廿二世紀殺人網絡：創世、自由與進化

創世
到底係我眼中， Matrix 係一個點嘢嘅故仔呢？佢發生喺未來，成個世界由電腦控制，睇落好高科技咁，但其實我覺得好大程度地，其實係一個宗教故仔，係一個聖經嘅故仔。就住成個故事，你會見到好多同宗教有關嘅符號，例如主角Neo 係教世主，佢女朋友個名叫 Trinity ，係三位一體嘅意思等等等等。而成個故仔同聖經其中一個好相似嘅地方，就係兩者都有創世嘅情節，去問緊一個問題：到底應該創造一個點樣嘅世界俾人類去生活呢？而其實講到尾，個問題就係問緊人到底需要啲咩，一個點樣樣嘅世界先係適合人最美好嘅世界。

話說去到未來，人類成為咗電腦嘅奴隸，所有人平日所經驗到嘅，都係由電腦創造出嚟嘅虛擬世界，亦即係所謂嘅 Matrix system，人類終其一生就係作為一粒為電腦提供能量嘅電池，換言之人類即係被電腦奴彼緊既。而有一啲革命軍就想反抗，帶領人類走出奴役。原本就咁睇呢個故仔就好似一個有關於抗爭既故事，一開始我諗觀眾都會覺得佢哋真係真係對抗緊電腦，但後尾我地就會發現其實所謂嘅抗衡原來一直都係一個局。

拿，就係呢個白頭佬嘅局。呢個人同好多其他人一樣，就咁睇落好似一個人，但其實佢就唔係人嚟嘅，佢係創造 Matrix 嘅設計程式嚟，叫做 Architect，就係佢創造虛擬世界出嚟俾人類生活。佢喺呢個故仔其實就好似聖經嘅上帝咁，由佢決定個世界到底係點。所有其實都係佢嘅「設計」，而係呢個故仔入面，呢個設計師要面對嘅，正正就係要諗，到底點樣可以創造到一個適合人類生活嘅美好世界。

第一次設計師整個 Matrix 世界俾人類生活嘅時候，佢諗住一個無痛苦只有快樂嘅世界，夠晒完美啦，點知人類居然接受唔到。雖然故仔無解釋好多點解會係咁，但喺第一集 Matrix入面， Agent Smith 就話，佢覺得人類係要以痛苦嚟定義自己嘅生活，佢嘅意思其實可能係講緊，假如人類只得快樂而無痛苦，其實係唔夠，因為無痛苦，我哋就無嘢去克服，無野去挑戰，所以人類唔會有咩成就，人生亦唔會有意義，所以咁樣嘅人生唔夠美好。

於是第二次設計師就參考返人類歷史，諗住整個同人類原來世界差唔多嘅 Matrix 俾人生活，但後尾人都係接受唔到，最終都係失敗。設計師就發覺，如果自己要成功，就要好似人咁諗嘢，要知人諗乜、需要啲乜。於是就有咗一個以直覺做主導嚟探知人類心靈嘅程式—Oracle。Oracle發現咗人類係需要有選擇，有選擇嘅世界會比起之前好好多。而我對呢點嘅解讀就係，因為人雖然可以透過面對苦難黎成就到自己，但問題係點解，人類根本就無一個 why 去解釋點解要咁做。而有咗選擇之後，人類可以揀自己要過嘅人生，可以選擇點樣成就自己，咁樣嘅人生先有意思。（電影第二集01:50:00-57:00）

於是有咗選擇之後，就有啲唔滿意Matrix嘅人走咗出嚟，呢件事Matrix係一直都知，甚至係佢容許嘅結果嚟。所以我地先會話呢場大龍鳳其實講到尾都係Matrix操控既。

選擇
咁個故仔發展到呢度啦，其實就有一個問題就出現，一方面個故仔好強調選擇，但另一方面佢又同你講，其實人類根本無自由去選擇。喺故事入面，有一個花名叫法國佬嘅角色，佢就講過，選擇其實只係一個假像，佢話所有嘢其實不外乎係因果，cause and effect，而且我地可以話所有野都係被決定咗。

呢個法國佬唔只只係一個法國人，佢仲係一個跳皮嘅法國人，佢作為一個出色嘅講書佬當然就唔會就咁講個理論出嚟，佢緊係以身試法，用行動話你知點解所有嘢都係因果。佢話佢 order 咗一個甜品俾隔離檯位女士，呢個甜品就好特別嘅，食完個人就會㷫恰恰，就會想色色，由佢大腦再到身體唔同地方都有反應。（電影第二集 01:06:00-09:00）而法國佬話呢個咪就係因果囉，當有某啲充份嘅條件，某啲結果就一定會發生，而由於個世界喺某個之前嘅時間點已經生咗某啲事，咁呢啲「因」好自然地就會決定咗之後會有嘅結果，呢個就係成個世界運作嘅方式，好多嘢一早就被決定好晒。所以換言之，人類嘅活動當被呢啲因果決定咗嘅時候，其實根本無第啲可能性，可以做出另外嘅行動，呢種講法可以話係某種決定論嘅想法。

