空姐一人去英國 🛫 | 一路向北識女仔#01

Adgi：Hello~~
主持：What’s your name？
Adgi：My name is Adgi.

主持：呢度就係劍橋，今日嘅嘉賓就係...…
Adgi：Adgi！
主持：Adgi 係一個甜品師傅…
Adgi：初學嘅初學嘅…
主持：你嘅笑聲係有少少扯蝦咁㗎喎。點呀你嚟咗呢到有幾耐？
Adgi：10個月左右……今年2月過嚟
主持：點解會揀Cambridge呢個地方？
Adgi：因為我有一個朋友之前讀嘅大學係喺呢頭，跟住佢就係有個host family介紹，咁我就係果到落腳
主持：嚟之前其實你都唔太知呢到係點？
Adgi：係呀唔知呀，只係知道有一間好出名嘅大學

主持：呢個節目叫《識女仔》，表面就好似係我識你，實際就唔係嘅
Adgi：我識你係唔係？
主持：無錯，我俾個機會你識我
Adgi：咁你執到喇，豐富嘅節目等緊你！緊唔緊張呀！？(笑)
主持：Very good (笑)

配上呢啲音樂你可能會覺得呢個係一個普通識女仔嘅節目。錯！我係要踢爆佢話喺英國會有豐富節目絕對係一個大話！

當你哋打開地圖，你會發現Cambridge係喺倫敦北面左右，車程大概個半鐘左右喇。呢度最出名當然係劍橋大學，當中最多人玩嘅活動就係劍橋撐篙。其實唔係你撐…係果個麻甩佬撐。喺呢個咁悶嘅城市，你竟然話自己有豐富節目？我就同你join一次撐篙，睇吓你有幾enjoy。笑吖…夠膽就笑吖…你又真係笑㗎喎……

主持：你嚟到呢度之後有冇坐過(撐篙)？
Adgi：冇呀，第一次，緊張緊張……我哋可以表演鐵達尼號，咁啱有塊木板喺度…
主持：…OK我冇呢個打算…

主持：你有冇俾人搭訕過呀？
Adgi：都有...但係我有少少懷疑。果時我仲係做緊待應，咁就有一對gay couple話自己慶祝周年紀念，之後就問我拎IG，再約我食飯，咁我當然無去喇。之後我就心諗究竟佢係真gay定假gay呢？又話慶祝周年紀念但又要約我出去食飯。之後我就唔理佢
主持：有時三人行，必有我「撕」
Adgi：唔好咁喇(笑)
主持：就唔知佢撕你定係你撕佢嘞
Adgi：互相撕殺 (笑)

主持：本身你係做咩職業？
Adgi：空姐
主持：你做空姐？即係你係裁員潮果啲……(Adgi：係 (笑)) 嚟咗呢度你就決定由頭開始揀一個全新嘅職業？
Adgi：無錯。咁我一過嚟，隔離嘅時侯就好似瘋子咁搵工，用咗三個星期搵到第一份工，就係喺酒店做侍應嘅工作。做咗三個星期左右，咁我就遞信想辭職
主持：咁你真係唔係好捱得
Adgi：因為我搵到另一份工人工好啲，之後manager想留我，就問有咩條件會令我留低。(我話)如果你可以offer我入去廚房做我就留低

主持：你係由細到大都想整甜品？
Adgi：係呀，我11歲開始就整餅
主持：之後12歲就送一個甜品俾男朋友係咪？
Adgi：冇呀冇呀(笑)，冇呢樣嘢

雖然你由細到大都鐘意整甜品，但係你一出嚟做嘢就做空姐，你依家入廚房你捱唔捱得住呀？

主持：嚟到呢度做到甜品師傅，工作環境係點呢？
Adgi：所有同事都好友善，但係係真係辛苦
主持：空姐辛苦定依家辛苦？
Adgi：呢份工辛苦啲。你要準備食材，有咩唔夠就要訂、接落嚟有咩派對要準備？同埋有幾多個人，呢啲我都要負責去計劃點樣去完成
主持：咁你工時長唔長？
Adgi：都長，呢排就更加長，因為我個老師放假，得番我一個，可能就要返10個鐘
主持：10個鐘？！
Adgi：佢有休息時間，通常我都會忙到無時間休息

主持：好喇真係問入啲，空姐人工好啲定依家人工好啲？
Adgi：依家…依家好啲。雖然要俾稅，但係都係依家人工好啲
主持：我睇到佢答得咁肯定……無錯真係依家(好啲)
Adgi：其實我冇咩唔適應，可能因為啱啱開始係做待應，同空姐都有少少似，就係每人都要見唔同嘅人。入咗廚房其實我都係要見唔同嘅人，都唔會自己埋頭苦幹係咁做唔理人

