【#香港之最】香港最古老嘅水塘係邊個呢？香港嘅食水又係幾時開始由政府供應嘅呢？— Google Map 不會告訴你的事 EPISODE NO.3

小雲：大家好，我係小雲。歡迎大家黎到Google Map不會告訴你的事。講起香港嘅食水，除咗東江水之外，香港人嘅食水依靠就係黎自水塘喇。而近年多咗人鐘意行山，所以水塘都成為咗郊遊嘅熱門景點。唔知大家對水塘有幾多認識呢？全香港最歷史悠久嘅水塘又喺邊呢？我而家即刻帶大家去全香港最古老嘅水塘。

而家喺我身後就係全香港最古老嘅水塘——薄扶林水塘喇。等我講吓薄扶林水塘嘅地理位置先。薄扶林水塘就係位於薄扶林郊野公園入面，係喺港島西邊薄扶林鋼線灣對上，正正就係喺西高山同奇力山之間嘅薄扶林谷嗰度。可能行開山嘅「貧友」都應該會聽過西高山同奇力山，不過鋼線灣就應該少啲人識喇。其實鋼線灣而家已經唔係灣黎㗎喇，因為填海嘅關係，已經發展成為而家嘅數碼港。相傳香港嘅市花洋紫荊，就係喺鋼線灣畀一位神父發現嘅。不過有關洋紫荊嘅故事，我哋留返遲啲睇吓有無機會再講喇。我哋講返薄扶林水塘先。薄扶林水塘喺1863年落成，及後因為擴建工程，去到1871年完成之後，薄扶林水塘就變成咗上下兩塘喇。

講完水塘的背景，不如睇吓佢附近有咩睇啦。第一個爲大家介紹嘅景點呢，就係薄扶林郊野公園入口附近嘅伯大尼修院喇。呢個修院相傳就喺1873年至1875年間由巴黎外方傳教會建成，係傳教士休養嘅地方黎嘅，數返轉頭都至少已經有成147年歷史喇。修院設計佈局對稱，四面都有外廊，而修院裏面個小教堂嘅拱形圓頂，有細長哥德式支柱支撐住，係香港唯一一個新哥德式風格嘅教堂黎添㗎。大家黎薄扶林水塘之前都可以去伯大尼修院到參觀吓㗎。咁睇完個修院呢，我哋正式向水塘出發喇。

一黎到薄扶林水塘就已經見到個法定古蹟，呢個就係管理員嘅看守站喇，中式瓦頂配三角屋頂嘅設計，配合埋白色外牆，係一個典型嘅新古典建築風格。而喺看守站隔離，我哋會見到一個二級歷史建築，就係土堤喇。佢係防水建築物黎嘅，都有過百年歷史㗎。咁經過呢個看守站之後，我哋就進入薄扶林家樂徑。薄扶林水塘自1970年起一直都有做植林工作，而家已經成為香港林木覆蓋狀況最好嘅地區之一。另外薄扶林水塘亦都有好多兩棲動物喺度棲息，有記錄嘅兩棲動物就已經有七種。短腳角蟾t同香港瀑蛙仲係瀕危物種黎添，所以薄扶林水塘入面係有好多本地嘅野生動物㗎，大家下次黎到記得留意吓喇！

黎到薄扶林水塘，除咗睇佢嘅野外生態之外，呢到仲有好多充滿住人文價值嘅水務建築，呢個就係佢嘅古蹟之一——「石橋」喇。石橋位於薄扶林水塘東端，喺薄扶林水塘上面，石橋橫跨近山坡嘅其中一條支流嘅入口，由花崗石築砌而成。橋嘅材質、形狀同埋整體嘅佈局可以反映出一種意大利文藝復興風格嘅強烈渲染。例如橋恐都會有半圓拱或者係平圓拱去修建。成個薄扶林水塘總共有五座石橋，其中四座早喺2009年嗰陣就已經是法定古蹟，最後一座都喺2020年年中獲批成為法定古蹟。

沿著個水塘行，我哋都會見到好多水務設施，但明明香港四面環水，點解仲需要起個水塘出黎儲住啲雨水呢？因為我們欠缺嘅唔係鹹水，而係淡水。香港其實無乜淡水水源，啫係湖泊之類嘅大型淡水地貌，所以當年香港人嘅飲用食水主要係黎自山澗溪流，又或者係市民開鑿地下水井。頭先都有提過，隨著城市發展所帶黎嘅人口膨脹，本來呢啲簡單嘅食水來源都唔足以應付日常嘅食水供應，而地下水井同埋山澗溪流又容易受到污染，引致痢疾，所以食水問題就成為咗早期港英政府急切需要解決嘅嘢喇。

時間去到1860年2月29日，有一位英國皇家工程部嘅文員——羅寧就建利用薄扶林地谷嘅地勢起一個水壩去攔截薄扶林地谷嘅雨水，儲起黎俾市民飲用。最初嘅建議係起一個可以容納3000萬加侖淡水嘅儲水庫，港英政府本來係初步接納呢個建議，而亦都喺1860年7月10日正式通過法例，規定政府係要負責向市民提供食水，不過可惜嘅係港英政府爲咗節省開支，不斷削減建造費用，最後令水塘嘅容量由原本建議嘅3000萬加侖大幅減至200萬加侖。200萬加侖聽落好似好多，但係事實上如果以一個標準游泳池黎計，一個游泳池裝到嘅水就已經大約係50萬加侖，咁姐係話當時嘅薄扶林水塘可以容納到嘅淡水就係得四哥標準游泳池咁多。咁少又點可能夠用呢？所以喺後來有位個名叫做威爾遜嘅工程師就提出，政府可以喺原址上游嘅地方興建第二個水塘，提升儲水量。政府採納咗呢個建議，擴建薄扶林水塘。最終喺1877年，擴建薄扶林水塘嘅工程正式完成，水塘嘅儲水量亦都由本來嘅200萬加侖增加到6800萬加侖，大幅增加三十四倍。但就算係咁，都仍然滿足唔到香港市民對食水嘅需求。

起好咗薄扶林水塘之後，但係啲水都唔夠市民用，咁可以點樣解決呢個問題呢？於是乎當時嘅港英政府就決定興建多個水塘喇。而呢個水塘就係大潭水塘。港英政府就喺幾年之後嘅1873年計劃喺大潭谷興建第二個水塘，去到1888年就起好咗大潭水塘嘅第一部分，大潭上水塘作為香港第二個起嘅水塘。大潭水塘由四個水塘組成，其中有大潭上水塘、大潭副水塘、大潭中水塘，同埋大潭篤水塘，喺1888年至1917年間相繼落成。不過同薄扶林水塘相比，大潭水塘嘅儲水量究竟多薄扶林水塘幾多呢？嗱！我之前提過，薄扶林水塘嘅儲水量就係6800萬加侖，但係單單喺大潭篤水塘嘅儲水量就已經係14億2000萬加侖，成個大潭水塘嘅儲水量就將近有20億加侖，多過薄扶林水塘足足三十倍有多。

喺行勻成個薄扶林水塘之後，我哋都會見到佢無論係地理上黎講定係儲水量黎講，佢都係唔算好大嘅啫，但係佢就見證住香港開埠早期嘅發展史，爲唔少香港嘅市民提供乾淨嘅食水。俗語都有話喇：「飲水思源」啊嘛，希望大家睇完呢條片之後都會對我哋呢個城市嘅食水資源有多少少認識喇。

今集Google Map不會告訴你的事之香港之最就講到呢度先。我係小雲，我哋下集再見，拜拜！