【Dickson整喊女事主！！】26/11《圍爐取戀》- 派綠帽派到自己喊？！

---過場---

眾：Hello～

（今日位女事主就陷入咗兩難嘅局面喎，一邊就係拍咗拖十年既男朋友，另一邊就係非常之照顧佢嘅男上司。）

東方昇：一腳踏兩船！派綠帽！

利君牙：未嘅可能

東方昇：未派嘅下話？

（係呀，所以佢想打電話上嚟問吓你哋，佢應該揀男朋友定男上司。）

東方昇：好～打上嚟，嚟！

---過場---

東方昇：Kitty你好！

Kitty：Hello咁多位主持人～

東方昇：你係派綠帽畀人喎，係咪呀？

Kneta：派咗未？（Dickson：未派嘅……）（東方昇：派咗㗎喇。）

利君牙：講嚟聽吓先啦，發生咩事呀？

Kitty：你哋可以define一下算唔算係嘅～

東方昇：好呀好呀好呀……

Kitty：我自己嘅definition就係啦。咁我講一講background先啦，我同的男朋友一齊咗接近十年，咁我哋嘅關係已經去到談婚論嫁㗎喇；同埋我哋相處一路都好開心，又冇鬧交，佢又好錫我，我又好錫佢，即係大家都好認定大家嘅。

東方昇：咁美滿又點解（出軌）呢？

Kitty：事緣最近幾個月轉咗工啦，咁去到新嘅公司人生路不熟，但係就有個男上司對我好好嘅，即係佢好照顧我呀、教我做嘢呀，好好人咁樣啦。咁但係都開始feel到呢，咦？係咪想追我呀？咁我都有明示或者暗示畀佢知我係有男朋友啦。

東方昇：你點樣明示或者暗示？

Kitty：即係譬如同同事出去食飯，咁我就唔會掩飾，我會直接攞部電話出嚟，好明顯見到我男朋友嘅訊息。

東方昇：嗱！呢個我男朋友呀！睇吓啦！

Kneta：有冇咁誇張呀？

Dickson：想盡辦法話畀佢聽其實我已經有另一半喇。

Kitty：即係見到我覆message嗰啲嘢囉。

利君牙：即係你冇直接講嘅？

Kitty：冇，因為驚無啦啦走去同佢講話「我有男朋友㗎」咁樣咩？

東方昇：都係，咁樣好怪嘅，無啦啦咁講好似人咃追你咁樣。

利君牙：啊係呢～我有男朋友㗎！

Kneta：點解唔可以係「咦！我男朋友打畀我」，「聽一聽個電話先」，咁樣得唔得呀？

利君牙：係囉，可以用呢招，我覺得可以用呢招喎～

東方昇：所以唔怪得你成日話畀我咃聽你男朋友接你放工啦。

Kneta：哈哈哈哈哈！

東方昇：（晃然大悟！！）係咁樣嘅原來！

Kneta：你諗多咗喇！

東方昇：我冇追你呀！！哈哈哈哈哈……跟住仲有呢？點呢？

Kitty：咁我見我講咗我有男朋友但係佢都會對我咁好喎，咁我會覺得可能佢純粹係好好人、好照顧後輩，所以都冇話同佢斬釘截鐵咁樣唔好同佢咁多聯絡之類啦。但係因為我咃朝夕相對，佢又對我好好喎，咁我一開始冇反感之餘仲好enjoy，即係有少少沉船呀…（眾：嗯～）同埋可能呢個男上司同我男朋友嘅類型都係比較相似。

利君牙：佢係咩類型？

Kitty：比較暖男咁樣囉，嗯。後尾我就發現自己好似有少少鍾意咗佢，又會控制唔到自己keep住同佢text咁樣啦。我咃都試過單獨約出街食晚飯嘅，咁食完佢有拖我手，不過我好快就放咗手，因為我知道咁樣做係好唔啱嘅，我覺得好對唔住我男朋友啦，所以我就define咗自己已經係派咗綠帽㗎喇。

