#米紙｜職場面試見工攻略｜HR方丈教授職場面試技巧 CV真係要一版過咩？ 博炒定自己辭職？（#米問你答）

方丈: 而家今次其實最主要想同你傾吓salary expectation（期望薪金），咁想問吓你而家想叫價幾多
Sybil: err我想要兩萬。
方丈: 咁點解你覺得呢個叫價係一個合理嘅水平？
Sybil: 因為我覺得喺我….好緊張呀！sorry...
Sybil: 因為我覺得係我過去嘅經驗，其實都好符合佢呢份工所做嘅嘢，其實我覺得呢個價錢我自己都比較舒服，而且覺得公司可以用呢個價錢請我咁嘅員工。
方丈: 其實因為我哋未必可以出得起呢個價，你嘅底線係幾多？
Sybil: umm…嘩 原來咁難答㗎，errr 一萬八千。

方丈: 好，咁呢個就係一個唔算失敗，但係一個好慘嘅例子 。因為點解呢？佢就話兩萬蚊係比較舒服嘅價錢，呢個位有少少奇怪。因為當我哋講緊價錢嘅時候，其中一樣比較忌諱嘅係將佢講到好personal。咁其實如果我係你，我諗我應該就會話「 呢個係一個市場上嘅基準價錢，而且呢個都係對應返我上一份工嘅人工，咁呢個都係一個合理嘅調整」。咁如果我哋係唔諗住去減價嘅話，我哋會直接講「其實啱啱嗰個就係我嘅底線」 。
Sybil: 同HR嘅博弈真係非常困難。
方丈: 係呀，所以唔好輸呀咁多位。
Sybil: 係呀！千祈唔好好似我咁蝕咗兩千蚊，原本可以兩萬蚊㗎！

Sybil: 有人就問其實點解你叫方丈？
方丈: 因為我真係好小氣，千祈唔好喺我背後講我壞話。我知道嘅話，就會好似18銅人咁，唔知喺度困住幾多年㗎喇。
Sybil: 咁但係我都想問吓，你其實做咗HR呢一行幾耐呢？
方丈: 嘩！呢個係透露年齡秘密嘅問題。但係都已經接近10年，大約十年啦。
Sybil: 嘩！都好長喎！
Sybil: 你喺連登開post，或者你義務咁樣幫大家睇CV大概幾耐呢?
方丈: 我諗大約差唔多三年左右啦。

Sybil: 點解你會咁好人，喺連登度開一個Account，仲要幫人哋每日提供資訊，又開YouTube Channel，好無私咁分享俾大家聽呢?
方丈: 咁其實最主要係無論係IT HR都好，我哋喺連登高登都係俾人叫HR狗㗎嘛。咁其實坦白講，我就覺得唔一定每個HR都淨係識壓價，或者淨係識得黑口黑面，然後就話呢個唔得嗰個唔得，其實唔係咁嘅。
Sybil: 其實係咪每一日都會收到CV㗎?
方丈: 我每日差唔多收到四五十份CV 。其實我通常兩至三日就會覆一次，大約一至2分鐘就完成一份。
Sybil: 咁即係你睇一份CV用一至2分鐘就已經搞掂？
方丈: 差唔多。
Sybil: 嘩！你係scan CV達人嚟㗎喎！

Sybil: 咁其實大家都有問啦～·見工嘅時候最後俾人問「最後有冇啲咩問題」應該點樣答？呢個我都成日都好煩惱，即係對方問你有冇啲咩問題，我點都要問一啲呀？其實我唔想問㗎喎。
方丈: 其實，首先就如果真係有問題就問啦，例如話去見工嘅時候，職位名稱冇寫清楚，人工人哋冇講清楚，或者可能係你唔清楚公司會唔會有任何教育、津貼、贊助，各樣野想知嘅就問啦。咁第二樣呢，我覺得係見工最重要嘅概念，就係這呢個機會再推銷多自己一次「我想問吓公司嘅進修政策係點㗎」，咁然後佢答完啦，你會講咩呢？你就會答返一句「我都有興趣進修，我之前係上一份工我都有進修某啲課程，其實時間管理上面我係做得到嘅」咁樣 。另外，仲有啲問題可以問得好啲，例如「一個職位想一個咩性格嘅人」，咁然後你咪可以俾啲例子佢 「我個性格就係咁樣」，個感覺就好似係你女神問你，你有冇嘢想問我呀，咁然後你會唔會答我冇呀咁樣吖？你唔會㗎嘛。
Sybil: 呢個例子好好。
方丈: 所以就係無論女神講咩都好，你都會推銷自己「你驚曱甴我識打，你鍾意食嘢我識煮」，一定有啲嘢你可以推銷到你自己。
Sybil: 哦～學到野喎。

Sybil: 有人都會問CV嘅設計，有冇影響到面試嘅機會?
方丈: 你問我呢design會唔會有影響呢，其實最重要嘅係，佢唔會影響你收唔收到Offer ，但係佢會影響你會唔會有面試嘅機會。如果你嘅CV夾硬寫滿一版，人哋去睇一份CV，其實可能係30秒內已經睇完，如果你有太多嘅資訊，佢完全唔會收到呢啲資訊。例如話係咪一定要一頁過？唔係嘅可以兩頁。
Sybil: 下可以兩頁㗎？
方丈: 可以㗎。
Sybil: 啲人成日話要一版過㗎喎。
方丈: 唔係㗎，呢個concept 係錯㗎。只要你睇得舒服睇得清楚，其實呢一樣嘢先係最重要。

