911後難得的團結！不再中立、制裁俄羅斯 西方國家的反擊行動一次看【TODAY 看世界】

如果話普京打烏克蘭嘅目的係要烏克蘭遠離西方，咁而家嘅情況睇嚟就係適得其反。而家越來越多海外嘅烏克蘭人選擇回國參戰，喺烏克蘭同波蘭邊界嘅火車站有2,30歲嘅年輕人亦都有40幾歲旅居其他國家嘅公民，佢哋都話戰情告急唔可以睇住同胞白白送死，其中仲有好多來自歐洲各地嘅外國人響應烏克蘭總理嘅號召要為民主而戰。同一日喺聯合國大會上面，俄羅斯外長拉夫羅夫透過視像參加，但係佢人都仲未上鏡頭，各國代表就一齊表示杯葛直接離席。今次嘅烏俄戰爭亦都令歐洲喺二戰後出現前所未有嘅團結。

大家好！我係范琪斐，歡迎收看范琪斐嘅today看世界。其實喺烏俄開戰前嘅五個月，美國就已經向歐洲各國警告要佢哋擬定好制裁應對俄羅斯發動攻擊，當時俾人當係耳邊風，開戰之後歐洲一下子未嚟得切反應只係口頭譴責，烏克蘭靠自己捱左接近三日反抗俄軍先至當頭棒喝歐洲。好多國家打破咗幾十年來從來都唔靠邊嘅傳統，好似瑞士並唔係北約嘅成員，兩次世界大戰同冷戰期間都保持中立，星期一竟然決定送反坦克武器比烏克蘭，係83年第一次向衝突地區送武器。瑞士一直以來都係靠中立明哲保身，歐盟、北約都冇加入，但係總統都係同一日宣布非常時期要用非常手段，不但關閉領空仲禁止俄羅斯高層入境，對俄羅斯殺傷力好大，因為好多官員、富豪嘅財產都放咗喺瑞士嘅秘密銀行。另一個中立國芬蘭就認真考慮加入北約防務聯盟，今個星期公布嘅民意調查顯示53%嘅芬蘭人贊成加入。

德國對俄立場大轉彎 強化軍事幫助烏克蘭
不過轉變最大嘅就係德國，華爾街郵報指出呢位老大哥一開始真係令人O晒嘴一廂情願咁認為冇可能會開戰，喺俄軍進攻嘅第一日，德國情報局局長仲一度被困喺基輔走唔到，但而家終於回過神，喺外交、軍事同能源政策上都徹底改變。首先係外交，德國喺過去30幾年黎對俄羅斯嘅態度係「我哋唔好孤立呢個鍾意搞事嘅鄰居，我哋照顧佢嘅情緒佢就會俾面我哋」一方面係德國非常需要俄羅斯嘅能源，另一方面係二戰之後奉行包容政策，認為唔可以將俄羅斯拒於歐洲嘅門外，如果唔係會對歐洲造成更大嘅危險。

但事實證明普京根本「將客氣當隨便」，今次烏克蘭嘅慘況亦都令到老一輩嘅德國人諗起二戰時候蘇聯紅軍嘅暴行，年輕嘅一群就係睇唔慣都已經2022年啦歐洲竟然仲會發生戰爭，民意激憤亦都令當局驚醒發現舊既政策已經行唔通，係時候負起團結歐洲嘅責任，呢個決定亦都即刻反映喺軍事政策上面。之前特朗普鬧北約成員國嘅防衛支出都唔夠GDP嘅2%，而家德國已經宣布即刻增加一千億歐元更換新嘅裝備，跟住要增加國防預算，投入金額一定超過GDP嘅2%。