東方昇：哦！即係佢拖你隻手啫…（Dickson：然後你揈開咗佢）冇喇？

Kitty：Errr…Err…佢有…有…錫我一啖嘅……

利君牙：咁你有冇回應佢嘅吻？

Kitty：我冇回應呀，我完全係被動嘅角色。

東方昇：即係佢係偷錫嗰啲呀？

Kitty：只係蜻蜓點水式咁樣…（利君牙：錫你個嘴嘅？）係喇係喇。

東方昇：嘩……

Dickson：咁你點樣反應呀？有冇好似電視劇咁樣兜巴車返佢一下？

Kitty：咁就梗係冇啦，因為我沉咗船吖嘛…（利君牙：即係你都enjoy，你個樣都笑住咁樣嘅？）Er…怕醜咁樣囉。

東方昇：嘩……

利君牙：含羞答答！所以個男仔就會覺得佢接受。

東方昇：咁我再問你佢冇下一步喇？

Kitty：佢有，但係我拒絕囉…（Dickson：即係推開佢喇已經？）係喇。

Dickson：跟住佢冇後續喇？冇做任何嘢或者向你表白諸如此類？

Kitty：佢其實有同我表白嘅，佢就咁講囉，佢話：「你又未結婚，咁我覺得你一日未結婚我都可以追你喎。除非你係結咗婚，咁我就唔可以破壞人哋家庭啫！」。

東方昇：佢講得啱呀，佢可以追你呀，但係你可以有選擇點樣回應喎。

Kitty：我冇應承但係……可能我拒絕得唔夠明確？我話：「我哋咁樣唔得㗎」咁樣囉。

東方昇：嘩…（Kneta：佢好開心啦！）你點樣講呀，如果我聽到頭先嗰個我就再搶韁啦，即係我再用誠意打動你啦！

利君牙：即係你有種欲拒還迎嘅感覺……

東方昇：係呀，即係你再努力啲我就會離開我而家嘅男朋友㗎喇，帶出咁樣嘅訊息喎可能。

利君牙：但係我想問吓男仔，咁佢算唔算派咗帽先而家？

東方昇：我覺得反而係你接住落嚟點樣做，就係決定嘅關鍵，係喇。

Kitty：我就係好似控制唔到自己嘅感情，我自己都會問自己，喂，點可能成十年嘅感情突然間咁容易就比另一個人入咗我個心，我冇幻想過自己會係咁嘅人。

Dickson：嗱，我自己嘅睇法係咩呢？有可能係你入咗一個新嘅環境，然後你好陌生，突然間有個人走出嚟，咁佢又對你好好；然後又向你施予援手，又比水泡你，令到你喺呢個陌生嘅環境入面有一絲嘅溫暖。

東方昇：女仔係咪咁諗呢其實？

Kneta：我有試過㗎，我有試過類似Kitty嘅情況，咁嗰陣我點樣撳住自己呢？就係覺得同男朋友一齊咁多年啦，其實佢一路都冇問題先可以行到咁耐啦，我點解要take一個risk去試一個我唔清楚嘅人？

東方昇：我反而覺得係你好人啫，你可以騎牛搵馬先啦，你可以一腳踏兩船㗎嘛，你咁樣諗因為你冇咁樣做…（Kneta：嗯係係係……）咁我想問Kitty你有冇咁諗呢？兩個去住先？

Kitty：我冇諗過㗎，我淨係諗過最壞嘅情況係我會孤獨終老囉，因為我咁樣好衰……

利君牙：咁你好好喎！

東方昇：我要頒個貞節牌坊畀你先～（眾：哈哈哈哈哈……）所以我覺得Kitty嘅疑惑，嗱，我要釐清你而家嘅情況先。因為有機會其實係道德上你覺得同佢拍咗拖十年，你要同佢繼續一齊，所以你先唔可以同個新嘅一齊啫。我想問你，你鍾唔鍾意你男朋友先？

Kitty：好鍾意。

Dickson：咁你又要考慮吓，因為譬如十年嘅感情呢，其實平淡似水係好應該嘅。

東方昇：你識個新嘅，我梗係去盡啦，對你極好、極關懷備至，去搶嘢吖嘛大佬！如果你清楚你係鍾意而家嘅男朋友，咁冇辦法，你要斬斷你同你上司嘅關係…（Kneta：個情根呀～）係呀 ……