Sybil: 明白，頭先都有聽你提到reference letter（推薦信），咁其實係咪好重要 ?
方丈: 公司都會做reference check嘅，咁做reference check呢，舊公司係真係冇義務幫大家答。咁所以呢如果舊公司一直死都唔肯答，但係新公司又真係好需要一個好嘅reference 喎。咁呢個時候你嘅reference letter就好重要，咁佢就係攞咗唔係好有用，但係用起上嚟嘅時候，你先至會需要嘅樣嘢。
Sybil: 但係成日聽講都有人威脅，「即係自己辭職，就可以有reference letter；如果你唔肯，我炒你就唔會比reference letter你」，其實成日都聽到呢啲威脅式嘅講法。
方丈: 咁其實坦白講，如果雇主做到呢一步，你都預計佢reference check 佢都唔會講得特別好。咁所以係咁樣嘅情況底下，咁就要睇你俾佢炒，你會唔會攞到一筆錢。點解佢要咁樣威脅你，佢一定會有啲動機令到佢咁做。咁其實通常，如果你自己辭職走，佢就可以唔使比通知金。所以呢，如果呢一筆通知金好大，你明知道佢都唔會講好說話，咁就梗係攞錢啦，反正都蝕底㗎啦，都係蝕少啲好。

Sybil: 最荒謬係聽到啲咩case呀？
方丈: 最荒謬呀? 因為其實我之前唔係淨係管理香港呢邊，我會管理亞太區。咁樣就想請一個人，佢就有非常好嘅工作經驗，佢有一個極度相關嘅經驗，佢個樣係靚仔到呢，講緊你會覺得好似喺韓國電視劇見到佢咁。
Sybil: 咁即係CV完全完美喎～
方丈: 完美，個人都好完美，不論係儀態或者其他嘢都好完美。因為呢個係要請一個要對客人嘅職位
Sybil: 係面試見埋㗎啦？
方丈: 我見過佢兩次，我特登飛去見佢。跟住正想出offer嘅時候，咁然後呢，我就問佢攞身分證，咁就發現有啲唔對路喎。原來佢張身分證係假嘅，佢全部嘅身份都係假嘅。佢用一個假嘅身份去幫幾間好出名嘅奢侈品公司做過嘢，出過糧因為有資料嘅。但係後來先知佢嘅身份係假嘅，所以唔請得呢個人。即係成個人都係假㗎啦，即係例如佢話自己係1993年出世，但係對返佢份CV上面嘅資料，其實佢應該係1980年左右出世。

Sybil: 哦，咁即係CV上面都唔協調。
方丈: CV上面有一部份係啱嘅，但係有一部份係假嘅，學歷係假嘅身份係假嘅。即係佢唔係Sybil，而係第二個人，但係佢就扮係Sybil咁樣。
Sybil: 咁奇怪？
方丈：咁所以跟住後來都冇請到佢啦。
Sybil: 有冇拆穿佢呀？
方丈：冇拆穿到佢，都係話唔合適。但係呢個應該係我暫時HR生涯最癲嘅一單嚟。
Sybil: 真係好荒謬喎，連個身份都係假。

Sybil: 都想問吓方丈啦其實做HR最大嘅困難係咩？
方丈：我諗如果係講呢一年嘅話，其實最辛苦嘅地方，係成為咗公司同埋同事之間嘅磨心啦。例如話好簡單啫，強制打針，咁究竟逼唔逼同事打針呢? 佢一直喺公司帶着口罩就唔使去打針住? 咁其實呢一類型嘅問題，好多時候公司嘅利益同員工嘅利益有抵觸嘅時候，如果你係一個有心想保障同事嘅HR 咁就會好辛苦囉。
Sybil: 咁你最後會唔會都有一啲提醒想比下大家？
方丈: 我諗最重要嘅係，唔好太過怕羞。因為你要知道當interviewer去做面試嘅時候，可能佢都同你一樣咁緊張，你點知你係咪佢第一個要面試嘅人啫?即係你去到，你自己緊張會扣咗自己30分先，咁呢樣嘢係最蠢嘅。同埋唔好限制自己，話覺得我見呢份工作要有兩年經驗，但係我得一年九個月咋喎，佢都應該唔會揀我㗎啦算啦。其實唔需要囉，你去send一份CV，或者去一個面試，其實成本好低，頂到盡淨係用咗少少時間。個成本咁低，但係幫你買到一個職業發展嘅機會，我覺得咁樣係值得㗎囉。

Sybil: 今日呢就好多謝方丈上嚟米問你答啦，都多謝佢解答左我哋咁多問題。而我本人嘅問題佢都幫手解答咗，係呀，真係好多謝方丈。咁大家記得要CLS我哋米紙同埋方丈嘅Channel。
方丈: 都非常多謝你哋嘅邀請。
Sybil: 好啦，咁多謝晒，下次見啦，拜拜～