位處世界十字路口擁絕佳位置，是重要的軍事基地，但仍難以脫貧 — 吉布地共和國

佢就係我哋今集嘅主角位於非洲之角既吉布地共和國，我哋首先睇吓吉布地嘅地理環境，佢位於紅海入口同亞丁灣嘅交界處，係世界最繁忙嘅海運航道之一。通過蘇伊世運河、鴻海同亞丁灣，可以連結歐亞兩大洲，每年全球商船大約有30%會由呢度通過，更加係波斯灣石油產業嘅必經之路。全球有11%嘅石油必須通過亞丁灣先可以運輸到煉油廠，吉布地港目前亦都係全世界最重要嘅非洲轉運中心，而且仲負責咗非洲內陸進出口嘅主要海港。非洲嘅第二人口大國，東非經濟強國衣索比亞就鄰近住吉布地，不過因為佢唔靠海，所以所有嘅海運進出口都要倚賴吉布地嘅物流服務。2018年統計，衣索比亞有超過90%嘅貿易量都要倚賴吉布地既物流工作，喺呢個背景下世界各國嘅軍事策略家同政治安全事務專家都將吉布地列為重要國家名單，美國、法國、中國、等大國都喺吉布地擁有軍事基地，佢嘅重要性可謂備受公認。中國更加將吉布地納入一帶一路投資名單當中，2012至2020年間總投資額有140億美元咁多，就咁聽吉布地應該係一個快速發展中嘅非洲強國，但係事實上直到而家佢仍然係世界最窮嘅國家之一。2018年吉布地嘅人均GDP只有2050美元，同年嘅新加坡人均GDP大約係6.4萬美元，究竟點解兩者可以相差接近30倍咁多呢？

首先係氣候嘅問題，吉布地除咗沿海地區之外，境內嘅土地大部份都係沙漠同草原，亦都冇固定嘅河流流經。全年氣候炎熱小雨幾乎冇農業糧食嘅發展，糧食自主性極低，只有一啲畜牧業可以提供肉類好似驢、羊、駱駝、山羊等。

第二吉布地人口太過稀少，人口唔夠一百萬而且因為長年貧困醫療環境又差，根據聯合國「2020年世界人類發展報告」統計，吉布地既人類發展指數係全世界189個國家同地區中排名第166名，到而家依然處於低於人類發展水平，平均壽命只有61歲。先天不良嘅氣候環境，人口太過稀少令吉布地經濟發展緩慢，好多基礎建設例如鐵路、工業都難以快速發展，加上後天嘅政治環境令吉布地命途坎坷，佢喺1888年被法國殖民統治，二次大戰後非洲大陸各國興起獨立運動，但一直到1977年吉布地先正式脫離法國獨立，成立吉布地共和國，至今只有短短40幾年歷史。

國內兩個民族伊薩族同阿法爾族長期已嚟又有對立問題，1991年北方嘅阿法爾族因為不滿受伊薩族統治而發動內戰，武裝行動持續左整整三年政府先同反對派簽訂和平協議，逐漸轉型為憲政總統制國家。內戰、政治動亂、民族問題都耗費咗政府大量嘅資源同埋心力，讓吉布地長期處於動盪之中至2001年先正式結束。動盪告一段落之後，吉布地迎來左一位強人總統，蓋雷（Ismael Omar Guelleh）喺1999年上任之後直到而家連任咗五次，佢長期打壓反對派，係被公認係獨裁嘅鐵腕領導人，最近一次嘅選舉投票中佢嘅得票率高達98.58%，德國智庫阿諾德研究所（Arnold Bergstraesser Institute）分析家卡姆斯基認為根本唔係真正嘅選舉， 呢場投票比較似係一種確認嘅程序，因為好少人知道反對派嘅候選人係邊個。2001年911事件後美國展開全球反恐戰爭，吉布地內戰啱啱平息，蓋雷就襯呢次機會向美國招手，出租領土比美國同其他各國進駐吉布地設立軍事基地反恐任務，吉布地最熟悉嘅法國擁有最大嘅駐軍基地，除咗美國、法國、中國、日本之外，意大利、德國、西班牙亦都紛紛派兵駐紮喺吉布地，目前就連沙地阿拉伯都籌備緊進駐工作以伊朗喺亞丁灣日漸擴張嘅勢力，同制衡吉布地對面國家葉門嘅什葉派武裝組織。

