10/3《圍爐取戀》我同EX個妹上咗床

東方昇：KC～可以講出你個故事喇。
（圍爐Buddy KC（化名））
KC：各位主持好呀，咁我叫KC啦。話說我就同我前度個阿妹呢互相鍾意咗大家，咁但係一齊唔到嘅，因為唔知可以點樣面對佢屋企人嗰啲呀。咁所以想問吓主持到底有啲咩好啲嘅處理方法。
Kneta：有冇啲咩經歷呀？即係講多啲嚟聽吓……
Dickson：幾時撻着先？
Kneta：係囉。

KC：咁我講多啲先啦～其實我一開始都冇諗過鍾意阿妹嘅，因為嗰陣同家姐拍緊拖吖嘛，咁本身阿妹自己又有拍拖。咁之後呢，我同阿妹間唔中傾吓計就發覺…… 「嘩，其實我哋都係夾啲㗎喎！」一直對阿妹都有啲好感，但係因為當時拍緊拖吖嘛，咁又唔係鍾意佢，就純粹得好感就冇諗過發展啦。咁跟住到前排呢，我就同阿前度分咗手啦……
東方昇：即係同家姐分咗手？
KC：係呀係呀。咁阿妹咁啱又分咗手喎，咁我哋就傾咗一晚電話，就講感情嘅煩惱啦。咁第二日呢，我就上咗佢屋企度再傾咗一陣，佢都……
Dickson：即係家姐屋企？
KC：係呀係呀。
（Dickson、Kneta、利君牙偷笑；東方昇雙手疊起托著下巴，表情認真）
Dickson：喺同一個屋企喎。

東方昇：咁家姐喺唔喺度㗎？
KC：唔喺度，唔喺度。佢屋企冇人，得我同阿妹嘅啫，係呀。
Kneta：嗯～～
KC：佢都同我講話其實對我都有feel嘅，但係如果一齊嘅話佢過唔到佢自己嗰關，因為佢話佢好愛佢家姐，驚家姐亂諗嘢，覺得係佢搶走咗我。咁所以嗰一日之後呢，佢就keep住咁樣特登去避開咗我，我搵佢佢可能好少覆呀，跟住見面嗰啲都話「哎，唔喇」，或者唔覆咁樣。咁我都諗「唉… 咁就…… 都唔想畀太大壓力佢」，咁就冇再搵過佢喇。
Dickson： 嗯～


利君牙：KC呀，可唔可以講吓你同家姐嗰個關係？
Kneta：即係點解要分開咁樣。
KC：我覺得係個性格唔啱囉。主要係因為我同佢呀，都係會想做一個上把位多啲呀。變相兩個上把位一擺埋一齊嘅時候呢，就好多碰撞呀、拗撬呀，開始我就冇咗個耐性呀，冇咗嗰種鍾意嘅感覺，最後就分咗手囉。

東方昇：咁你同佢屋企人係咪好密切㗎？
KC：都…幾㗎……，因為之前間唔中都會上吓去，食吓飯呀……
東方昇：即係佢屋企人都認得你㗎喇？
KC：係呀，認得㗎認得㗎，都見過唔少次㗎喇。


Dickson：再問一問喇，你點樣可以判定到阿妹係鍾意你呢？即係你哋之間有冇發生過啲乜嘢係同愛情有關係㗎呢？
KC：咁首先佢自己口講都講咗嘅，同埋我咪話嗰日我上佢屋企傾咗陣計嘅，咁其實都…有啲親密行為，即係可能攬吓、錫吓咁樣嘅。，即係個feel都幾好嘅。（Kneta露出意外的表情）

東方昇：嗱，有冇……性行為先？
KC：冇冇冇冇冇冇…… 因為佢…… 東方昇：肯定？
KC：係呀係呀，佢都好知道自己做緊乜…… 東方昇：肯定？？！
KC：肯定！好肯定！
東方昇：以我所知，唔係喎，因為你問我呢個好大分別喎。
KC：唔係呀，我知呀！但係…即係如果出街嘅話我講唔到落去呀。咁一定會有啲係認得㗎嘛。
Dickson：冇人認得㗎。 東方昇：冇人認得你呀。
Dickson：因為呢件事正常係家事…… KC：唔係認得我呀……
Dickson：得你哋四個知㗎咋嘛。 KC：係認得阿妹呀！
KC：唔係認得我，係認得阿妹呀。

