一人一個工人姐姐之匪夷所思👩🏽姐姐因咩事講粗口問候我🤬？落雨天點解要收埋自己呢🥺？！其實我個姐姐最精彩🤣

湘姐：我覺得就係覺得依件事好笑所以冇特登要糾正佢囉。

鄭中基：哦～咁死啦，佢出街比人打，一陣間返到嚟腫咗隻眼你就知。第二個，我有個工人姐姐叫Marine，喺某日嘅朝頭早，我如常起身刷牙洗面啦，跟住個工人姐姐就問我「Sir, what breakfast you want?」，我就話「I want cup noodle, thanks」。點知呢佢拎咗個麵出嚟，我見到眼到凸埋，佢煮咗個麵，然後放左入隻咖啡杯入面，跟手放喺我面前，再同我講話「Sir… your noodle is ready」，我真係喊咗出嚟。

湘姐：佢可能以為Sir鍾意拎住隻杯耳嚟食。

鄭中基：佢可能以為Sir原來成日扮飲咖啡，其實喺到食緊麵。跟住落嚟依位叫做Yuki Leung，佢就話，Wee～之前有個工人姐姐，佢個hard disk容量應該得5mb。我一聽就知你講咩，我諗你係比多咗佢，我諗係5kb。

湘姐：嗰個係Floppy（磁碟）喎。

鄭中基：因為佢只能夠裝到10個食譜，如果再教佢一個新嘅煮法呢，佢就會自動將之前嘅食譜delete咗嘅。咁試過煮一個薯仔沙律，就唔記得煮熟啲薯仔，生切嚟做咗沙律，食咗一啖之後覺得點解啲蘋果冇咩味嘅。

湘姐：生食薯仔好核突喎。

鄭中基：我又試過喎！

湘姐：點解嘅？

鄭中基：（Load緊）嗰時，戇鳩囉哈哈哈… 同啲同學玩，你試過生食未呀，未就試下啦，又得啫。某程度上嗰啲姐姐係會唔記得嘅，我都試過好多次。

助手同湘姐：你自己定你啲工人姐姐呀？

鄭中基：我自己嘅姐姐，通常佢兩個禮拜之後，佢就會好似啱啱第一日返工咁，哈哈哈⋯又着條短褲出嚟。

湘姐：你應該講下你個短褲經歷吖。

鄭中基：之前啱啱請咗個新嘅姐姐，有一日放工放去第一次見嗰嗰姐姐。（我睇到啲咩？）「Emma，what… what happen?」Emma 就話「I don’t know」咁就行咗去啦。我就見到佢着一條好短嘅短褲，佢係嚟到依到，好似人哋打排球嗰啲咁嘅，但係佢個身型，就唔係打排球嗰啲嚟嘅。

湘姐：形容下呀⋯我未見過呀因為。

鄭中基：豪華臀啦。仲要嗰陣時係冬天，佢嚟嗰陣係冬天。

湘姐：你都凍啦！

鄭中基：吓，我話冬天凍你都唔着長褲，佢話舊嗰個呀Sir 好鍾意我着短褲⋯⋯（眾人大笑）未發生依件事之前呢，就問佢以前你僱主對你嘅評價係點樣呀，佢話都好好㗎，阿sir 好鍾意我㗎，跟住話咁你一係比個電話我哋打，同佢傾下呀。佢話好呀，比個電話你地打，佢話你淨係可以搵呀Sir，唔好搵Mum，Mum 好憎我。

湘姐：哈哈，咁梗係憎啦。

鄭中基：好喇，唔好講我嗰啲喇，講依啲啦，依個就叫做Tung Kwok。Wee～我以前個工人叫呀花，佢唔識英文，廣東話又得半桶水。有一次打風，我哋又未返到屋企，就打電話返去叫佢收埋窗台啲花入士多房啦。返到屋企點知唔見人，搵咗好耐先發現佢收埋咗自己喺個士多房到成晚，跟住啲花跌晒落街，哈哈哈哈～