Kitty：不過其實都擔心唔知點處理，因為大家都喺公司度……

東方昇：明呀！因為牽涉到就係佢係你上司呀，你知唔知個情況幾…（Kneta：尷尬。）講真一個上司溝你…（利君牙：一係結婚！一係離婚！）係咪呀係咪呀！你唔識拒絕，你驚拒絕咗會唔會令你工作上面阻阻呢？（Kneta：或者冇咗份工呀？）或者報復式行為呢？而好似你咁講當你要拒絕佢其實你都好難呀…（Kitty：嗯。）同埋我就好衰，因為我覺得個男仔都唔係好人啦，雖然佢話未結婚就可以搶，但問題我唔會咁樣做囉。

Dickson：即係你同佢一齊咗之後呢，可能佢見到個更加好嘅，佢都會同你講…（Kneta：佢都可以選擇㗎。）未結婚都有得選擇嘅。

東方昇：係呀，佢就係一個咁嘅價值觀嘅人。你係咪決定咗同你上司…（Dickson：斬纜。）斬纜先？

Kitty：我覺得我而家呢一刻未決定到住。

眾：嘩……

利君牙：有咩阻住你呀？（Kneta：有咩阻滯呢？）因為你頭先好……

Dickson：因為佢個情感好澎澎聲喺度郁緊呀，而嗰個人又不停地進攻呀。

Kneta：Kitty呀，我想問呢，你同你男朋友而家仲有冇成日拍拖㗎？

Kitty：我哋都會約出嚟嘅，但係可能都係普通行街睇戲食飯囉，可能見嘅時間真係唔算多，但係以前一路拍拖落嚟都係咁，所以我又覺得冇乜問題。

Kneta：我自己嗰陣又係呢，拍到差唔多好悶呀，日日返工放工。之後一遇到呢個問題嘅時候，嗰陣我問自己「死喇，我應該要點？」、「我係咪要搵啲衝擊呢？」，咁你個衝擊唔係搵第二個人嚟衝擊自己…（Dickson：所以你就建議你男朋友學SM喇？）唔係呢種呀！即係你主動都好啦，即係搵返嗰種熱情同你男朋友。

東方昇：你決定之前你唔可以用呢個situation去決定，因為嗰個追緊你嘅，梗係對你好啦，而嗰個又唔知你覺得佢已經冷淡咗啦嘛，所以如果我覺得你真係鍾意你男朋友嘅，我覺得你要畀個機會你男朋友…（Dickson：畀佢發功。）發吓功先，我覺得要嗰邊溝通咗先，咁樣先……

Kitty：其實佢……其實佢知㗎，我有同佢講過上司追我嘅……

眾：嘩……

利君牙：咁佢咩反應呀？

Kitty：佢話……「Errr唔緊要嘅，人哋追你你都控制唔到嘅，我信你咪得囉」，所以我係好心痛，你明唔明？

東方昇：咁佢有冇行動多啲去關懷你呀？對你好啲呢？

Kitty：又好似冇特別，都係平時咁囉。

Kneta：試吓畀啲怨言佢囉。即係……踢一踢佢囉。如果你唔mind你都可以試吓郁吓嘅。

利君牙：其實我唔同意一定要個男仔郁喎，我唔覺得個男朋友有問題，咁嗰個關係兩個人㗎嘛，Kitty佢都有責任令到嗰個關係保鮮㗎嘛…（東方昇：啱啱啱～）而如果你最決絕啦，其實我覺得，如果係一份工，同埋一個同你一世嘅人，直頭係可以放棄嗰份工囉。

東方昇：如果你揀定咗就係囉。

Dickson：Kitty我想問吓你啦，你而家呢個十年嘅平如止水嘅男朋友，如果你有一日冇咗佢嘅、失去咗佢，咁你會係點呢？有冇諗過呢個問題呢？

Kitty：Errrrrrrr…（Dickson：可以幻想吓先。）個心好似穿咗個窿咁囉應該會。

東方昇：咁原因係因為你覺得慣咗定係咩呢？

Kitty：唔……Sorry…（東方昇：你慣咗定係咩呢，你覺得係？好嚴肅呀呢個話題。）我覺得係……因為佢係一個我好珍惜嘅人。

眾：嗯……

Dickson：因為我大概明白就係有時有啲嘢就係佢喺度你唔會覺得係啲乜嘢嚟，但係原來你發覺有一日你冇咗你先會知道原來佢係非常之咁重要。

利君牙：但係我又好驚Kitty而家純粹係不斷用時日去計算感情嘅重要性。

Dickson：點解時間有時會都係一個重要嘅環節就係時間入面會有好多唔同嘅經歷，或者係會有唔同嘅考驗，咁通常你一個咁長嘅時間呢，嗰啲考驗可能已經係你去面對過，大家仲未有咩問題出現呢，咁即係（呢個人）可能係適合㗎喎。