主持：咁你識到朋友?
Adgi：大部份都係返工識。有西班牙、葡萄牙，波蘭人都有
主持：佢哋都係差唔多年紀 ?
Adgi：係呀
主持：咁你真係好爽。你有錢搵，有搵到朋友，又有船坐
Adgi：Live in a dream. (生活在夢想中)
主持：講得出呢幾個字，我覺得你係真係滿足
Adgi：係呀，有得整餅就好開心，搵到自己想做嘅嘢唔容易
主持：夢想係唔係開鋪？
Adgi：想開鋪，我想兩、三年之內開

主持：好靚喎呢度
Adgi：但係其實我地啱啱已經經過
主持：因為有你，所以好靚
Adgi：多謝多謝……即刻好感度加分…加加加加
主持：我準備咗好耐㗎喇，終於搵到位講
Adgi：諗咗兩個幾鐘係咪？(笑) 就喺揸車上嚟嘅時侯

主持：一路坐喺船上，能夠聽到Adgi對夢想嘅追求，我都覺得好開心。你見我哋兩個人用一張毛毯，我相信佢一定好滿意我嘅安排
Adgi：如果係個再靚仔同我坐我會開心啲，同埋我成個人都會暖啲

膚淺，女人就係膚淺！雖然男人都係一樣…
我嘅活動就安排好喇，咁你又安排咗咩活動俾我呢？

主持：平時你嘅weekend係喺度做啲咩？
Adgi：行街
主持：咁同喺香港一樣
Adgi：都差唔多，但唔同嘅地方就係呢度冇咗香港嘅朋友
主持：咁呢度有咩街行？
Adgi：通常我都會行Tesco superstore同market square
主持：嗱Market square真係好多英國地區都有，有咩特別先呢個？
Adgi：地區性啲囉呢個…(笑)
主持：……即係冇特別喇！

主持：平時你就係行下呢啲市集？
Adgi：係呀係呀，因為啲鋪頭唔係日日都一樣，所以可以睇下佢有冇咩新奇啲嘅嘢
主持：新奇啲嘅嘢，或者好食嘅嘢

主持：(同來自馬拉嘅老闆講)可唔可以要一份餃子？
老闆：餃子？ 一份？
主持：多唔多香港人過嚟呀?
老闆：好多都搬嚟呢度住
主持：嚟呢度過夜呀？
Adgi：過夜? 我好少過夜…我返屋企多…(笑)

不論係喺英國定香港，Adgi呢個女仔嘅日常活動好似都係差唔多，但喺佢口中有一樣嘢係不可取締。

主持：結婚戒指？
Adgi：唔係，Friend送
主持：Friend送？咁你班朋友係唔係大多留喺香港？
Adgi：無錯。我覺得重點唔係咩活動，重點係你同邊個一齊。喺香港同啲朋友都冇咩特別嘢做，有時會打吓牌睇吓Netflix，其實都好開心
主持：但係依家冇
Adgi：有時會唔開心。或者返工有啲唔順意，就會覺得如果佢哋喺身邊就好……因為始終有時差

主持：咁你點處理孤獨感?
Adgi：Text佢哋…就算知佢瞓咗都text佢哋，或者係text依家(喺呢度)嘅朋友
主持：其實你都係一個例子嚟。只要你踏出第一步，行出去，搵份工，你就一定識到人
Adgi：係呀無錯，我就覺得一開始做朋友嗰陣唔係你講嘢先，就係我開始講嘢先，所以唔洗怕(做主動)

主持：不過我好肯定大家都會繼續見到佢，因為我會搵佢拍嘢。
Adgi：好呀…果個叫咩……我唔記得咗果個中文叫咩…
主持：仆你個街，嚟咗小小時間扮唔識講中文。
Adgi：唔係呀……果啲咩呀...後會有期！！！好似係
主持：取消同你嘅拍攝計劃！(笑)

由空姐變成甜品師傅，追夢一啲都唔易。人在異地，朋友嘅支持可能變得更加重要。Cambridge悶唔悶我就俾唔到答案你，但我相信佢生活得好開心。下一集，我哋繼續北上搵女仔。

【後記】
Adgi：肥仔話佢準備咗一件禮物俾我，我依家好期待
主持：白卡之星，送份禮物俾你
Adgi：多謝多謝
主持：每一集嘉賓都會有，咁呢個就係聖誕老人碟嚟嘅。知唔知可以用嚟做咩？
主持：會唔會係放甜品上去？(笑)
主持：冇錯啦！
Adgi：有料有料

Adgi：係唔係即係我要整甜品俾你食(笑)……係唔係呀?
主持：係！
Adgi：我早有準備嘞！
主持：真係㗎？！
Adgi：無錯，小小心意
主持：嘩…係咩嚟㗎？
Adgi：係brownie
主持：可唔可以打開？有冇示愛？
Adgi：今次無(笑)…下次先
主持：多謝你！hand-made真係感動

主持：咁交換禮物啦
Adgi：交換禮物(笑)，咁要有啲儀式

(握手)

主持：唔好成日借啲意掂我喇(扮嫌棄)
Adgi：俾人發現咗添(笑)
主持：走啦小心啲喇
Adgi：拜拜下次見~~