總是覺得人生迷惘？三個助你找到人生意義的方法

例如曼德拉喺監獄入面花咗30年去爭取黑人平權；我哋香港本土運動都有梁天琦，雖然佢哋生活過得非常差，但我哋絕對唔會話佢嘅生活係一團糟。
當缺乏意義，其實人係好容易墜入一種唔知點樣嘅狀態。意義仲有一個非常重要功能，相信大家都知其實人生係由林林總總大大小小痛苦組成，有人會痛苦d有人會冇咁痛苦，但係痛苦就係人生一部分，因為大家都知人係有生老病死等唔同嘢等住我哋。你可能會話「唔係啊，其實我依家生活非常好」，可能各方面，無論工作事業、愛情關係上面你都好滿意，但係有樣嘢你唔可以忘記就係，你今日擁有嘅，你終有一日都會失去。
唔係好似d廣告所講「你今日冇嘅你將來會有」，而係調番轉，今日有嘅你將來都會冇，好似人生就係本身就係面對緊痛苦。
其實意義嘅重要性喺邊，就係佢將我哋承受痛苦提供咗一種理由，換言之佢令痛苦唔再係漫無邊際嘅痛苦，而係為目標、為意義而必要承受嘅痛苦，呢個就係根本上嘅分別。

咁講開痛苦同意義，有個心理學家一定要講，就係現代existential therapy意義治療嘅始祖viktor frankl。Viktor frankl係一個二戰時德國出身猶太裔心理學家。
大家都知二戰年代德國出身猶生人會發生乜事，就係俾人拉去集中營。佢嗰時已經係一個心理學家，但入到去之後佢仍然冇放棄自己身為一個心理學家嘅使命，佢開始為佢囚友提供心理治療。
喺集中營過程入面佢做咗唔小觀察，留意有咩人最容易捱過集中營嘅煎熬，有咩人會捱唔住。佢個發現好簡單，就係嗰d知道自己點解要捱過集中營煎熬嘅人就最易捱得過，例如有d人好期待當集中營煎熬完咗可以見番屋企人；或者viktor frankl佢本人出番去可以發表自己心理著作，就係呢d意義令佢哋堅持落去。
反而嗰d生無可戀出番去都唔知做乜嘅人，因為集中營個環境非常惡劣，所以佢哋好快就會放棄，通常佢哋放棄之前都會食一枝煙，食完之後就會見到佢哋衝去自殺。
因為喺集中營入面煙其實係貨幣，可以用嚟賄賂獄卒、買到嘢食等，當你放棄佢用嚟換取歡悅時，就係已經陷入咗一種絕望狀態。
所以就算係喺集中營呢d咁絕望嘅環境，睇嚟意義比起身體能力或者身體質素，更加令人能夠堅持落去。

好快咁總結，意義個重要性係咩，你點解要搵到意義呢？個原因係因為人生本來就有住總總痛苦，有d人會多d，有d人會小d。但係人總會生老病死，甚至日常生活中有小小不適，我哋都要搵意義去為呢d痛苦俾理由，如果唔係我哋就會唔知自己點解要承受呢d痛苦。
我可以用尼采一句名言去做總結「who has a why to live can bear almost any how」，譯成中文就係「你知道自己點解要捱的話其實你係乜嘢都捱得過」。

我諗大家聽完啱啱我講應該都知道其實意義係好重要，我估依家沖上心頭嘅問題係「喂，人哋有意義啊嘛，依家我冇，咁點算，好似viktor frankl佢有老婆但我係一個單身狗，又冇乜心理學理論要發表，咁我嘅意義係咩？」

我想提供三個幫大家搵到自己意義嘅方向，必需注意一樣嘢就係意義其實非常depends on 你人生觀同世界觀，好難單純透過一個podcast一個lecture去教你人生有咩意義，所以呢d只係探索嘅方法。

首先我想講係心理治療入面幾有趣嘅現象，叫dudu bird hypothesis，佢意思係咩呢，唔知大家知唔知道，其實心理治療入面都有好多流派。有d會想透過改變自己認知去治療自己心理問題；有d會話要發掘自己潛意識去解決心理問題，咁其實好多心理學家都嘗試去搵出到底有冇咩心理治療係最好方法，點解我哋搵嚟搵去都搵唔到有邊套係最好，套套都好似有一定作用，但係明顯睇唔到有邊套係好過另外一套。呢個就係叫dudu bird hypothesis，源自愛麗斯夢遊仙境入面一段故事，意思就係其實任何心理治療都有佢功用，喺香港呢個setting上面我哋會叫做「獎門人，打和啦！super！」，好似更加合適。

咁到底點解我哋會有獎門人super hypothesis，心理學家就開始諗，佢哋會諗，雖然心理治療方法採用有好多唔同模式，但係下面其實都有一套根據，就係會鼓勵client去講出、梳理自己人生故事。
簡單咁講就係同人傾計去整理自己思緒同埋諗法，呢樣嘢本身已經對搵到自己意義好有幫助。你諗下其實人生係非常之複雜，例如我當你番緊工聽緊我呢段podcast，其實你番工搭地鐵呢段好冇意義時光又係你人生；你朋友又係你人生；甚至你嘅夢想都係你人生。你會發覺其實你人生入面有好多element，但係你同人講嘅時候係冇可能講得曬咁多嘢，所以呢個時候就要作出取捨，為咗有效溝通，減省cut走某d對你嚟講唔重要嘅部分，淨番嘅就用我哋理智同整理去成為一個完整講得出嚟嘅故事。
因為你必須將你自己人生同問題整理成一個故事，先有辦法去同一個心理治療師溝通，所以心理學家推算呢個就係其中一個任何心理治療都有效嘅原因。
甚至呢樣嘢未必需要去同一個licensed 嘅治療師去講先有用，甚至好多心理學研究指出，只要你去同一個朋友傾計，佢未必需要好似一個心理治療師咁guide你，只要佢可以靜靜地咁聆聽，俾機會你講，喺你講嘅過程當中，你都會梳理到你人生故事。亦有d研究發現甚至講都唔使講，只要我哋寫落張紙，例如好似寫日記咁嘅習慣，都可以改善我哋心理健康，其實歸根究底原因係咩，就係佢可以幫我哋梳理到自己人生意義。

