習得性無助：面對絕望與無力感，有何對策？

其實絕望有幾條好主要嘅支柱，當然我唔會話條條支柱都要出現先嗰d先叫絕望，但其實好多時絕望都會搵到呢3個成分。簡單叫法就係「3個P」。
第一就係Personal，令我哋絕望嘅事因為哋個人嘅，可能因為個人能力不足，做極都做唔到呢樣嘢。例如一次考試失敗，其實有personal同唔personal嘅方向去睇呢件事，personal咁睇就係因為個人能力不足，係自己內在出錯，可能覺得自己蠢。但如果係外在，可能就會覺得個考試本身難度太高。
第二就係Pervasive，影響好廣，即係我哋會傾向覺得件事牽連甚廣。咁我記得我讀中學嗰陣無論會考或者dse都好有pervasive嘅錯覺，因為我哋覺得個考試只要一差咗個人生就會絕望，就會牽連甚廣，大家都知中學老師同學生灌輸緊咩信息。咁呢個當然唔係事實啦，所以有時呢d絕望係錯覺嚟。
第三就係Permanent，我哋普遍嚟講會覺得令我哋絕望嘅事件係永恆而且冇得被改變。
可以見到一件絕望時件如果有曬呢3個elements，佢最傷人心係你覺得永遠都係咁，兼且係自己係有問題，冇辦法改變，呢個就係絕望嘅情緒。

咁絕望呢個感覺係點樣得番嚟呢？呢個時候就要講下「習得性無助」learned helplessness呢個理論，其實習得性無助呢個理論係一個非常出名嘅心理學家martin seligman提出，最諷刺係呢位martin seligman係正向心理學之父，佢係positive psychology呢門學問其中一位開荒牛。但係佢就做咗d令人，其實唔係令人，係令狗好絕望嘅研究。
係咁嘅，佢搵咗3批狗，其中一批狗，冇乜特別，就係普通嘅狗；第二批狗seligman就會不斷電擊佢哋，呢d狗係無法避過電擊；第三批狗佢哋都會俾人電擊，但同第二批分別，佢哋俾人電擊之前可以撳一撳個掣，咁個掣就會制止咗接下來嘅電擊。
當然個掣都唔係咁易撳，可能要你0.01秒之前撳到先會避過呢個電擊，所以最尾佢哋都會俾人電咗好多獲，因為個掣係非常難撳。
咁完成呢個程序後，seligman就會將d狗放入一個箱到，個箱就分開兩邊，中間有個欄杆隔開，一邊係通電區，另一邊係安全區，佢就會分別將狗放去有電嗰邊再電，電幾下。
呢個時候，佢發現三批狗嘅反應係唔同。
首先佢發現最正常批狗，即係第一批未被電過嘅狗，基本上一放入去就會跳走，因為個欄杆其實唔係好難跳，佢一跳過就可以避過厄運。
嗰d被人電但撳掣有得停止電擊嘅狗，佢哋都會即刻跳走，同無俾人電過嘅狗一樣。
最大獲係嗰d遭受過無辦法被逃避電擊嘅狗隻，就會一直爬喺個位到俾人電，明明個厄運係可以逃過。
Martine seligman就係將狗嘅不作為，同埋佢哋嘅情緒狀態叫做習得性無助，learned helplessness，唔係嗰個動物本身就係咁，即係透過後天遭遇去將佢學習番嚟。

呢個習得性無助理論帶咗咩啟性呢？就係好多時我哋處於習得性無助，但實際上件事未必係絕望，即係我哋係喺個跳得走嘅電箱到，但因為我哋之前嘅經歷令我哋唔願意跳走。
例如馬戲團表演入面會用到呢d拿渣手法，多數係對d動物，好細個就不斷去虐打佢哋，到動物長大咗之後，就算佢哋嘅力量強過個馴獸師好多，但因為佢過往慘痛經歷，佢就唔會願意企出嚟反抗。咁其實呢個唔單止動物，人都係咁。
例如我接觸過d唔願意直述已見，唔願意表達自己情緒，好唔願意同人衝突嘅人，你會發覺呢d人可能好細個嗰陣家教都係非常嚴厲，佢哋父母係非常專制嘅人。
如果套用番習得性無助嘅理論去理解，就係其實呢d小朋友可能細個經歷過嗰種無法逃避嘅電擊事情，可能佢一講錯d咩佢屋企人就會一巴打埋嚟，到佢大個之後，雖然其他人冇佢家長嗰種壓迫佢嘅能力，但係因為嗰種過往造成嘅習得性無助，佢哋會保留住呢d比較唔adaptive嘅行為模式，呢個就係習得性無助點樣影響一個人。

既然我哋已經知道習得性無助係咁樣，咁我哋應該要點做呢？
我認為第一步最重要嘅就係：退後一步反思。用番seligman狗隻個實驗，就係你要判斷自己個處境係喺第一階段無法回避嘅電擊，定係你有能力去改變個厄運呢？
我發覺好多好冇自信嘅人有個共同特質，就係佢哋對樣樣嘢都好冇信心：對自己判斷冇信心、對自己能力冇信心、對自己將來冇信心…但唯獨佢哋對自己一樣嘢好有信心，就係好有信心「自己判斷自己係無能」呢個判斷係啱。
其實對抗無力感同無助，第一個step要take就係要問多幾步自己原因，其實依家自己覺得嘅絕望係真係有根據？冇根據？有咩理由去支持我絕望呢個判斷。

話雖如此，其實呢個世界真係好多嘢係會令人好絕望，我哋啱啱探討完我哋要分辨真絕望同假絕望啦，如果唔好彩你發現自己個處境係絕望咁點算呢？如果係真絕望，對任何嘢絕望都係，的確係一個令人痛苦嘅情境，但有時人嘅focus係非常窄。
例如一個140cm高嘅男仔，如果佢夢想係打籃球打到kobe bryant 咁叻，佢會注定絕望，因為佢生理上限制唔允許佢咁做。但呢個時候我哋可以退後一步，去問下，呢個係咪我哋唯一值得去focus嘅地方呢？點解咁多目標，我要淨係將個目標放喺呢個唯一目標上呢？
呢個唔係咩「世界好大，你散下心就會冇事，發覺自己係好微不足道」嘅講法，其實每一個痛苦都係好真實，人係有承受痛苦嘅能力，但係承受完我哋終要活下去。所以有時如果發現自己真係活喺一個絕望嘅情境，有時巧妙地分現自己專注力，尋找其他志向，都不失為一個好方法。其實有咗志向之後人嘅轉變係可以轉變得非常之多。

今日就講住咁多，希望大家鍾意呢個關於人生意義嘅五分鐘心理學podcast，我係大家主持peter，如果大家鍾意個podcast就記住subscribe，如果對心理學有咩問題想問，可以去facebook treeholehk或者instagram到直接問我，多謝大家時間，拜拜。