東方昇：唔係，我明呀，咁點解你又要做呢？因為真心，如果你哋係真係好似你講「錫吓」呢，我都覺得OK㗎。 Kneta：係～
東方昇：因為其實冇所謂，咪就係…… 一時心情唔好咁…有少少越界嘅嘢。解釋到嘅，合理嘅。
KC：好好好～
東方昇：但係當你去到嗰條界就係…… 有性行為…… Dickson：係喇。
東方昇：就有啲問題喇。而……
KC：有嘅有嘅～

Kneta：你試下唔好咁detail去形容囉。
東方昇：唔係，唔使形容㗎喇！
Kneta：係喇，即係唔使形容，淨係講「有」同「冇」咁啫。
KC：有嘅有嘅～
Kneta：嗯～


東方昇：我問喇，咁你哋而家打算點呀？
KC：其實我係想（一齊）嘅，但係阿妹嗰度就係佢想像唔到如果同屋企人講咗呢件事會係點樣囉。所以佢一直有呢個顧慮，就一直唔敢開始囉。
東方昇：咁我會問喇，我會問一個真實問題。你有幾愛佢個妹呢？
KC：嘩… 可以…… 可以衡量㗎咩呢啲嘢？（冷笑）
東方昇：Err…… 我就唔知呀……
利君牙：或者你愛唔愛佢呀？
KC：我愛佢呀。我愛佢，我鍾意佢呀。

東方昇：如果你嗰日冇同佢個妹發生關係，你會唔會覺得你鍾意佢呀？定係因為你係發生咗關係，你覺得要「負責任喎，好似唔係咁好喎，食咗人個妹喎。」
KC：唔係，絕對唔係。我可以好肯定，完全唔係。
東方昇：咁如果係我都覺得你都係畀性慾牽住自己行㗎喎。「哎呀，有個妹想同你上牀。喂，嚟！食咗先算啦。妖，唔好理。唔好理啱啱分手個家姐喇，唔好理個妹點樣面對家庭喇。」你就係一個咁嘅狗公囉。
KC：完全唔係咁諗呀，因為真係好知佢性格呀，即係嗰啲係點樣……
東方昇：唔係，我明我明。我問你一個問題：全世界係咪淨係得佢個妹你要同佢一齊吖？咁多個女人你唔揀。喂！而你呢個case咁尷尬……
KC：呢刻我會話「係」囉。
東方昇：其實你要諗吓…… 你要處理㗎嘛！即係唔係普通一個女仔咁簡單吖嘛。

Kneta：因為呢…… 其實而家呢件事，我自己覺得唔係好單純嘅道德上面（嘅問題）囉。咁你要知道你同妹妹一齊咗之後，你係為佢負上一個責任，同埋佢有機會冇晒屋企人㗎喎。當最後你哋唔可以喺埋一齊，你要諗吓佢要點樣去面對返佢哋屋企人吖嘛，你明唔明呀？
Dickson：包括你而家鍾意緊嘅妹妹喎。
Kneta：係呀。
Dickson：即係唔係淨係講緊家姐喎已經。
Kneta：我好肯定話你聽！我作為女人呀，如果我阿妹呀，或者我best friend，即係唔好話搶啦，隔咗幾日同我男朋友喺埋一齊呢，我呢一世都唔會原諒佢！
東方昇：啱呀，best friend都唔得呀。閨蜜都唔得呀！
Kneta：唔得！唔得！

KC：但係其實…… 我同家姐已經分咗手一段時間㗎喎。
Dickson：唔係，人同人係有感情㗎嘛。同埋我問返轉頭呀，你同佢家姐一齊嘅時候係你提出分手嘅？
KC：嗯。
Dickson：咁家姐嘅反應係咩吖？
KC：好唔開心囉。
Dickson：咁如果畀佢知道咗，喺佢屋企…… Kneta：地方……
Dickson：咁就發生咗啲咁嘅行為嘅話，咁咪仲崩潰囉？我諗你哋都相愛過㗎嘛……
東方昇：所以我要你…… 我要你知道你自己嘅行為係幾自私呀，你係搞到佢屋企家破人亡……
Kneta：係呀係呀。 東方昇：未人亡嘅～
Kneta：其實係…… 東方昇：家破囉～

