9/11《圍爐取戀》- 叫雞大辯論！個個男人都係李雲迪？！

眾：Hello！
幕後：大家應該都有聽過「李雲迪事件」啦。
專家Dickson：冇得彈
利君牙：李雲迪叫雞冇得彈
東方昇：就叫雞。點呀，你想問我哋有冇叫雞呀？冇
幕後：我想問吓大家點睇李雲迪叫雞呢一件事呢？
Kneta：我係好憎男仔叫雞㗎，所以唔淨止李雲迪啦。咁如果放喺李雲迪呢件事上面呢，因為我係…見各大報章一直都present佢係一個好柔情嘅男人啦，好似好溫柔好知書識禮咁，咁但係佢做咗呢一件事喎，我就會覺得佢好似一個偽君子囉。
東方昇：如果隻「雞」都係同佢玩音樂先呢？又識吹………//字幕：床上音樂大會// 吹笛呀嗰啲
專家Dickson：佢又彈吓琵琶咁
東方昇：佢哋可能喺度比試一輪先，笑傲江湖！ 咁樣先開始呢？可能好浪漫㗎喎
Kneta：唔得囉我真係唔得。(東方昇：都唔得？) 唔得唔得。

東方昇：呀利君牙呢？
利君牙：我覺得…佢本身嫖妓呢件事係冇問題嘅，因為同我冇關係吖嘛。但係如果佢係即將要做我男朋友、要同我結婚嘅話呢，就有問題！
專家Dickson：即係你接受唔到，但係你理性上知道「叫雞」呢樣嘢係冇問題。
利君牙：係，因為我覺得佢叫雞嘅話呢，即係佢對愛情嗰個睇法會唔同咗呀。(專家Dickson：吖呢個係。) 即係平時追一個女仔，你要同佢瞓嘅話，你要氹佢呀，同佢食飯呀、行街，你先做到呢樣嘢。但你叫雞啦，你畀錢就得喇喎，咁個價值觀就好似錯哂囉，即係畀錢就乜都得……男仔覺得呢？
專家Dickson：我係理性上覺得冇問題，但係我到而家都未做……即係我對呢一樣嘢存有一啲恐懼。
利君牙：你未試過嘅恐懼下嘛？未知嘅恐懼。
專家Dickson：Errrrr……呢個唔係，因為我都真係驚有性病㗎嘛。
東方昇：如果佢衛生，檢疫係……QC(質量控制)做得好好嘅…
利君牙：(笑)打哂針嘅。 (東方昇：係喇)
專家Dickson：咁就…要諗喎……
眾：哈哈哈
利君牙：嘩！！！即刻猶豫呀。
東方昇：所以我想知你係道德嘅乾淨定係衛生嘅乾淨？
專家Dickson：唔係呀可能因為學佢話齋，可能未試過咋，有啲驚咋。
Kneta：所以驚 ~

東方昇：嗱，我覺得咁樣有問題嘅，不過佢呢個…社會對於李雲迪呢件事件嘅懲罰呢，好似太大。因為叫雞唔係十惡不赦。嗱，理論上佢未結婚啦…
專家Dickson：其實佢冇道德問題。
東方昇：有道德問題，但未去到咁大！
專家Dickson：即係唔係嗰種會影響家庭呀或者會影響身邊人嗰種。
東方昇：係喇係喇，但其實社會都好大反應，變咗佢直程係過街老鼠。咁就我都戥佢可憐嘅

幕後：嗱，因為李雲迪事件啦，我哋就喺IG度收集咗好多人嘅意見。咁今日就搵咗兩個女士嘅case上嚟，一個就非常之反對「叫雞」，而另一個呢，就竟然支持佢男朋友叫雞喎。

//本集主題：叫雞？嫖妓？大辯論//

東方昇：嘩……咁極端？
Kneta：咩料呀呢個…
專家Dickson：即係送佢去深造。
幕後：係呀係呀送佢去深造…(笑)。咁我哋而家就接佢哋入嚟喇喎！
眾：好！！



