10／11《星期三港案》遺宅整理師

其實一間屋有屍水都唔係最臭，最後間屋唔通風，開唔到窗。唔好話冷氣，風扇都唔可以開。成屋斷電，出邊好猛太陽曬住。咁我哋又著哂保護衣，好熱啦，防毒面罩都頂唔到，有味道滲入黎，好難受...但係呢個系你嘅專業精神啊，咁咪要頂硬上囉。

旁白:呢個廿四歲嘅後生仔本身系賣金銀衣紙嘅，但隨住社會上嘅轉變，泰仔就增加咗唔同嘅服務，例如幫海外港人拜山，仲有呢個遺宅整理服務。因為近兩年好多人移民，多咗好多獨居長者，有啲長者喺屋企意外或自然離世，隔左幾日都冇人發現。直到有氣味傳出嘅時候，先有鄰居報警，呢個時候就需要泰仔嘅服務喇。除了清理現場，仲會保留重要文件同物品，有待之後交翻俾佢哋嘅親人。

泰仔:死亡唔單只要重視在生果一批人啊，啲人成日講「喂，你死咗，最傷心係在生嗰啲」。但係我地也要顧及死者本身囉，因為俾翻個尊嚴佢，其實呢樣嘢就好似一個醫院嘅病人，可能佢失禁。佢死左咗間屋內好臭，個個望到佢間屋又皺哂眉頭。鄰居啊又「真可憐，在這離世又沒親人在旁」。但我覺得我地可以幫助呢啲人，起碼留番個好印象比鄰居，因為好多時住果啲區，唔一定全部老人家，但都已經住左幾廿年。左鄰右里會話「個公公睇住我大」「有時會接我放學，做鄰居20多年，現在離去了」。我成日同團隊講，無論果個人點死，自殺沒人發現，安詳自然離去也好，你要記住呢份係我地做比佢最後一份禮物，留比佢鄰居最後的印象。

旁白:雖然好有意義，但呢份職業真的不容易，除左惡臭，又有蛆蟲，還有好多難以形容的畫面要面對。有次鄰居行近少少間屋，就已經即刻擰轉身嘔住出嚟，佢哋而家行街聞到消毒藥水味，嗰陣難以忘記嘅味道都會隨之而再浮現。而呢份係整理一個屋企之餘，更可以話系去認識、去瞭解一個人，幫佢同佢親人作最後嘅連繫，縱使泰仔同佢哋根本素未謀面。

泰仔:一間屋有一個人死左，唔代表嗰啲嘢系冇意思，每一件我哋屋入邊棄置出嚟呢，佢背後都有一段故事。做過一個港島嘅老人區，去揾我哋嘅系死者兄長嚟嘅，佢冇咩要求，佢淨系要揾翻本相簿。佢話「本相簿由他和細佬，從小已儲起直到現在」四十幾、五十年，我哋最尾揾到俾佢。佢攞左本相簿講唔該，後來係後樓梯坐底係度喊，佢話「點解我係最老嗰個，唔係我死先，點解係你?」仲話好多忘記了嘅回憶，而家都有番哂黎。你會瞭解咗死咗果個人多啲囉，但系唔係透過佢嘅説話，唔係透過後人講嘅東西，而係透過間屋發生緊嘅事，講俾你聽唔同嘅野。

之前試過有一個案列，事主同我講話，佢爸爸媽媽離左婚，咁佢長期同阿媽一齊住。咁佢初時就覺得佢同老豆冇乜緣分。佢老豆死左係屋企啦，後尾揾出嚟，原來佢收埋咗好多個仔嘅獎狀，學生相或成績表，我諗睇翻都廿零年啦。甚至乎嗰個人唔知做邊行啊，即系平時報紙呢，好大個人頭貼哂喺度。咁樣咁佢又唔知點解睇報紙見到個仔，咁就剪咗落嚟啦。保存得好好啊嗰箱野。跟住果個就喊啦，亦都咁多年誤會咗個老豆，原來老豆咁多年系咁樣過。今日我可以為講翻出嚟件事，我覺得你釋懷到我哋就開心，我即系我哋系想做到呢件事。

旁白:份工咁惡頂，真系做完一單，都唔會想咁快想再有第二單，但佢哋竟然有時連無酬工作都會照接?

泰仔:有陣時坦白講，當然啦，有一部分嘅當然系有糧出，有啲系真系冇糧出，乜嘢屋企人都冇，連去辦喪事都系街坊夾錢嘅，咁我哋有做呢啲。咁但係呢樣嘢系有意義，無論對方系有錢無錢，我哋收錢好，唔收錢好。人死得有尊嚴啦，或者死得有質素。唔係有錢人，唔喺獨有某一個社會人而擁有嘅專利。當然啦，我唔可以控制到佢死嘅時候，有人發現，咁呢個係佢在生嘅時候的社會嘅責任。咁但係死咗之後，我地就作為一個殯葬團隊，我覺得我哋可以幫到呢啲人。

旁白:話呢份工系要厭惡性行業一啲都唔過份，無乜人肯做，亦冇咩人做得到，所以都有翻咁上下時薪。不過講到錢呢樣嘢，泰仔就有呢個睇法。

泰仔:如果你要做呢樣工作去攞錢去衡量呢，好辛苦，即系當然啦，我唔係話咩扮清高，我唔講錢啊，痴線啦!我食飯都要錢啦，我都講錢系啱嘅呢份工係。但係如果你全盤用錢去衡量，你會好辛苦，因為你每一啖你抖嘅空氣，都系臭嘅，或者你都會覺得係好厭惡。

我都好坦白，人心肉造，唔會冇喊過。即系對我而言，我覺得對死者嘅一個好明確嘅標示，就係已經停曬。無論你唔甘心，唔放低，你都要停。比死者知，其實你可以放下塵世，你啲嘢我交咗俾你信任不過嘅人處理，你可以安心走。作為一個殯葬從業員啦，或者做一個祭祀嘅負責人啊，呢個就係我哋要做嘅職責。

旁白:生死從來唔係我哋可以主宰，渺小嘅我哋可以做嘅事，就係喺有限嘅時間內珍惜眼前人。呢個星期香港天氣開始轉涼，雖然未必即時可以出現喺佢面前，為佢添衣，但其實你一個電話就已經足以暖透佢嘅心。