Kneta：我當你可以同妹妹一齊喇，咁你點樣面對佢家姐，點樣面對佢屋企人先？
KC：其實我根本都唔係好想像到，到底會發生咩事囉。我只可以話，其實我會想同屋企人坦白咗先。如果佢屋企人唔畀嘅話我可以放棄囉，即係我愛到一個地步係。
Kneta：我覺得你係可以放棄嘅話，咁點解唔一早放棄呢？即係點解要同屋企人講咗先？即係屋企人一聽咗，其實就會覺得好有問題呀。即係唔理你哋發生咩事……
東方昇：就算你屋企人唔知道你哋發生咗關係，都會覺得……
Kneta：個感觀好差呀。

KC：所以我咪就係諗住問咗阿妹佢會唔會想講，如果佢話唔會嘅，咁佢都唔會開始，咁我咪放棄囉。但係如果佢話佢都想試一下，我會同佢屋企人講咁樣囉。我本身係咁樣諗嘅。
利君牙：咁你而家係問咗阿妹未㗎？
KC：佢…佢仲未答我呀。
Dickson：唔係，頭先咪話佢避開你，然後又抗拒同你有兩個人嘅接觸，咁咪即係其實佢已經答咗你囉。同埋佢可能有罪疚感，所以佢唔係好想見到你囉。
KC：嗯～ 都…都可能係嘅。

Kneta：另外一個好現實嘅就係，佢唔可以make sure佢同妹妹一世㗎嘛。
利君牙：係呀，除非你而家答到你一世淨係鍾意阿妹一個嘅啫。
Kneta：佢答到我都唔信呀！
KC：我可以呀！我真係可以呀！
Kneta：我唔信！ Dickson：算啦～阿KC……
東方昇：你係一個咁自私…… KC：我講完……
東方昇：唔諗人哋嘅人。 KC：你哋都唔信。
KC：我覺得證明呢啲嘢，就淨係可以用時間去證明。

Dickson：假設如果你同咗阿妹一齊之後，咁你又唔鍾意喇，咁你又會點吖？
東方昇：唔係呀，咪再啅返佢阿家姐囉。
（Kneta、利君牙笑）
Dickson：唔係……
東方昇：再翻兜佢家姐囉。 利君牙：等陣先等陣先！
利君牙：KC我有另一個新問題問你呀。嗱，既然你而家講到你咁愛阿妹啦，可以同佢一生一世，咁你可唔可以等阿妹一年、兩年先一齊呀？
KC：我已經同佢講過，我話：「如果你覺得未得嘅話，我可以等你。」我已經同咗佢講咁樣㗎啦。
利君牙：咁...你覺得自己可以等幾耐呀？
KC：我...呀？我無諗過可以等幾耐喎......因為......
利君牙：十年得唔得呀？真係愛喎，可以一生一世喎。
KC：但係個問題係，我係咪真係等得到囉，我會話...
利君牙：呢個就係我問你嘅問題喎！

專家Dickson：因為佢好多嘢，佢好多嘢都無嗰個信心。其實KC你係......你以為你好愛阿妹㗎咋。其實好多嘢你都唔firm嘅，係因為你冇真真正正確實去諗過如果你同阿妹發展係會咩情況吖嘛。
東方昇：但係你就知道想做愛。
KC：唔係......
東方昇：即係唔好話阿妹吖，講真，你對你個表妹有好感，我覺得你都會同你表妹上床呀，唔好講我講。
利君牙：「表」係可以嘅但係。
東方昇：表妹得咩？
利君牙：「表」係得嘅。
專家Dickson、Kneta：「表」係得嘅，堂妹就唔得。
東方昇：堂妹堂妹。唔係嗰個糖妹吖嘛？TVB嗰個吖嘛。
東方昇：我覺得你係不宜同任何人拍拖，你認清自己性慾先呀。
Kneta：不宜（同人拍拖）住啫，住啫。
KC：OKOKOK…有啲嘢真係唔係好識講……

東方昇：明呀，但係你做咗吖嘛。所以我覺得你在所有呢啲嘢之前，你要喺做之前諗囉，你淨係諗咗你自己先吖嘛，所有嘢都係。而個問題咪就係牽涉到引伸而家呢一冧嘅問題囉！
Kneta：嗱，其實好簡單嘅，即係呢，喺情慾呀，感情呢係一定會有時會有魔鬼就出嚟。你做咗唔緊要嘅，但係你唔好再去jer落去即係譬如唔好jer落去話「我一定要同阿妹一齊呀」、「我要迫佢畀個答案」，你做咗大家知「哎，仆街咗喇」，算喇，唔好意思喇，大家就做陌路人喇。即係鍾意都算喇。
東方昇：佢冇理你，你都唔好搵佢喇。
Kneta：係啦，但係你唔係！你要jer！
專家Dickson：你仲要再想返踔第二轉。你淨係諗「我得到就得㗎喇」，咁其他嗰啲......「呿，由你啦」、「你仆街啦」。
Kneta：或者埋到嚟先再諗囉。
專家Dickson：「戀愛不嬲都係兩個人嘅事㗎喇」咁樣。
KC：其實我會話......
利君牙：係

