14/2《圍爐取戀》情人節放閃特輯，拍拖七日即閃婚！？陀地歌姬Serrini駕到！

眾人: 大家好
東方昇: 嘩，今日情人節呢集，我哋請到Serrini嚟嘅
Serrini: Hello
東方昇: 不過正確啲來講係你自己主動上嚟，好唔要面喎你
Serrini: 係囉
東方昇: 點解呢?
利君牙: 講吓你嘅故事
Serrini: 因為冇嘢撈吖嘛，咁啲演出呀所有嘢都cancel哂，咁就喺屋企自己同自己講嘢，不如上嚟同大家講嘢
東方昇: 正呀! 我哋求之不得啦。咁我哋循例都要問吓你
Serrini: 婚姻狀況係咪呀?
東方昇 & Kneta: 係呀
東方昇: Status呀
Serrini: 暫時未婚㗎
東方昇: 未婚嘅。有冇拍拖呢?
Serrini: 應該係冇嘅以我所知，唔知其他仔仔點諗啦
東方昇: 咁你咁多段拍拖經歷，我估啦，有冇啲好難忘嘅嘢可以同我哋分享下呢?
Serrini: 我有一次最深刻係，我拍咗拖啦，但我阿媽係唔知啦，拍咗四年咁樣囉。跟住仲要個仔仔幫我影埋畢業相啦，又要同佢哋食飯啦。媽媽就話:「咁成日都有呢啲仔㗎啦，使乜理佢啫」
東方昇: 點解呢? 佢唔會好奇嘅咩? 定係佢扮唔知呀多數嗰啲
Serrini: 我都唔知喎，因為我媽咪成日都覺得我係一個會害人嘅女人，佢就覺得你咁嘅死款，你唔好burden其他男仔啦。跟住我爹哋都話:「Take your time，幾時都得㗎~」，即係其實想將我匿喺屋企做一個宅女，Which我都係嘅
東方昇: 嗯，咁佢有冇話催婚嗰啲呀? 即係好老土嗰啲
Serrini: 催婚呀……. 喂，其實冇呀，喺十零歲嗰時有問過囉「你有冇拍拖呀?」咁樣。跟住我就會望住佢哋隻眼話「你想畀幾多錢嫁妝我呀?」即係總之畀好多壓力佢哋呢，佢哋就唔會再想再問任何其他嘢，但係……
專家Dickson: 嘩，呢一個我要學吓
Serrini: 我想成日嗌我阿媽問我有冇拍拖，但佢話:「我唔想理呀」咁樣。之後我話:「你問我啦今年，你想唔想我拍拖呀? 呢個男仔好唔好呀?」
Kneta: 驚咗答你
Serrini: 佢話:「我唔知呀，唔好理，我打牌」咁樣
東方昇: 咁你有冇主動帶男仔上你屋企呢?
Serrini: 冇呀，帶親上去都係一班基佬囉
東方昇: 哈哈哈
專家Dickson: 但係佢唔會懷疑嘅?
Kneta: 唔會懷疑喇
Serrini: 絕對唔會誤會，因為大家都叫自己做自己個姓，跟住咩師奶咁，一齊打牌啦。即係譬如東方昇就叫做「東師幻」咁樣。「喂!東師奶!」「Auntie」咁樣，佢完全唔會有任何非分之想，佢淨係覺得「啊，太好喇~有堆咁嘅男仔上嚟幫我揀衫啦，又會同我打牌啦，我覺得人類呢，真係應該多啲基佬存在」
東方昇: 好，其實我哋今日情人節啦，咁我哋今日個case有啲特別，就係放閃喇
Serrini: Okay
東方昇: 就等啲單身狗呢…… (同時指著Dickson)
專家Dickson: 完全冇理過我感受
東方昇: 就傷害佢哋嘅。我哋今日case大既係點樣呢?
導演: 大嘅就係拍拖七日之後即刻閃婚
東方昇: 結咗婚幾耐呢?
導演: 十二年喇
東方昇: 嘩~
專家Dickson: 唔係十二日喎
東方昇: 係囉，唔係拍拖七年之後結婚十二日喎，係相反吖喎
Serrini: 跟住之後就離婚囉
東方昇: 係囉，唔係咁樣喎。好，我哋接佢入嚟!

