CES 2022 焦點新品速報 全球科技盛會｜Samsung · LG · Sony · NVIDIA · AMD · Intel｜【Price.com.hk產品快訊】

CES其中一個受注目的新品就係電視機。同上年一樣，Samsung、LG同Sony都發表咗佢地嘅2022年電視機系列。先講Samsung，一口氣發表MICRO LED、Neo QLED和Lifestyle TV系列，當中主打大size的MICRO LED將會有3個尺寸(110吋、101吋與89吋)，具備2,500萬粒超微型LED，可以對亮度和色彩進行超過100萬級的精密控制，提供真正的HDR體驗。另外亦可呈現100% DCI和Adobe RGB色域。至於Neo QLED電視就加入了「進階對比度映射技術」，進一步提升Mini LED背光的亮度和色彩控制力。4K和8K的型號都支援144Hz和AMD FreeSync Premium Pro技術，仲會透過Shape Adaptive Light控制亮度的表現，同埋以Real Depth Enhancer分辨畫面的主體和背景，從而加強逼真感。

除此之外，Samsung仲會推出全新的電視介面，以及加入NFT平台，俾用家直接在電視買賣 NFT數碼藝術品。喺出新電視的同時，Samsung亦都發表了一款利用Wi-Fi電波充電的電視搖控器，比起去年發佈的太陽能充電款的搖控器可以提供更加穩定的電力，基本上只要屋企有router，個搖控就會有電。而且佢亦內置了多個串流頻道的快捷鍵，好似係Netflix、Disney+和Amazon Prime Video，仲有黑色和白色可以揀。

至於LG就繼續發展OLED電視。上年推出的OLED「Evo」面板放喺今年的G系列和入門級C系列上，前者亮度更會再次提升。兩個型號的HDMI都會增至48Gbps，支援120Hz 4K畫面，亦都有虛擬的7.1.2空間音效。尺寸方面，LG今次亦特別為C系列加入較細的42吋型號，同埋為G系列加入巨型的97吋型號。另外，電視系統亦會更新至webOS 22，加入「多用戶界面」，好似Netflix、Disney+咁，為每個家庭成員提供個人化內容。

眼見各大電視品牌都用上量子點面板技術，Sony亦宣布推出旗下首款採用QD-OLED面板的旗艦電視A95K，號稱會有更寬可視角度和更豐富的色域。另外亦會推出採用mini LED面板的Z9K與X95K，分別提供Contrast Booster 20和15的光度表現。除了色彩和亮度之外，相信呢兩部電視最大的亮點就落咗喺呢個智能web cam上。佢唔單止可以用來video call，仲識得分析環境光線和色溫去調整畫面，無人睇電視時更會自動調暗亮度。另外亦會偵測用家的位置，再將聲音的重心移到該方向，並且可以用手勢控制大細聲、 關機等。呢個咁聰明嘅鏡頭可以用喺2022年全線Sony電視，而以上兩款型號將會跟機附送。

講完電視就講下電腦。NVIDIA喺CES公佈咗旗艦顯示卡RTX 3090 Ti。雖然張新卡同3090一樣只係得24GB GDDR6X RAM，但記憶體頻寬就加大去到21Gbit/s，整體效能比3090高12.5%，係目前30系列入面最勁嘅顯示卡。除咗RTX 3090 Ti，NVIDIA 亦都推出咗notebook 版3080 Ti和3070 Ti，並同時引進第4代Max-Q技術，進一步提升laptop顯示卡嘅效能。官方話 3080 Ti仲勁過前代嘅Titan RTX枱機顯示卡，能以2k 120fps嘅最高設定打機兩款新顯示卡將會喺二月份出現喺各廠嘅gaming laptop。

講起laptop顯示卡，AMD亦都喺CES公佈咗主打輕薄嘅Radeon RX 6000S。官方指新系列嘅顯示卡在功耗同效能上有提升，可以在不損失效能的情況下令noetbook薄20%。不過大家反而應該考慮吓未來嘅notebook仲需唔需要獨顯，因為AMD最新嘅notebook CPU系列Ryzen 6000已滿足到不少輕度玩家的需要。新嘅CPU採用咗RDNA 2內顯，官方話佢嘅遊戲效能比起上代足足提升咗2倍，能夠以1080p玩到大部份3A大作，而且佢仲支援FreeSync技術。同埋Dynamic HDR嘅熒幕令內顯都提供到唔錯嘅畫面質素。

接著繼續係AMD嘅消息。預計喺今年春天上市嘅Ryzen 7 5800X3D將會採用AMD獨家嘅3D V-Cache封裝技術，而今次亦都係佢哋第一次將呢項技術應用喺枱機CPU上。AMD指新CPU有高達100MB嘅總快取，喺1080p遊戲上，性能會比Intel 12900K勁5%。而對比起自己嘅Ryzen 9 5900X，性能亦都有15%嘅提升。除咗新嘅CPU外，AMD亦公佈了Zen 4 Ryzen 7000嘅計劃。官方指次世代嘅CPU會喺2022年後半年推出，將以5nm製程打造，採用新嘅 Socket AM5平台並支援DDR5同PCIe5。而官方更即場試範以Ryzen 7000 CPU運行《Halo Infinite》。