東方昇：所以我覺得你要解決問題，其實係一個好好嘅機會畀你諗吓，究竟你拍拖十年嗰個係唔係你嘅終身伴侶先？（利君牙：係咪真係最鍾意嗰個。）就算如果佢唔係，都唔代表你要同新嗰個一齊呀…（眾：嗯……）只不過係畀個機會你去反思，究竟十年呢個係咪你嘅終身伴侶啫。本身我都想鬧你派綠帽㗎喇，但係我真係鬧唔落，因為你其實係……（Dickson：佢係……）（Kneta：被動呀。）糾纏緊，你都係有個道德，有個天使喺你側邊叫你唔好咁樣做。

利君牙：始終都有個牌坊啦係咪呀？

東方昇：係呀，派咗個貞節牌坊畀你㗎啦。

Kitty：唉……我都唔知點解自己會咁，我覺得我係一個衰人囉…

東方昇：都……

利君牙：你覺得你自己係一個衰人，咁你就係一個好人嘅表現。

東方昇：你內疚都已經…（Kneta：你識反省。）係呀，嗰頂綠帽都係淺綠色嘅…（Kneta：若隱若現㗎～）（利君牙：呢個布咁～）淺綠色嘅，OK嘅OK嘅。

Dickson：呢件事同嗰個吻都係蜻蜓點水啫。

利君牙：但係我真係想你諗清楚你係咪真係鍾意你而家呢個十年嘅男朋友，我覺得呢個係最大嘅問題囉。

東方昇：係呀。

Kitty：知道。

東方昇：好啦～（Kitty：好。）好啦～唔該哂～（Kitty：多謝哂。）唔好喊喇唔好喊喇……

眾：拜拜～

---過場---

東方昇：其實Kitty都幾克制㗎喇我覺得，其實佢又冇乜過火行為，所以清醒嘅算係。同埋我哋又好難評論，因為我哋唔識佢男朋友，同埋佢個上司。如果佢男朋友好似Dickson咁樣，佢上司好似我咁，咁我梗係叫佢揀佢上司啦！係咪先？但係我哋唔知佢兩邊嘅為人。而呢啲問題我覺得女仔成日要面對呢啲問題…（Dickson：畀人追嘅問題。）係，畀人追就開始要抉擇……

利君牙：所以要自己諗多啲嘢囉，我好驚Kitty因為嗰個時間同男朋友一齊咗十年…（東方昇：係呀……）所以佢覺得唔可以放棄，所以佢先話好愛佢，冇缺點，而放棄咗嗰個可能更好嘅機會。

Dickson：但係同時間我都會擔心佢因為嗰個男上司新嘅全攻型行為同埋佢嘅新鮮感，而放棄佢十年嘅男朋友。

東方昇：冇呀～係一個契機畀佢諗清楚囉……

Kneta：係呀，因為其實佢人生中可能有好多次呢啲咁嘅情況㗎。

東方昇：當你揀定咗呢，就好似利君牙咁樣，就……落閘！姜濤追你都唔得……

利君牙：你哋唔好約我食飯呀。

東方昇：係咪呀？

利君牙：係呀係呀。

東方昇：所以啲人會退居幕後就係咁解喇……

利君牙：係呀……

Kneta：退咗後啲啫其實係～

東方昇：不過好呀，都好多謝Kitty打嚟吖～

Dickson：圍爐最緊要陪伴啫～

東方昇：大家有咩問題……我哋都未必一定話你係渣女嘅，上到嚟睇吓個情況先啦。

Kneta：你睇佢今日打咗個貞節牌坊比人哋……

東方昇：係囉，畀咗佢呀…（Kneta：幾唔容易呀！）好少打㗎我都……好啦！

眾：拜拜！