港女 尖叫 第一次👄 | 一路向北識女仔 #03

講明先，我一直對伯明翰印象都唔係咁好……Carrie就話...「得喇！我carry你喇今日」仲話一定要令我對伯明翰改觀。

肥仔：我就咁行都見到有個殘體字招牌，呢度好多大陸人？
Carrie：可能都有20 - 30%，因為我呢度都幾近唐人街。
肥仔：你啲鄰居嘅比例係幾多？即係香港人、大陸人同埋外國人。
Carrie：我諗係外國人最多，之後係大陸人，香港人佔最少。真的
肥仔：我們今天…(普通話講)
Carrie：就用普通話吧 (普通話講)
肥仔：對！我們今天就用普通話！你覺得我的普通話怎麼樣？
Carrie：你不如講返廣東話喇。

伯明翰就喺倫敦嘅西北，搭火車應該2小時之內到。作為一個大城市，好多人移民都會揀伯明翰，其中一個原因就係因為有好多大學。當然，你識諗，其他國家嘅人都識諗，所以伯明翰入邊都有好多唔同種族嘅人。至於你話食嘢方面，都真係有唔同國家嘅美食。直到今年，港式茶餐廳終於登陸伯明翰！

肥仔：鏡頭可以pan(影)落去(啲食物度)……人在異地能夠食到同香港一樣嘅嘢食係一種喺伯明翰嘅幸福。
Carrie：平時喺香港好少食茶記，但係嚟到呢度一定要食……有冇香港嘅感覺？
肥仔：(好似)返撚咗去咁。

(杯奶茶)係我香港喺飲嘅味道嚟㗎喎，我為咗佢會返黎嚟伯明翰…
仆你個街…呢間冰室幫伯明翰加分，本身好低分。
Carrie：點解？
肥仔：(之前)未嚟過呢度(冰室)，嚟到呢度加分。

呢啲表情絕對唔係效果，我依家已經掛住呢杯奶茶。咳咳…不過係時候出發去第一站喇，到底喺伯明翰係有咩玩㗎呢？

肥仔：老老實實平時你喺伯明翰會做咩？
Carrie：打牌、行街 (笑)……好期待你今日會帶我去邊…
肥仔：你喺香港都係玩呢幾樣？
Carrie：都有...但係喺香港多啲朋友就會多啲出去玩。
肥仔：你有幾耐無試過大聲尖叫？係high果隻
Carrie：好多年。你………想點？
肥仔：你ok嗎？你緊握拳頭喎，係唔係想打柒我？

—------------------------------------------------------------------------
肥仔：行喇
Carrie：啱啱我見要玩60分鐘………我想6分鐘玩完……(唉)換鞋先…
—------------------------------------------------------------------------

伯明翰郊區有一個歷奇中心，原來Carrie一直都好怕玩高空活動，因為佢有啲畏高。但係一場嚟到，第一次認識，為咗留下一個深刻印象，喺你心目中留低一個英雄形象，我梗係逼你上去玩喇！嘻嘻嘻嘻…一齊聽吓當佢遇到難關嘅時侯會點做？(由於佢喺上面搞咗太耐，所以剪最精華嘅部分出嚟…準備……！)

Carrie：呀....真係唔得，我真係唔得㗎。
肥仔：背負住Carrie呢個名！勇敢踏出第一步！
Carrie：我好弱㗎！你返翻嚟先講。
肥仔：痴線，我唔睬你喇……嗌出黎好啲㗎，快啲過嚟啦！
Carrie：真係唔得…我真係唔得㗎！！
肥仔：你要記住你隻左腳一踏出，就好似你嚟英國咁，無得返轉頭。
Carrie：(哭腔) 但係我真係做唔到！！
肥仔：踏出你嘅comfort zone！
Carrie：我真係好驚………我真係好唔得 (喊)

肥仔：到喇！Yes！你突破咗自己呀！但係你知唔知最慘係咩？
Carrie：(哭腔) 要返返去吖嘛…
肥仔：你已經快過上一轉好多，原來呢個世界啲嘢就係咁。
Carrie：(哭腔) 點？
肥仔：一次生兩次熟 (笑)，但係我呢次唔拖你過嚟，呢一步你一定要自己行
Carrie：唔好喇
肥仔：靠自己踏出，俾啲掌聲佢咁多位觀眾！！
Carrie：頭都暈埋

聽到佢叫到咁係唔係以為好緊張？其實一樓嚟㗎咋，你睇下隔離條友行得幾快？不過有時突破comfort zone係有啲難，就好似佢由香港轉到嚟英國打工，佢都要鼓起勇氣踏出comfort zone。