AMD 嘅對手Intel一樣唔執輸，佢哋亦發表咗採用混合式架構平台嘅第12代Core i notebook CPU，打頭陣嘅將會係高性能、主要用喺gaming laptop嘅H系列，而輕薄效能級的P系列及輕薄長效型的U系列就會遲啲登場。Intel指12代Core i比11代嘅同級晶片快40%，並且喺好多好食CPU嘅遊戲當中，FPS都會有明顯嘅升級。官方就以《Hitman 3》作例子，指遊戲可以用P Core來處理物理引擎，E Core專注處理背景音效嘅分工，可提升8%FPS。而在生產力應用方面，Intel更加話CPU嘅跑分贏咗Ryzen 5900HX以及Apple M1 Pro及M1 Max。目前有不少廠商，包括HP、ASUS、ACER都發佈咗配備第12代Intel Core嘅notebook，有興趣買新機嘅朋友可以考慮吓。

講到配備12代Intel Core嘅laptop，Alienware嘅X14都幾受注目，因為呢個牌子嘅機一向都係sell輕巧，而今次呢部新機竟然係配備12代Core i7處理器和RTX 3060顯示卡，而機身厚度則維持於1.44 cm，並打造出自己旗下最薄嘅gaming laptop。Alienware表示，X14係第一款同時支援NVIDIA G-Sync以及Optimus技術嘅14吋notebook，而新機預計喺今年冬天開賣。至於配備RTX 3050、16GB RAM及256GB SSD嘅基本款將會賣$1,799美金，折合港幣$14,000。

睇埋電競熒幕，最矚目的應該就是Samsung Odyssey Neo G8，因為它是全球第一款配備 240Hz的4K熒幕，具備32吋1000R曲率，並採用Quantum mini LED背光，峰值亮度達2000 nits。另外，Samsung亦同時發表了Smart Monitor M8和S8，前者內置了智慧電視功能支援SmartThing操作同埋磁吸式的SlimFit視訊鏡頭，而後者則是全球首款獲得UL認證的零反光屏幕，特別為content creator而設。兩款屏幕都擁有32吋UHD解像度，而S8還有27吋可以揀，三款芒(mon)都會在今年上半年上市。

基於土地問題，相信香港唔少玩家都被迫將部Console駁落電腦mon度玩。唔知HP係咪留意到市場有咁嘅需求，它們發表一款4K mon Omen 27u，表示可以完美支援PS5同Xbox Series X。呢款螢幕支援HDMI 2.1和DisplayHDR 400，並且內建有一對喇叭，用家只要駁好部機就玩得。另外IPS面板覆蓋95%嘅DCI-P3色域，支援144Hz更新率與RGB燈光，就算用嚟做緊電競mon都唔錯。Omen 27u預計今年春天在北美上市，定價係$700美金，折合港幣$5,460。唔知呢個價位對大家嚟講又有無吸引力呢？

至於Router方面，預計今年都會有唔少Wi-Fi 6E產品登場。Netgear就帶來了兩款新WiFi 6E Router，分別為Nighthawk系列的RAXE300與中小企業用的Orbi Pro SXK50。前者提供7.8Gbps的頻寬，可以覆蓋約232平米的範圍，而後者就主要用於Mesh網絡，可以支援最多75個用戶。

除了電視機、電腦同電腦周邊產品外，亦有唔少同智能生活有關的產品，當中有多款支援Apple Find My的物件追蹤器，好似係Chipolo的Card Spot就是一款可以擺喺銀包入面嘅卡形追蹤器。另外仲有一款內置了物件追蹤器的Targus電腦袋，可以擺到15.6吋的電腦，而且擁有反追蹤能力，撳個掣就可以尋找iPhone，一次充電可以用到一年時間。值得一提的是，這電腦袋利用26個回收水瓶製成，又安全又環保，唔知大家有冇興趣呢？

另外 L’Oreal’s呢款手持式染髮機就可以俾用家喺屋企做到salon的染髮效果。呢款叫做Colorsonic的染髮機外形有啲似捲髮器，上面的刷毛每分鐘以「之」字型擺動300多次。染髮劑就會過噴嘴，均勻地噴在髮絲上。有咗佢之後就可以喺屋企DIY喇。不過呢款產品預計要到今年年底或2023年初才會全面推出。至於個人影音方面，新產品就有JBL的新款真無線耳機，包括Live Pro 2、Live Free 2以及Reflect Aero。3隻耳機都支援主動降噪、智能環境模式、語音控制、觸控操作以及IPX5以上的防水等級，它們最大的分別在於外形和電量。除此之外，JBL亦都推出了3款不同定位和設計的便攜式喇叭，分別是Boombox 3、Pulse 5和PartyBox Encore，遲啲有機會都會同大家評測～