KC：我係想去面對，但係我唔知可以點樣去面對，即係我冇試過有咁嘅情況啦，我身邊又冇人試過咁樣啦。
東方昇：唔係，我諗全香......全世界都冇乜人咁樣試過㗎喇。
專家Dickson：唔係，除咗拍av嘅時候囉。
Kneta：你問佢！我而家叫你帶住妹妹私奔，你同妹妹兩個租一個地方嚟住，咁等佢屋企人唔好知，咁你哋冇乜事，冇事冇幹，幾年後咪講囉。咁你做唔做到先？你可唔可以提供呢啲好現實嘅嘢先？
KC：我一定可以呀！
專家Dickson：唔係，佢呢啲「一定」我都唔係好信，因為你好多嘢都唔firm吖嘛。
東方昇：所以真心你要......你認清你自己係咩人先，你透過呢件事......
KC：OK〜
東方昇：而家我外人話畀你聽，你就好自私！最大問題係你自己唔覺，你仲有一個美麗嘅說法話「好愛」嚟包裝咗你嘅自私。喂！你愛佢呢就唔會咁快同佢發生呢個關係啦！因為你知道佢呢個角色係幾咁尷尬㗎嘛！喺公司都話「喺度食，唔好喺度屙呀」，你仲要喺同一個屋企嗰度喺度食，喺度屙。
利君牙：咪住先！公司有咩問題先？
東方昇：你咪有問題！冇冇冇，你好幸福，你係成功嘅例子！

眾人：哈哈哈哈哈
東方昇：所以你喺屋企就唔好喺度食，喺度屙喇真係！
KC：係〜
專家Dickson：我哋畀你嘅意見都係喇，咁其實就係唔好苦苦糾纏囉。我寧願你喺出邊再搵個新嘅，然後你......
Kneta：又開心！
專家Dickson：係呀。
KC：係呀，所以我就係......之後都冇再點樣搵佢囉就係。
專家Dickson：好啦，咁KC我哋都幫你唔到喇。
東方昇：你應該去就嚟上床之前，你即刻打嚟！我都仲幫到你！
Kneta：「唔好呀！」
東方昇：「停呀！」、「勒住呀！」 、「自己打個飛機先啦！」
專家Dickson：入廁所洗個面。
東方昇：你都上咗床啦！仲可以做到咩啫！
專家Dickson：係呀，你都發生到呢個地步。
東方昇：希望你有避孕啦〜
KC：有〜有有有有。
Kneta：（拍枱）喂！喂！你仲有時間避孕喎！你諗得好清楚喎！
KC：哎〜喂！其實我覺得你哋已經認定曬我係就淨係for為扑嘢，我覺得好難溝通囉！
Kneta：唔係唔係。嗱！我幫你！我真係冇咁諗嘅！我聽到之前呢我係覺得冇問題嘅，如果追求鍾意嘅話。但係呢，聽到一連串其實好多好現實嘅問題啦，你又冇去考慮清楚，所以我先唔鼓勵啫。其他人點我唔知，但係你唔好覺得我哋係一定覺得你係一個禽獸先！冇嘅！

東方昇：唔係呀！我一早認定係禽獸呀！
Kneta：我冇嘅！我真係冇嘅！
東方昇：唔好意思呀！我相信大家都會支持我㗎！
眾人：哈哈哈哈
東方昇：如果你係有諗過人哋，
利君牙：愛嘅話。
東方昇：我都仲同情你。你淨係諗自己，所以我真心覺得，你要諗下你自己係一個自私嘅人。
專家Dickson：至少你冇從家姐嘅角度諗過先，而嗰個人係你曾經愛過，而且你係拍過一段時間嘅拖。
東方昇：慢慢諗下先啦，夠你諗幾晚㗎啦。
KC：好呀好呀。
東方昇：下次一有呢啲機會有諗下 跟住又扯唔到旗㗎喇可能即刻。
KC：好啦，拜拜！
Kneta：拜拜〜