湘姐：因為佢個人覺得自己重要過啲花呀嘛～

鄭中基：佢叫呀花呀，然後叫佢將啲花收埋喺士多房，（扮工人姐姐）「Yes Sir」（關門鎖門），「Sir doesn’t like me」。好喇，跟住落嚟依個叫做黃色嘢，YtstandsforYellowThing。Wee～屋企養咗隻狗叫Money，工人有一日忍唔住問我哋點解隻狗叫炆你嘅，係咪諗住養大咗炆佢嚟食。當晚就考慮不如換個工人，萬一邊日買唔夠餸佢就會炆咗隻狗嚟食。睇下乖唔乖啦隻狗，唔洗一次過食晒嘅，先笑隻手先啦。（講笑㗎咋）我係好愛護動物嘅，依個人講嘅嘢唔代表我哋嘅立場。

跟住依個叫做北極光，佢就話Wee～件事發生喺10幾年前，當時工人姐姐就喺印尼嚟，嗰陣係八月香港好熱，咁每日都30幾度，但係佢每日都叫凍，唯有叫佢喺我哋啲衣櫃揀啲衫着住先啦，點知佢揀咗件羽絨着，仲要着埋去買餸，不過第二年已經適應咗香港嘅天氣。我覺得可能係真係因為佢哋嗰邊天氣問題啦，佢哋長期都好熱㗎嘛。冬天嗰陣時可能就好似閃靈（The Shining）咁結咗冰喺廚房，「點解今朝冇嘢食」，之後見到個姐姐喺廚房到結咗冰。

Wee～到今時今日都仲係諗唔明，工人姐姐點解要一路食西瓜，一路黐啲黑籽⋯⋯

助手：係呀嗰啲籽，啫係西瓜嗰啲核呀。

鄭中基：喺自己嘅大髀上面，吓，啫係佢一路食西瓜，跟住啲核就黐咗喺自己嘅大髀嗰度呀？瞓覺都黐住？黐到第二日，我見佢拎住個樽仔珍而重之咁倒晒入去，每次食西瓜都係咁，直頭儲到個樽仔滿咗，但係我未問佢個原因，佢就返咗菲律賓。頂你咩，你冇答案嘅你！

湘姐：佢要經歷一個儀式係先擺喺佢大髀到，然後第二日先擺落個樽到，佢有一個咁樣嘅儀式，風乾囉。

鄭中基：整乾佢囉，點解唔擺喺張紙巾到呢？

湘姐：所以我咪話佢大髀係咪重點？

鄭中基：咁應該要擺落我工人姐姐個大髀啦，好大㗎，我諗要食成萬個西瓜先得。依個叫做Helen Lau，佢就話Wee～細個嗰陣我有個印尼嘅工人姐姐，佢就專登教咗我一啲印尼文，其中教我講咗一句「烚下烚下」，即係唔洗客氣嘅意思，哦係㗎咩。有一日我同我工人姐姐行吓下街，就見到有個呀伯跌咗支拐杖，咁工人姐姐就出於好心幫佢執咗佢，佢就同工人姐姐講唔該，點知我工人姐姐突然間沖口而出彈咗句「烚下烚下」出嚟，而個伯伯就話我唔該你啫，做咩要話我成個懵樣，諗返起都有啲尷尬。即係「烚下烚下」其實係唔洗唔該咁解，都幾好用呀，「烚下烚下」，打邊爐嗰陣時都成日「烚下烚下」。同工人姐姐去打邊爐，咦點解依到啲人成日係咁講唔洗唔該嘅。

依個叫做23999888，係咪電話嚟㗎依個？Wee～早排出完街，諗住買啲嘢比印尼姐姐食，佢係咁用半鹹淡嘅廣東話話我要炸雞，我心諗，你平時好乖㗎，點解請你食嘢仲要揀。乖就唔揀嘢食㗎啦咩？兩回事嚟㗎喎，呀23999888。後來講多幾次先知，原來佢講話要食齋，齋戒。我有試過請個印尼工人姐姐，佢識講廣東話嘅我記得我以前嗰個印尼姐姐，識講廣東話之餘仲識得煲劇，做完晒啲嘢，佢就話Sir，我做完嘢想返房睇電視，我話好呀你睇吖，我就心諗有咩好睇呢，晚晚都做完嘢就即刻去睇，原來佢係煲緊劇嘅嗰陣時。

