【Tinder詐騙王】24/2《圍爐取戀》我喺交友app被呃10萬⋯內幕人士爆出騙局手法！！

Kneta：我覺得佢呃人嘅技倆固然係超級癲啦！ 但係佢連追女仔嘅手法都係一流我覺得你（Dickson） 要學嘢！ 唔好學前面要學後面。
Dickson：我係真係有啲吸納咗佢少少技倆㗎。
東方昇： 吸納左你有冇用出嚟先得㗎。
Dickson：嗱！我唔會呃人。
利君牙：俾你講吓你學咗啲咩？
Dickson：我唔會呃人既！嗱！ 我係從佢嘅技倆入邊發現呢，原來公開自己嘅生活係非常之重要㗎， 譬如如果你每一日擺嘅，就係可能你行山，跟住踩單車跟住而家滑浪，咁個女仔就可以從你呢啲生活入邊，幻想到佢自己同咗你一齊之後係經歷緊啲乜嘢。
東方昇： 你終於知啦咩？你成日擺自己睇咩書，咁梗係冇女埋黎啦大佬！ 同埋佢更加犀利嘅就係佢真係擺啲私人飛機呀、遊艇啊、五星級酒店呀！喂！講真我呀 我係男仔呀我都覺得犀利呀！
Kneta：想一齊玩啦係咪啊？
利君牙：咁你學完之後諗住點樣經營你個生活啊？
東方昇： 佢諗住打隻私人飛機出嚟。
（眾人大笑）
Kneta： 打造啊！
Dickson： 環遊世界！
東方昇： 係啦！你呢利君牙？
利君牙： 我就係覺得如果我係女仔我都會俾佢呃到囉！ 嗰啲技倆...即係呢從佢嗰啲WhatsApp對話呢！ 好正喎真係「我想同你組織一個家庭」 咁樣喎～
Kneta：女仔聽到係會心動。
Dickson： 嗱！呢啲說話真係要睇吓邊個講嘅啫！ 如果我講嘅話呢！我想同你組織一個家庭。
利君牙： 唔關事你無試過啊。
Kneta：你要鋪排！ 你唔係一野就黎話「我想同你組織一個家庭」 咁我會報警拉咗你先嘅。
Dickson：係咪想扑X我呀條友。
Kneta：係啦。
東方昇：所以講返就係大家都要小心，因為亦都唔可以講話，哇嗰啲女仔咁蠢㗎，呃人嗰個係職業嚟㗎，佢太叻喇！所以我哋各位男男女女都要好小心！咁今日我哋精彩啦！我哋搵咗兩個受訪者，第一個就係說佢曾經俾人呃嘅經歷， 而接住落嚟呢，就係佢識得有個朋友就係曾經喺社交平台呃人，佢嚟分享吓佢背後嘅一啲技倆！

嚟啦嚟啦！Juicy Juciy！情場騙案大公開！
東方昇：好！我哋首先第一個受訪者就係Katy（化名）。
Katy： Hello大家好！
東方昇： 你係咪將會講一個喺呢個社交平台俾人呃嘅經歷啊？
Katy：係呀係呀。
東方昇：好呀快啲講好心急。
Katy： er...咁話說呢就係半年前到啦 咁我就喺交友app嗰度識到一個男仔，咁佢都正正常常又算係Sporty嗰啲啦， 咁佢就都係正常打份工啊，話自己做啲project management文職嗰啲啦！ 咁我又冇特登問好多問題，但係佢成日都係半夜嗰啲時候先至text話:「啊！做完嘢喇而家」嗰啲，咁時間耐咗呢，我都覺得佢似係想認真發展長啲關係嘅人，唔似係拍散拖嗰啲啦，就開始對佢有少少放下戒心，咁同埋覺得都可能有得發展，咁就繼續傾啦。
東方昇：咁佢每日都花好多時間同你深入了解㗎 ？
Katy：唔係㗎唔係㗎。
利君牙：淨係通宵先同你講，令你覺得佢好有上進心係咪啊？
Katy：佢日頭都有出現吓嘅，但唔係長期Online嗰啲囉。
東方昇：但你嗰時都沉沉地船嘅？
Katy：未去到好沉船嘅，但就純粹覺得呢個人......