肥仔：咁有冇一刻係想返去？
Carrie：冇呀真係，係零。又唔可以話完全適應曬，但係我冇一刻係唔鐘意呢度。我覺得我慢慢融入緊，喺度重新開始返工、識朋友。點解我揀伯明翰呢？雖然我公司倫敦同伯明翰都有分部，但係伯明翰物價低啲，俾同一個價錢我可以住大啲、舒服啲，同埋空間又多啲。依家返咗工，work-life balance好啲。
肥仔：聽落好似好少人移民去英國係做銀行相關嘅職業。
Carrie：但係因為我做HR，要請人，我覺得呢度都幾多工作機會。
肥仔：真係？
Carrie：我公司都請緊好多。

肥仔：喺香港同英國，你都有試過打銀行工呢啲咁高尚嘅職業。你覺得最大分別係咩？
Carrie：我係幾鐘意喺呢度返工。第一就係…例如大家都有個deadline，呢度嘅人係好relax咁去做。例如5點就係deadline，但佢哋3點仲可以去take個break。如果喺香港你可能要一路食杯面一路做，但佢哋唔會，同埋我都好鐘意自己條team。之前一齊去Christmas market，之後我嘅deparment head…佢都叫做lead住十幾人，但去到佢係好主動問我哋飲咩，話佢去買。你知Christmas market好多人㗎嘛，佢就自己去排隊買曬之後自己一個人拎返嚟……我就覺得呢度無咗一份階級觀念。

肥仔：如果我喺香港做銀行，係可以點樣入行？
Carrie：其實我覺得好容易。我自己覺得…大家都話嚟伯明翰好難搵文職嘅工，我係完全唔同意。一嚟我知道呢行係缺人，咁當然佢會揀喺香港都有相關經驗，所以如果你喺香港做開文職，我覺得喺英國搵工就唔難。

同香港非人嘅生活相比，喺英國嘅工作模式一定係比較輕鬆，但係Carrie同好多香港人一樣，其實心入面都有好多嘢放唔低。

肥仔：最掛住屋企人？
Carrie：係呀………(喊)，通常我講起屋企人都會喊……掛住屋企人囉。
肥仔：呢個都好正常嘅
Carrie：每逢佳節倍思親
肥仔：特別依家係Christmas

肥仔：有冇為咗屋企人掙扎過嚟？
Carrie：有呀……因為我本身都好癡屋企，同埋同屋企人關係好好，不過嚟咗呢度之後關係好似更加好。以前喺香港多朋友，一個星期返屋企一兩日其實已經算多，我阿爸成日都會話我當屋企係酒店咁，淨係返嚟瞓。但係依家去咗第二個地方，你更加要同佢哋聯繫。雖然我返office係9-6，其實我收工佢哋已經瞓曬教，咁我盡力4-5點或者星期六日同佢地facetime，盡量如果我work from home更加會(聯繫佢哋)。以前佢唔會知我做緊咩，依家我做緊咩都會話俾佢哋知。我覺得我都慢慢克服到……因為我都會搵到方法保持聯絡。
肥仔：我覺得好似你啱啱玩繩索咁，即係第一步可能好痛苦，但行第二次第三次，順咗就會冇事。
Carrie：最緊要行出最難嘅第一步。
肥仔：原來行咗就會返唔到轉頭(笑)。

時間一路路過，我相信好多香港人同Carrie一樣，諗緊方法點樣解決自己呢一個死穴。好喇，既然玩完刺激嘢，同你行吓街浪漫吓。

Carrie：好high呀你
肥仔：你試吓跟住我搖………伯明翰擁有全英國最大嘅…
Carrie：Christmas market！
肥仔：無錯！係全英國最大嘅Christmas market，你知唔知點解？
Carrie：真係唔知。
肥仔：Christmas market係源於德國，以前伯明翰同法蘭克福係姐妹城市，所以就會咁有特色。
Carrie：哦 ~ 長知識
肥仔：入去睇下有冇嘢行！伯明翰最開心應該都係Christmas market啦。
Carrie：好有氣氛真係…
肥仔：佢係真係最有氣氛，啲人真係喺到享受聖誕，真係飲酒食嘢。
Carrie：佢地係由朝飲到黑(笑)。
肥仔：唔知條片係幾時出街啦，但係依家呢刻呢疫情爆到仆街 (Carrie：每日10萬)，所以一定要帶口罩，美中不足就係大家睇唔到個大家個樣。

Carrie：肥仔話有份禮物要送俾我。
肥仔：無錯
Carrie：多謝
肥仔：朱古力笑笑波板糖，呢個係聖誕禮物……手震喎你。
Carrie：因為我都有份嘢要送俾你，係一個薑餅人音樂盒。本來我想送一個護膝俾你，因為我知你鐘意踢波，同埋方便你返去跪玻璃，但係考慮到依家聖誕節，所以都係呢個好啲。

肥仔：如果呢條片過十萬view你先食得，唔夠十萬就唔食得………等到幾時(笑)。你食嘅時侯要影相證明，要自己食曬佢喎。下次見喇我哋。
Carrie：好，下次見！
肥仔：我哋扮到好似唔係一齊行咁…(笑)