍然深厚。

另外，兩姊妹都鍾意珠寶，經常高調咁帶住各款名貴鑽飾出街。而係1998年3月20日嘅下午，佢哋就分別戴著約值50萬元，10卡同埋8卡嘅鑽戒，一齊到銅鑼灣時代廣場賺物。但就係當日，佢哋係一間電器舖選購洗衣機嘅時候，有兩個神祕人注意到兩個人手上面嘅鑽戒價值不菲，所以就暗中監視佢哋。當兩姊妹購物完之後，就離開咗時代廣場，打算前往母親嘅住所，但係佢哋唔知道神秘人啱啱一直暗中跟住佢哋。係兩姊妹毫無戒心之下，危險逐漸逼近。

《死亡升解機》
時間到咗下午四點鐘，兩姊妹步行至海濱大廈，當年呢棟大廈嘅用戶仍然係用舊式升降機上落，需要人手開門。兩姊妹如常咁係地下大堂等待升降機，當升降機到達之後，佢哋就拉開門入去，同時一名前往六樓、姓黃嘅男人亦一齊入咗去。正當姐姐周台娟打算閂門之際，再有兩個男人急步咁跑入升降機，然後姐姐就閂門，升降機開始上升。就係升降機起動冇幾耐，兩個啱啱入𨋢嘅男人突然發難，佢哋分別攞出長30厘米嘅長刀，仲指向兩姊妹，大叫「打劫！」佢哋不斷以兇狠嘅語氣要求兩姊妹將手上面嘅鑽戒取落嚟。

面對悍匪，兩姊妹竟然唔驚，佢哋不但之冇聽從悍匪嘅命令，更加試圖一齊反抗。兩姊妹同兩個匪徒糾纏，期間同場係升降機入面姓黃嘅男人一直縮係一角、神色緊張。當升降機抵達三樓嘅時候，嗰個男人為咗逃命，率先跑出升降機，仲大聲呼叫。其中一名匪徒企圖嘗試阻止佢逃走，雖然個男人最終成功擺脫匪徒，但係係過程入面仍然被刺傷小腹。

係呢個時候，兩姊妹同匪徒糾纏嘅聲音驚動咗住係三樓嘅母親，母親認出兩個女嘅聲音，非常擔心，即刻走到走廊睇下發生咩事。母親冇諗到自己關心女嘅舉動，竟然會反過嚟被匪徒利用。母親沿著兩姊妹嘅聲音走近升降機。一名匪徒見到母親，可能當時意識到佢同兩姊妹嘅關係，所以就即刻轉移攻擊目標。佢嘗試攻擊母親，威脅兩姊妹就範。姊姊周台娟唔願意母親受到傷害，就即刻撲上前阻止匪徒接近母親。眼見兩姊妹頑強抵抗，唔願意放棄手上面嘅財物，匪徒惱羞成怒向姊姊連刺多刀。姊姊嘅胸、背、腹部等位置慘被匪徒刺中九刀，其中一刀更加插中心臟要害。瞬間，姊姊成身都係血，倒地不起。

《逃之夭夭》
眼見對方重傷倒地，兩名匪徒冇因為咁樣而停手。佢哋將姐姐拖出電梯，而目睹呢個可怕一幕嘅妹妹同埋母親就驚到縮埋一邊躲避。由於姊姊已經失去反抗能力，兩個匪徒就嘗試除咗佢手上面嘅戒指。佢哋估唔到戒指緊緊咁箍住姐姐嘅手指，好難取落嚟，最終佢哋竟然用刀將戒指撬出，兩名匪徒最終搶到姊姊10卡嘅鑽石戒指。