嘉嘉(化名): 你好，咁多位大家好~
東方昇: 喂，你好串喎，你今日打上嚟就係話要……
專家Dickson: 掁盲我對眼呀
東方昇: 係囉，放閃光彈曬命喎，係咪呀?
嘉嘉: 少少啦~又唔係好多
眾人: 少少呀
東方昇: 有幾閃你講吓啦
嘉嘉: 我哋拍拖七日就決定結婚
東方昇: 講吓嗰七日……點樣識嘅先?
Kneta: 發生咗啲咩事?
嘉嘉: 我哋其實係同一間公司做嘢嘅，不過唔同部門嘅
東方昇: 係咪咩…有咗呀?
利君牙: 七日就有咗呀?
東方昇: 第一日……即係扑咗嘢啦
專家Dickson: 你有冇常識㗎?
東方昇: 七日驗唔驗到先? 我真係唔知喎
眾人: 梗係唔得啦
東方昇: 應該驗唔到㗎嘛
嘉嘉: 驗唔到嘅，但係唔關事嘅~即係我哋兩個自己冇小朋友，到而家都冇
Serrini: 但係你……返工嘅時候係之前唔識佢嘅?
嘉嘉: Errr，叫見過，即係其實say hi say bye 咁樣啦，跟住到有個project真係要合作啦，咁就識咗個零月之後先至係正式拍拖，咁第七日佢就求婚咁樣囉
東方昇: 嘩~
Kneta: 佢主動喎
東方昇: 喂，咁我想問，佢同你拍拖嗰陣有冇咩特別㗎?
嘉嘉: 冇呀~都係正常拍拖咁囉
東方昇: 咁點解嗰七日變咗咁大變化呢?
嘉嘉: 據我所知，萬綺雯都係拍咗拖七日就結婚㗎啦
東方昇: 如果萬綺雯同我拍拖，我七日都想同佢結婚
專家Dickson: 我七粒鐘都得呀
東方昇: 係囉，大佬，萬綺雯喎，你係咪萬綺雯咁靚先?
嘉嘉: 我梗係唔係啦
Serrini: 好衰呀
眾人: 哈哈哈哈哈
東方昇: 咁你有咩吸引力令到佢七日就向你求婚呢?
Serrini: 唔係，應該問嗰條男人有咩吸引力令到你接受?
嘉嘉: 我一拍拖就覺得好愛呀，愛得好緊要，覺得呢個世界除咗佢，我睇唔到其他男人
東方昇: 嗱，我分析吓先，其實所有人拍拖頭七日都有呢個感覺㗎嘛
專家Dickson: 好少可第一日就話:「你個仆街吖」
東方昇: 係囉，冇㗎嘛。你拍過拖㗎嘛，係咪呀?
嘉嘉: 我拍過拖
東方昇: 咪係囉，頭七日一定係咁樣㗎喎
Serrini: 「頭七」呀講緊?
東方昇: 咁嗰日係佢向你求婚嘅?
嘉嘉: 佢向我求婚嘅~
東方昇: 咁佢點樣呀? 佢無啦啦……
專家Dickson: 有冇好大龍鳳咁樣呀?
嘉嘉: 冇呀~我哋其實好平淡，即係去完街，佢揸車送我返屋企啦
Serrini: 有車嘅?
嘉嘉: 係有車嘅
東方昇: 係咪架車好勁㗎?
Kneta: 洪洪聲係咪呀?
利君牙: 係咪要坐到好低先上到車㗎?
Serrini: 洪!
專家Dickson: 你哋嗰個怨恨好似都大過我咁嘅點解? 我都未問。係咪保時捷先?
嘉嘉: 唔係呀唔係呀，咁多年我都係同佢一齊捱㗎
眾人: 哦~
嘉嘉: 跟住佢就喺架車度同我講，佢就話「覺得好適合，覺得一分鐘都唔能夠分開喇我哋，不如我哋組織一個家庭，可以日對夜對，日日都黐住，唔使再分開喇」咁樣囉
東方昇: 嗱，我聽過呢啲case嘅，多數因為嗰個男仔個媽咪唔知點解要沖喜呀
Serrini: 即係有事嗰啲呀?
東方昇: 係有呢個情況
Kneta: 好衰呀
利君牙: 呢個世界係有愛情㗎!
東方昇: 唔係呀……
專家Dickson: 即係佢結婚就係為咗唔好死老母
東方昇: 唔係……
