咩係戇鳩？點先可以冇咁戇鳩？

鹽叔：我自己就成日遇到自己啦，好多，即係做某d嘢時候有好多簡單嘢做漏咗又冇留意到啦，就會「唉，on9啊呢個人」。

Peter：不過其實鹽叔呢個人我都識咗佢成年，佢有一樣嘢係好值得一讚，就係佢好小嘗試去維持自己嘅自我形象。唔知大家知唔知啦，佢平均遲到時間大約係45分鐘，但係佢從來唔會defend自己。

鹽叔： 因為我真係覺得係自己唔啱啊嘛。

Peter：但係有d人唔係咁架喎，佢做錯嘢都會「撻落地拿番扎沙」，鹽叔你覺得點解會有呢d人呢？

鹽叔： 呢d其實好多，而我覺得其中一樣嘢就係，人呢，我覺得有兩個factor係扮演一個好重要角色。
第一就係：人硬係覺得自己係ok嘅。人係好難肯接受自己係唔ok，就算係咩人都會有呢個面向，不過有d人呢個面向特別強，就好覺得自己有陣時要維持一個ego嘅形象。
而同一時間呢，第二個factor就係人會想consistent嘅，想一致嘅。
咁如果你又要覺得自己係一個好嘅人，係一個正嘅人，即係所謂想「維持住自己ego」，同一時間又想consistent，就會諗辦法去解釋自己表面上有d on9嘅行為，或者錯嘅行為，「唔關我事架，係因為其他原因架」。於是乎呢個位就會引致到頭先你所講有一種on9，就係「點都趺落地拿番扎沙」「唔關我事架其實xxx」「我都盡力做咗xxx」。

Peter：咁其實心理學上面呢都有一個好相關理念，叫fundamental attribution error，基本歸因錯誤。講嘅就係其實一個人自己犯錯嘅時候，佢會比較傾向將一件事錯嘅來源歸疚去其他外部因素。例如鹽叔遲到，會唔會用呢個mechanism？「因為d車等唔到啦」。

鹽叔：如果我會咁樣用，我通常會知道只係藉口嚟，我自己知道唔關事。

Peter：係啦，鹽叔好明顯係唔on9嘅人，至少喺in this extent，佢基本上會解釋番其實唔係架，我自己好鍾意遲到所以我就遲到，咁但係多數人唔係咁架喎。有研究發現呢，一般人錯嘅嘢會歸疚落1d 外部因素啦。但唔係喎，你睇人哋錯咗就會覺得係人哋問題。用遲到作例子，每一次你自己遲到，你都會諗一千萬個理由，可能你最尾冇講出嚟啦，但係你可能會諗「架車等唔到啊」「被啊媽捉住啊」，但係人哋遲到你就會覺得「遲到咪就係你問題囉」。

鹽叔：你諗下以前讀書，你考得好嘅時候你就會諗「緊係啦，我ok架嘛呢科」或者「我有努力架嘛」，但係見到人哋考得好嘅話呢，有時就傾向多機會覺得「人哋因為外部因素考得好」；如果係考得唔好呢，就會覺得」人哋係因為自己因素考得唔好」，到自己嘅時候就唔會咁諗。呢d都會反映到類似pattern。

Peter：我哋啱啱講嘅都係比較小事，例如遲到呢d好多人過咗之後都係如過雲煙，有冇機會有一樣嘢defend自己自我ego，奶出一件好on9嘅嘢出嚟呢？

鹽叔：我自己就暫時未有，或者係有，奶咗之後我自己都唔知啦，但係我知道我有d朋友，我覺得喺處理人際關係上，會因為呢種fundamental attribution error，頭先我哋講嗰種pattern，而引致到人際關係上有問題。尤其是喺親蜜、intimate relationship入面，例如好close嘅朋友、父母、伴侶，其實依d往往係好影響我哋點樣去同人建立一個好嘅關係。
因為你諗下，逢係好嘅嘢都覺得係因為我自己，如果唔係就會因為維持自己ego而覺得唔關我事咁，其實係限制咗自己改變嘅可能，你逢係發現自己唔ok，就會覺得係因為外部因素而唔關自己事，咁你點會有改變嘅動力呢。

Peter：不過從另外一方面嚟講，覺得從來都係自己好都係一種維持心理健康嘅關鍵，甚至有個研究發現患有抑鬱症嘅人去評估自己能力係比較準確，正常人反而比較容易去高估自己能力。但當然我哋其實講緊嘅係一個適可而止嘅道理，基本上我哋係需要一定ego，但係如果太強就可能會defect番我哋自己個人，咁鹽叔你又覺得我哋應該要點拿捏中間嘅平衡呢？

鹽叔：呢個平衡其實就好難拿捏，我只能夠講其實現代人，差唔多大部分人都係自己覺得冇問題係行先，我覺得好大部分情況都係。其實反而喺依家呢個level，稍為覺得關自己事多d呢個諗法，係點都對大部分人行去一個好d嘅方向。
尤其是，喺現代社會，我哋會叫做一個比較atomic society，係個人主義為上，咁呢個時候就會更容易考慮咗自己idea同preference先，而呢d都會造成我哋頭先所講嗰種以自己作為出發點去評價所有嘢，包括評價自己，係有一脈相承道理，所以喺現代社會我哋問下自己「會唔會將自己睇得高得濟？」、「會唔會係自己問題呢？」呢個會係一個好取態，大部分嚟講。
不過當然要因材施教啦，你唔好係人都咁講，因為有d朋友真係唔係咁，咁你就要行另一個方向。

Peter：可能有d朋友你咁同佢講佢仲會發嬲，不過鹽叔啱先提出咗個切實建議，就係要放一放低自己，要放低個前設「自己咩都啱曬」。

鹽叔：我講多一句啊，其實好多時喺佛學角度嚟講其實人類好多困擾就係因為太執著自我而引致，覺得「我就係好嘅」，於是乎引出咗好多麻煩問題出嚟。其實好多煩惱係咁嚟，我哋放棄下所謂「我執」，唔好將自己睇得咁重，試下practical 咁講，我相信唔止係做緊一個好d嘅人，而係對你心理上都會好d，起碼冇咁執著，唔係咁需要去維持自己形象。

Peter：即係依家好多on9，我覺得我哋依家個傾談都好on9，但係至少有一種on9係因為放唔低自己，或者係缺乏反思，咁其實反思自己有好多種方法，例如我哋今次邀請鹽叔嚟都有其中一個原因，其實哲學係一種反思自己好途徑，而鹽叔係嚟自好青年荼毒室，香港一個推廣哲學嘅團體，如果大家有興趣可以去佢個facebook：

鹽叔： 「好青年荼毒室哲學部」，或者去我哋ig都得，我哋有ig「corrupttheyouth」。

Peter： 嘩點解突然間大聲咗，你見到呢d就係ego，大聲d講自己。我就係心理學團體樹洞創辦人peter，如果大家有興趣聽多d心理學資訊就記得subscribe我哋podcast，或者去到我哋facebook「treeholehk」都可以搵到我哋，多謝大家。