東方昇：即係其他人就真係好狗公啦，就即刻話出嚟咩啦，咁佢就冇呢個意圖。
Dickson：即係佢欲擒先縱啊呢個。
Katy：即係唔係話講嘢好flirty嗰啲囉，所以就都正常咁樣囉，因為當時佢聲稱自己唔喺香港出咗trip嘅。
Kneta：咦咁即係你係從來冇見過佢㗎喇喎？
Katy：冇錯冇錯。
東方昇：即係佢用呢個方式避免左見面。
Dickson：咁我就再問啦～佢有冇喺言談之間有啲好親密嘅，即係諗住可能flirt下你咁樣嘅情況呢？
Katy：都有啲暱稱嗰啲嘅。
Dickson：例如呢？
Katy：er…bb呀 嗰啲囉。
Dickson：咁就真係已經唔係普通朋友，叫你買倫敦金㗎啦喎。
Katy：跟住之後呢佢就問我「你有冇投資啊」咁樣嗰啲嘢。
Dickson：即係好早就已經同你講呢個㗎啦？
Katy： 傾咗三個禮拜左右。
Kneta： 好快喎。
Dickson： 都一個月喎。
Kneta： 我覺得好快啦喎。
東方昇：下三個禮拜好耐啦。
Dickson：唔係唔係，嗱～你要睇佢平均傾嘅時間有幾多先，如果佢一個星期其實只係同嗰個男人傾咗一次呢，咁三個禮拜又唔係好耐。
Katy：哦咁又唔係！Daily都有。
Dickson：Daily都有就好耐喇 投資好耐㗎喇。
東方昇：就開始露出尾巴啦！但你唔覺得佢呃緊你嘅？
Katy：都唔係嘅一開頭都有戒心嘅，咁跟住佢就有同我講，佢玩嗰啲係加密貨幣嚟嘅，之後佢就叫我試吓玩，咁起初我都reject嘅，跟住之後佢就不停喺度說服我玩啦，又用啲言語去推我，即係話「你玩下啦咁樣」 咁個刻我就覺得可能比二三千去玩，當睇吓呢個係咩人試吓佢囉，咁真係有玩到嘅嗰刻，之後佢就一路教我玩啦。咁等到佢覺得個收入OK啦，咁佢就話俾我知可以放啦咁樣，放咗之後佢就會教我去攞返啲錢出嚟啦咁樣，咁佢又真係可以將啲錢過返落去我戶口嗰度嘅。
東方昇：即係其實呢你放低戒心，係因為你開頭嘅時候真係賺到錢，有啲甜頭攞到。
Dickson：唔係完全地呃咗你唔見咗影。
Katy：係啦係啦！跟住佢都會有呢一個時step就係好似釣魚咁樣囉。
東方昇：不過呢個係一個騙徒嘅普遍做法，其實就係俾少少甜頭你囉！說算個套《Tinder欺詐王》都係架，又私人飛機又五星級酒店又請你食飯先，令到你好似佢咁有錢我都唔會呃我啦，或者我都有着數攞咗先啦，令到你放下戒心所以呢個係好正宗下懷。
Kneta：常用技倆囉。
Dickson：然後就提出佢想要嘅嘢啦。
東方昇：係呀 咦！咁我想問啦你開頭reject啦，到嗰時佢係繼續講返其他嘢關心你，定係已經好逼你。
利君牙：好chur咁樣
Katy：佢又好醒，即係佢又唔係下下都講同一個topic，隔一陣佢又會講返啲正常嘢㗎喎，去到適當時候我就覺得佢又會返番嗰個topic。
東方昇：即係好似釣魚咁樣，chok下chok下咁樣，咁邊一刻令到你對佢信任大咗呢？
Katy：就係當刻啲錢可以過返落我戶口嗰度，咁我咪覺得呢件事好似make sense啦。
