iPad mini 「啫喱芒」屬正常現象？歐盟規定手機統一用Type-C！Xbox主機支援Dolby Vision遊戲 | 廣東話【Price Weekly #82 2021年10月】

iPhone 13 和 iPad mini推出了兩個禮拜，不少朋友都已經入手新機，但最近Apple就陸續收到不同的投訴，包括戴口罩時用唔到 Apple Watch 解鎖iPhone。而iPad mini的屏幕亦都被指捲動時出現彈下彈下好像啫喱般的情況，針對 Apple Watch 的問題Apple 就承諾會在短期內透過軟件更新去修正。但對於 iPad mini 的情況Apple 就表示屬於 LCD芒的「正常現象」，他們解釋由於螢幕是逐行更新，所以頂部和底部的更新可能會出現極微細延遲，導致捲動時候不同步。亦即是說嚟緊買到嘅iPad mini都會有呢個問題，唔知大家又會唔會卻步喇。

小米今個禮拜喺香港舉行產品發佈會，宣佈將會推出 11T 系列兩部電話，仲有好耐無係香港市場出現嘅小米平板5，全部機即日起有得買。先講小米 11T 及 11T Pro呢兩部機的外形都非常相似，同樣配備6.67 吋2400 x 1080 AMOLED 熒幕，支援 120Hz 刷新率，11T Pro仲會有埋 Dolby Vision。規格上11T 採用了 MTK 1200-Ultra 處理器，有8GB RAM 及 256GB 儲存空間。而11T Pro 就採用 Snapdragon 888 處理器，有12GB RAM 及 256GB 儲存空間。兩機都支援 5G 及 Wi-Fi 6 制式，大家都有3個鏡頭，分別是1億800萬像素主鏡頭，800 萬像素超廣角鏡及 500 萬像素微距鏡，而自拍鏡頭就有 1,600 萬像素。電量方面，兩部機都有 5,000mAh，不過11T Pro 支援120W 超級快充，17 分鐘就可以充滿電，跟機會送埋 120W 超快充火牛。兩部機都有灰色、白色及藍色可以揀。而家已經有得買喇，11T賣$3,699，而 11T Pro 則為 $4,399。

至於第 5 代小米平板機身採用金屬設計都幾輕薄，厚度及重量分別只是 6.85mm 及 500g，有白色及灰色可以揀。規格上搭載 Snapdragon 860 處理器，有6GB RAM以及 128GB / 256GB 儲存空間選擇，同埋有8,720mAh 超大容量電池。屏幕就有 11 吋 2560 x 1600 解像度，120Hz 刷新率，支援 Dolby Vision 和 HDR10，有四單元喇叭以及Dolby Atmos 全景聲音效。另外小米為呢部平板推出了專用的智能觸控筆，支援 4096 級壓感及 240Hz 觸控採樣率。同iPad Air 一樣可以將枝筆磁吸在機身右側叉電。售價方面由$2,699起，至於觸控筆就賣 $569。

繼 OMEN 同 Pavilion Gaming 之後，HP 今年5月時亦宣佈會推出新的電競 Laptop 系列，叫做 Victus by HP，主打入門市場。而喺剛舉行的發佈會上，廠方就帶來系列第一款產品Victus by HP 16。呢部外形簡約、無任何RGB燈效、電競味唔重的Laptop配備 16.1 吋熒幕，有1080p解像同 144Hz 刷新率，最高搭載 NVIDIA GeForce RTX 3060 顯示卡。而處理器方面就有第11代 Intel Core i7 八核心及 AMD Ryzen 5 六核心兩個版本可以揀。另外仲有HP Flicker-free 技術和 OMEN Gaming Hub，玩一啲畫質要求高少少的Game都應付得到。呢部新Laptop由即日起有得買售價由$8,999起。

同場HP亦發表新一代，OMEN by HP 17 電競Laptop。規格就再勁d，最高搭載第11代Intel Core i9八核心處理器同埋 RTX 3080顯示卡，內置 1TB PCIe SSD及高達 32GB DDR4，並採用17.3吋 QHD IPS熒幕、有165Hz 刷新率、Eyesafe 認證同符合德國萊茵低藍光標準等等。亦是由即日上市，售價由$17,999起。

現時好多流動電子產品都係用USB-C叉電，而為了方便用家同埋減少製造電子廢物，歐盟執行委員會早前正式提出議案要求所有喺歐洲地區銷售的流動裝置包括手機、平板、相機、耳機等等都要統一使用 USB-C 插口，並建議生產商以後賣新機都毋須提供充電器。呢個議案最受影響當然係 Apple，雖然MacBook、iPad 已陸續轉用 Type C，但 iPhone都仲用緊 Lightning 接口。不過相信就算議案正式通過都仲有時間給Apple部署，唔知最後 iPhone 會唔會改用 Type C充電呢？講起Type C，最近USB開發者論壇就公佈了USB-Type-C 2.1 的最新修訂標準，其中一項令Notebook用家叫好的規格就係支援最高240W的充電功率，比起宜家的USB PD 3.0的100W 快充足足快了兩倍有多，意味住遲啲用電競Laptop打機就唔駛帶埋個火牛出街喇。

等了成年 Xbox Series X/S終於都支援Dolby Vision 的遊戲，成為目前唯一支援 Dolby Vision 的遊戲主機。目前有超過 100 隻game已經為 Dolby Vision HDR進行了最佳化，另外有過千隻games都可以透過 Dolby Vision 的運算達到強化 HDR 光影的效果。如果想要有最佳的視覺體驗，除了要擁有支援 Dolby Vision 的電視外，電視最好就有低延遲和變動式更新率等的功能。官方話取決於電視的能力，用家最高可享受到光 40 倍的高光區域，暗 10 倍的黑色區域細節以及最高 12bit 的色彩深度。

唔少人買傢俬都會選擇IKEA，估唔到嚟緊連電競的家具都可以喺個到買到喇。佢哋即將推出全新的電競系列涵蓋電競桌椅、抽屜組合、頸枕甚至係耳機架、環形燈等不同的配件。當中部份產品同ROG crossover特別為電競玩家打造，預計10 月將在全球推出。另外 IKEA 亦都再次同美國智能音響品牌 Sonos 合作，推出新一代 Symfonisk 檯燈。喇叭喺設計上都有不少的改變，首先係檯燈的底座，即是喇叭部分比上代更纖巧，方便擺喺床頭。而燈罩亦都可以更換，用家可以選擇唔同的布質或玻璃燈罩。而且燈泡插孔亦都改為 E26/E27，適用於更多燈泡或 LED燈。不過要留意的是底座和燈罩要分開購買，前者是US$152，而布質及玻璃燈罩就分別賣 US$24 及 US$35，底座連燈罩大約由$1,372起。