【Far Cry 6】值得買嗎? | 伏Game評

主線任務係我好鍾意嘅部分，唔少嘅重要主線任務都好有電影感，有好緊張刺激嘅戰鬥或者逃跑時刻。加上遊戲入面我哋嘅主角呢講真都幾薄血㗎，如果你諗住hea打又或者慢慢行嘅話就真係會拉柴。令到劇情可以畀到玩家緊張感，亦都更容易投入劇情，當然精美嘅cutscene當然都唔少得啦。支線就當然都係嗰啲Ubi玩法啦，清據點、尋寶等等。遊戲入面嘅大型據點，比較喺同類型遊戲嘅話，嗰個重覆度已經算比較低㗎喇。

大部分據點設計都係獨特嘅，配合本作變化多端嘅打法，每次佔點都有一定嘅新鮮感，搶完據點仲可以攞到素材改造你把武器。Far Cry 6嘅武器陣容係本作玩法多變嘅原因之一，武器多、改造選項多呢啲我就唔多講喇，比較重要呢就係子彈種類。響今集入面子彈種類顯得好重要㗎，譬如你用對人體比較有效嘅軟子彈去打重甲兵，有機會對住佢個頭打曬成隻匣都唔死呀。呢個時候只要你換一支裝咗穿甲彈嘅槍出嚟，三行血條嘅敵人都係一槍爆頭，仲可以引爆毒氣兵。講得白啲就pokemon嗰種屬性概念。亦都正如Pokemon你只可以帶六隻寵一樣，由於玩家嚮Far Cry入面帶到嘅武器係有限嘅，戰鬥入面又唔可以畀你換槍或者子彈種類，要去到工作枱先可以畀你換，呢個設計令到玩家要衡量身上武器可唔可以對應到目前嘅情況。比如接下來去打兵營，咁對人嘅軟子彈當然有幫助啦，但係如果你接下來係去打裝甲營，如果冇帶emp爆破彈隨時對住啲直升機真係冇曬扶呀。所以呢個系統雖然唔方便，但係就好考玩家點樣去合理安排武器陣容。

響我嘅遊戲體驗入面呢發現其實最實用嘅子彈係穿甲彈，因為所有人形嘅敵人無論弱點係怕毒、怕火、定係怕軟子彈，你只要用穿甲彈爆頭佢都係死硬。所以如果你同我一樣係鍾意瞄頭射嘅人，咁呢個子彈屬性係統嘅根本就可有可無，全部上曬穿甲彈得㗎喇。當然啦你鍾意打身都係你嘅自由嚟嘅，不過打身嘅話如果你用錯子彈類型呢就真係好奇怪啦，輕甲單位用火點樣噴都唔死喎。就嚟熟啦，聞唔聞到浸燒雞翼未呀？

除咗武器之外，今集重新增咗「極品」，極品就係背脊嘅呢個大Backpack。大家可以將極品視為角色嘅大招啦，要你個能量槽滿咗先可以發動嘅。唔同嘅背包有唔同嘅功能，比如話EMP、噴火、補血等等，又或者同我一樣用最實用嘅極品，預設嘅跟蹤飛彈背包。唔理係步兵定係載具都打得死，所以爭咩呀？直接將眼前所有敵人炸死咪最實際。

今集戰鬥嗰陣時嘅夥伴依然都健在啦，不過嗰啲op載具同人形同伴就畀人取消曬啦，係得動物同伴一齊戰鬥。唔理係正面駁火定係潛行暗殺都係一大助力黎嘅，真係唔打得都坦得啊。關於嗰啲動物嘅支線，特別係關於隻雞嘅支線呀都幾好笑架，我就好推薦大家去睇下。