未來10年咩行業最危險❓10分鐘睇明AI🤖｜生命3.0

「李世乭剩下的時間不多，但他必須把它用盡。」
「他已考慮了七至八分鐘。」
「我令你們失望了，我希望為我的無能道歉。」

呢單嘢當時係好轟動！個A I行嘅棋，連玩左大半世嘅專業圍棋高手都睇唔明。

「很意外呢一步棋。」
「這是非常稀有的一步。」

而為咗徹底粉碎我哋嘅自尊心，依家公司再發明多一隻A I，打低咗之前打低咗我哋嘅A I，狂數100:0，你話呢啲係咩意思？
呢條片首先我哋會重溫一下現今人工智能去到咩階段先，當AI變成完全體嘅時候又會係點呢？短期未來應用嘅可能性、仲有一啲潛在嘅道德問題、同埋一啲我嘅睇法。我知唔係所有人都有時間睇書嘅，所以交俾我呢啲閒人同大家簡化啦。

呢本嘢你哋揀嘅，連佢(Elon Musk)都話：「這個好！」。Elon Musk係神嚟㗎，佢講嘅嘢你冇理由唔信㗎。人工智能係乜東東呢？可以去到幾盡呢？最後會唔會見到好多殺手機械人揸住支雷射槍周街射呢啲咁恐怖嘅情景呢？傻啦！A I殺人唔一定要用雷射槍㗎喎，蜜蜂啊、機械狗呢啲都得㗎嘛！俾啲幻想力啦！

我唔怪你㗎，我都係一跳就跳咗去諗一啲最末日嘅case，因為人腦係咁㗎，生成㗎。問呢啲問題係好㗎啵，但係最好就係先有個框架。

A I有分兩種：一種強、一種弱。「弱」即係代表喺限制嘅領域下，即係好似Siri呀、Face ID啊咁樣，咁如果你落order要令佢喺某隻game裏面最高分，佢就淨係會做呢件事，單一目標，其他嘢佢係唔會理。所謂嘅「弱」，其實係一啲都唔弱。係唔止Atari嘅所有遊戲同埋圍棋，連Starcraft呀Dota呀，幾年前都已經征服埋喇。

「遊戲結束，OpenAI連贏兩場。」

睇怕唔使好耐呢，人類都會退出遊戲界。人工智能係好先進，咁但係佢識唔識整meme呢？
我哋人腦比人工智能更聰明嘅地方就係因為思想夠闊、夠通用。不過人工智能而家已經邁向通用呢個目標出發，亦即係AGI (Artifical general intelligence)。而當AGI可以提升到同人類同level嘅通用化，呢個就係最終目標。有啲專家就話五至幾十年不等就會出現，亦都有啲話永遠唔會出現。但係如果同人類同級嘅AGI成真嘅話，大部份專家都認為一場智慧大爆發係在所難免嘅。智慧大爆發即係到時嘅AI已經唔再需要我哋嘅人頭豬腦，可以不停自我update，智商會遠超所有人類加起嚟，最終變成「超人工智能」(aka Superintelligence)。

呢本書就唔係預言嚟嘅，佢只係列出現階段不能排除嘅可能性。以現時嘅人工智能，短期內會有咩影響呢？

《AI應用：工作自動化》

私家車輛係可見未來，用人工智能買賣股票，大把公司已經用緊添啦。A I醫生都係指日可待嘅事，自動化有助減低我哋嘅日常壓力，同埋可以令到我哋物質上生活更加豐富。但係如果A I乜嘢都做得好過我哋嘅要平過我哋，仲要平過我哋，咁我哋會唔會搵唔到工呢？會唔會從此我哋係冇晒存在價值呢？成日就喺度話「自動化時代」會冇晒啲工作，電腦革命嗰陣啲人都係咁講㗎啦，到時自不然會有啲新嘅工種㗎啦！我同我啲朋友私底下都有討論過呢個可能性，但係作者用實證否決左呢個說法。因為原來今時今日絕大部份嘅所有工作，100年前就已經存在㗎啦喎。咁我哋要將所有嘅工作崗位以提供嘅職位數量去順序嘅話呢，咁係要去到第21位先見到屬於呢一個世紀嘅新工種，而佢(軟件設計師)只係佔美國就業市場嘅唔夠1%。即係換句話講，我哋只係集體郁咗去更高嘅工種，嚴格嚟講我哋係「集體跳槽」，咁我哋仲可以俾啲乜嘢職業規劃嘅意見比後生嘅下一代呢？從事一啲現階段啲機器仲係好廢嘅工作，問自己幾個問題：嚟緊你想做嘅工作係需唔需要靠建立社交嘅呢？需唔需要用創意嚟到去解決某啲問題呢？係咪一個不穩定或者不能預期嘅工作環境呢？你越多問題可以答Yes，理論上嗰一行就越安全嘅。我唔知⋯係歌手？要見人、要有創意、又係非常不穩定啦。我都唔知呀，有啲咩呢可以？

