【#點解問點解】點解新蒲崗啲街名咁得意？點解新蒲崗叫做「新」蒲崗？唔通有「舊」蒲崗？— Google Map 不會告訴你的事 EPISODE NO.2

小雲: 位於黃大仙、樂富、鑽石山之間嘅新蒲崗可以話係近期香港一個炙手可熱嘅地區。除咗係鄰近啟德新發展區之外，亦都因為鄰近鑽石山而成為咗坐屯馬線就會好容易到達嘅地方。好多人都成日話新蒲崗有隱世美食，隱世玩樂好去處，到底新蒲崗除咗呢啲隱世乜乜乜之外重有啲咩?究竟新蒲崗嘅前世今生又係點?「新蒲崗八街」嘅箇中典故又係點嚟嘅呢? 今日就帶大家嚟到新蒲崗，講吓新蒲崗有啲咩得意嘢啦。

旁白(小雲): 大家好，我係小雲，歡迎大家嚟到Google Map不會告訴你的事之 -點解問點解。上一集，阿肥就帶大家去到彩虹道街市嗰邊，為大家介紹咗一間提供平價午市放題好多年，屹立咗喺新蒲崗區已經廿七年嘅小店「順豐良心飯店」。除咗帶出新蒲崗獨有嘅人情味之外，亦都顯示出新蒲崗已經唔算「新」㗎喇，充滿好多唔同嘅歷史痕跡。所以我諗大家對新蒲崗都有唔同嘅印象，無論以前嘅徙置區、工業區，定係今時今日嘅住宅區、新興文化區都好，喺每一個嘅時代，都有一個「新」嘅蒲崗。

小雲: 唔知大家又知唔知點解新蒲崗叫做新蒲崗呢? 點解新蒲崗工廠區嗰邊嘅街名又咁得意? 等我問吓周圍嘅街坊睇吓佢哋知唔知先。

(街頭訪問)

小雲: 你知唔知點解新蒲崗叫做新蒲崗?
高大風褸男: 唔知道
伯伯: 新蒲崗? 呢個我都唔知喎…… 幾廿歲人我都唔知
眼鏡女性: 唔知
其餘路人*4: 唔知

小雲:咁你知唔知點解新蒲崗有八條數字街㗎?
年輕眼鏡男: 識三祝街、八達街、五芳街，跟住其他唔識啦
中年眼鏡男: 四美街
小雲: 如果第一條開始數起呢?
中年眼鏡男: 唔識。
小肥眼鏡男: 大有街、雙喜街、三祝街、四美街、之後…Er…五唔知乜嘢，之後六合街，之後唔記得咗啦
小雲: 你都識好多喎其實
小肥眼鏡男: Er聽過下啫

小雲: 新蒲崗呢，未有條街叫爵祿街嘅?
高大風褸男: 係
小雲: 咁你知唔知爵祿街係點嚟㗎?
風褸成年男: 唔知喎，係咪嗰啲… 以前英國嗰啲……Duke(伯爵)啊?
中年眼鏡男: 應該有隻雀係綠色啩?

小雲: 你試下好快咁讀「爵祿爵祿爵祿爵祿爵祿爵祿爵祿爵祿爵祿爵祿」，你會諗到一個詞語。你試下讀出嚟先啦
年輕女性: 你讀畀我聽啊不如
小雲: 爵祿
年輕眼鏡男: 爵祿
小雲: 爵祿
年輕眼鏡男: 爵祿 爵祿
小雲: 成個Keroro咁
年輕眼鏡男: 咁咪正囉
爵祿爵祿爵祿爵祿爵祿爵祿爵祿爵祿爵祿爵祿爵祿爵祿爵祿爵祿爵祿

小雲: 問咗咁多唔同嘅街坊，大家都有唔同嘅講法，不如就襯呢個機會等我帶大家行吓新蒲崗呢一區，講吓新蒲崗嘅嘢，同埋講吓「新蒲崗八街」嘅歷史由來啦。

旁白(小雲): 好多人聽過新蒲崗呢個名，但係唔知大家又有冇諗過既然有新蒲崗，又會唔會姐係代表以前有「舊」嘅蒲崗嘅呢? 如果你有咁樣諗過嘅話，咁就恭喜你喇，因為喺新蒲崗出現之前，係真係有「舊」蒲崗㗎，不過佢就當然唔係叫「舊」蒲崗啦，而係就咁「蒲崗」兩個字嘅姐。咁所以喺講新蒲崗之前，我哋就要從新蒲崗嘅前身 - 「蒲崗」開始講起喇。