Dickson：即係佢真係收咗錢嘅。
東方昇：即係開頭的確係有啲甜頭啦，咦我想問一個問題喇，其實佢喺嗰個交易嘅中間，佢有冇攞到錢嘅呢？
Katy：佢冇㗎。
東方昇：說法上你唔知，即係你覺得冇啦起碼呢刻。
Dickson：即係佢係冇得抽佣嘅。
Katy：係呀係呀。
東方昇：所以你覺得放下戒心覺得佢又冇得益呀。
Katy：係呀！跟住去到我攞返啲錢之後佢就叫我「呀你再買啦 而家個狀況都OK喎」 ，咁我就再大筆咁樣去買。咁嗰陣時第二次我就買咗兩萬蚊，但之後呢佢就開始有啲奇怪嘢啦。咁買完啦OK啦夠啦，咁我就自己放咗啦，跟住我就叫佢教我點樣攞返啲錢出嚟先啦，咁嗰陣時呢我就在跟住佢啲步驟去做啦，咁其實佢中間有一個Password要你入返嘅，果下就出事啦就話個Password唔啱，咁我就連續入咗兩次都唔啱 但係我都幾肯定 我入嗰個Password係啱嘅。
東方昇：咦咁即係如果你最尾同樣個Password入唔到，即係有機會個網站係假㗎喎係咪呀？
Katy：無錯 而家就知囉！但係當刻佢freeze左我個戶口嘅時候，佢就叫我「啊你搵個CS去問一問啦」咁樣
東方昇：點知又係佢嚟嘅 打俾佢「咦又係你嚟嘅？」
Dickson：扮女人呀嘛。
Kneta：變聲器都用埋。
Katy：冇電話啊佢喺check room嚟㗎。
東方昇：咪即係又係佢囉。
Katy： 唉可能係啦。
東方昇： 一人分飾多角。
Katy：跟住之後佢就同我講「呀！你要入返啲guarantee落去，咁佢先可以俾你解返嗰個戶口」 ，咁其實嗰刻我自己都覺得好唔妥，但係我都係為咗攞返個筆錢。我入咗錢就嗱嗱聲release咗啲錢之後，我就可以咁撳返啲錢出嚟，的而且確入完之後，呢嗰個戶口真係解咗凍嘅，但係去到你撳錢出嚟嗰刻呢，佢就話「你太大額啦，你個地址係唔夠安全，所以你而家都係拎唔到錢嘅」 咁跟住之後我就stop咗啦，即係嗰刻就知真係唔得啦。

專家Dickson：有入無出。
東方昇：咁即係其實你入咗二萬蚊之後，後尾再要入多啲錢落去，咁一次過……
Katy：係。
東方昇：即係入咗幾多錢落去個戶口呢？
Kneta：前前後後。
Katy： Total係十萬嘅。
東方昇：嘩……
Katy：即係連埋你第一次嗰筆，因為真係唔甘心呀有少少，咁但係你知道就算再入其實佢都總有方法會唔俾你出個筆錢。
東方昇：咁你而家打算點樣啊？呃咗好大嚿錢喎都。
Katy：係呀……其實我so far仲未拆穿呢件事，我亦都冇同佢返枱嘅，但係我都嘗試睇吓有咩方法可以攞得返啲錢出嚟囉。
Kneta：嗯～
東方昇：喂，但我覺得你要搵方法將佢繩之於法喎。
Katy：其實我覺得佢個人根本都唔係喺香港。
東方昇：呢件事還呢件事啦，因為我覺得你喺呢度講，公諸於世係一個方法，講一個佢個套路呢，我相信好多人聽咗之後呢，都已經吸收咗啦。
專家Dickson：就知道會咁樣做嘅。