東方昇：Wendy你好 ~ 可以講你嘅經歷嚟聽吓喇。
Wendy(化名) ——支持叫雞代表 ：Hello咁多位主持，咁交代返少少我哋嘅關係啦。咁喺早幾個月之前，同我前度就租酒店長住，諗住試吓同居嘅生活啦。咁有一日呢，佢放工飲醉咗酒，咁返到嚟就一嘢瞓咗落床，瞓死咗啦。但係佢下意識就手握住部電話啦，咁我就覺得佢鬼鬼哋，我就趁佢瞓着咗嘅時候就…睇佢部電話啦。咁因為佢個人呢成日會靜雞雞玩交友app，但係又怕畀我知道啦，轉個頭走去delete咗佢咁樣
眾：嗯 ~
Wendy：咁點解我會知呢？因為我睇佢電話啲SMS入面呢，佢有好多verification code嘅。
利君牙：哈哈即係下次啲男仔要del呢要del埋嗰啲message，嗰個驗證碼！嘩~好精明喎。
東方昇：聰明呀吓

Wendy：咁我就好心幫佢download返啦，跟住打開嗰啲交友app呢，就發現佢又狗公上身係咁yo女。咁我之後就打開佢telegram，咁我就發現佢有成廿幾個叫雞群組。
利君牙：入面係點樣㗎？
Wendy：咪嗰啲女仔自我介紹呀，話咩……「我廿幾歲呀」、「讀緊書呀 」 (專家Dickson：即係一個雞頭群組) 「想搵啲錢呀」，係呀嗰啲PTGF群組呀。因為佢返工嘅時間比較彈性嘅，咁原來佢就趁我每日朝頭早出門口嘅時候就喺房度不停問價，「3000蚊1Q OK?」、「有房可以即刻上」。
利君牙：即係會上去你哋住緊嗰個酒店度呀？
Wendy：係呀！
Kneta：Oh my god……

Wendy：跟住就話可以包的士錢呀，最過份係佢影埋我哋間房畀條女睇囉，去證明佢自己真係有房囉。
東方昇：即係其實佢話同你同居，諗住試吓同居，其實係方便佢咁樣叫雞。
Wendy：係呀。 (專家Dickson：而唔需要畀任何租錢)
東方昇：仲要你分一半租金喎，係咪？
Wendy：係呀。
眾：嘩………
Kneta：即係同畀錢佢叫雞有分別喎。
Wendy：咁之後呢，我又發現佢有啲…揼邪骨嘅紀錄啦，即係嗰啲…「八點小薇OK嘛？」咁樣，「小艷今日有冇返工呀？」好多呢啲咁樣嘅紀錄。
專家Dickson：即係佢瓣瓣都撈勻哂㗎喇
Wendy：係呀。

東方昇：你識佢之前有冇蛛絲馬跡佢係啲咁嘅人呢？
Wendy：佢係一個…即係佢包裝到係一個好正人君子、係一個好暖男…完全冇呢啲咁嘅癖好嘅一個人嚟。
專家Dickson：即係叫雞冇樣睇。
Kneta：我好想問阿Wendy佢係咪一個性慾好強嘅男人嚟㗎？即係我相信你哋應該都有…有㗎喇，即係一齊住酒店係咪先？
Wendy：真係好sorry呀，係冇㗎，我同佢嘅關係呢，佢就講到「哎~我愛你，我點會係為咗呢啲而同你一齊呀？我同你係(為)將來㗎嘛，我唔係淨係得鹹濕呢一面㗎」咁樣。我同佢呢，兩個禮拜可能先至有一次呀。

東方昇：咁你有冇同佢講你發現咗呢樣嘢呢？
Wendy：咁我睇到呢啲record嘅時候呢，我成個人其實已經有啲mindfuck咗㗎喇。之後嗰一日啦，我起身啦，我真係當面就問佢「你咩事呀？」、「你係咪叫雞呀？」咁樣啦，跟住佢話冇喎，只係好奇問吓價。
Kneta：痴線㗎呢啲人真係…
專家Dickson：你估你係marketing呀？ (眾：哈哈哈哈)
Kneta：做research呀。
Wendy：咁過咗幾日，沉澱咗幾日呢，我真係頂唔順，我真係決定要同佢分手喇。而佢身邊嘅朋友問咩事「喂，你哋做咩分手呀？」咁樣，咁我就照直同佢哋講，然而呢，佢哋一直都知道條友係有叫雞嘅習慣。即係佢喺我同佢拍拖之前，已經有叫雞嘅習慣。