咁依個叫做痴線啦，啱呀。佢就話，Wee～朋友個姐姐喺露台食煙，堅喎，but mum講過話唔可以，所以佢等屋企冇人就食，點知Mum突然間返嚟，佢驚得濟就爬去隔離露台就冇事，點知跌咗落街，放心佢一啲事都冇，因為喺一樓。匪而所思嘅係，看間伯伯忽然見到有舊嘢飛咗落嚟，land 咗喺大門口，都未嚟得切做反應，嗰舊嘢已經若無其事、氣定神閒咁企返起身，拉開個玻璃門入去撳Lift。我聽完之後即刻諗返起回魂夜，哈哈哈哈⋯⋯

好喇，依個叫做Ching，就咁啦，Wee～話說我男朋友屋企請咗個工人姐姐返嚟嘆世界，咦，依個都似呀，似我媽，我媽個工人姐姐⋯⋯

助手：哦好靚頭髮嗰個。

鄭中基： 好靚啲頭髮瀑布咁靚，好喇，讀埋依個先，佢話返嚟嘆世界，因為呢佢每日都可以瞓晏覺。我每日都冇得瞓晏覺。一個星期呢淨係出街買兩次餸，佢哋全家就食隔夜餸食足兩三日。嘩！

湘姐：咁洗乜請個人返嚟呢？

鄭中基：有一次我男朋友買咗好多嘢，叫工人姐姐幫手落樓下拎，跟住個工人姐姐就用咗唔正宗嘅廣東話同佢喺電話講，細佬你自己拎啦，哈哈哈哈⋯⋯然後就cut咗佢線，跟住返到屋企見到工人姐姐有講有笑咁喺到傾電話。然後爸爸叫工人姐姐幫手批個梨，跟住工人姐姐就遞把刀同個梨比佢「先生，你自己批啦。」重點係，佢媽媽仲要當住個工人面前大聲咁罵佢哋，話唔可以比麻煩個工人姐姐叫佢做咁多嘢。我全程睇住呢一幕，真心呆撚晒，心諗咁你請個工人返嚟做乜嘢呢？

湘姐：你頭先，我見到你有一下情緒，你好似有好多故事同大家分享⋯⋯


鄭中基：就係嗰啲嘆世界嗰啲囉，啫係我呀媽嗰個，好靚頭髮嗰個。佢有一次就係話佢好攰，咁但係呢個問題係我阿媽屋企冇乜嘢做，佢哋成日出街，跟住又唔係話好屋企食飯，冇咩特別野。佢話佢好攰想請個助手，我話咁點解你咁攰嘅呢，佢話我一個人清理個廁所嗰陣時呢好需要幫手。咁我去佢個廁所到望下，唔係好大咋喎，佢話係呀我鍾意行孖咇，即係佢鍾意兩個人一齊做，掃把都要買兩把，所有野都要買Double，佢一set，佢助手一set，咁當然之後冇請到助手，佢仍然仲係好靚。我個女，呀Emma呢，咁佢有同啲姐姐交換電話⋯⋯

湘姐：講真㗎？

鄭中基：講真，佢哋喺WhatsApp（有傾偈）。

湘姐：跟住點呀？

鄭中基：咁我咪喺到坐喺到睇佢哋WhatsApp，（鄭中基：）「邊個嚟㗎依一個？」，（Emma：）「嗰個咪嫲嫲嗰個Joe姐姐囉。」，（鄭中基：）「Joe姐姐？！」，跟住我督入去睇，見到佢着緊身嘅背心，跪咗喺張床到，好靚，頭髮真係好靚，咁樣擺咗個pose。

助手：張床係邊個張床？

鄭中基：我唔知呀⋯⋯（唔敢想像），好啦好啦，我哋繼續讀落去。依個叫做Lui Jason，佢話真人真事，朋友個老闆見架車好污糟，有日叫埋工人姐姐落停車場，指住部車，叫佢之後洗車抹乾淨。如是者過咗一兩日，個老闆發現佢架車仲係咁污糟，於是乎就問工人姐姐點解仲未洗，之後佢就同老闆去停車場，指住車位上令立立嘅車好冤枉咁話「我已經每日去抹車」。原來，工人姐姐係抹咗同一車位架車，而唔係去抹老闆嗰架車，啫係佢抹錯車。

