【最終幻想XIV : 曉月之終焉】值得買嗎? | 伏Game評

而《FF14》最新嘅6.0資料片《曉月之終焉》已經喺12月7號正式開服。今次嘅6.0版本《曉月之終焉》可以話係《FF14》開服到呢家「海德林與佐迪亞克篇」嘅結局。

經過多年來嘅營運，遊戲故仔終於迎嚟最高潮，對於一路有玩《FF14》嘅朋友嚟講，呢個資料片根本係必定要買啦！我個人都係佢一開訂就即刻已經預訂咗喇，到底今次嘅《曉月之終焉》係唔係一個令人滿意嘅結局呢？我哋即刻開始「伏Game評」。

呢一條片主要集中係評價6.0嘅資料片都會提及一啲四個月前我冇嘅諗法。不過如果你想了解返《FF14》成隻Game嘅話呢，可以睇返《FF14》嘅「伏Game評」。當然睇過嘅我唔介意你返兜嘅係咪？Link就喺條片嘅Description入面。《FF14》每次大更新，首先一定會係新劇情、新種族、新職業、新地圖，然後就係新副本、新裝備仲有新嘅高難度內容。而大家最在意嘅一般我諗係新職業啦... 始終新職業代表咗新嘅玩法，所以我哋就嚟講下《曉月之終焉》入面新職業都仲有戰鬥上嘅改變。

不過非常之不幸，兩個新職業我都係未滿Level嘅，只係略懂略懂。畢竟遊戲出咗唔係冇耐咋嘛~ 但係呢我就玩咗少少啦，加上練滿咗Level嘅朋友所俾嘅意見，應該有足夠證據顯示Reaper係呢個版本入面比較強嘅近戰職業。近戰職業需要嘅攻擊力、走位能力佢都擁有。用起上嚟唔算複雜，唔信你呢家行入南方戰線睇下你就會見到一堆Reaper用極高傷嘅全體技瞬間清場。

賢者就係一個好易上手嘅盾補，只要佢事但篤兩三個掣就可以為成對帶嚟好強大嘅防禦能力，攻擊嘅同時可以幫人補血呢個設計真係太明白我哋啲補師喇！終於冇嘢可以阻止補師當自己係DPS喇！

不過容易上手嘅呢，唔止係新職業。6.0目前我試過或者研究過嘅職業呢，特別係一眾啲DPS都真係好易上手。以個人之見，呢個版本嘅職業調整呢，都係圍繞住令到個職業用起上嚟更簡單啦，仲有減少佢哋嘅缺點嘅。

特別係嗰啲時限類技能呢，唔少都俾人改良，或者甚至抆走嘅。於是呢就減少咗嗰種「咩某某Boss跳咗出畫面外面耍大龍鳳斷咗我Combo」嘅狀況呀，又或者「某某職業唔適合打某某Boss」嗰啲咁嘅情況。雖然呢，武僧仲係跳緊街舞，忍者唔需要再結風遁，但佢嗰啲起手依然係好難搞。而我個人嘅Main白魔呢就真係冇乜點改喇！佢嘅新技能用嚟對抗鍾意連擊嘅新Boss都係唔錯嘅！而嚟到副本方面呢就暫時都冇乜好講嘅，因為《FF14》嘅主版本副本向來都係劇情主導，大家都只係入去體驗下劇情。難度道比較低，開心打下就得架喇！因此呢，佢今次副本令我欣賞嘅地方呢，在於佢劇情同埋氣氛真係營造得好好。至於呢個版本嘅極本呢，我都仲未約到團，所以都冇辦法表達太多意見。不過大家都明啦，極本就算係高難度內容入面呢，比較容易嘅一種。

除咗戰鬥比較注目嘅地方呢就絕對係劇情啦~ 上個版本5.0嘅劇情呢，光之戰士為咗解決第一世界嘅光之泛濫，化身為暗之戰士為大家重新帶來夜空。呢種光暗反轉令到5.0劇情成為左《FF》系列入面最特別嘅故仔之一，同時亦都解釋咗星球意志海德林同埋無影之神佐迪亞克嘅身份，可以話係幫6.0嘅故事鋪好晒伏筆喇！