//字幕：原來Wendy前度早有前科…//

東方昇：咁我想問，佢有冇病呢？
Wendy：咁我同佢散咗之後，就決定去驗性病啦。本身呢，個報告驗完之後正常兩個禮拜先至睇嘅，咁有一日呢姑娘就打電話嚟同我講，話「醫生想快啲見到你呀」。我當下呢…世界末日咁款呀。咁去到醫生就話我真係不幸染上性病，咁醫生就話啦，啲人叫完雞呢，以為自己戴咗安全套啦、冇爛J啦，就好安全啦，其實好多外在嘅環境呢，嗰個地方都係充滿住唔同嘅病菌嘅。即係例如嗰張床單啦、嗰條聲稱一次性嘅毛巾啦、嗰間沖涼房啦，其實都係好污糟㗎。
利君牙：咁你而家好返哂未呀？
Wendy：我未呀~ (專家Dickson：所以佢個憤怒就keep住) 我要…打針同埋食藥半年先至好返，跟住之後再要去驗囉……

東方昇：咁有冇影響你之後嘅…
專家Dickson：對男人嘅睇法呀？
Wendy：咁一定有啦，我睇完佢嗰啲叫雞群組之後呢，我嗰日仲喺間酒店房嗰度同佢生存咗幾日㗎嘛，我一落街望到所有嘅女人，我都覺得佢哋係雞呀…
//Wendy對身邊嘅人失去咗安全感//
東方昇：嘩，慘…又憎女人又憎男人呀。
Wendy：就算even我而家咁樣講返，其實我都係好唔開心。同埋我都係覺得完全接受唔到，點解會咁樣對我？

東方昇：好吖～感謝你咁勇敢去講呢個故事出嚟啦。我相信大家女仔聽完之後呢，真係要⋯⋯
Kneta：小心呀。
利君牙：帶眼識人呀。
Dickson：但係帶眼都冇用，因為佢話⋯⋯佢話叫雞冇樣睇呀！
東方昇：都帶唔到！

Kneta：係呀～
東方昇：但我唔想講話⋯⋯要Check下SMS有冇啲驗證碼！哈哈，小心啲啦，因為可大可小。
受訪者：嗯～好～
東方昇：好！感謝你感謝你
Kneta：Thanks You～
東方昇/利君牙：感謝你，好啦，拜拜！

【訪問結束】

-

東方昇：嘩，我聽完頭先個故事呢，完全感受到嗰個女仔有幾慘呀！
利君牙：好絕望呀！
東方昇：佢個前度呢，仲仆街過李雲迪。
Kneta：唔係～我自己都試過有啲類似咁嘅經歷。
東方昇：嘩！你試過有呀？
Kneta：即係我冇性病！你哋冷靜啲先，即係有啲咁仆街嘅男仔。
利君牙：都係叫雞呀？
Kneta：係呀，好L變態㗎，即係嗰啲變態Group呢，佢咪有Join埋囉。
東方昇：咁我想問喇，咁你點樣重拾對於男人嘅信心呢？教吓我哋呢位受訪者。

Kneta：好驚㗎，冇㗎，其實真係要時間磨㗎。我好明佢話，「落到街見到個個女人都係雞」，咁我又冇咁誇張嘅，我就落街覺得個個男人都會有Join嗰啲好變態個啲TG Group，所以就變到個人好神經質啦。
東方昇：唔怪得我第一次我見你見我，望住我嘅眼光好奇異呀！
Kneta：我覺得係你係有㗎！！！
利君牙：因為你真係好似呀！！

Kneta：佢真程係有嘅！！！
Dickson：你唔好見佢揸住卷廁紙，就以為佢係先得㗎！
東方昇：我好純真㗎！
Kneta：咪住先！我哋話唔得啫，但係其實原來係有啲女仔話得嘅，因為我哋下一個Case呢，個女仔係非常之ok。
東方昇：我都好好奇！
利君牙：期待呀～
東方昇：點解佢會接受到男朋友係叫雞？
利君牙：好～嚟呀～

-

【訪問開始】

東方昇：阿波你好～
阿波（化名——反對叫雞代表）：你好呀你好呀～
東方昇：我聽阿導演講你好奇怪喎，你係接受到男人叫雞喎！
Dickson：你甚至乎鼓勵喎！
阿波：Errrrrr⋯⋯
東方昇：係咪呀？
阿波：我又未去到話鼓勵～但係，我唔Mind囉，我唔介意。
東方昇：咦？點解呢？
阿波：首先我講一講自己背景先啦，嗱，我嚟緊有機會會離開香港都幾年時間，咁我亦都係in a relationship嘅，係Stable嘅。