而亞丁灣就係一個非常複雜嘅地方，經濟嘅四通八達亦都引起海盜虎視眈眈，由21世紀初期開始，索馬利亞海盜就喺呢度猖獗興起，佢哋會打劫商船並勒索贖金，另外有啲企業會趁亂喺呢度傾倒有毒嘅廢料，2006年開始以美國海軍為首喺呢度組織「海事安全巡邏區」，一共25個國家嘅海軍參與巡邏，喺各國強烈嘅打擊下海盜嘅勢力先逐漸消退，雖然每個進駐嘅國家都各自懷着精打細算同政治考量，但對於吉布地來講各國的駐軍進入令吉布地免受海盜同其他嘅威脅，減少左本身嘅軍隊開支。喺國內高失業率、糧食同石油價格極度不穩嘅狀況下，「軍港經濟」亦逐漸成為佢哋嘅經濟支柱，根據資料法國每年需要向吉布地支付約3395萬美元租金，美國就每年比6300萬美元租金，軍港經濟除咗可以帶嚟租金之外，亦都吸引咗一部份嘅外資進入協助當地的基礎設施，例如日本同吉布地建交以來已經累計提供咗1.12億美元以上嘅援助。2017年中國嘅一帶一路政策更大手筆投資140億美元，包括鐵路全部由中國承包，由火車車廂製造到鐵路人員嘅培訓中國一手包辦，仲進行引水工程由鄰國伊索比亞引來地下水，解決吉布地三分之二嘅人口用水問題。2018年7月由中國建設嘅「吉布地國際自由經濟區」成立，設有港口及其他各項嘅公共設施，為海外公司提供穩地嘅營運基地，蓋雷致詞嘅時候提到吉布地國際自由經貿區有望舒緩國內高達50%嘅失業率，未來可以提供高達35萬個工作機會，讓國家發展逐步上軌道。蓋雷嘅經濟策略就而家嚟睇的確為吉布地殺出左一條血路，亦自有佢嘅一套道理但亦都有玩火嘅風險同危機潛在當中。

喺「軍港經濟」中經濟係一層糖衣，其中包含着各國嘅軍事意圖，美國同中國嘅關係緊張，兩國喺非洲嘅部署由北非嘅茅利塔尼亞，南非嘅納米比亞到東非嘅吉布地都說明咗人國角力絕對唔只係經濟上嘅擴張，亦都係為日後可能出現嘅衝突做足左戰略嘅準備。美軍非洲司令部長湯生喺早前美聯社嘅訪問中表示，中國喺某啲非洲國家上嘅影響力已經超越美國，藉着開發港口嘅計劃對經濟同基礎建設嘅發展，令中國未來喺非洲獲得更大嘅成功，中國就否認佢哋嘅企圖並表示設立軍事基地嘅目的好單純，只係用於護航同維護和平任務嘅補給保障。

從資料嚟睇中國同美國係吉布地設立嘅軍事基地相差不遠，如果中美關係持續緊張，發生衝突嘅機會率亦會提高。20年前先由內戰中恢復和平嘅吉布地，難保唔會再一次陷入動盪之中，而且今次仲係難以控制嘅強權角力。另外，「軍港經濟」亦都成為咗吉布地嘅浮木，嗰啲由其他國家「投資」嘅基礎建設喺日後恐怕會成為一道經濟難題，位於印度洋嘅斯里蘭卡就可以作為借鑒，斯里蘭卡因為高度依賴中國嘅投資累積欠債超過80億美元，因此要依照合約租借港口比中國99年。而吉布地目前欠中國嘅債務已經高達GDP嘅70%，如果吉布地還唔到錢佢嘅土地資產會唔會被接管目前仲係未知之數，軍港經濟亦代表着吉布地始終都會受到各國列強嘅影響，喺擺脫之前都難以有一套真正獨立自主嘅經濟政策。

好啦！今集嘅窮奢極慾就到呢度，我哋下次再見啦拜拜！