《AI應用：法律》

人工智能喺法律上又有啲乜嘢角色呢？作者就提出左「機械法官」。歷史上其實大把係基於膚色啊性別啊或者係宗教歧視嘅誤判個案啦，咁如果可以將啊「機器法官大人」嘅程式係設計到完全透明，對人人平等，亦都係冇認知偏差嘅，仲有啲乜嘢人性嘅缺陷呢？冇任何法官係可以完全清楚記得晒所有專利、以至謀殺嘅案件嘅所有法律知識，或者係所有嘅案例唔夠時間，研究案件都係一大問題嚟㗎啵！「機械法官」就冇呢個問題啦！冇時間？copy&paste多幾個出嚟囉，software嚟㗎咋嘛！愛沙尼亞呢個國家其實已經開始再用A I法官嚟到處理小額錢債案，佢仲有無限記憶同埋學習能力，咁所以如果你係一個法官，你以為自動化燒唔到你嗰疊啊？

「機械法官」又可以有啲乜嘢缺點呢？呀！如果個法官大人比人hack咗咁點算呀？又或者如果佢發現囚犯嘅重犯率係同某個性別或者係種族統計學上係有關聯呢？咁算唔算係一個帶有種族歧視或者係性別歧視嘅法官呢？面對盛行嘅cancel culture，但反而就唔難解決嘅，你撳個掣你就可以cancel咗佢(「機械法官」）啦。

《AI應用：軍事》
軍事方面又可以點呢？有人話核彈係令到大型戰爭消失嘅主因嚟，因為個後果太過不堪設想喇！如果呢個邏輯嘅話咁我哋應唔應該俾多啲國家去製造更加恐怖嘅人工智能武器呢？咁咪可以永久杜絕戰爭囉！大家都唔敢輕舉妄動咁咪世界和平囉；亦都有一批人係認為戰爭係無可避免嘅，不論你做啲咩都好，咁我哋應唔應該製造更加多聰明啲嘅智能武器令到戰爭更加人道呢？即係如果未來戰爭係機器對機器，咁咪冇人命傷亡？

嗱淨係呢啲問題都諗死人㗎喇！由於片長關係我唔能夠將所有應用嘅可能性全部列晒出嚟，不過我都想分享吓當「超人工智能」嘅世界出現咗又有啲咩可能性呢？如果用喺監控上又會點樣呢？監控其實已經唔係咩新鮮事，有啲係明顯啲，或者係比較隱藏嘅版本。基本上已經成為左我哋生活嘅一部份㗎喇，就算你承唔承認都好。但係「超人工智能」就可以將監控變成實時監控兼分析，例如乜嘢呢？即係電郵、電話、短訊、監測鏡頭、信用卡記錄將會無間斷被監控不特止，佢可以不斷分析你嘅網上行為。咁地球上每個人諗緊咩、做緊乜嘢、準備諗啲咩、準備做啲咩佢係知得仲早過你。如果呢種全知嘅科技出現咗之後會造成一個乜嘢嘅社會呢？咁應該由邊個去掌控呢？如果金正恩喺控制台入面你又點睇？A I要翹起人類未必一定係有人深懷不軌個喎，佢唔解你都得㗎！

「如AI有個目標，而人類剛好擋住了，它會直接消除障礙。想都不會想，也不會放在心。就好像我們建路，一座螞蟻山碰巧擋住的話，我們不憎恨螞蟻，我們只是建路，所以再見螞蟻山。」

所以有好多嘢喺人類程度嘅AGI實現之前就要決定好啦!」咁「超人工智能」會扮演啲乜嘢角色呢？會唔會有個人意識呢？我哋有冇能力可以控制到佢？抑或佢會取代左我哋？作者就提出左十幾種end game出嚟。呢啲唔係睇得多科幻片嘅人講嘅分析嚟㗎喎，而係真係喺A I呢一瓣走得最前嘅一班科學家咁講。雖然好多都聽落好似好科幻，但係即係你試吓返返去以前同阿蘇格拉底講，有一日我哋都一齊會坐喺張凳度，然後喺天空到飛，我哋仲可以一路飛，一路投訴啲食物有幾難食添！所以某程度上，我哋已經係希臘神話啦！如果你哋對AI呢個題目有興趣呢，都可以睇埋呢本《Superintelligence》。

最後想問問大家，你認為有啲咩工作係10年內未被取代嘅呢？一齊諗諗。