東方昇：有一個咁嘅事情，係呀，因為令到起碼唔會再有人被呃，第二係我覺得雖然唔知報警有冇用呀，因為好多話呢啲其實……啲騙徒有方法令到你check唔到，但係起碼警察多啲呢啲資料，下一個受害者出現嘅時候，佢哋就可以捉到個匪徒。
利君牙：就好似Tinder嗰套野咁樣。
東方昇：係呀，嗰套電影都係咁樣呀嘛。
專家Dickson：相似嘅嘢去搵個線索咋嘛。
東方昇：咁對你有冇影響啊？對你下次再喺社交網站識人。
Katy：嗯……我自己又冇嘅，不過已經試過一次就……錢銀嘅嘢自己就真係要小心。
東方昇：係啦～所以冇啦，下次小心啲啦。
專家Dickson：總之大家知道有呢件事！
東方昇：係喇！
專家Dickson：咁就可以喇。
東方昇：好！感謝你嘅分享，對大家好友幫助。感謝您，感謝您。
Katy：好啦，唔該晒～
東方昇：拜拜。

東方昇：其實頭先Katy嗰個故事呢，咁始終Katy係個受害者啦其實，我都唔想再傷害佢。
專家Dickson：挖番佢啲舊史出嚟。
東方昇：但係其實我覺得都有……
利君牙：Simon。
東方昇：呃少少感情嘅。
專家Dickson：有感情投射。
東方昇：因為如果唔係無啦啦有個人，我問你投資，其實你唔會理我。
專家Dickson：即係等同於你平時都會收到啲cold call打嚟。
Kneta：買保險嗰啲呀嘛。
東方昇：所以一定會牽涉咗少少感情，所以其實嗰個騙徒係好X仆街。
專家Dickson：係～
東方昇：所以大家真係要小心，唔好以為嗰個case純粹錢銀，其實一定唔係，一定夾雜着啲信任呀，愛情呀。
專家Dickson：因為唔會無程程叫BB而你唔反抗嘅。
利君牙：但係我想講一樣野就係呢，我覺得係呢啲平台上面呢，唔好關錢是係最安全囉。
Kneta：係永遠都唔好講錢。
東方昇：係呀。
Kneta：冇必要囉因為。呢啲平台講感情㗎嘛！講咩錢啫而家！吓！
東方昇：因為就係呢啲平台……大家第一樣驚嘅嘢就係呃我隻豬呀，即係呃我上床。
專家Dickson：冇諗過……
東方昇：就放低咗錢嗰個感覺，你明唔明呀？
利君牙：係。
專家Dickson：冇諗過原來係呃你隻金豬呀。
Kneta：加咗錢，我覺得成件事好污糟呀！
東方昇：所以就係咁樣吖嘛。
Kneta：係囉。
東方昇：跟住呢，有個觀眾呢，就IG話俾我哋聽呢，曾經佢有個朋友呢，就係做呢啲喺網上呃人、倫敦金嘅嘢。而佢朋友就說服佢去做，但係佢最尾冇做，但係佢就知道晒來龍去脈，嗰個內幕係點樣呃人嘅。
利君牙：我想聽呀呢個。
東方昇：快啲接佢過嚟聽吓喇！

東方昇：喂，樂仔你好呀！
樂仔：喂， Hello Hello。
東方昇：好多謝你自告奮勇，話俾我哋聽其實知道你身邊有個朋友曾經就係做呢啲呃人嘅騙徒喎，係咪呀？
樂仔：係呀，係呀。
東方昇：咁你聽返嚟啦，其實佢係點樣運作嘅呢？佢點樣呃人嘅呢其實係？