如果個世界真係咁運作，人類其實根本無得揀，咁我哋做緊一切有咩意思呢？同埋成個故仔咁強調選擇做乜嘢呢？Oracle 一直係咁同講 Neo 有關選擇嘅嘢，後來白頭佬又迫 Neo 去選擇救個世界或者救愛人 Trinity 到底為乜？咁其實法國佬嘅講法，就唔係成個故仔最終嘅答案嚟嘅。我覺得Matrix體現嘅，係一種哲學上叫相融論嘅講法。

相融論講法並唔否定因果，但佢認為就算有因果嘅決定，人類仍然可以講到某種自由，所以喺呢個意義上，自由同決定論係相融嘅。而其中一種講法就係，所謂嘅自由唔一定係 could have done otherwise，可以做到第啲可能性，只要人做緊自己想做嘅嘢，而又無俾其他嘢阻礙咗，即使呢一切係受因果律控制，但仍然可以講到人嘅自由。簡單嚟講，人嘅自由在於按照到自己嘅意志行事而無受阻撓。

喺後來救世主 Neo 同終極大佬 Smith 打交嘅時候， Neo 原本佔下風，Smith 就係咁問佢你到底為乜？點解你要咁堅持打落去，係為咗自由，定愛定乜春啊哈里？Neo答咗個幾懶型又好似有啲深度嘅答案，佢話：because I choose to。（電影第三集01:48:00 - 50:00）到底Neo 係咪俾人打到傻 q 咗呢？人哋問佢為乜而打，佢話因為係我揀。我夠知你揀咗啦，但人哋問緊你點解咁揀吖嘛。阿鬼你到底講乜啊？我諗 Neo 喺到嘅答案就係我頭先講相融論嘅講法。佢係想講佢搵到人嘅自由喺邊，打呢場架就係展現緊人嘅自由。當人按照自己嘅意願嚟行事，「choose to do something」既時候，呢個就係我哋嘅自由。而 Neo 就係透過佢嘅行動嚟證明咗呢一點。呢場係我想打嘅仗，係展現我自由嘅一場仗，所以佢先答「because I choose to」。

而佢呢個證明就說明咗一個較理想嘅世界係點：人有選擇，可以透過例如愛面對苦難，就好似 Neo 咁去救自己嘅愛人，去救個世界，而嚟成就自己，講到價值同意義，而且呢種選擇係佢既選擇，係一種自由既選擇，於是乎我地講緊既就係我地點樣先可以創造到一個由自己做主導嘅人生，我地既行為要點樣先唔會係無意義。

愛與進化
Neo 其實自己都係 Matrix 嘅一個程式嚟，佢嘅存在就真係好似耶穌嘅道成「肉身」咁，透過佢嚟到人間經歷唔同嘢，最後回歸到上帝，三位一體完成咗救贖。而 Neo 嘅種種經歷、佢帶出嚟嘅領悟其實最終就導致到成個 Matrix 進化咗，話咗俾電腦知點樣搵到一個較美好嘅世界，同時亦令電腦自己都有變化。

其實你諗真啲，你就會發現人同電腦某啲位好似，人類被因果決定佢嘅行為，而電腦亦受限於程式、算式去運作，佢嘅行為亦係被決定咗，如果電腦想進步、想變成一個更加高級既存在，佢其中一個可能嘅方向，就係睇吓同佢比較相似既人類會唔會啟發到佢。

故仔入面講到，白頭佬 Architect 佢識得計算，可以計到選擇會帶嚟啲咩後果、有啲咩可能性，但佢唔明白啲選擇其實代表啲咩，有咩意思同價值。而後來到 Neo 選擇救 Trinity 都唔救個世界，展現咗無比嘅愛， Matrix 世界出現咗啲變化。啲程式都識得講愛（第三集 09：28-10：23）。喂大佬，程式都有愛，我老豆都變棵菜啦。而程式之間有咗愛仲曉生咗個女出嚟，實在離奇過離奇。

其實呢到代表緊嘅係話你知程式進化咗。原本程式只係會按照啲算式運作，所有嘢都只係冷冰冰嘅數字、運算，但到後來 Neo 為 Matrix 世界帶嚟咗愛、明白咗愛，就令到啲程式明白到唔同選擇唔係同等、中性嘅數字，而係有價值有意思。而亦都係咁，電腦先有可能都講到自由，因為有咗愛，電腦做選擇時就唔再只係計算，而係有理由有慾望去做某啲選擇，做佢想做嘅選擇，有咗佢自己嘅意願。所以電腦就成為咗啲 better being ，更好更高級既存在，比起之前純粹淨係識得計算嘅機械唔同咗，唔再係冷冰冰既機器。所以其實我地可以話Matrix係探討緊唔同物種，又或者唔同既「類」到底可以點樣成為更高級既存在。

Ending
講到尾大家要留意返，Matrix 第三集個個名叫 The Matrix Revolutions，Revolutions 係有 s 㗎，即係意味住革命唔係得一次，人類理想世界同 Matrix 世界嘅變革仲有好漫長嘅路，所以係咁先會有第四集，先會昆到大家入場睇多次。我哋就一齊拭目以待，即管睇吓到底故仔會有咩新發展，佢對於人類理想世界同埋成個 Matrix 有咩新睇法。我地今次就講到呢度先啦，期待我地下次就真係講下第4集既Matrix啦，bye bye。