3/1《圍爐取戀》忘記不了我的前度...歌手JC陳詠桐來襲！

（片頭動畫）
（主持：Dickson，利君牙，Kneta，東方昇／嘉賓：JC）
眾人：Hello！
東方昇：嘩，今日好開心有歌手JC做我地既嘉賓！Wow 歡迎歡迎！
東方昇：你知唔知呢，我同Dickson講你黎嗰時呢，佢好開心！佢話你係佢而家唱緊歌既女歌日之中，最欣賞既五甲之一
JC：多謝多謝
東方昇：所以即刻調左位先！
利君牙：好！
東方昇：調位調位！好野！（拍手）
（利君牙同JC調位，JC變左坐Dickson隔離）
利君牙：你睇下佢紅哂呀塊面！
JC：其實……其實佢都係宅男裡面我最欣賞嗰個
Dickson：嘩！識講野識講野！
眾人：（拍手）好野好野！

東方昇：喂，咁我知你今日上黎係因為你有首新歌叫《分手100天》啦
JC：係～
東方昇：咁我地講啲正經野先啦，一定係有一段感情hurt得你好勁，所以你先會諗到呢隻歌既
JC：咁呢首歌都係幾personal既，即係我自己都覺得，但係就細節唔講啦，即係主要呢首歌都係想講，其實有時你分左手之後……
東方昇：我想聽細節喎
JC：哈哈哈哈哈
東方昇：係點解hurt到你……（字幕：娛記上身）
利君牙：你等人講完介紹左先再講啦！
東方昇：點解hurt到你咁樣要寫首歌去抒發呢？
JC：自己咁岩咁有感受既時候，即係你就會有好多靈感，咁咪好多靈感你就會諗，啊，不如寫首歌啦
Dickson：呢個係咪解得通，我就係覺得佢咁細個，點解佢唱歌既時候好似好知道發生緊咩事
東方昇：係呀係呀，Dickson就係咁樣讚你架啦
Dickson：因為佢每首歌都好似好慘，好知道發生緊咩事
東方昇：因為你未拍過拖姐，所以你唱情歌咪唔得囉
眾人：哈哈哈哈
利君牙：所以你唱歌無感情
JC：本身個人比較多愁善感少少，即係呢個我諗都係好多歌手呀，或者做藝術既人都係
東方昇：咁即係下次每次有新歌都又係……
利君牙：咁我地知咩事喇喎
Kneta：有下一段感情呀
東方昇：咁我地今日個case係咪又同分手有關架？
工作人員：今日個case犀利喇，係一個關於分手、復合、再分手，然之後而家想打電話上黎問下咁多位主持，應唔應該再復合既故事呀
東方昇：多數問我地都話分手處理架喇呢啲
Kneta：唔好復合喇
東方昇：接黎聽下先！
Dickson：好，接佢入黎啦！

本集主題：《離離合合心未淡，復合定斬纜？》
事主Jason（化名）

東方昇：Hello Jason！可唔可以講你個故事黎聽下呢？
Jason：咁前幾日啦，我就岩岩分手既
東方昇：前幾日就分手既？真既？
利君牙：分第幾次呀？
Jason：errrr係之前分手左一次，跟住復合左之後再分左一次囉而家
眾人：哦……
利君牙：哦第二次分手喇
Jason：咁之前再分左一次係點解呢？就係因為嗰陣時就覺得自己戇X呀，可能就忽略左佢啦，加上我自己就無咩經驗啦，因為我同佢都係大家既初戀咁樣啦，就令到佢好失望，好傷心呀
（字幕：分手主因 後知後覺，忽略伴侶的需要）

東方昇：有咩戇X既例子呢？
Jason：即係佢有時就好想分享啲野俾我聽，想我覆佢咁樣啦，但係可能我自己就做緊assignment，到佢已經無mood再講落去既時候我先覆佢囉
利君牙：即係佢係咪有少少好專注係佢學業嗰度，所以做野覆唔到女朋友
Jason：係喇係喇
東方昇：即係唔係戇X，係你未好了解女仔既心態，多數呢啲女仔send俾男仔就即刻要覆架啦要，秒覆架啦
Kneta：chur住佢添呀
JC：我覺得睇下你睇下幾時囉，即係如果譬如佢返緊工既話，佢八個鐘唔覆我都ok
東方昇：你ok既？
JC：但係如果佢放左工，佢真係好得閒又唔覆我既話，我就會覺得有問題囉
Kneta：因為個女仔覺得而家我呢一刻需要你，你唔係度，咁就你以後都唔使係度喇，嗰種感覺囉應該
（字幕：絕不能讓女生失望）