而嚟到6.0， 就可以話係一次過將呢啲伏筆全部解明晒。相對喺5.0嘅光暗反轉，6.0就回歸到傳統嘅王道JRPG套路，反而成功營造出決戰嘅氣氛。因為「塔」而陷入危機嘅世界，設定上老是常出現嘅薩利安同埋薩維奈，深入長久以來嘅敵人， 加雷馬帝國嘅領土，仲有唔理宣傳片定係官方直播都好引人注目嘅月球。嘩係！？打到上月球咁... 犀利呀？

然而，更犀利嘅仲喺後頭呀... 王道JPRG嘅套路呀嘛~ 到後面絕對係有驚喜啦！而劇情後半呀，亦都即係話我唔想劇透嘅部份，我只可以話：吉田你係咪上個版本搞尼爾合作果陣時呢... 俾橫尾太郎感染咗呢？故事、劇情、風格，某位人物探究嘅命題同埋佢嘅結論，主角眾人嘅回應，仲有呢個任務名都好有橫尾嘅味道，令我既感動又有少少胃痛。反正整體嚟講呢，成個劇情我係好滿意嘅，劇情上成功向玩家解釋所有嘅故事真相，亦都為大家帶嚟咗滿意嘅結局。

雖然呢，中期為咗解釋劇情呢，對話部份係多到令人燥底嘅，係好・燥・底嘅！但係去到結局嗰陣時呢，就會覺得... 啲燥底位都值回票價嘅~

除咗劇情本身之外啦，劇情嘅表現力呢，亦都值得我哋留意。過場片入面呢，角色嘅表情同動作都比以往豐富，大大減少咗MMO常見對話嗰時太木獨嘅問題。音樂嘅運用上面亦都有進步，某啲位置地圖個背景音樂會直接延伸去到劇情當中，令到成個轉換變得更加自然同埋流暢。仲有唔少劇情同埋副本主打回憶牌，基本上成隻Game出現過嘅所有角色都會出現喺6.0入面。冇錯呀！基本上可以出現嘅，都出現咗，仲有以為冇辦法出現嘅，都出現埋，絕對係角色大集結！所以記得準備好紙巾喇，我真係呢... 第一次玩MMO跑腿任都可以玩到眼濕濕。

但係講到跑腿任務，亦都即係話MMORPG最常見嗰種，叫你由A點去B點傾個計嗰種任務呢... 今次喺6.0嗰個跑腿強度係真係好高嘅。第一，係因為今次《曉月之終焉》太多劇情要交代喇，所以變相有好多內容都玩家去搵NPC傾個計啦，再去睇一大段劇情嘅。從劇情角度出發，呢個係一個優點，但係從遊戲角度出發呢，就真係有啲悶喇。第二就係今次仼務呢，多咗樣一樣新花臣。同行任務係6.0新加入嘅任務類別，任務進行期間會有NPC跟住你行，仲有機會觸發額外劇情添。咁對於遊戲加入新嘅劇情表現方式呢，我係好高興嘅，但係實際玩落去嘅呢種模式就實在有待改善。NPC會突然輕功水上飄呢，我都係算_數喇！問題係呢啲同行NPC喺度呢，首先基本上你唔可以上坐騎先喇，因為佢哋會追你唔到，結果玩家就俾人強行喚起對徒然A to B嘅嗰種恐懼。

喺遊戲入面放大量嘅A to B嘅任務其實真係已經太老土喇，仲要有坐騎唔俾騎，要我哋行路上廣州喎... 咁咪戇鳩鳩囉！如果你覺得主線任務嘅同行任務唔夠多，你仲可以去做下啲支線任務吖，足夠令到你崩潰呀！仲有嗰啲咩喺薩利安搵8個研究員嗰啲咁嘅垃圾任務呢，真係搵到人都癲。雖然我頭先都講過啦，結果上係值回票價嘅，但係玩到中期真係有啲悶喇。同啲A to B任務相反嘅就係6.0嘅單人主線戰鬥關呢，係比起舊版本進步咗不少，比如用桑克瑞德玩嗰個暗殺小遊戲呢，就令我回想起單機《FF》入面果啲小遊戲環節喇。戰鬥中亦都會有唔少富有戲劇性嘅時刻，亦都有唔少過去版本嘅NPC同你共同作戰呀。

5.0引入嘅戰友系統亦都有少少新花臣呀，響唔劇透嘅情況下，我只能夠話戰友系統加入咗新角色，同埋有四人副本以外嘅打法。Sorry呀，已經講到好白架喇...