有個練習我覺得大家可以做下，你可以試下將你自己嘅人生故事化成一個三分鐘故事，試下喺三分鐘入面描述同形容你嘅人生，你會發現件事其實並唔簡單，因為俗語有云「愛就係選擇」，你好難喺三分鐘呢個咁短嘅時間入面描述到曬你全部想描述嘅嘢。
但係因為三分鐘嘅時間限制會迫你放棄好多嘢，所以會令你喺三分鐘有限時間內將想講嘅內容砌得靚d，迫你砌番一個coherence嘅人生故事出嚟。呢樣嘢你可以試下，試下對自己練習用三分鐘介紹自己，唔係見工嗰隻介紹，而係用三分鐘去為自己人生做一個總結，用三分鐘我會講d咩呢，呢個係第一種方法。

第二個方法係參考steve jobs同埋steven covey，咁steve jobs係邊個我相信好出名都唔需要多講。Steven covey係一個好出名企業培訓大師，其實佢兩個都有同一諗法，就係話當人面對死亡嗰陣，d次要東西自然地流走，淨番我哋個focus喺我哋最重視嘅嘢度。心理學研究有整理過d人臨死前會講d乜嘢，基本上冇乜人會後悔自己搵唔夠多錢、事業上唔夠努力，反而人人都會諗起自己同身邊人嘅關係，所以steve jobs同steven covey都會發覺死亡係一個好有效方法去提醒自己想要咩嘢。
甚至steven covey指出過一個小練習：你可以幻想下當你辦自己嘅喪禮時，你會想你身邊人點樣形容你呢？例如你嘅朋友代表上咗台去描述你，你會想你朋友點樣描述你呢？相信冇乜人會想自己死咗嘅時候人哋會描述自己係一個自私嘅人，但面對住社會洪流，好多時都會迫不得已咁我哋都會做d自私決定，呢個時候你就會想透過你朋友，喺你幻想情景入面，講到其實你嘅價值係真係想變成一個無私嘅人，只係有時你生活上嘅制肘令你唔容許如此。呢個時候我哋會作出改變，亦都會去到我哋第3個point。

第3個point就係其實搵意義係需要實踐，尋找意義從來都唔係一個純粹理性嘅活動。
記得上年反送中運動時，上youtube睇到一條片，係一個年輕人，話一直都覺得自己人生好冇意義好虛無，直至反送中運動出現，佢覺得呢樣嘢就係佢意義。有時係咁架，意義呢樣嘢有時係你自己坐喺度諗極都冇，踏破鐵鞋無覓處。但係當嗰樣嘢出現時，會令你覺得意義好似得來全不費功夫咁。
例如大家可以諗下d你自己重視嘅議題，好小人係坐喺張梳發到諗，諗到成個人覺得件事對自己咁重要。多數都係一個投入、反思再投入嘅循環，例如環保呢個議題，相信大家都知環保係一個重要嘅事，但我相信好小人會喺教科書到睇到全球暖化呢個議題之後就下定決心去改變自己生活態度去過環保生活。多數係由認識到d人開始，改變咗小小自己生活習慣，跟住就入咗環保人士圈子入面，變成一個推廣者角色，就係咁樣層層遞進令自己投入呢個cost到。
所以我想同大家講你係冇可能坐喺梳化到死鋤爛鋤鋤到自己個意義出嚟，不妨去諗下有冇咩議題係自己關心，未必一定係好關心，跟住開始試下投入嗰方面嘅活動，先係活出意義嘅最好方法。如果你淨係想學理論搵意義，咁係做唔到。
當然我唔係話理論係唔重要，有本書我覺得好值得推介俾大家，就係viktor frankl寫嘅man searching for meaning，中文叫《活出意義來》，但係記住，睇呢d書嘅時候你可能情緒上會有d衝動，即係會有d admire呢種生活態度，但係其實將呢種敬仰化成小小行動，投入去d自己覺得真係值得獻身嘅活動上，其實呢個先係最重要。

小小recap今日podcast講過d咩，意義係非常重要，因為意義為人生種種嘅苦提供咗理由，而要搵到意義，我哋要從理論同埋認識自己出發，但係其實最重要係我哋自己要行出一步small step，唔好覺得「嘩件事好完整」先行出一步，好多時搵嘢嘅過程係行出一小步，再修正小小，再行出一大步咁循環得出。

希望大家鍾意呢個關於人生意義嘅五分鐘心理學podcast，我係大家主持peter，如果大家鍾意個podcast就記住subscribe，如果對心理學有咩問題想問，可以去facebook treeholehk或者instagram到直接問我，多謝大家時間，拜拜。