Jason：即係可能有時候佢講話去邊度，跟住我覆左個「可」咁樣囉就
眾人：嘩！！！！！
東方昇：就太衰喇你！
（字幕：震驚）
JC：喂，Jason，「可」真係有啲過份
眾人：係呀
Dickson：你連個「以」字都唔打！
利君牙：打多個「以」丫喂
JC：你咪話okie咁樣囉！O-k-i-e咁樣囉，都幾cute you know
（字幕：用字的重要性！）
東方昇：咁都好小事姐，但係因為呢個觸發到……
利君牙：女仔黎講好大事，第一次拍拖既女仔
Kneta：好感情架嘛女仔
JC：我覺得尤其是係女仔佢仲要係可能應該年紀細啲既女仔，係會重視呢一啲儀式感上面既野囉
Jason：即係我無諗過佢會咁睇重呢件事，就係變左咁樣囉第一次嗰陣時

JC：咁點解又會復合呢？
東方昇：因為佢一分手就即刻覆佢呀，「唔好啦～」咁樣，好快覆左咁就即刻……
利君牙：你終於秒覆我喇～好啦～
東方昇：係咪咁呀？唔係丫嘛
Jason：唔係。咁我係知道自己衰左既，咁其實我嗰陣時不斷咁搵佢就……
東方昇：認低威
Jason：認錯先啦，一定係認錯架喇，因為真係做得唔好丫嘛，之後因為我覺得佢仲係鍾意我，我都係鍾意佢，咁佢就俾多次機會我咁樣啦。
（字幕：真誠道歉打動對方）
Jason：跟住咁我地復合之後呢，我直頭覺得個關係已經唔同左呀，我變左做一個下把位喇我覺得自己
（字幕：Jason認為……復合後關係變質了）
Jason：因為我知係做得唔好丫嘛，咁我係要做多啲去彌補返之前我做得唔好，咁我係明既，但係我覺得有時候個關係我覺得應該係大家對等咁樣先開心架嘛，但係我唔想突然間話邊個上把、邊個下把咁樣既
眾人：嗯～ 係
Jason：跟住第二次分手嗰時我就話，其實我覺得自己付出左好多，但係我覺得你唔係真係好似好開心我為你改變咁，我覺得自己就無形有種自卑感呀

東方昇：唔係唔係！你講個例子先，因為你太虛啦
Jason：咁就有一次佢就生日啦，我就偷偷地用我地嗰啲相就整左一條片俾佢囉
東方昇：咁幾好丫
Dickson：即係為女朋友做一啲細心既野
東方昇：幾浪漫丫幾好呀，跟住佢呢？佢鍾唔鍾意呢？
Jason：我覺得佢係鍾意既，但係我又未feel到佢真係好真心鍾意，即係能話「嗯……好感動呀」，即係有少少表面咁樣囉我覺得佢係
利君牙：男朋友送禮物俾你既時候你會點表現呢？如果你好鍾意既話
Kneta：嘩！！（高音）（拍手拍手）咁囉
利君牙：如果唔係好鍾意呢？
Kneta：嘩…多謝……鍾意呀……（chok聲）
眾人：哈哈哈哈

JC：會唔會只係佢係一個唔係好善於表達既人，即係佢內心好感激，但係佢無表露到出黎
（字幕：JC提出……或許對方性格內斂因而產生誤會）
Jason：呢個其實我都唔清楚，同埋我同佢分手嗰陣時呢，都係通過打字去講出黎既，打個電話傾下都唔得
JC：哦，佢唔願意同你去有一個面對面既交流？
Jason：係喇係喇，因為第一次分手嗰陣時，佢就打左段咁既事，復合嗰陣時同佢講就係「有啲咩其實大家當面講清楚，係會比較好既，因為起碼我知道你而家既感受，我面對面見到你，我可以有種交流同你講」