Kneta: 係度咒人
東方昇: 即係要沖喜，唔知咩事啦，跟住仲要咁急就逼…… 你哋冇聽過呢啲咁嘅嘢咩?
Kneta: 有聽過，但係……
Serrini: 古裝片有聽過
Kneta: 有，但唔會七日囉
東方昇: 古裝片(偷笑)
東方昇: 就冇呢啲情況嘅?
嘉嘉: 冇呢啲情況嘅，我哋仲要唔夠膽話畀阿爸阿媽聽我哋只係拍咗拖七日就決定結婚
東方昇: 咁你嗰刻你應承佢啦，你完全冇懷疑嘅?
嘉嘉: 冇猶豫過! (秒速回答)
Serrini: 幾多歲呀你嗰陣?
嘉嘉: 26歲
東方昇: 嘩~
利君牙: 咁佢幾多歲呀?
嘉嘉: 佢29
東方昇: 嘩……
Kneta: 差兩年咋喎(神數學?!)
東方昇: 又問吓先! 唔好意思 你之前嗰啲男仔係咪好衰㗎?
Serrini: 全部都係難以置信
嘉嘉: 又唔係好仆街，但又唔係好囉
東方昇: 所以你見到呢個就……
專家Dickson: 就覺得好正，即刻就係砰砰聲喺埋一齊喇
嘉嘉: 好正! 覺得佢所有諗嘅嘢都係以我為先咁樣囉
Serrini: 你自細家庭背景係點㗎?
嘉嘉: 好幸福㗎，我阿爸阿媽又係超級恩愛嘅
東方昇: 嗱，多數啲人結婚前梗係sweet㗎啦，跟住男人呢，結咗婚之後又會變衰㗎嘛，佢冇嘅?
專家Dickson: 你會變咗咩樣先?
Serrini: 揈襪囉
東方昇: 唔做家務嗰啲啦，一定㗎啦
Serrini: 揈走啲襪
東方昇: 但之後都係咁好嘅?
Kneta: 都係冇缺點嘅?
嘉嘉: 都係咁好㗎
東方昇: 講幾個例子嚟聽吓先啦
嘉嘉: 好好㗎喎，應該咁講，佢好顧家嘅，好照顧我啦，佢好照顧我爹哋媽咪啦。即係譬如有時我唔得閒，佢自己都會約我爹哋媽咪出嚟，請佢飲茶，同埋佢出咗糧成份糧係畀哂我嘅。佢每一日係攞返一百蚊做零用錢。
Serrini: 學吓嘢啦
東方昇: 嘩!
Serrini: 每日淨係攞一百蚊零用錢
東方昇: 一百蚊? 佢好願意咁樣做嘅? 嘩佢點用呀一百蚊
嘉嘉: 佢願意! 以前五十蚊㗎咋! 一百蚊係最近通脹加咗咋
眾人: 嘩……
嘉嘉: 頭嗰兩三年都係五十蚊咁㗎咋。咁咩錢洗啫?早餐就一齊食完，跟住一齊返工，然後佢咪食lunch囉。然後夜晚返屋企我又煮飯畀佢食，所以佢冇錢使㗎
Serrini: 都幾好嘅。咁你打上嚟嘅目的係乜嘢呀?
眾人: 哈哈哈哈哈
東方昇: 教大家點樣……
專家Dickson: 去追一個咁樣嘅男人呀
東方昇: 咁你哋而家結咗婚幾耐呀?
嘉嘉: 十二年喇今年
東方昇: 嘩! 十二年! 當中唔好話畀我聽冇啲……
專家Dickson: 嗌霎
東方昇: 嗌霎嗰啲喎，我唔信喎
嘉嘉: 真係冇乜喎，同埋我哋鬧交通常為啲家務嘈呀「明明你應承我，幫我拖地，做咩我放工返到嚟你都未拖呀」呢啲囉
Serrini: 哦，呢個係愛的吵架嚟嘅
嘉嘉: 係喇，冇乜啲好大件事嘅嘢
Serrini: 都係嗰句啦，咁你情人節打上嚟係咪想鼓勵啲觀眾，勇敢相信愛情呀?
東方昇: 即刻結婚
利君牙: 唔好拍拖喇，即刻結啦
Kneta: 係喇
東方昇: 求婚
嘉嘉: 其實閃婚冇問題㗎，最緊要係你覺得嗰個人係啱嘅就OK啦。你拍拖十年都會分手㗎啦，最緊要你認定嗰個人係你嘅終身伴侶就OK，但有啲人話結咗婚之後呢就會相處淡如水，即係好似責任咁樣照顧對方，
你老公有冇先﹖