但係由於可能佢哋怕再糾纏落去會驚動鄰居，所以佢哋冇繼續向妹妹同埋母親落手，沿著樓梯拔足狂奔。就係兩名匪徒由三樓跑落地下嘅期間，佢哋就遇上一個畫室職員、一個百貨公司職員同埋一個保安，同時有鄰居因為啱啱打鬥聲而報警求助。但係當警察趕到現場之後，兩名匪徒已經逃之夭夭，現場留低咗受咗傷嘅姐姐、受驚嘅妹妹同埋媽媽，同埋一副眼鏡同埋一包紙巾。

警察見到呢個情況，就即刻召嚟救護車將姐姐送院，但係由於佢嘅心臟被插中，送院之後證實不治。雖然妹妹最終保住手中嘅8卡鑽戒，但係佢永遠失去姊姊寶貴嘅性命。妹妹好傷心，決意要協助警方將殺死姐姐嘅兇徒捉拿歸案。
可疑人物

係案發之後，妹妹忍住心入面嘅難過，到警署落口供交代事件發生嘅經過。之後，警察先從有犯案前科嘅人入手，佢哋攞出過千張有案底嘅犯人照片俾妹妹認人。妹妹仔細逐一咁睇相，直指一名29歲嘅男子余偉發係其中一名兇徒。
余偉發係一名鋁窗安裝臨時工，曾經因為偷竊而留有案底。佢係家中嘅獨生子，從小就係一個收入唔多嘅家庭長大。佢嘅母親靠剪線頭維生，兩母子感情好好。余偉發嘅學歷唔高，只有中一嘅學歷，輟學之後就開始鋁窗安裝嘅工作，每個月都會俾3,000蚊家用。雖然佢讀書唔成，亦曾經行差踏錯，但係喺母親嘅眼中，佢好孝順，而且絕對唔會傷害人。

時間到咗1998年3月22日凌晨，警察嚟咗大角咀，係余偉發嘅住所將佢拘捕。係審訊初時，余偉發堅決否認自己行劫同埋殺人，但係警察安排咗死者嘅母親認人，母親當面指出佢就係其中一名犯人。由於案發嘅時候，母親有近距離而且有長時間見到兇徒嘅樣，所以警察認為呢個證人非常可信。

點知，余偉發由一開始堅決否認，冇幾耐就變成主動認罪。係錄影犯人口供嘅過程入面，警察讀出余偉發嘅犯案經過，佢全部都承認。兇手認罪，人證亦有，警察只係爭在物證。而警察根據余偉發嘅口供，去咗佢大角咀嘅居所同埋附近搜索佢搶咗去嘅鑽石戒指，又派出咗俗稱「水鬼」嘅潛水人員到附近嘅碼頭尋找兇刀，但係警察搵咗好耐都係冇任何發現。

《告一段落？》
由於當時係案發嘅時候，總共有兩個人行兇，所以警察亦要求余偉發供出另一名匪徒嘅身份。余偉發供出一名姓譚嘅男子，但係警方就發現呢個男子係案發嘅時候根本唔係香港。雖然警方對另一名匪徒嘅身份毫無頭緒，而且搵唔到證物，但係警察認為根據死者嘅母親同埋妹妹嘅指證仍然足夠令余偉發入罪。

係1995年5月14日，案發一年之後，案件係高等法院審判，但係余偉發係庭上面突然改口，佢堅稱自己當時冇搶劫同埋殺人。

佢聲稱自己被捕之後俾警方毒打逼供先會認罪。但係法官同陪審團唔止唔相信佢嘅說話，更反被法官斥責佢殘忍冷血，作供時嘅態度毫無悔意。最終被裁定謀殺、搶劫、有意圖傷人等罪名成立，判處終身監禁，喺石壁監獄服刑。

余偉發被捕入獄之後，警方同埋死者嘅妹妹都認為呢件事已經告一段落，妹妹更加撰寫咗一封信公開讚揚港島重案組行動迅速，案發後冇幾耐就成功逮捕兇徒，而呢封信至今仍然可以喺警方嘅網站睇到。