主持：嗯～
阿波：我個人係同我另一半講，我唔介意你出去嫖妓，只要你唔好懶醒，你嫖完走嚟同我打卡咁就得㗎喇，Touchwood 你有病，你自己睇醫生。
東方昇：嗯～
阿波：係～咁點解呢，就係因為喺我眼中，嫖妓呢一回事同出軌冇一個必然嘅關係，即係我身邊好似好多人都會話「吖～我男朋友出去嫖妓，咁個啲就一定係出去出軌喇」咁樣，我就覺得我唔buy佢哋嘅諗法嘅。
東方昇：即係你都接受唔到你個另一半出軌嘅，但係嫖妓就OK，即係你性同愛分得好開。

阿波：可以咁樣理解。但係我會elaborate呢一點就係，因為嫖妓喺我眼中，其實係一個買賣嘅關係嚟㗎嘛，即係你個性工作者係唔會因為個客係有另一半，就唔做佢生意㗎嘛。即係性交易呢一回事其實就係，個客上到嚟，講錢，講conditions，大家OK咪交易囉。咁呢樣嘢suppose係唔包括販賣情感，而販賣情感嗰啲叫PTBF/PTGF吖嘛。
Dickson：嗱，我又要問吓你喇。因為召妓都有唔同嘅情況嘅，你係唔介意佢成世人去偶爾去兩三次吖，定係話，原來佢可以隨隨便便好似落7仔咁樣就去召妓㗎啦，咁你介唔介意呀？

阿波：Errrrrr，我只可以話我應承得佢，我唔介意你去嫖妓。呢一個action啫，咁但係，如果而家以我嘅感覺去睇嘅話，我會有concern囉，我會同佢傾囉，即係我爴咗個自由佢，我畀咗佢可以咁樣做咋嘛，但係佢有冇濫用到呢一樣嘢，又或者，我感到唔開心嘅時候，我有冇同佢去表達清楚。
主持：嗯～
阿波：因為我同我伴侶嘅關係都已經係比較stable，我哋係傾到成家立室㗎喇。
主持：嗯～
阿波：佢必須要去衡量做呢一樣嘢嘅時候，或者做咗會對我哋嘅除咗關係之外會對我哋呢一個Family unit會有咩影響。

東方昇：因為我覺得阿波就⋯⋯其實佢意思就係，佢同佢另一半約法三章咋嘛，你可以叫雞，但係唔可以有感情，其實佢係base on 一個⋯⋯互相溝通嘅⋯⋯
阿波：佢如果牽涉情感呢一方面，我就⋯⋯我就係⋯⋯踩咗我條線囉。
東方昇：即係其實佢係一個deal嚟㗎嘛，佢同佢個另一半，其實冇問題，我覺得你同另一半自己列一啲rule，大家只要遵守就OK，咁其實係OK㗎喎我覺得。
主持：嗯～
阿波：係呀係呀。
東方昇：咦，咁我問喇。
Dickson：嗱，如果你唔係呢個situation。
東方昇：係喇，你唔係話要離開香港，你會唔會容許佢召妓呢？

阿波：Errrrr⋯OK呀。
利君牙：咁你唔覺得佢係有需要唔搵你？點解佢要去搵其他人呀？
阿波：咁樣講～佢有需要唔代表我每一個時候都有咁嘅mood，有身體嘅情況係允許㗎嘛。

主持：嗯～
阿波：如果係我自己嘅condition唔允許嘅話，而佢又有咁嘅needs嘅，佢出去尋求呢個服務，我唔覺得有問題喎。
利君牙：咁你會唔會覺，即係講吓衞生嗰啲，感受嚟㗎嘛，會唔會覺得好污糟呀？我自己幻想我會覺得呀，有兩個人咁樣⋯⋯（怪叫）諗起都⋯⋯
東方昇：咁啲人一齊都得啦！三個！
主持：哈哈哈哈哈！

東方昇：你明唔明，三個一齊都唔覺啦！
阿波：我唔會覺得呢樣嘢污糟囉，應該話，你出去食飯，人哋都係同返同一個鑊，你個堆餐具都係⋯⋯都係reusable㗎啦，你會唔會覺得污糟吖？
東方昇：我幾Buy佢喎，你（利君牙）嗰個污糟其實係⋯⋯你自己主觀。
利君牙：係呀，我自己感覺。
東方昇：係呀，佢覺得OK咪OK囉，即係每個人對東污糟嘅定義係唔同㗎嘛。
利君牙：我想問吓你同佢講嘅時候，佢有咩嘢感覺呀？或者畀咩反應你呀？
阿波：佢個反應就係⋯⋯「啊～～？」咁囉，因為佢⋯⋯
主持：哈哈哈！
東方昇：幾可愛喎～唔怪得你畀佢出去啦，咁可愛！

