恐懼之哲學：死，又有咩好怕喎？

Peter：我睇咗啊，我自己感覺係，我見到黑衣女鬼彈出嚟，我硬係覺得個身會震一震，你覺得好驚嗰陣其實個身體會chok 1 chok，你會留意到心跳會加速啦，同埋汗水會即刻增多，咁其實呢個反應喺心理學角度嚟講係幫助我哋生存。
咁以自然界為例，一隻狗或者蜥蜴，佢會恐懼嘅場境係遇到即時敵人，例如佢嘅狩獵者，咁其實佢就要透過調節自己生理上嘅反應嚟幫助佢逃過難關，所以其實恐懼係有呢個價值喺度。
但係其實我哋睇恐怖片好安全架喎，又唔係真係有隻鬼會彈出嚟，點解人仍然會驚呢？

鹽叔：其實除咗恐怖片之外，我有好多嘢都會驚，我話我係垃圾級別，其實唔止恐怖片，例如我好驚玩機動遊戲。我d朋友成日捉我去海洋公園，通常去到佢哋就唔會玩機動遊戲，就係玩我玩機動遊戲，強迫我玩海盜船，佢哋坐曬一邊，之後我坐喺另一邊睇我玩，所以可以見到我幾廢啦；玩鬼屋就會每次搵我行頭，因為佢哋好enjoy，搞到d鬼追住我，吸引力法則嘅相反，你越驚佢就越追住你嚟嚇，咁我就更加驚啦，咁我就會搞到成條隊冧曬嘅通常都。
咁呢d其實都係，d人成日都同我講「喂，d機動遊戲其實安全系數好高，你驚乜啫」，我成日都話你哋唔明，我真係唔擔心乜嘢生命安全危險，我就係驚，好似頭先peter問題就係，我哋原本係因為生物本能求生，使得我哋驚高、驚快、驚有嘢趺落嚟，後尾往往就係呢d只係indicator，即使係冇生命危險，我都係會驚呢d indicator，真係吹漲。

Peter：喺心理學角度嚟講，呢種現象可能係因為人有幾個意識中心，一個腦神經科學經常出理嘅理論叫「三重大腦」(triune brain)，佢講話其實人某部分嘅腦部結構好似一隻蜥蜴；某部分好似一隻狗；另外一部分就係人類獨有。鹽叔佢明知道「人類玩機動遊戲係好安全」呢個理解存在係人類獨有嘅部分，但係可能佢下面蜥蜴同狗嘅部分係非常驚，咁其實呢d理解到，因為基本上即時視覺刺激同一隻動物遭遇環境危險係非常相似。
我覺得人嘅驚係好似得意過呢幾樣嘢，例如有d人係會驚死，有d人會驚死之後嘅嗰種空虛，咁人點解會驚「空虛」呢d概念？

鹽叔：驚空虛呢概念我都明白，因為人係所謂一種「社交動物」(Social animal)，其實好多時有群體一齊係對你生命安全好有影響，所以好多時社交動物本身會比較傾向唔想一個人，唔想一隻動物喺度，因為呢樣嘢會易響到你危險，同你怕黑一樣，因為你唔知道有咩危險，所以如果一個動物會有怕寂莫嘅時候，其實蜥蜴或者狗嘅腦都一樣，係一個求生機制。
但係我反而想再講多樣遠d嘅嘢，因為喺哲學理面有一樣好有趣好出名，我哋叫做「概念區分」。因為有兩隻字唔同，有一隻字我哋叫做「fear」，驚啦都係；但係另一隻字好得意，德文叫做「angst」，唔記得佢英文係咩，一時間唔記得咗，遲d再話俾大家知，一時間我人腦嗰個部分唔係好work，得番狗同蜥蜴部分運作緊。
咁呢兩隻字有咩唔同呢，就係fear，永遠係fear of something，例如我哋驚曱甴、驚高、驚某樣嘢，驚係一種fear，咁有好多原因，頭先生物學嘅解釋解釋咗。
但係我哋所講嘅angst，即係由海德格、齊澤克佢哋講，由海德格區分啦，angst係最重要講緊「死亡嘅恐懼」，佢話其實好得意，因為死亡唔係一樣「嘢」嚟，人係有樣嘢具體喺度會驚，例如有隻曱甴喺到你會驚佢。但係死亡唔係「嘢」嚟，我哋都會驚，咁呢樣驚係咩嚟呢？
有時喺哲學上有個討論好得意，因為人有時會tend to驚死啦，但有哲學家會覺得死係唔值得我哋驚，其中一個講法係咁「人死後你都唔存在啦，你死咗就即係冇嘢啦如果唔係你都唔會死，你都唔存在，咁你仲驚乜嘢？」你明唔明我講咩，例如你驚會受苦，因為你驚會有d慘事發生喺你身上，但係如果係死亡嘅話，你都已經唔存在，就算個世界幾差都唔關你事啦，其實人到底驚緊d咩呢？
呢個就會使得，海德格就話，呢個其實嚴格嚟講就唔係普通嘅fear，因為佢唔係驚緊particular 嘅嘢，而係一種普遇、general一種恐懼。咁呢個我覺得係幾有趣嘅topic。

Peter：咁睇嚟啱啱個講法係建於人死後會咩都冇嘅世界觀，但的而且確係幾有趣嘅呢個講法，但係可唔可以理解成其實人係驚失去d嘢，例如你有個女朋友，你會驚分手唔驚死一樣；又例如依家我哋可以享受d好好食嘅嘢，但係死咗就冇架啦喎。

鹽叔：係啊，你呢個講法係一個好出名嘅theory，我哋叫做deprive theory，就係死本身冇嘢，但係點解好多時我哋會驚，唔係因為死呢個問題，而係佢會deprive咗你一樣嘢，就係剝奪咗你擁有生命時所擁有嘅正嘢。你死其實冇事，只係冇咗d好嘢令你驚。
所以調轉嚟講死係冇問題，如果你係一個好淒慘嘅人，你嘅生命如果見唔到改變嘅可能，例如你本身係永久殘疾；如果你本身係一個社會低下階層永無翻生可能，咁有d人其實係會覺得比死更難受，其實死亡即係剝奪你嘅可能，但係如果你生命只係得番壞嘅可能，咁死可能係一件好事。

Peter：如果根據番啱啱個哲學討論死亡係一樣咁恐怖嘅嘢，佢恐怖嘅原因係因為當刻我哋有d令我覺得珍貴嘅嘢，所以有d人成日會話我哋要珍惜當下原因就係咁樣啦，我哋今日對恐懼嘅討論就到此為止，鹽叔有小小補充。

鹽叔：係啦其實我頭先一路講突然諗番起，我個人腦甦醒番，其實angst呢個字，依家已經變咗英文啦，但係傳統嚟講我哋仲可以將佢翻譯成dread。

Peter：再一次多謝大家，亦再一次多謝今日嘅嘉賓嚟自好青年茶毒室嘅鹽叔。咁如果大家對更多心理學知識有興趣，記得去facebook search我哋treeholdhk，記得subscribe我哋個podcast，byebye。