性愛心理學之自慰有損心理健康？聖人模式？

從呢一份研究我哋可否得出一個結論：「自慰損害我哋心理健康？」。咁又未必，個情境冇咁簡單，因為呢度牽涉到嘅研究都係比較用correlational design，唔能夠量度到因果關係。咁樣講係咩意思？即係呢d研究純料係搵咗一群人，分別量度佢自慰次數、做愛次數，然後幫佢哋做一系列心理問卷，從而去搵出呢幾樣嘢嘅關聯，但係並無探討到底自慰同做愛係咪呢d心理質素分別嘅成因。換言之其實個因果關係其實可能係調轉：「唔係因為你自慰得多所以你比較唔開心，而係因為你本身比較唔開心，所以你比較難覓伴侶交配，而自然你需要自慰」可能其實個關係會係咁，所以其實單身嘅朋友唔需要太在意呢樣嘢。

而喺腦神經科學角度而言，其實任何形式嘅性行為，包括自慰同做愛，都對大腦有一定好處。我想同大家介紹兩種荷爾蒙，一種係dopamine多巴胺；另一種係oxytocin 催產素。兩種都稱得上為開心同愛情嘅荷爾蒙。但係其實佢哋性質有好大分別。

Dopamine我會話係性入面興奮嘅感覺，一般嚟講會覺得開心、pleasure，而dopamine係會成癮。其實就算唔係性愛，吸毒或者食好食嘅嘢其實都會成癮。咁睇新聞入面「一日打十幾次飛機導致精盡人亡」呢d好明顯就係dopamine 成癮，停唔到。
另一隻oxytocin就相反，佢不但唔會成癮，仲會降低你對其他嘢嘅成癮度。例如有人飲酒成癮或者毒品成癮，oxytocin可以幫助佢解決呢d問題。咁如果話dopamine係「性歡愉」荷爾蒙，我就會話oxytocin係「愛情聯繫」荷爾蒙，甚至冇愛都可以有oxytocin。例如阿爸阿媽湊仔，都會產生好多oxytocin。Oxytocin嘅特質係聯繫、溫暖、人與人之間有好多connection，就係oxytocin。

其實聖人模式喺腦科學角度嚟講就係呢兩種特質，咁當然仲有其他好多特質，但主要就係呢兩種。性係好奇妙，啱啱講到dopamine係一種成癮劑，但係oxytocin又係一種抗成癮劑，所以in a sense其實兩種作用係可以互相調和。

大家諗下自己嗰種聖人模式，有人會話，做完愛嗰種聖人模式同自慰嗰種聖人模式係好唔同。D人會話自慰嗰種聖人模式係一種空虛感，甚至有連登仔會話：「哥射的不是精，而是寂莫。」咁但係做完愛嗰隻係會覺得好滿足，甚至會有小小覺得無慾無求，當然前提係一場good sex。當中個分別可能喺邊呢？ 其實可能會係oxytocin。

首先講下dopamine先，其實諗番嘅話，喺做愛同自慰入面，dopamine個分別未必係咁大，因為佢純粹講嘅係肉體嘅快感，甚至你可能買個飛機杯，刺激得自己勁d，你個dopamine可能會release得勁d。咁其實個分別可能就係喺oxytocin同其他相關嘅荷爾蒙嘅研究上。

我做過小小學術文獻研究，好似冇直接搵到oxytocin比較自慰同做愛之間關係。但另一份2005年tittle叫「做愛係滿足過自慰」，個tittle都幾啊媽係女人嘅研究。嗰份研究就發現咗另外一隻同oxytocin幾似嘅荷爾蒙：催乳素，喺做完愛之後分泌嘅份量比自慰多4倍。呢個亦都係嗰份研究解釋點解做愛滿足過自慰嘅原因，亦有可能係兩種聖人模式嘅分別。兩種性行為都有歡愉嘅快感，即係dopamine，咁當然份量上可能有小小分別，呢個就好似暫時未有學術文獻。但更大嘅分別可能係自慰缺乏咗嗰種令人滿足嘅荷爾蒙，即係整體嘅picture嚟講，歡愉嘅感覺自慰同做愛都有，但係自慰缺乏咗令你滿足嘅荷爾蒙。

就正如我啱啱所講，個問題就係dopamine係一樣會令人上癮嘅嘢，如果你冇咗反上癮嘅嘢，例如oxytocin或者催乳素，我哋好容易就會陷入咗不斷打J呢個循環，咁就會消耗好多精力。但係其實適量嘅dopamine對我哋身心健康、快樂同埋減低壓力係好有幫助。

所以最後嘅結論係，如果你有伴侶就當然好啦，做多d對身心健康有幫助。如果冇伴侶都唔使擔心，自慰有一定益處，但要注意唔好做得太多，同埋人要喺第二度搵寄託，而唔係淨係肉體歡悅就可以滿足自己。

大家好，我係peter，樹洞香港創辦人，我哋組織係一個心理學推廣機構，如果你對心理學有任何疑問，可以去我哋facebook係treeholehk，instagram @treeholehk.psychology到pm我，我會解答你嘅問題。