笨賊在廢墟偷了會發光的粉末，結果造成巴西最大核事故！｜戈亞尼亞事故｜叉雞

事故發生喺巴西中部一個叫戈亞利亞嘅城市， 喺距離市中心西北方1公里左右曾經有一間叫戈亞諾研究所嘅私人放射治療中心專門幫癌症病人進行放射性治療， 但係1985年研究所就搬咗去其他地方，不過仲未嚟得切將啲儀器搬去第二度，研究所就同其他人因為建築物嘅業權鬧上法庭，結果就留低咗一啲儀器同設備，其中一件係藏有銫-137嘅金屬囊。

銫-137 呢樣野其實係核彈、核武器實驗或者核反應堆核裂變嘅副產物之一， 佢產生嘅伽馬輻射源可以用來校對治療癌症嘅放射治療設備， 但如果人體長時間暴露喺伽馬射線， 輕則會出現嘔吐、肚瀉同貧血等症狀，重則甚至會將你變成Hulk，講笑啫，實際上嚴重嘅話會患上癌症甚至死亡，所以銫-137 絕對係一種非常危險嘅嘢！當然研究所嘅負責人都知道佢嘅危險性，所以佢都一直想盡快回收呢件含有嘅銫-137 金屬囊。

喺事故發生嘅四個月之前，即係1987年5月4日，研究所嘅負責人曾經返去研究所嘗試回收金屬囊， 不過就俾警察以官司仲未完為理由而拒絕入去，之後法院仲派咗一個保安看守防止其他人再次入去，負責人曾經寫信警告主管部門話佢哋要為呢一粒銫炸彈可能產生嘅問題付全責，負責人亦都多次聯絡巴西國家核能委員會話俾佢哋聽將放射物放喺廢棄嘅建築物好危險，希望委員會可以介入處理。但係最後都無得到認真對待，結果就他媽的出事啦！

1987年9月13日， 呢日原本被派去看守嘅保安偷懶同屋企人去咗睇戲，兩個男人於是趁機潛入廢棄嘅研究所諗住搵啲值錢嘢變賣。 為咗方便接下來嘅解說我哋簡稱呢兩個人「啊傻」同「阿逼」。「啊傻」同「阿逼」入到去之後就開始搵值錢嘅嘢， 唔知應該話佢哋眼光好定係太傻，佢哋睇中嘅就係嗰個裝咗銫-137嘅金屬郎，兩個人用手推車將金屬囊搬返去啊傻嘅屋企之後就開始分拆組件，不過身在輻中不知輻嘅阿傻同阿逼嗰晚就開始出現輻射中毒嘅嘔吐症狀，第二日阿逼嘅症狀變得更嚴重，出現頭痛、 肚瀉而且左手都開始腫脹。9月15日阿逼去咗醫院，不過醫生都搵唔到點解最後診係食物中毒就叫咗阿逼返屋企休息。

與此同時，一心諗住發大財阿傻雖然身體唔舒服但係都堅持要分拆嗰個金屬囊，9月16日啊傻終於用螺絲批篤爆咗金屬囊嘅伽碼射線窗口，仲喺個窿度見到一啲藍光，滿心好奇嘅阿傻繼續用螺絲批伸入去挖出咗一啲藍光嘅粉末， 當然阿傻並唔知呢啲粉末就係致命嘅銫-137。佢起初以為呢啲粉末係火藥，仲試過燒着佢不過完全冇任何嘅反應。 9月18號呀傻將金屬囊賣咗比附近嘅廢鐵廠，廢鐵廠老闆起初以為金屬囊只係普通嘅廢金屬，不過當日晚上佢都由阿傻拮出嚟嘅窿見到藍光，老闆心諗呢樣嘢肯定唔簡單要發達啦！於是就將金屬囊帶咗返屋企。

係之後既三日，廢鐵廠老闆本住有輻同享，有藍同當嘅精神， 叫咗幾個親朋好友嚟到屋企包括自己嘅老婆、細佬同鄰居等等一齊欣賞呢個會發光嘅神秘金屬囊，大家都喺度估呢啲會發光嘅物質到底係乜嘢。9月21日廢鐵廠老闆嘅朋友用螺絲批徹底撬開左金屬囊，仲喺裏面攞咗好多好似米咁大粒嘅物質，廢鐵廠老闆繼續秉持住有輻同享嘅精神將呢啲粉末分享比自己嘅親朋好友，再將金屬囊賣比另一間廢鐵廠。大家分到呢啲發光粉末之後都覺得好神奇有啲人拎住玩有啲人直接搽喺身上面，不過要講最黑仔嘅應該就係廢鐵廠老闆嘅細佬啦！細佬分到唔少發光粉末之後第一時間就想同六歲嘅女分享，返到屋企之後將發光粉末灑喺地上同佢個女一齊欣賞呢啲粉末發出嚟嘅藍光，只有六歲嘅女當然亦都被藍光吸引，佢不但將粉末塗喺身上俾媽媽睇，仲用嗰隻掂過粉末嘅手直接拎雞蛋嚟食，結果就將粉末一齊食咗落肚。