樂仔：咁嗰陣時係一個我嘅前同學啦，咁佢就係啲交友Apps度，咁就用某一啲人嘅相，然後真實又真係有嗰個人存在個喎，即係佢哋如果要講電話，或者要FaceTime，咁呢個人真係會存在。
東方昇：吓？
利君牙：其中一個同事嚟嘅。
Kneta：即係佢哋公司嘅。
利君牙：即係其中一個同事嘅女同事，然後20個人都用呢張相嚟啊。
東方昇：即係搵個公司入邊比較靚仔，即係如果依家公司就搵我喇，係咪呀？
Kneta：係係係係係，冇錯冇錯。
樂仔：咁就會開好多Account啦、唔同Apps啊，咁主要就係match一啲男人啦聽佢講，一嚟就會想知道「啊，到底佢有冇錢嘅呢？如果佢係窮鬼嘅就算啦，唔理佢啦」，咁覺得佢有啲potential嘅，就可以同佢friend啲囉，即係噓寒問暖啊。
東方昇：其實啱㗎，因為呢，其實好多人睇佢用咩profile pic都知㗎啦。即係喺格林寶堅尼面前影相、show啲名錶啊，嗰啲咪有錢囉。
專家Dickson：或者去一啲好高級嘅地方食飯咁樣。
東方昇：係呀，即係如果你係好似我哋咁樣，好窮，喺巴士度自拍呢，就一定你都唔理我哋嘅。即係睇吓你有冇錢先啦，跟住先睇吓值唔值得投資去呃佢。
樂仔：係啦係啦，因為以我所知，咁佢哋建立關係嘅時間，都要有返咁上下時間，同埋要心機囉其實。
利君牙：大概幾耐㗎 ？要投資幾耐時間啊？
樂仔：我諗……一兩個月都走唔甩㗎啦。
東方昇：即係唔可以為呢，騙徒呢，就一定係講兩句之後就即刻……
Kneta：快食嘅。
東方昇：原來唔係嘅，佢都係放長線釣大魚嘅，同頭先嗰個Katy嗰個例子其實好似嘅。
利君牙：係，即係起碼都一個月。
東方昇：係啦，跟住仲有呢？
樂仔：咁跟住let say我喺香港，佢就一定會講係喺第二度。
東方昇：哦，點解呢？因為避免見面，係咪呀？
樂仔：係啦係啦，即係中間可能知道佢幾時生日呀、或者可能情人節呀咁樣，咁就會既啲嘢送俾佢咁樣囉，好似好真實咁樣去做囉。
東方昇：哦～即係如果我諗住呃返啲騙徒呢，其實我就喺甜頭嗰度呢，就攞晒啲甜頭！跟住就唔好……
專家Dickson：就冇去投資。
東方昇：係啦！咁就會攞到騙徒啲着數啦！即係唔係叫大家咁做，即係咁講呀。咦，頭先我哋聽咗個真實例子呢，佢就其實類似就可能叫佢投資啦，跟住有少少回報啦，跟住再叫佢投資更大，跟住可能就因為話咩攞唔到錢出嚟，咁你朋友嗰個例子係咪都係咁樣類似呃人呢？
樂仔：即係可能呢個就話攞唔到錢啦，咁有啲就話係你再唔補多啲就會輸晒㗎啦。
東方昇：係啦，一樣啦，類似啦。
Kneta：即係好類同。咦，咁我咁樣聽呢，樂仔，其實你朋友有冇同你講，呢啲有training 㗎 ？即係要上堂之後先可以出去呃人，咁樣有冇㗎 ？
樂仔：應該會有訓練嘅，點樣可以容易啲同佢交心啊、用啲咩topic啊。
利君牙：通常有啲咩㗎 ？我哋想知點樣呃嗰個感情先，我哋好想知呀，我幫朋友問㗎。
Kneta：係呀係呀。
樂仔：我諗好多人會玩交友Apps嗰啲呢，會比較係孤獨少少囉。
利君牙：嗯～