阿波：唔係～佢問我「你⋯你點解會咁樣覺得呀？」佢自己同我講話係，佢自己冇考慮過叫雞呢一回事。
東方昇：啥，我咁樣問一個問題吖，會唔會係因為你知道你男朋友就係一個咁乖嘅人，所以你先咁特別講得口響呀？
利君牙：仲要講大啲。
東方昇：口響～係呀係呀係呀。
阿波：Errrrr。唔會。
阿波：嗯～如果係嘅話好㗎。因為我唔會challenge你嘅，因為你嘅諗法嚟㗎嘛。因為其實唔係淨係嫖妓呢一回事，而係個原則，我畀唔到你嘅嘢，咁唔代表你唔可以去追求佢。

利君牙：咁萬一如果你有一個新嘅對象，你對佢未必咁有信心，你會唔會都畀同一個自由佢呀。
阿波：我會話，要depends on 佢真係做咗啲乜嘢囉。佢Hurt咗我嘅話，咁其實自然我係唔會放咁多自由畀佢啦。

Kneta：咁如果喇，我講你哋係有諗住成家立室㗎嘛。咁⋯⋯將來你小朋友，喺條街度見到「咦～爸爸拖住個女人喎」·或者係隔離陳師奶見到「喔～你老公去叫雞喎」，即係你明唔明，成件事有好多嘅連鎖效應。
阿波：如果主持人你咁樣問嘅話，我會答返就係，到結咗婚，真係有小朋友嘅嗰一刻，咁就係一個evaluation嘅時候。
東方昇：係囉，我都認同，因為可以再轉㗎嘛。
（Kneta不停搖頭，極不認同）

阿波：咁你好多嘢係你結咗婚，你結婚之前同埋結婚之後係會有變動㗎嘛。
東方昇：啱呀。
阿波：咁呢樣嘢，其實最重要嘅係兩個人要坐低理性慢慢傾。
東方昇：啱呀，最緊要唔好後悔囉。「哎呀～我個陣時⋯⋯」（利君牙：「我都係唔想喇而家～」）係呀，就唔得咁樣囉。你大家訂立咗規矩，就要接受個後果囉，所以我覺得其實係幾理性㗎。
Dickson：我係覺得呢件事⋯⋯如果真正發生嘅時候會唔會可以真係維持到，你所講咁理性呢，咁樣。
（Kneta狂點頭。）

阿波：其實冇㗎，呢個世界好多嘢都係去到最後個刻，你先至知會點，但係希望我到時嘅理智同埋我嘅心境，係容許我一路Keep住呢個諗法囉。
東方昇：啱呀。好呀好呀。喂！感謝你咁勇敢講你自己嘅諗法，雖然係會好多人抨擊你，但係你都好相信自己嗰一套，亦都我⋯⋯我buy你呀！
利君牙：你係咪其實好想有一個⋯⋯咁嘅伴侶？
東方昇：我梗係啦！！！！我都想同你一齊呀阿波！
主持：哈哈哈！！！
利君牙：你分手嘅時候記得搵佢喎！
東方昇：好！感謝你
【訪問結束】

-

主持：好啦～拜拜～
東方昇：嘩～正呀！
利君牙：辯論完畢。
東方昇：大家都講到⋯⋯面紅耳熱呀真係。
主持：Thank you、Thank you。

（主持們互相握手）
東方昇：今集其實見到係，社會上有唔同人對「叫雞」都有⋯⋯
Dickson：唔同嘅聲音～
Kneta：諗法。

東方昇：我相信啲人睇緊呢，都即刻要留Comment畀我哋，表達下自己嘅想法係好事嘅。咁大家就喺我哋下面討論下喇！總之呢，我堅持自己唔叫雞嘅，OK？
Kneta：收聲啦！！！
利君牙：但係可以識一個畀你叫雞嘅女朋友！
東方昇：啱喇！最好最好係咁樣添！最完美嘅結局。好啦～感謝大家！好！拜拜！