11/12《圍爐取戀》你唔好再做好人喇！啱Channel Ah Gi駕到！

專家Dickson ：唔係！唔係！唔係！唔係！咁你平時有冇睇開呢個...圍爐取暖嗰啲咁樣？
Ah Gi：真係有，真係有！即係我講吓你哋嗰啲角色設定啦！我覺得你（Dickson）好似一個...教練囉！（字：A0教練）即係嗰啲俾橋呀，或者比策略咁樣！
專家Dickson ：咁落場踢呢？
利君牙：即係教練唔識踢嘅！
Ah Gi：Errr 落場...即係落場未必識踢啦～
專家Dickson ：即係摩連奴...我諗佢都唔係好識嘅。
Ah Gi：係喇係喇！咁我覺得利君牙就似係一個...智者。佢有時又會好sweet㗎喎！即係最後呢～你以為你係唔認同佢啦！但係佢又好似有一個抱抱返佢咁咁樣喎！
利君牙：係呀，我有時會覺得佢太慘，會想呵返佢！
Ah Gi：係呀，你唔忍心囉我feel到你係！跟住Kneta 就唔使講，重炮手啦嗰啲～
Kneta：（揸槍手勢-》開槍 嘭！）
Feat. <Rambo: First Blood Part2>
Ah Gi：加快左都聽得好清楚，你係咁喺度鬧人嘅。
利君牙：咁你都睇得好透徹喎其實。
專家Dickson ：咁你今日諗住做一個咩角色呀？
Ah Gi：睇情況囉！你哋交啲咩波我就...踢走佢咁囉！
大家：哈哈哈哈
Kneta：踢俾佢（Dickson）囉！
利君牙：好喇，導演！我哋今日故事係咩呀？

導演：今日事主住呢，就因為佢女朋友係一個絕世大好人，而忽略咗佢。就想打電話上嚟，問吓咁多位主持，佢應該改變佢女朋友呀？定係唔再同佢女朋友繼續行落去？

[本集主題：唔想女友做大好人？！]