東方昇：咦咁我想問喇，咁你第二次同佢拍拖，你出街，咁你地唔會溝通架？唔會講心事架：
Kneta：定你地好少出街呀？
Jason：你話心事又無特別去講，好多時都係圍繞去玩咁樣囉
眾人：嗯
（字幕：日常溝通流於表面）
東方昇：咁玩玩下去到摩天輪咁樣，傾下計都唔會既？
Jason：有既，但係又可能大家都未咁放？
JC：咁其實我覺得你地兩個都唔係話有一個……即係好成熟既一個所謂談戀愛
東方昇：（用力）係呀！我就想……
Dickson：使唔使咁大聲……
東方昇：拿，首先我會分析先呀，我覺得呀Jason呢溝通都唔係咁叻架喇，我係聽你講左好耐，我都唔係好明你講咩
Dickson：好多時候係佢一輪嘴係度講
東方昇：係呀。但係我咁聽返黎，可能你個另一半呢佢溝通能力仲差過你
Dickson：係。但係我有啲懷疑佢另一半既溝通能力未必係差過佢，只不過因為佢係自卑心作祟架有啲。即係譬如人地俾你既回覆無你想像中咁大，你就覺得人地「唉，佢唔鍾意我喇」
（字幕：Dickson認為……Jason自信不足，容易胡思亂想）
東方昇：好多都係你諗佢，「哎，我覺得佢唔係好開心」，即係你好自己匿埋係個腦度拍拖

利君牙：不如搞搞佢自卑先啦，點解佢會……
Jason：點解個自卑感會黎左呢？就係本身我可能讀Asso，跟住佢就升左去讀degree咁樣，就竹山 5得好似有一種差距出左黎
眾人：哦……
（字幕：學歷差距+環境轉變）
Dickson：同埋你覺得佢有機會係新既環境入面認識到一啲比你更加好既人
Jason：即係有一啲更好既人，我自己個自卑心就出返黎咁囉就係
JC：既然你覺得你自己讀Asso係一個導致你自卑既一個咁大原因，咁其實你應該將啲時間更加努力讀書，可能睇下點樣升返上去
東方昇：好難架
Jason：嗰陣時我就係因為咁樣諗，就開始放左好多時間去讀書度，所以我就咁忽略左佢
東方昇：所以真正你攞返你既自信，都未必係讀書架，你應該搵你既長處，你有長處你先吸引啲女埋黎架嘛
（字幕：東方昇建議……發掘長處就能重拾自信）
JC：唔好去諗你個前度嗰啲呀我覺得
東方昇：越呢段時間俾啲空間佢
JC：係喇。咁你自己有所成長囉，咁即係有麝自然香啦
（字幕：花若盞開，蝴蝶自來。）
東方昇：係呀，就第二個都會衝埋黎架喇
Jason：了解

Dickson：定係我見你有種失落既感覺，其實你會唔會諗住，其實打上黎就係想我地鼓勵你去追返你既前度呀？
Jason：唔係，我就係斟酌個位，我應該係斬纜丫，定係我繼續去追返佢咁樣囉，呢個我就掙扎緊囉
東方昇：首先我問Jason你，你係咪仲好愛佢先？
Jason：係呀
東方昇：我既意見就係，你俾佢抖一抖先，唔好咁chur佢先，你再咁aggressive呢，佢會覺得好反感，佢會憎左你。我覺得你要放長線釣大魚
（字幕：東方昇認為……逼得太緊，只會有反效果）
JC：同埋我覺得你係呢段同佢斷絕聯絡既時間裡面，你要俾佢睇到你有一個本質上面既改變囉，即係可能佢本身就係覺得你個人好自卑，跟住之後你又好demanding既人黎既，咁你可能可以旁敲側擊咁樣展現到你個性上有轉變呀，即係可能你個人已經係睇開左喇咁樣。即係我唔知你點樣做啦，可能post下啲social media又好呀咁樣，點樣都好啦
（字幕：JC認為……要讓對方感受到自己的轉變）
東方昇：影住個天，跟住「我看開了、心境開放」
JC：係喇，嗰啲啦。即係當然你自己個人都要進步啦，你知道你自己個問題係邊，咁你就要去改囉