其實蒲崗本身係一個位於九龍北部嘅一條原居民村落嚟嘅，有傳係喺而家彩虹道遊樂場、鑽石山荷里活廣場或者係鳳德邨一帶，所以喺嗰邊其實就有好多以「蒲」字為開頭嘅街，例如最大條嘅「蒲崗村道」，又或者係「蒲崗里」、「蒲景里」、「蒲芳里」等等。而相傳呢條蒲崗村喺宋朝嗰陣就已經有㗎喇，當時有一個福建莆田人叫做林昌宗，佢就舉家嚟而家大磡村區域附近。因為佢哋係嚟自福建莆田，而莆田嘅「莆」字同蒲崗嘅「蒲」字喺古漢語嗰陣係相通嘅，所有林氏就將佢哋呢條村命名為「蒲崗村」。就係咁，「蒲崗」呢個名就係咁誕生喺地球上面㗎喇。蒲崗村嘅林氏其實都對香港有另一個好重大嘅影響，就係佢哋帶嚟咗一個神明，不過呢個就留返遲啲再講啦。

去到二戰時期，香港淪陷，喺三年零八個月入面，日軍為咗加長啟德機場嘅跑道而將蒲崗村附近嘅廿幾條鄉村拆毀，村民散居喺唔同嘅地方，令到香港重光之後，本來嘅蒲崗村就已經變成咗啟德機場跑道，但由於喺一九五八年嗰陣，九龍灣嗰邊有新填海畀機場嘅地，令到當時位於蒲崗嘅機場跑道被廢棄，之後就開始有商人睇準香港工業發展嘅情況，想喺舊機場跑道原址同埋附近開設工廠，所以當年港英政府決定撥歸啟德機場嘅範圍，即係而家太子道東同埋彩虹道之間嘅地段作為工業用途。規劃新區需要改名，而因為工業區位於原蒲崗村一帶，但又已經唔再係原來嘅蒲崗村，港英政府喺1959年就沿用「蒲崗」呢個名，不過再加一個「新」字，將「蒲崗」重新命名為「新蒲崗」，所以呢個新發展區就被命名為「新蒲崗」，而新蒲崗呢個名就係咁嚟㗎喇。

而當時舊機場跑道就係延伸到而家嘅爵祿街，而爵祿街嘅名亦都同機場跑道有關㗎喎，唔信你試吓不停咁讀爵祿街嘅「爵祿」，爵祿爵祿爵祿，你就會發現，佢好似飛機著陸嘅「著陸」兩個字咁。無錯喇，爵祿街本來係叫做「著陸街」，就有飛機降落嘅意思，但係當時大家都想佢好聽啲，所以就以近音字「爵祿」取代喇。

小雲: 新蒲崗喺五十年代尾開始發展，交通比起而家更加唔方便，亦都因為係新區，所以都稱唔上係受歡迎嘅地方，於是乎港英政府就打算由命名街道著手，希望吸引發展商嚟投資。

旁白(小雲): 於是乎，政府就將工業區入面嘅八條街以中國數字一至八為首命名。順次序就係: 大有、雙喜、三祝、四美、五芳、六合、七寶、八達，人稱「新蒲崗八街」。相傳新蒲崗八街嘅命名亦都係香港史上首次有系統性命名街道嘅例子，不過喺西環一帶之前已經有第一街、第二街、第三街，同埋本來應該叫做第四街但因為唔好意頭而改名嘅高街，所以為免混淆同埋好意頭啲，就將「一」改做「大」、「二」改做「雙」，同時喺數字後面加上「喜」、「祝」、「美」、「芳」、「合」、「寶」、「達」，呢啲喜慶吉祥字眼。去到六十年代 香港工業急速發展，唔少嘅廠家都去到新蒲崗開設工廠，無論係製衣、鐘錶、紗廠、塑膠，呢啲本土輕工業都喺新蒲崗蓮勃咁發展，見證住「香港製造」嘅誕生。