好快呀女就開始出現輻射中毒嘅症狀，其他接觸過粉末嘅人亦都有不同程度嘅病徵，有啲人嘔有啲人甩頭髮有啲人既身體出現原因不明嘅腫脹同埋潰瘍，但大家都以為呢啲只係單純嘅食物中毒。直到1987年9月28日，事故發生嘅第16日，廢鐵廠老闆嘅老婆見到自己同身邊嘅人一個個咁病咗，開始懷疑老公收返嚟嘅嗰個金屬囊，於是特登由另一間廢鐵廠拎返嗰個金屬囊然後坐巴士去屋企附近嘅衛生中心求助。9月29日早上，收到通知嘅醫學物理師帶着輻射探測器嚟到衛生中心測量，終於確定今次係一場核事故。

消息一出，成個戈亞尼亞就好似末日災難電影咁樣，懷疑被核污染過嘅區域全部被封閉，大家都人心惶惶。幾日之內有接近13萬人去醫院做檢查，當中有250人被查出受到核污染，最後有20個出現輻射中毒症狀嘅人需要接受治療。最先接觸金屬囊嘅呀傻因為左手嚴重潰瘍需要截肢，呀逼嘅左手都因為有潰瘍而要局部截肢，不過兩個人總算保得住條命仔，但其他人就冇咁好彩啦！兩個分別18同22歲嘅廢鐵廠員工因為出現各種嘅併發症而去世，廢鐵廠老闆嘅老婆亦出現精神錯亂、肚瀉同急性腎衰竭，最後因為敗血病同全身感染去世。

至於廢鐵廠老闆細佬嘅女因為直接吞咗落肚令佢自己都成為左一個輻射源，所有醫護都怕被輻射污染而唔敢靠近佢，當國際醫療團隊抵達醫院嘅時候發現阿女被單獨困喺隔離病房，其後佢全身多個器官衰竭同出血，最終喺1987年10月23日去世。第二日政府就安排幫佢下葬，雖然安葬嘅地方係一個普通嘅墓園但佢用嘅棺材係用特製嘅玻璃纖維製成，外面仲有鉛塗層以防輻射外洩。不過即使係咁，住喺墓園附近嘅2000個居民都係發生咗暴動，反對將佢葬喺屋企附近仲同警方發生衝突，不過最後阿女都係入土為安。


至於廢鐵廠老闆同佢細佬雖然都長時間接觸左高強度嘅輻射，但兩個人最後都奇蹟地生存落嚟。廢鐵廠老闆因為自責而患上抑鬱症，最後因為酗酒喺1994年肝硬化去世。細佬之後亦同樣患上抑鬱症，喺2003年因為肺氣腫去世。除咗人類受到污染之外，仲有3架巴士、42幢樓、14部汽車五、5隻豬同5萬卷紙巾被輻射污染，包括廢鐵廠、廢鐵廠老闆同細佬嘅屋企全部都要被拆除，屋入邊嘅所有物品被沒收檢測，就連屋外面嘅泥土表層亦都要被移除以防止有任何殘餘嘅輻射源。不過即使係咁樣，來自戈亞尼亞嘅居民有一段好長嘅時間受到排擠，大人搵唔到工作同屋住，小朋友亦搵唔到學校願意收，咁大家估吓到底係邊個要為今次嘅事故附上責任呢？係事前無認真對待嘅政府部門？偷懶走去睇戲嘅保安？定係偷走金屬囊嘅阿傻同阿逼呢？答案係以上皆否，反而係三個喺個瓦洛研究所工作嘅醫生被控告過失，其中一個醫生因為將研究所荒廢而罰左十萬巴西幣（即係大約155200港幣）而裝住銫-137嘅嗰個金屬囊而家就放咗喺里約熱內盧嘅一間學校展出以紀念參與呢場事故嘅救援人員。好啦我係叉雞，我哋下次再見啦！拜！