總之我想表達嘅就係，劇情上嚟講真係更有氣氛，《最終幻想XIV 曉月之終焉》呢一個資料包係真係好出色嘅，同時佢亦都有理由一定要出色，除咗因為佢係百年嚟嘅大結局之外，亦都係因為6.0係建立喺諸多犧牲之上嘅。比如本來原定今年推出嘅「絕・龍詩戰爭」延期，令到一眾三絕大佬失去方向，不過唔關我事。今年嘅活動呢就冇送啲咩好睇嘅衫，都係垃圾家具為多，最正嘅咪得隻北極熊坐騎囉~

今次更新亦都唔似過往咁樣有兩個新種族，而係得一個種族，雖然男兔人係真係靚仔呀。咁好彩呢，結果上嚟講《最終幻想XIV 曉月之終焉》係真係有完成佢嘅任務。雖然響跑腿任務同行任務等等嘅地方依然有改善空間，但今次更新嘅重點，比如新嘅主線，亦都即係話「海德林與佐迪亞克篇」嘅結局篇啦，新職業Reaper同埋賢者，仲有調整過嘅職業玩起上嚟都令人都好舒暢，令我急不及待咁想將所有職業練到滿Level呀！

遊戲嘅演出同埋關卡設計亦都明顯超越咗上一集嘅水平，作為最新版本真係好完美嘅咁完成佢嘅任務，所以《太空戰士XIV》以5星為最伏，個人會俾0.5星。咁接下來呢就要睇跟住落嚟呢兩年佢打算點樣更新喇。對於《最終幻想XIV 曉月之終焉》我係極為滿意嘅，不過關於6.0嘅野呢我哋前面就講咗好多喇。

不如我哋嚟講講我個人對於《最終幻想XIV》未來嘅展望啦。因為隨住今次嘅更新，又令我再次諗起一啲《最終幻想XIV》一直存在嘅隱憂呀。我哋上條片同埋呢條片都喺度講《FF14》5.0版本有幾正呀，6.0版本有幾正呀。但實際新人入坑，玩嘅呢，係2.0版本內容。2.0版本嘅故仔當然都係不可分割嘅部份啦，不過2.0嘅流程就真係有啲無聊呀，之前嘅更新就已經將2.0嘅流程縮短咗，但係我認為都係未夠短。二來就係遊戲嘅視覺表現問題。《FF14》嘅遊戲材質真係好低清，劇情入面呢，一俾啲角色近鏡你就會睇到佢啲衫呀，頭髮呀，全部都起晒格架。以MMO呢種視覺表現好緊要嘅遊戲嚟講呢真係一個好大嘅缺陷。

三來呀，呢個幻化櫃呢都依然得15格，真係唔夠用。依家隻Game都31個職啦，得15套幻化，即係每兩個職業就要共享一個外觀。作為一個31個職都有喺度練嘅人嚟講，真係覺得完全唔夠用。四來就係房屋問題喇，隻Game入面啲房屋呢，到呢家都係完全唔夠住架。即係我當然都明白啦，咁房屋呢啲野梗係要稀有少少架喇~ 係咪？仲有隻嚟到今時今日，我哋啲屋主都仲未可以喺自己間屋度瞓覺Log-out ，唔可以響自己間屋入面開幻化櫃搞外觀，仲有就係每次喺屋入面排副本呢，排完副本都俾人夾硬踢咗出去屋企門口。喂！大佬呢度我屋企嚟架喎...

呢個問題唔該解決下啦~ 如果呢啲問題係7.0果時得唔到解決呢，呢啲問題呢看似唔係核心問題，但係呢就一啲計時炸彈嚟嘅。呢家《FF14》咁風光呀，呢啲問題呢就真係冇人夠膽大聲講，講完都俾班忠粉鬧。咁如果邊日《FF14》去咗低潮時刻，有其他嘢做導火線嘅話呢，呢啲炸彈就會一齊爆架喇！所以我希望《FF14》接下來呢兩年，唔好自滿，解決一啲基本嘅問題先。

「海德林與佐迪亞克篇」係一個段落嘅結束，但係同時亦都係下一個段落嘅開始，希望兩年後我哋可以睇到更好更強嘅《FF14》，並再進行一段新嘅光之旅途。