Samsung Galaxy S21 FE 試玩評測：五千蚊「輕旗艦」 與S21同門較量？｜Samsung Galaxy S21 FE Impression

Alright呢部就係Samsung 2022年推出嘅第一部機S21 FE。點解22年出番部S21呢？呢層要問番Samsung啦。咁Samsung已經係第二次推出一部FE版，Fan Edition嘅S系列手機架啦。咁佢嘅目標係好簡單直接嘅姐，以個一年嘅旗艦級嘅S系列作為藍本，拎走一啲唔係好重要嘅功能，以一個相對地有親民啲嘅價錢推出比大家。上一部S20 FE呢就係憑住呢一個concept係個陣突為而出，今次呢部S21 FE仍然都係承繼緊呢個concept嘅……kind of

Galaxy S21 FE入面用緊一粒Snapdragon 888 SoC、8GB RAM、128/256GB UFS3.1 storage。所以單憑chipset嘅定位嚟講呢，呢部S21 FE係絕對係一部高階機嚟嘅。我知有部分人對呢粒S888 chip有好多批評啦，咁但係公道講句佢performance係唔差嘅，我未好仔細test過呢部S21 FE嘅performance係點啦，咁但係以上年咁多部用S888嘅機做參考，估計佢都9成人嘅需要架啦。

機身正面就有一塊6.4” 1080p 120Hz 嘅AMOLED屏幕，咁係屏幕方面呢Samsung係呢部S21 FE度冇同你慳嘅，基乎將佢地最好嘅手機屏幕放落呢部機度，你要120Hz有120Hz；你要HDR有HDR；連塊玻璃都係用最好嘅Gorilla Glass Victus，係爭在冇比到2K解像度你姐，咁不過係呢個價位唔比都好合理姐。咁呢塊mon呢係好typical嘅samsung mon嚟嘅，佢好sharp啦好光啦；同埋佢係平面mon咁所以絕對唔會有誤觸嘅情況啦除非你自己手殘嘅姐，咁所以佢個mon係幫呢部機攞咗唔少分嘅

咁跟住到個fingerprint scanner呢就開始見到F21 FE嘅一啲偷雞位啦。拿！講明先，偷雞唔一定唔好嘅，如果好似S20 FE咁樣識偷嘅話呢係好事嚟嘅。咁F21 FE個mon底下呢都有一個finger print scanner。咁但係呢個就係一個光學式嘅scanner而唔係其他S21系列機用緊嘅超聲波scanner，雖然好似降咗一級咁，但係初步印象佢個速度都okay嘅。跟住佢個設計，咁S21 FE嘅後面呢係用緊一個塑膠機背嘅，overall嘅設計語言同佢原型S21/S21+差唔多嘅姐。
用咗個霧面嘅機背設計啦，咁不過顏色上就有啲唔同啦，有黑綠紫白四隻色。

咁呢四隻配相對冇S21個啲咁sharp嘅，Tone down咗少少嘅。我手上呢隻就係炭灰黑啦，老實講佢係近灰多過黑色，左上角都係有個突起嘅camera bump啦。咁不過呢個camera bump就唔係用金屬啦，偷一偷雞同機背一樣用番塑膠。咁所以就冇咗好似S21個種金屬機框同camera bump同出一轍嘅感覺啦，係咪好影響呢？呢樣嘢就各花入各眼啦。

S21 FE嘅設計唔講得上係特別搶眼亦都唔係特別礙眼，經過咗S21系列一年嘅歷練之後係幾穩陣嘅設計嚟嘅。跟住佢個相機係用緊一個三鏡頭嘅系統啦，佢嘅主攝鏡呢的確同S21係用緊exactly同一粒sensor同一個鏡頭嘅一個12MP f1.8光圈嘅鏡頭，咁呢個係一件好事嚟嘅，因為S21個粒主攝鏡係唔差嘅，咁但係佢個遠攝鏡就由一個64MP嘅鏡頭轉用咗一個8MP f2.4嘅鏡頭。咁呢個鏡頭pixel count係細咗，但係真 有3x光學zoom嘅遠攝鏡，而唔係好似S21咁靠高像素同運算去做digital zoom。咁邊一個做法效果好啲呢？我未敢講，但我純粹想指呢一個分別姐。跟住個超廣角鏡同S21一樣都係12MP f2.2光圈架啦。不過佢個視角廣咗少少嘅，但係同時間佢pixel size就細咗，咁到底係好咗定差咗呢？又係一個好大嘅問號。咁佢個自拍相機就用一個32MP F2.2嘅鏡頭，睇落去比起之前S21 10MP嘅自鏡好好多啦，但係S21 FE嘅自拍鏡係冇自動對焦嘅，咁又係啦，邊一邊好啲呢？

S21 FE其餘嘅規格都唔差嘅，佢有一舊4500mAh嘅電池啦，仲大電過S21添。然後又有齊哂IP68認證、5G、無線差電，仲要佢呢部機嘅定價係非常之進取！256GB版係賣緊$5598，128GB再平啲添：$5198。不過要留意佢都係冇Micro SD卡槽嘅所以我諗大部分人都會買256GB架啦。係呢個價位好多機都未必有咁齊嘅hardware功能，特別係啱啱講到嘅無線差電同IP認證，再加埋佢個chipset呀、佢塊mon呀、三鏡頭呀，其實S21 FE成個package係幾吸引嘅。

但係，呢部機有一個問題，而個問題不在於部機本身嘅質素。如果好狹窄就咁睇部機嘅話，佢係一部知package好齊完善嘅機嚟嘅，而且個啲所謂偷雞嘅位我覺得都合理。個問題係在於我呢條片經常提起嘅一部機：S21。上一次S20 FE之所以可以突出到，除咗因為佢可以以一個好親民嘅價錢帶到一部有9成旗艦功能嘅機比大家之外。另一個原因係⋯⋯佢係個陣冇乜對手，但而家而家成個市場都已經唔同咗。其他brand唔講啦，Samsung自己已經有S21嘅係度。

S21係上年年頭出個陣其實已經搶咗好多FE版嘅嘢嚟做架啦，佢都係將當時一部好旗艦嘅旗艦機：S21 Ultra。減走啲花巧嘢，淨番嘅就係一部好基本但又好齊全嘅「輕旗艦」，再以一個好親民嘅價錢推出。同一個築略嚟架喎，仲要而家係Samsung online store度256GB嘅S21係賣緊$5398，兩部機相差兩百蚊姐。呢兩部機係規格上、定位上同定價上都好相近架，咁所以我唔係好明白Samsung係想點，我更加唔明白Samsung想我地點。

Let’s say 我有5000幾蚊我想買部機，咁我應該揀邊部機，仲要我都未講S22下個月都出架啦喎。如果S22出咗之後Samsung停售S21呢，咁S21 FE嘅存在就make sense好多啦。但Samsung係咪真係會咁做呢？我都唔知。