大有街係第一條街，喻意住工廠區入面乜嘢都有，包羅萬有，亦都八條街入面最長嘅一條街。就例如米迦之前有提及過，以紅膠筒、膠杯、膠凳而聞嘅「紅A」都係喺大有街設廠。而除咗「紅A」之外，當年最興旺嘅行業就一定有「穿膠花」份喇。六七十年代港產塑膠花盛行，高峰期曾經佔世界塑膠花貿易額80%，而喺「紅A」大有街嘅廠房轉角就係以前嘅「香港人造花廠」。呢間人造花廠就威水啦，因為佢就係當年六七暴動嘅導火線。一九六七年四月，香港人造花廠廠方宣布削減薪酬福利，同員工發生勞資糾紛，先後有多名工人被無理解僱，引起工人嘅不滿，於是乎工人就發起工潮。當時工人有喺大有街近三祝街交界嘅廠廈外牆張貼大字報，號召罷工，亦都有上街示威。後來左派工會介入，勞資糾紛越嚟越激烈，去到五月嗰陣，警察派出防暴隊以木製子彈開槍鎮壓工潮，而工人亦都以石頭、玻璃樽、甚至土製炸陣還擊。呢個就係六七暴動嘅第一槍，而呢第一槍就係喺大有街到響起喇。

去到七、八十年代，因為工業飛速發展，為香港帶嚟經濟起飛，輕工業發展已經達到一定水平，而玩具、電子、鐘錶業亦都突飛猛進。當時香港各行各業嘅工廠大約有16500間，所以當時嘅人都話新蒲崗工廠周圍都係機會，師傅級嘅工人月入可以過萬蚊，以嗰陣嘅生活水平嚟講已經係好好。除此之外，為咗滿足呢班當時算我上係消費力比較強嘅工人，喺新蒲崗亦都有唔同嘅特色設施應運而生，例如喺而家彩虹道遊樂場嗰個位，就有住上集阿肥都有提過吓嘅「啟德遊樂場」喇。啟德遊樂場係一個主題公園嚟嘅，佢喺一九六五年一月三十一日開幕，當時有住好多唔同嘅機動遊戲喺入面，相傳佢哋重係有住全香港第一座過山車嘅主題公園。

除此之外，喺啟德遊樂場入面仲有珍寶戲院添。講起戲院呢，嗰陣時嘅新蒲崗就真係恐怖喇，因為當時嘅新蒲崗係有住五間戲院，分別有喺而家越秀廣場嗰個位，堪稱全香港有史以嚟最大嘅戲院—麗宮戲院。麗宮戲院喺一九六六年八月二十五日開幕，全場總共有三千個位，分為前、中、後座、超等、特等之類嘅座位，而再落亦都有而家護老院前身嘅麗斯戲院嘅再前身—英華戲院。再加上喺附近邵氏嘅亞洲戲院，嘉禾嘅國寶戲院同埋頭先講嘅珍寶戲院。五間戲院就將新蒲崗變成一個電影放映集中地，所以其實早喺六、七十年代，新蒲崗就已經係文化集中地嚟㗎喇。

不過隨住香港社會嘅經濟轉型，去到九、九十年代，香港嘅工業開始北移，再加上機壬由啟德搬咗去赤鱲角，新蒲崗區內嘅工廠同空運貨倉銳減，而新蒲崗本身亦都唔算得上係交通方便，所以新蒲崗呢個傳統工廠區就慢慢咁變得越嚟越少人喇。

雖然傳統工業喺香港慢慢咁消失，令到好多廠房都丟空咗，但呢啲丟空咗嘅廠房就成為咗新一代嘅藝文發展空間。有好多從事文化產業嘅年輕人就係睇中咗舊工廈平租又高樓底，所以佢哋亦都嚟到新蒲崗建立佢哋嘅Studio或者工作室，例如唔同嘅雜誌辦公室、劇團、書店同埋Production House等等。除此之外，亦都有唔少朋友睇中咗呢個區域日漸年輕化嘅情況，佢咊亦都嚟咗新蒲崗搞唔同嘅娛樂休閒業務，例如有烘焙工作室、皮革工作坊，甚至有釣蝦場、室內War Game場、攀石場等等。當然新蒲崗本身係同啟德發展區係相連嘅，區入面有好多唔同嘅新樓盤相繼落成，亦都有唔少嘅商業用地，例如一啲商場同埋辦公室等等，可以預想到嘅係，新蒲崗嘅人流將會越嚟越多。

諗返轉頭，由蒲崗村、舊機場跑道、工廠區，到今時今日嘅新蒲崗新興文化區，可能喺不久嘅將來，大家都會見到一個「新」嘅「新蒲崗」，不過呢個新蒲崗到底會係點，就要留返畀大家自己去探索喇。今集Google Map不會告訴你的事之 點解問點解 就講到呢度先，我係小雲，我哋下集再見，拜拜。