但係事實上呢件案件仍然有好多未解的謎團，究竟另一名匪徒係邊個呢？案中嘅兇刀、血衣同埋被劫走嘅鑽石戒指又係邊度呢？仲有究竟多次聲稱自己係冤枉嘅余偉發係咪又係真正嘅兇手呢？

雖然喺外界睇呢一切已經塵埃落定，但係喺獄中嘅余偉發多年來不斷要求上訴，佢提出一個又一個嘅疑點請求法庭重審案件。雖然上訴庭不斷咁拒絕佢嘅申請，但係佢始終否認自己犯案。最終佢喺2004年迎嚟一次轉機。

《五頁的書信》
喺案發6年之後，即係2004年6月，35歲嘅余偉發再次去信上訴庭申請重審。今次佢喺長達5頁嘅信入面提出四大疑點︰
第一，案發嘅時候佢唔喺現場，余偉發堅稱自己當時正喺大角咀嘅屋企瞓覺，其間亦曾經用屋企電話打畀朋友。而案發嘅地點喺銅鑼灣，佢冇可能喺短時間由銅鑼灣返去大角咀打電話。所以佢認為呢件事可以證明佢有不在場證據。但係佢認為當年為佢辯護嘅法援律師冇盡力了解案情，所以冇將呢個咁重要嘅證據呈堂。如今佢重提呢個疑點，希望能夠證明自己清白。另外，案發現場搵到嘅一副眼鏡同埋一包紙巾上面都搵唔到余偉發嘅指模同埋dna，但係就有另一個人嘅dna，呢啲證據都顯示佢當時不在場。

第二，證人對兇徒外貌嘅特徵描述並唔能夠準確咁反映余偉發嘅真實外貌。余偉發前額頭髮稀疏呈M字額，門牙之間有道大縫隙，兩點都證明佢嘅相貌有明顯嘅特徵。但係現場幾名證人都冇喺口供入面提及呢啲重要嘅特徵。而且妹妹喺口供入面提及佢反抗嘅時候曾經咬傷匪徒嘅手臂，但係警方喺余偉發隻手臂冇發現有咬痕。余偉發喺案發後兩日被捕，被咬傷嘅話應該唔會咁快復原。

第三，案發當日兩名匪徒逃跑嘅時候曾經遇到畫室職員、百貨公司嘅職員同埋保安等人，但係佢哋喺單面反光鏡認人嘅手續過程入面，都認唔出余偉發係兇手。甚至有證人堅稱犯人根本唔係認人行列入面。而唯一喺過程入面認出余偉發嘅就只有死者嘅年老母親。不過根據判決書上面嘅資料顯示，母親係認人期間有人曾經同佢對話，所以佢可能受到外界的影響先至會指證余偉發。

第四，余偉發揭露自己被捕之後慘遭警方拳打腳踢。初時佢堅決否認自己係兇手，冇諗到警方竟然鎖住佢手腳然後以更殘忍嘅方式打佢。然後警方話佢知，死者嘅妹妹同埋母親已經指證佢係兇手。余偉發已經被警方折磨到身心疲累，為免自己再遭毆打佢只好認罪。但係余偉發欠缺法律知識，佢一心以為喺警方面承認罪行，等到上庭之後再否認就可以脫罪。點知道佢呢個舉動導致佢嘅餘生都要喺監獄渡過。

希望帶來的失望

余偉發喺信件入面詳細咁交代案件嘅細節同埋疑點，最後亦表示自己喺獄中過得非常難受，「
冇一日可以一覺瞓到天光」「唔想含冤而終」。如佢所願，封信終於得到咗外界嘅關注，當時立法會議員梁耀忠積極為佢搜查新證據，好多社會人士例如喺各大電台擔任靈異節目嘉賓同主持嘅陳雲海，甚至同死者有親戚關係、《危險人物》作者，律師翁靜晶亦對呢件事非常關心。

