BAD Ltd. 特約 《國家級任務》英國篇 第一集 - 移民從東方昇起

Bad Limited特約：國家級任務！英國！

我去泰晤士河沖涼喇！嘩！！！正呀！！

大家眼前呢個離境大堂嘅畫面，我相信係近一年香港人留得最多眼淚嘅地方。而家呢度，我就撞到今日即將離開香港嘅阿就。

阿就你好，我見到你有班朋友嚟送你機。

阿就：係呀係呀。

東方昇：係朋友嚟㗎嗎？

朋友們：係。

東方昇：呀！眼濕濕喎，見到你。你係咩原因走呢？

阿就：都係政治喇。

東方昇：即係社會環境喇。

阿就：係呀係呀。

東方昇：咁你係咪好唔捨得香港呢？

阿就：係！

東方昇：你最唔捨得啲咩呢？

阿就：香港所有嘢……

東方昇：你哋嘅好朋友走喎，你哋有咩感受呢？佢係咪第一個你哋身邊咁close嘅朋友離開？

朋友們：係嘅……

東方昇：之前你知道好多香港人移民，但當真係有個咁close嘅朋友走，咁你哋嘅感受係？

朋友們：恭喜佢。

東方昇：恭喜佢！呢個好啊！都係㗎其實。

朋友們：走得快好世界呀嘛。

東方昇：咁你哋有冇諗住走呢？

朋友們：點走呀？走唔到喎我哋。屋企人唔走我哋冇得走㗎喎，我們咁細個。

東方昇：佢哋恭喜你係真㗎。因為佢哋反而覺得你係幸運嘅一個，可以離開。係咪好唔捨得呢？

朋友們：咁一定唔捨得嘅。冇人請食飯喎而家。

東方昇：係咪呀？

朋友們：冇老細喎而家。

東方昇：見到佢哋開始……開始係到嬉皮笑臉呢，掩蓋自己真實嗰個離愁別緒嘅感覺呀。呢個係正常嘅。你有咩說話想同啲朋友講？

阿就：多謝大家……我愛你哋……

東方昇：耶～阿就你好衰㗎～搞到人眼濕濕～就等我都幻想一下，如果今日係我最後一日喺香港，我……又喊唔喊得出呢？

點解～～～～～而我喺上機之前，我做咗個實驗，我喺登機閘口前面攞住張機票影咗張相，然後upload上咗Facebook同IG，一隻字都冇寫到。結果……果然不出我所料，呢張相已經觸動到各位嘅敏感神經，短短半個鐘已經有成千上萬嘅留言：

「東方昇都走，一路順風呀」、「好唔捨得你，同時都戥你開心，一切順利」、「你係100毛台柱也要走，看來100毛要摺了」

呢個實驗證明咗，即使你冇移民，但移民呢個議題已經深深咗咁影響住大家喇～不過我估唔到嘅係，原來大家咁在意我㗎。你哋好衰㗎～

上咗飛機之後，竟然比我撞到今日飛去英國移民嘅Alex～

你好你好～多謝你接受我呢個訪問呀。你都係搭呢架飛機去英國移民？

Alex：係。

東方昇：我見到你個case係你……有你老婆啦、有仔仔啦，同埋有老人家啦，移民其實係邊個有呢個諗法先呢？

Alex：早係2014年，我哋兩公婆開始有咁嘅諗法，咁一路時間過到去2019年喇，開始好積極咁樣諗。直至到出咗嗰個visa喇，就真係覺得……有冇咁嘅需要呢？

東方昇：你心情係點樣呢？

Alex：好……好surreal……我一路搭車過嚟，我只會係覺得好似係去緊泰國玩，好似係去緊其他地方。可能有一日我靜靜哋坐返喺屋企嘅時候，可能覺得吓……你已經冇得再翻去。可能到嗰陣先會感覺到，原來真係要移民。

東方昇：最後希望你係英國生活愉快。

Alex：多謝你。

東方昇： 一定要平安。

Alex：嘩！同國際巨星握手。

東方昇：落機喇！我係樂基兒呀！

（咩年代呀你……）

東方昇：我終於到咗英國喇，我要即刻唱返首英國國歌先！登登登登登登登登～London bridge is falling down, falling down……嘿嘿嘿……你哋係咪好好奇點解我一落機就可以出機場高歌一曲，完全冇保安打柒我，然後撳我落地，捉我去隔離呢！哈哈哈！梗係啦我天王巨星呀嘛！所以我特別得到英女王嘅特赦，係唔需要隔離㗎！講笑咋，因為我為咗大家，我特登打咗針，所以就唔使隔離！即係話，我終於得到真正嘅自由喇！

【下集預告】
下集，將會係，國家級任務大戰占士Bob，過幾日就會出㗎喇！大家密切留意。