樂仔：或者唔多朋友呀，可能好想喺呢個平台識到啲真心嘅朋友或者另一半，咁佢哋就捉到呢一個心理囉，哦，知道原來呢個人好想拍拖嘅，咁咪不停營造到我好似俾佢溝到啦，或者我俾啲甜頭你，我會有啲特殊嘅暱稱咁樣。
東方昇：嗯～
利君牙：即係叫「BB」，即係一個月就可以叫「BB」啦，係咪啊通常？
樂仔：係啦，嗰啲囉，當係同咗你一齊㗎啦咁樣。
東方昇：即係一啲假嘅承諾，所以其實我覺得呢個騙徒手法其實同溝女一樣。
專家Dickson：係。
東方昇：即係條女鍾意乜嘢，你咪俾啲咩佢囉，一樣咋嘛。
專家Dickson：即係你睇盡佢邊個缺口，就填補佢。
東方昇：只不過溝女係真心愛佢就溝姐，騙徒就用咗呢個方式攞去呃人囉。所以如果Dickson要做一個騙徒，佢都係最渣嘅，最渣嘅騙徒嚟㗎。
專家Dickson：但係同時間我都冇乜俾人呃過，我都想俾人呃。
東方昇：因為你無慾無求吖嘛。咁你個friend說你做，你係冇做到嘅？
樂仔：我冇做到啊。
東方昇：點解呢？
Kneta：有冇啲好吸引嘅Offer開俾你？
東方昇：搵到錢囉多數到，係咪呀？
Kneta：淨係話好有錢？
樂仔：會搵到錢囉。
東方昇：咁你個friend說你做嗰陣時，佢話大概佢一個月可以搵到幾多呢？
樂仔：Er……佢說我做嘅時候，我睇佢着衫呀、戴嘅錶啊，或者你見佢嘅生活啊，咁係有啲錢嘅。
Kneta：係呀！我聽講過有啲呢……係個老細嘅，即係呢個地方係老細。
東方昇：借俾佢吖嘛。
Kneta：即係一大班人上去喺度飲酒啊、食飯啊……
東方昇：大陸嗰啲女人都係啦，租啲名牌手袋黎影相。
Kneta：名媛。
東方昇：擺profile pic嚟釣金龜。搵錢多嗰啲都要整返隻勞力士啊、整返間靚車，係俾人睇㗎嘛！唔好見到佢揸靚車戴名錶，你就想入行啦，好冇啊？
Kneta：心郁郁吖嘛。
東方昇：好啦好啦，好！感謝您，拜拜。

東方昇：咁聽完樂仔咁講，其實同之前阿Katie講嘅嘢係好吻合，其實來來去去都係嗰啲板斧，但其實我哋又唔好聽完之後覺得，嘩，嗰啲社交平台全部都係呃人，我覺得又唔係嘅，其實嗰啲平台係中性嘅。
專家Dickson：因為佢係一個social嘅平台，如果你咁講，電話都可以賴埋啦。
東方昇：因為以前咪就係攞電話呃囉，跟住再之前咪就係面對面呃囉，其實嗰啲平台就中性嘅，最衰係嗰啲壞人！嗰啲仆街就利用大家嘅弱點啊……
Kneta：人性啊。
東方昇：希望俾人愛啊，貪錢呀，嚟呃人。
Kneta：想拍拖。
東方昇：所以我哋要小心呢樣野囉。
利君牙：大家都要小心呢樣野。
專家Dickson：我就更加要小心。
Kneta： Dickson都要小心喎。
東方昇：就算乜嘢平台，識任何人都要帶眼識人，就睇耐啲先。
利君牙：嗯。
專家Dickson：係喇。
東方昇：咁好啦！希望大家有啲咩愛情騙案，即管話畀我地聽，等我地公諸於世！等少啲人成為呢個受害者。
專家Dickson：即係知道吓發生咩事。
東方昇：好啦好啦，拜拜！ ！