Kneta：大好人...都想分開喎？（字：好人都唔得？）
Ah Gi：好人又唔得？
專家Dickson ：睇吓咩事先！
Kneta：係囉！

利君牙：喂～Samuel！聽講你啱啱就同女朋友嗌完交喎！係咪啊？
Samuel：係呀係呀！
利君牙：嗌啲咩啊？講嚟聽吓先啦！
Samuel：因為我希望佢就係～喺處理同屋企人嗰啲無理嘅要求嘅時候，真係可以決絕少少。但係佢就覺得～佢比較會想將我同佢屋企人嘅生活分開。
專家Dickson ：我又好想聽吓嗰啲無理嘅要求係啲咩～
利君牙：咁不如我哋由頭開始講啦！
專家Dickson ：係囉！由頭開始講啦！
Samuel：咁其實我呢排同佢鬧交，最主要都係來自因為佢本身份人比較內向啦！同埋比較自卑啦！咁係人哋有提出要求，或者希望去做一啲嘢嘅時候呢，咁基本上佢都會應承嘅！ （任何要求也答應）小至於話放完工，O完T，都要行來回成九個字，幫人買啲嘢食返屋企咁樣，佢都OK嘅。再大到例如話有一次，我陪佢做完手術，佢已經面青口唇白，差唔多企唔穩咁滯呢，佢都可以因為佢個妹想坐埋我㗎順風車，所以就叫我喺市區，等佢阿妹個幾鐘頭咁樣囉！
利君牙：除咗呢個仲有冇啲咩例子啊？
Samuel：佢住嘅地區已經好遠㗎啦！佢住嘅屋距離地鐵站揸車都要40分鐘嘅！咁佢個妹就通常（凌晨）三四點呢個時間先至返嚟，咁基本上都冇小巴嗰啲去接佢㗎啦！平時佢就會叫佢媽咪呢，就三四點鐘起身揸車，出去車佢返屋企嘅。我有時去佢屋企過夜，聽到呢個嘅時候呢，即係我寧願我辛苦少少，都好過辛苦人哋媽咪咁樣囉。佢個妹係可以趕住電話，我車都未泊就落咗車，行咗返屋企先，係一句thank you都冇，跟住就走咗去啦。
利君牙：哦～咁佢而家最大嘅怨氣係佢個妹喎！
（字：阿妹才是罪魁禍首？）
大家：係囉！係個妹喎！
Samuel：咁呢個情況唔淨係出現喺佢阿妹身上，咁都出到街啦，同佢啲friend話唔開心，屎窟痕想去staycation，咁就每個月去一兩次啦，咁我女朋友又唔識拒絕，咁佢又一齊去埋咁樣。我一開始同我女朋友嘅協議就係，我希望佢嘗試一下返工之後儲錢，可能一個月儲兩三千蚊啦。但係佢到最後因為呢啲朋友，所以去到最後戶口keep住都係四位數字（字幕：為朋友變月光族）。
專家Dickson ：我首先想知道就係譬如你女朋友自己本身，en唔enjoy去做呢個好人？（字幕：女朋友樂在其中？）定係佢原本都返嚟同你呻話，「哎呀，佢哋真係好煩」
Samuel：佢一時時㗎！佢就係話佢...佢話佢成世人最憎最憎就係BBQ嘅，但係佢朋友叫佢去BBQ，佢都唔會去拒絕囉。佢同我講都話，佢真係好唔想好唔想去，但係最後都係出席左咁囉。
專家Dickson ：因為譬如有啲人呢，就算我拍拖都好，有男朋友都好，我個朋友其實就係擺喺我嘅第一位嘅。即係我嘅親人都係擺喺我嘅第一位。咁所以我就想問吓，其實你有冇同佢傾過呢個問題呢？
Samuel：都有嘅，咁...我作為男朋友，我唔想佢話同我出街會有財政壓力，或者同我出街會令到佢好攰，所以我都盡量可能就佢囉。
Ah Gi：我想問吓Samuel呢，你同你女朋友平均一個星期見幾多次咁樣？見得密唔密㗎 ？
Samuel：呢排大概...一個月見一次到兩個星期見一次。

～～～～～～～～震驚～～～～～～～～
大家：吓～～～～～～～～～～～～
專家Dickson ：一個月見一次？！
Kneta：好少喎！
利君牙：係咪拍緊拖㗎你哋？
Kneta：但係點解先？
Ah Gi：點解呀？
Kneta：係因為工作？
Samuel：點解係因為...佢返工要返六日嘅，咁佢就剩返一個星期日，我就同佢講話咁剩返一日，我都想佢攞呢個時間去諗吓自己未來嘅計劃，或者係自己...
專家Dickson ：吓～～
Samuel：（或者係自己...）未來有咩想發展咁樣，所以嗰日就留俾佢休息，同埋俾佢諗吓自己條路點行咁樣囉。所以我就可能隔個星期先至約佢出街囉。
利君牙：呢啲係你嘅諗法嚟嘅，你諗住我比一日你思考啦！我唔煩你啦！係咪咁嘅意思啊？
Samuel：我唔知佢自己屋企嘅時間點過啦，但係我就想佢花少少時間去諗吓...即係將來條路點樣囉。
利君牙：Samuel，我有個簡單嘅問題啊，我想問吓你覺得你鍾意你女朋友多啲呀，定係你女朋友鍾意你多啲呀？ （字幕：誰人愛得比較深？ ）
Samuel：Errrr...應該係我鍾意佢多啲嘅。
大家：哦～～～～～～～～～
（字幕：彷彿瞬間參透了什麼...）
Ah Gi：我好似明咗啲嘢...
Samuel：我知佢都鍾意我，但係我feel到佢就係每個人都唔想失望，每個人都唔想得失嘅時候，就攞咗我出嚟祭旗咁囉。（ Samuel認為女友為了其他人，而忽略了自己）
Kneta：即係就咁聽啦，佢女朋友比較被動嘅，即係如果喺你哋相處入面，你冇咁主動嘅時候，咁佢又唔會做一個主動，會唔會令到你誤會，佢唔夠愛你呢？
Samuel：都有...佢啲朋友都會話，我幫佢做埋決定咁樣囉。有一排我都嘗試過俾佢試吓做一啲決定咁樣，我都想train佢話個人有主見少少。