嘉嘉：
我哋無呀，到而家都仲係好似日日熱戀咁。
佢好痴身嘅因為，
佢需要二人世界多過我，
有時我嫌佢煩㗎。
到而家呢刻，我翻翻吓工諗起我老公個樣，
我都會好甜絲絲咁笑出嚟。

利君牙：
但你老公有冇先﹖

KNETA：
諗起都打冷震

東方昇：
你老公望住嗰一百蚊有咩情況﹖
望住嗰一百蚊有冇甜絲絲咁笑出嚟先﹖

嘉嘉：
其實你以為我迫佢咁做...
其實由頭到尾都係佢自己想咁做㗎。

Serrini：
我哋都唔judge你，
我覺得呢個case好好呀。每個人有唔同嘅生活。

東方昇：
嗱其實我喺導演個口中得知，
你個老公一仲要本身係有小朋友㗎喎。

嘉嘉：
係呀係呀


東方昇：
咁樣仲犀利，
點樣可以...

KNETA：
七日接受。


利君牙：
你係第幾日發現嘅呢﹖

嘉嘉：
我哋未拍拖我已經知㗎喇。

Serrini：
係咪覺得好有爸爸好錫個女嘅感覺﹖
跟住覺得託付終生﹖

嘉嘉：
唔係呀，應該咁講，
其實佢有個女仲好，
因為我由頭到尾都唔想要小朋友。

大家：
嘩，正喎。

嘉嘉：
咁我就唁需要有壓力，
因為佢係獨仔嚟。
如果唔係如果唔係我就一定要生小朋友啦。

Serrini：
哦，即係傳統嘅family嚟嘅。

東方昇：
即係有啲會覺得如果另一半有小朋友啦，咁會即刻諗下我點同佢相處啦。 因為會多咗個...

嘉嘉：
呢個有呀。

東方昇：
呢個你點處理？
點樣做後母呀？
教下大家先。

嘉嘉：
其實我嗰陣時都唔識㗎，真係日日返去問阿媽。

Serrini：
點樣接受人哋嘅小朋友。

東方昇
你阿媽都未做過後母。

Serrini：
後底乸。

嘉嘉：
我阿媽做過阿媽吖嘛，
我連阿媽都未做過。
就直接跳咗step。

東方昇：
有冇遇過啲問題， 我唔知呀，我睇過啲電影， 好老土

利君牙：（插嘴）
你都唔係我媽咪！

東方昇：
（扮細路）你唔明我！你唔係我親生媽咪！
你冇資格話我！

即係有冇嗰啲情況出現？

嘉嘉：
，其實呢佢好大個先知，我唔係佢親生媽咪嚟嘅。

Serrini：
20歲先知嗰啲。

嘉嘉：
初初都會好似怪怪哋咁樣，即係佢都會對我突然之間好冷淡咁樣，跟住我諗都花咗年幾兩年時間，去改善個關係，到而家就ok囉所以。

Serrini：
好幸福咁樣嘅model。
即係有個女又好，跟住老公有幾好，跟住人生有冇乜寄託，你人生有咩波折㗎？

嘉嘉：
無喎。

Serrini：
好幸福㗎。好樂觀嘅人。

東方昇：
我想問個女係咪得一百蚊零用錢咋？

（全部人大笑）

嘉嘉：
阿女唔係，阿女一個禮拜有200蚊。

KNETA：
多過老豆。

東方昇：
所以你哋個情況真係咁啱搵到個性格啱，好啱嘅。
咁好啦最後就即係情人節啦，喺度曬緊嚟喇，你有冇啲咩忠告畀大家其實點樣可以為係一段咁長嘅感情呢？

嘉嘉：
千祈唔好吝嗇講嗰啲愛你呀我掛住你呀，甜言蜜語係要keep住講，蝕嗰條關係先可以歷久常生嘅我覺得。

專家dickson：即係你哋而家啲日日都會講嘅？

嘉嘉：
係呀日日都會講㗎。
一打電話呢就會
「有冇掛住我呀？」
「會呀，掛住呀」
會錫啖呀嗰啲，我哋都仲做緊呢啲嘢。

東方昇：
其實我聽呀嘉嘉把聲，都聽得出佢係一個好可愛嘅女仔嚟嘅。

專家dickson：
好熱情

東方昇：
係呀係呀。我懷疑其中一個原因點解你哋維繫到就係因為佢好熱情。

如果我哋要向另一半表達愛意，
有咩方式呢其實可以？

嘉嘉：
我覺得送花阿小禮物呢啲，

Serrini：
畀個list佢

嘉嘉：
唔一定係份禮物嘅價錢 ，純粹係嗰個驚喜好緊要囉我覺得。

東方昇 ：
咁我問下在座咁多位，如果你哋嘅另一半好快同你求婚

KNETA：
我拍得都唔耐，年半咋喎


專家dickson：
年半你同人哋七日比...