東方昇：嘩，頭先呢個case呢。嗱，我要講返先呀，其實我哋從導演嘅口中一早知道個故事就係佢其實就同個妹上咗床。但頭先呢，佢竟然揖揖揚揚！佢就話
眾人：「冇！」
東方昇：佢唔認！ 我想證明就係根本即係佢覺得有嘢！
專家Dickson：係
東方昇：佢先隱瞞囉！其實佢自己都覺得有問題呀。如果唔係咪講出嚟囉。
專家Dickson：咁即係證明咗啲咩呢？就係......就算佢有做過，佢都話「我對住燈火發誓！我斬JJ都冇做過！」
東方昇：所以呢啲人真係......
專家Dickson：但係原來佢有㗎喎。
利君牙：同埋我覺得佢講嘅嘢同佢做嘅嘢係唔挐捘囉，即係佢話佢好愛個妹，但係佢又冇諗過個妹嘅情況。
東方昇：所以係好自私嘅。不如嗱，你哋由女仔把口講畀佢聽其實喺呢件事傷害咗啲乜嘢人喇？
利君牙：家姐〜仲要好傷心咁樣分手喎。如果同咗我個妹一齊，首先我會諗......係咪......
東方昇：懷疑！一早已經有......
Kneta：趙咗喇！

利君牙：然後阿家姐就會極度冇安全感啦，然後可能精神有問題。
東方昇：憎咗佢阿妹啦，甚至乎憎曬所有女人啦，連個妹都信唔過！
Kneta：你點知會唔會一陣真係發生倫常慘案㗎？
東方昇：係呀。跟住個妹又會點諗呢？
Kneta：我覺得阿妹咁細個呢有陰影㗎喇。本身我係想支持佢嘅，即係一早已經講話我覺得追求愛情都冇乜問題嘅。但係佢唔認之後，我就有少少抆喇，覺得......嘩！即係典型渣男，真係仆街嚟嘅。
專家Dickson：同埋佢嗰個唔認都係......佢冇將個責任擺喺自己度㗎喎，即係佢話唔認係費事個阿妹畀人認出。但我心諗「你阿妹係邊個呀？點會畀人認出？」
Kneta：同埋又唔係叫佢形容！
東方昇：明星嚟㗎！可能好出名㗎！有冇啲明星？家姐個妹嗰啲呀，XXX，XXX呀
Kneta：喂呀！！
眾人：哈哈哈哈

專家Dickson：「點會呀......」我心諗，係咪呀？
東方昇：有冇啲家姐個妹好出名㗎？XX嗰兩個。
Kneta：喂呀！！！
利君牙：越講越多喇！
Kneta：Too much喇！
專家Dickson：所以佢連呢一個都唔想承認喎，佢想推埋畀人喎。
東方昇：所以佢根本唔知自己有幾自私，所以佢打陣飛機先啦。
Kneta：其實仆街嚟嘅。 總之就係仆街嚟㗎。
東方昇：佢唔配同人拍拖，因為只會傷害人㗎咋其實。
Kneta：所以我覺得總括呢，啲女仔聽到啲男仔話「我衡量唔到呀」、話「我肯定會畀到你呀」，唔好信！
利君牙：垃圾呀呢啲都係！
Kneta：要懷疑呀！
專家Dickson：但係我哋唔係咁嘅〜
東方昇：今集啫！其他集數呢我哋照會耐心討論，不存呢個好強烈嘅道德批判，但今集實在太......太唔得喇！
專家Dickson：太無恥喇！
東方昇：太無恥喇今集。
專家Dickson：佢個種無恥唔係個case無恥，係嗰個人，佢嗰個面皮有幾尺厚咁囉。
東方昇：好啦好啦。咁大家有咩case就要交過嚟啦！
專家Dickson：係囉。
東方昇：好啦！
眾人：拜拜。

Kneta：喂！我哋又有新一個嘅圍爐dating喇！ 咁如果我哋咁多個靚仔靚女想繼續再嚟同我哋一齊玩呢，咁就填下面嘅
專家Dickson：Google form！
Kneta：冇錯啦！Google form！
東方昇：要求好簡單，女就一定要靚女。
Kneta：全部都要啦！
東方昇：仔就一定要靚仔。靚仔過Dickson就得喇！
東方昇、Kneta、利君牙：（指住Dickson）
東方昇：係喇！好容易嘅啫！快啲過嚟！填！！