利君牙：同埋我咁樣聽落Jason呢，因為佢頭先講左個重點就係，兩個都係第一次拍拖，所以就好難想像要去搵個新既人丫嘛，即係會keep住好想挽救返第一段嗰個感情，所以……
Kneta：即係彌補嗰個遺憾
利君牙：係呀……咁我覺得你可以俾啲時間自己諗清楚，又俾對方抖下氣。同埋你要記住呢，萬一你地復合呢，都係兩個人既事黎架嘛，即係唔係你自己諗完就算架嘛，你都要睇下人地肯唔肯制先得架
Jason：嗯～
利君牙：同埋我身邊都有啲朋友分左手然後復合既，佢地成功既原因呢，就係因為佢地再一次復合既時候呢，佢地唔會記得之前既野架喇，係零同零開始，咁樣先會……
（字幕：必先放低過去，才能重新開始）
東方昇：呢個好好喎，呢個岩呀
利君牙：咁樣先有機會成功囉

JC：我地唔係復合，我地係重新開始
Dickson：再出發！
東方昇：係囉，無呀，就係俾兩方面都抖下先啦，學習下先啦，大把青春啦你，廿幾歲姐都係
Dickson：廿幾歲囉係
利君牙：好唔好呀今日？
Jason：好呀，超好呀
利君牙：超「可」呀
JC：祝你幸福快樂啦，好嘛？
Jason：好丫好丫
眾人：好！拜拜！
Jason：拜拜

東方昇：其實我覺得Jason呢個case呢，雖然我頭先好㷫咁成日咁樣鬧佢啦，但係其實我見到我自己呀。因為我第一次初戀呢，都類似咁樣
利君牙：都俾人鬧，例子！
東方昇：講個例子俾你聽，就係呢，以前覺得做呢個男朋友既角色呢就一定要千依百順。我記得係每逢大時大節呢都會買禮物俾對方既，即係覺得一定要貴就係對方開心
Kneta：代表個心意
東方昇：係喇。跟住頂唔順喇，即係有少少，我買個禮物好貴，佢又買返好貴既禮物俾我，我再買啲好貴既禮物俾佢，你明唔明呀，跟住死喇，我無錢添
Dickson：即係大家鬥貴
東方昇：係喇，跟住開始覺得唔得喇，我要同佢溝通，真係開始溝通。喂，其實大家不如咁咁咁
Dickson：我好窮呀其實就，然後佢就同你分手喇

東方昇：errrrrr，係！但係之後拍拖我就舒服好多喇
Dickson：所以我咪話佢係其實好好彩囉，你諗下佢溝通能力其實唔算好好
東方昇：係
Dickson：但係佢能夠有拖拍
東方昇：知唔知點解呀，因為我地同佢傾電話，可能佢好靚仔
Dickson：咁我一世都無架喇喎
眾人：哈哈哈
東方昇：咁咪解釋到你咩囉
利君牙：佢頭先諗住安慰自己，點知你一下就……
Kneta：你睇下佢個樣！
Dickson：我即刻自卑心又作祟架喇喎
JC：所以你都係唔使再進修你既溝通能力喇
Dickson：係呀，係無用架
東方昇：你可以打電話溝通
Dickson：係時候去整容喇！
東方昇：係呀

東方昇：喂，咁JC你呢首歌就《分手100天》啦，有無啲可以安慰到佢既野呢？
JC：其實我覺得有兩句都幾岩岩岩嗰個情況既，就係「難忘和舊愛太開心」定係「難忘還是我太不甘」。即係聽岩岩打上黎嗰位朋友講啦，即係我會覺得佢「不甘」多過佢真係好愛個女仔。假設你真係好愛佢，其實我諗佢應該係會選擇哦，佢開心就得啦，咁我放佢走啦咁樣
東方昇：你講得好岩就係，其實你唔係好清楚，因為個思想好混亂
JC：係
東方昇：究竟我真係掛住佢，定係我唔爭氣，我覺得「喂，我要贏，我驚輸」，但係其實可能旁觀者就最清楚囉。
（字幕：愛惜vs不甘）
東方昇：咁所以聽多啲你啲歌

利君牙：即係如果阿Jason最後真係無復合呢，咁即係分手啦，咁就可以聽JC既歌喇
JC：咁就岩喇
Kneta：無分手都可以聽
JC：分唔分手都可以聽～
東方昇：咁就感謝今日你上黎啦
JC：多謝大家
東方昇：大家記住上YouTube聽啦下嘛
JC：邊度都好聽！
東方昇：邊度都聽！好！拜拜！
眾人：拜拜！