KNETA：
我知但係我嗰個心態就係，唔會話因為識咗幾耐而去考慮結唔結囉。
咁我鍾意咪結囉。
橫掂touch wood有啲就算拍咗十幾年拖，要離婚都要離婚㗎喇。
關咩事啫。

東方昇：
Serrini呢﹖

Serrini：
閃婚呀？如果可以閃婚我係願意閃婚㗎。
但係冇呢個機會呀。

東方昇：
你真係會嘅？

Serrini：
我個樣係似奶奶，
或者即係包養人多過，真係會有啲咩先囉。ER... 睇下一個位點講先啦。

利君牙：
我幾認同嘉嘉講嘅嘢，其實我識而家呢個未婚夫嘅時候，頭一個月都覺得好啱，同埋覺得好似識咗好耐咁。但因為我又有啲保守，又會想觀望下，觀望完就...


專家dickson：
即係你唔會囉。

利君牙：
我唔會。但係我又唔明嗰種。
一啱嗰個人就係啱嗰個人囉。

東方昇：
所以嘉嘉其實好勇敢。


專家dickson：
仲要係女仔囉。男仔其實佢未必真係有咁多犧牲。
女仔就好似要拋個頭出嚟。

Serrini：
點解呀？我唔認同喎。
咩叫拋個頭出嚟？

專家dickson：
即係簡單啲嚟講就係，意思就比喻女仔係大致上呢，

Serrini：
FEMINISM。

專家dickson：
大致上嚟講好似犧牲大啲，係呢件事上面。

利君牙：
繼續問啦點解呀？

Serrini：
即係咩呀？
咩意思呀？

專家dickson：（招架不住）

Serrini：
It's ok

（全部人大笑）


Serrini：
好驚，佢心諗 ，返去開post ，「 serrini條八婆成日都喺度咁樣講嘢。」

東方昇：
多謝嘉嘉你分享一個咁樣嘅故事啦。都好令人鼓舞呀我覺得。

嘉嘉：
唔好客氣唔好客氣。

東方昇：
祝你幸福落去啦。

嘉嘉：
ok多謝拜拜。

全部人：拜拜。

（過場動畫）

東方昇：
頭先聽嘉嘉呢個咁幸福嘅例子，其實都唔普遍呀。佢其實點解可以成為都咁幸福嘅一對，呢其實有個好好嘅特徵，就係呢其實佢哋兩個都唔係好計較呀。佢老公就唔計較每日得50蚊，佢老婆即係嘉嘉啦，又唔介意佢老公之前有個小朋友，就盡量去睇下點樣包容一齊相處。所以呢個係個好大嘅原因，點解佢哋可以行到咁長，咁幸福。咁所以我哋可能要學嘢就係學呢啲嘢，唔好咁計較。

Serrini：
家庭觀眾唔好隨便模仿，各位睇緊嘅十三四歲嘅小朋友唔好以為7日就可以結婚。

東方昇：係呀，真係唔好學，經過專人訓練㗎呢啲。
咁阿shirley你對婚姻其實又點睇呢？

Serrini：
我對婚姻呢，就非常之有憧憬嘅。
係呀，我可以隨時閃婚㗎。
即係可能去Santorini呀，去吓las vagas呀。 去唔知邊度閃婚呀。我都ok㗎。

利君牙：
有啲咩人你係會即刻嫁？

Serrini：
如果財產多過我大約十倍以上，咁即係我一離婚，都可以分一半。我覺得..

東方昇：
有賺嘅，幾抵嘅，總之有賺就得㗎喇 。

Serrini：
但係我計計下，如果我將來可能會好有錢，咁就唔抵。咁就要計一計先囉 。
即係或者對方係一個好鍾意睇書呀，好有feel， 但係呢啲係存在喺漫畫裏面嘅咋嘛。咁呀睇定啲先啦。七日就，睇長啲啦。越睇得多就越多缺點。咁可能真係閃婚有佢嘅好處嘅，就係未睇到啲唔好嘅嘢。就係你未知道佢啲襪會唔會周圍掉呀。會唔會喺度對啲侍應唔禮貌呀，又或者會唔會啲指甲裏面有黑邊。你多啲時間會睇到嘅。 但當然啦我咁閹尖就有個問題嘅， 就係你要接納每個人類，你當係嗰啲狗場，咁你即係照顧嗰啲狗。

東方昇：
係單身狗。
（To Serrini) 好啦多謝你啦。
大家繼續睇住留意你啲新歌呀。

Serrini：
留意我嘅婚姻狀況。

東方昇：
我見你ig成日做LIVE㗎喎。

Serrini：
大家唔好睇。

全部人（大笑）

Serrini：
成日敷住面膜咁樣。

東方昇：好啦下集見。情人節快樂。

專家dickson：
我係唔會講嘅。

全部人：
拜拜。