佢地向警方攞返案中部份口供同埋認人紀錄，亦申請取回所有呈堂紀錄同埋未呈堂嘅案件資料，打算將資料整合再提交至特區政府，希望時任行政長官董建華運用特權將案件發還重審。但係佢哋喺搜集證據嘅時候遇上唔少阻滯，聽講陳雲海喺調查嘅時候曾經被警方請到警署「問話」，警方不斷詢問佢關心呢件案件嘅目的，所以有人認為警方故意阻撓眾人調查案件，有所隱瞞。

最終余偉發嘅上訴雖然提出多個合理疑點，但係仍然被法庭駁回。上訴庭認為警方落口供的方式並無不妥，而且原審法官喺處理案件時候亦無爭議。對於認人嘅疑點，上訴庭法官認為死者嘅妹妹喺事發之後幾個鐘內，睇過千張相入面認出余偉發，而且佢同兇徒糾纏期間近距離目睹匪徒嘅樣。加上現場光線充足，足夠認清對方個樣，可信性高。其後上訴庭法官更加斥責上訴律師應該提出合理嘅論點，唔應該只係提出被告自己所希望講嘅說話。

「我個仔冇殺過人」

上訴再次被駁回，余偉發難掩失望嘅心情，只好無奈咁繼續喺獄中渡日如年。佢萬萬都估唔到當日屈打成招會令自己恨錯難返。

事實上，案件發生之後四年，余偉發父親去世，淨返年老嘅母親。當時上訴被駁回之後，有傳媒訪問咗當年76歲嘅余偉發母親。佢一直堅信自己個仔係含冤入獄，佢憶述個仔被捕當時警察衝入去佢地屋企，殘暴咁毆打個仔，嚇到佢膽戰心驚。佢記起當時喊住咁問個仔有冇殺人，個仔就回答「媽媽，我冇！」。

年老嘅佢而家已經滿頭白髮，雙腳風濕加上靜脈曲張，就連平日行樓梯返屋企都令佢難忍痛楚。但佢就忍受住呢一切，多年嚟不斷為個仔申冤。到監獄探望個仔嘅時候，佢每次都強忍著淚水，唔想個仔喺獄中擔心佢。佢喺傳媒面前哭訴「我個仔冇殺過人」「我會一直等」「希望董特首好心」「幫佢平反冤獄」。

個仔入獄之後佢每次食飯嘅時候，餐枱上面都會擺放著刻有個仔個名嘅筷子作伴，同時佢一直都冇用郁個仔任何物件，深信佢總有一日會返返屋企。有時佢亦會喺夜晚瞓喺個仔嘅床上面，但係總係難以入睡。佢自己經常發夢見到個仔返屋企，佢摸住佢問「你仲唔返工？」然後就會醒，但就失落咁發現原來只係一場夢。

往後嘅日子佢身體越嚟越差，好難再到監獄探望個仔。後來佢只能夠透過義工協助，到旺角政府合署視像探監。佢表示佢會好好咁生活落去，亦會好好咁照顧個仔以前飼養嘅龜，直到佢返屋企。

雖然余偉發嘅上訴不斷被駁回，案件睇落去都好難再重審，不過外界仍然有唔少人嘗試為佢翻案。而律師翁靜晶曾經係一個飯局上面請求梁振英聯絡時任特首董建華幫忙，但係冇幾耐特首之位變遷。直到2012年梁振英擔任特首之後，表示此案件必須由相關部門處理，而且程序複雜。最終直到特首之位又再變更，案件都仍未獲重審。

你認為余偉發係咪兇手呢？咁案件中另一名匪徒同埋價值不菲嘅鑽石，如今又身處何方呢？但如果真係好似余偉發所講咁，自己當年被嚴刑逼供而含冤入獄，究竟今日仲有邊個可以幫到佢呢？咁而家已經94歲嘅余母，又能唔能夠有生之年一償心願同個仔一家團聚呢？