念力抗疫？談心理健康與抵抗力的關係

所以現代藥物研究為咗證明研究緊嘅藥並非只有安慰劑效用，會做一個randomize controlled 嘅動作，意思係搵一大班參加者，其中一半就餵佢食安慰劑，而佢唔知自己係食緊安慰劑定係真藥；而另外一半就俾佢食要試驗嘅藥。只有當食真藥個效果係高過安慰劑，我哋先會話隻藥係真係有效。咁大家見到其實我哋個心態的確會影響生理健康。

另一樣可以講嘅就係psychosomatic disorder，就係指有d人佢哋個身體出現咗d病徵，多數係胃，但係去到睇醫生做身體檢查時，搵唔出任何身體上問題。佢哋就會被轉介去精神科或者心理科到做服務，最後會發現其實呢d身體病徵係源自心理鬱結，當呢d心理鬱結被解開時，隨次而然身體病徵都消失。呢個係另外一個心理同身體健康有連結例子。

可能大家會話咁樣我哋同d人講用念力去醫武漢肺炎嘅人冇咩分別，並唔係，個重點其實係程度問題，例如1992年有份研究「到底心理治療有冇助我哋提升免疫力？」，佢嘅結論係咁講「普遍心理治療令人提升心理健康，會令免疫力提升，但係呢d提升未必等即時改善」，換言之兩者之間連繫係有，但係咪真係咁具體呢？其實並唔係。

保持健康心理，多做與心理健康有關活動，例如與朋友保持聯繫、食健康食物、充足睡眠等，係有助我哋提升免疫力。但係當嚴重疫症來到，例如武漢肺炎，我哋每個人都要做好醫學上自保措施，例如戴口罩係其中一種，咁就唔係純粹話自己心理健康就乜都ok。
甚至有d極端論調會指「所有身體問題都係源自於心病」，如果基於呢個講法，我係一個遺傳病病人就會非常唔開心，有冇搞錯，d病我細細個就已經喺度，點會係我心理問題呢？同埋有d人心腸非常歹毒但係都非常健康，你甚至有時會諗點解病嘅、死嘅唔係嗰d人呢。總之就係咁，心理學嘅結論好清晰，心理健康同生理健康有一定關係，做好我哋心理健康習慣有助我哋抵抗疾病，但個linkage並非絕對。

近年香港社會出現好多事，喺呢個時候其實保持一個具批判性思維係十分重要，凡事要諗得非黑即白係好簡單，例如你諗「有病係你心理問題」，呢個講法好簡單，亦好似有d幫助，但實際上係唔準確亦唔符合現實。呢個都係好錄五分鐘心理學頻道嘅目的，希望大家喺呢個亂世中有多小小思考，多小小scientific literacy，睇下實際上研究係點講。

我哋會繼續錄心理學話題俾大家聽，如果有問題歡迎到facebook treeholdhk或者instagram搵我，我係大家嘅節目主持peter，多謝大家。