助手：隔離嗰個好着數，心諗點解我架車咁靚。

鄭中基：係囉，Sir撈得好掂，日日都唔同車，定係Sir你個仆街，日日叫啲朋友揸唔同嘅車嚟叫我洗。

眾人：哈哈哈哈

鄭中基：好，跟住喇Stephen Fish，佢就話Wee～工人姐姐母語唔係廣東話，講嘢會有啲口音嗰種。有次呢佢煮煮下嘢佢個電話響，佢唔方便出嚟聽電話就同我講「同我「奸」咗佢啦」，我碌大隻眼望住佢，然後忍住笑咁同佢奸咗個電話，（其實）係關咗個電話。我識得一個爸叔都係咁，係呀，佢叫關心妍做「奸商研」。嗰個「奸商研」、「奸商研」咁樣，嗰個「奸商研」唱歌幾好聽咁，邊個奸商唱歌會好聽，你可唔可以介紹比我識（哈哈哈哈）。

下一個係成龍，Jacky Chan，佢話有一次呀叔想打電話俾呀嫲（屋企電話），點知工人姐姐接聽，呀叔就話「喂，嫲嫲喺唔喺到？」，工人姐姐就話「嫲嫲唔係喺到。」，呀叔就話「哦～佢喺邊到？」，工人姐姐就話「好啦拜拜」。事後先知道公司培訓咗一套程式，覺得講完唔喺到，對方就會講咁好啦我一陣再打過嚟，所以佢哋下一句會接好啦拜拜。佢心諗，我點知啫「好啦拜拜」咁樣，嫲嫲唔洗同我交帶㗎嘛去邊。

嘩依個叫Iting Lai，佢就話姐姐第一次嚟香港打工，咁我教佢洗衫前要摸下個衫褲個袋，如果有嘢要拎出嚟，我都教咗好多次㗎啦⋯⋯

湘姐：係唔成功嘅？

鄭中基：唔成功，我次次褲袋自己都唔記得攞嘢。咁睇住姐姐做咗一次，姐姐竟然摸住着緊嗰條。（眾人大笑）啫係點呀？咁洗衫之前要咁樣摸一輪自己呀？！

助手：但係佢而家擺明就係摸人哋嗰條啦！

鄭中基：姐姐竟然摸佢着緊嗰條褲，嘩係喎，而唔係需要洗嗰條褲個褲袋。（眾人大笑）有日換衫，發現點解衫袋有包紙巾，去問姐姐，姐姐話，洗完晾乾之後又放返入件衫。

助手：好有手尾呀～佢要記得邊個衫入面擺咗包紙巾。

鄭中基：係呀，咁啫係佢冇洗到啦包紙巾，個紙巾冇爛㗎喎。

湘姐：可能佢冇洗到（件衫）。

鄭中基：吓？！

湘姐：唔洗，直接摺（衫）

鄭中基：我嗰次，我仲未講完我嗰個好靚頭髮嗰個⋯⋯

助手：繼續啦～繼續聲討

湘姐：來吧，來吧～

鄭中基：佢好勁㗎，啫係佢係需要好多人去幫佢手做嘢。我記得有一次就係我屋企個工人姐姐唔見咗，我第二日搬屋我喺到包緊箱，封箱嗰陣就嗌佢幫手，點知嗌嚟嗌去都冇（冇人應），咁我就問點解，（佢）走咗出去邊，因為我有個小朋友嘅，就廢事佢哋喺到搞住晒喇，就送咗去我呀媽嗰到。咁點知我個工人姐姐就真係喺我呀媽嗰到，我話「點解佢嚟咗你嗰到㗎呢」，（佢媽媽：）「幫手洗碗」，我話「點解要幫手洗碗呢，你個姐姐唔洗碗㗎咩？」，嗰個姐姐就話「你啲小朋友嚟食飯呀嘛，你就要自己帶自己個姐姐嚟餵佢食飯，幫佢洗碗。」。啫係嗰啲佢就唔洗唔做嘅（無奈眼神）

助手： 吓，分得好清楚呀。

鄭中基：咁我就問我呀媽，你請客人呢，如果你請客人返嚟食飯，你會唔會叫佢「你記得啦，自己帶自己個工人喇，我個工人唔理你㗎。」（眾人大笑）好啦，今日嘅時間差唔多啦，聲討大會就此結束。