另外，德國因為納粹喺二戰時候嘅侵略行為一直懷着贖罪嘅心態，戰後禁止運武器去衝突地區，所以德國最初只係肯提供烏克蘭嘅戰鬥頭盔，仲唔准愛沙尼亞運德國製造嘅武器比烏克蘭。而家不單止放行，仲親自送出反坦克火箭同飛彈。另外，喺能源政策上德國除咗終止北溪天然氣2號管線嘅最終審查程序，仲打算加快液化天然氣接收站嘅興建工程，甚至反核出身嘅德國綠黨都話如果用核能可以減少對俄羅斯能源嘅倚賴，咁我哋會考慮繼續延長核電廠嘅壽命。

烏克蘭申請加入歐盟 戰爭凝聚歐盟向心力
另一方面烏俄開戰之後，烏克蘭總理澤連斯基申請加入歐盟，呼籲歐盟比烏克蘭用快速過關入歐就成為話題焦點，但就算最快烏克蘭都唔可能即刻入歐，畢竟審理程序至少需要幾年，而家排隊入歐嘅國家仲有五個，唔通要比烏克蘭打尖先審咩？雖然好多東歐國家都同意比烏克蘭即刻加入，但有歐盟官員指出西歐大國可能唔願意比烏克蘭即刻加入歐盟，因為歐盟嘅共同防禦條約規定成員國受侵犯嘅時候必須出兵協助。今次烏克蘭申請加入北約十劃都未有一撇，俄羅斯就已經咁大反應加入左歐盟嘅話仲得了嘅。

雖然烏克蘭唔可以即刻加入歐盟，但係專家分析今次既戰爭已經令歐盟出現前所未有嘅統一戰線制裁俄羅斯。歐盟喺27號第一次同意要提供超過50億美元嘅軍事援助，仲直接資助烏克蘭買武器，俄羅斯官媒亦都喺歐盟禁播。最重要嘅係一改對移民唔友善嘅態度，張開雙手歡迎烏克蘭人，提供長達三年嘅臨時庇護。好多分析都指出西方國家今次呈現左自911美國本土受到恐怖襲擊之後前所未見嘅團結，啱啱開始嘅時候西方國家嘅反應的確令人覺得太慢同太少，但係喺過去幾日西方國家嘅反應迅速升級，好多人都喺度問點解會有呢個轉變呢？

金融時報嘅美國首席評論員Janna Ganesh表示好多反西方嘅言論一邊將西方形容為無所不能嘅大魔頭，將民主嘅概念強行付諸於名國，但係另一方面又話西方軟弱無能，冇可能會為自己嘅信念作戰。評論員表示民主制度如果真係好似反西方言論所講咁脆弱係唔可能存在咁耐，應該一早已經被淘汰左。以前曾經做過咁樣嘅錯誤判斷嘅人1990年伊拉克嘅胡苼Saddam Hussein以為佢打科威特嘅時候西方唔會插手，點知佢就錯喇！今次普京亦都做出同樣嘅判斷，民主國家可能動作係慢咗少少但係的確係有團結起嚟對普京作出強烈嘅反擊。

有人就認為澤連斯基拒絕美國協助撤離嘅決定亦都好關鍵，佢嘅決定不但令烏克蘭人同仇敵愾，仲令周邊嘅國家都以烏克蘭為榜樣。如果烏克蘭投降冇奮力抵抗嘅話，形勢絕對唔會係今日咁樣。但好多分析亦都指出勝敗都係好難講，全世界嘅經濟已經感受到戰事嘅衝擊，對俄羅斯嚴厲嘅經濟制裁有可能導致通脹更加嚴重，供應鏈已經受到影響。

今日我想以波蘭總理Mateusz Morawiecki 嘅說話來做總結，佢話普京對烏克蘭發動嘅戰爭就係向西方嘅靈魂開戰，而家就係我哋展現出永不屈服於暴政嘅時刻，係我哋展現出自由同民主自決權嘅價值觀，唔係只係講講吓，我哋係願意為呢啲價值觀戰鬥！我諗要攞起武器從來都唔應該係一個輕率嘅決定，但係有啲時候唔攞武器又得唔得呢？歡迎大家同我哋分享你嘅睇法！Today看世界天天為你精選一則國際話題，帶你快速秒懂世界大事！