晚吹：又要威又要戴頭盔—網店店主（I）

小吉：大家好我係小吉，我全職經營網店兩年，做外國名牌代購，主要賣鞋、衫同埋化妝品，多數都係女裝。我同我partner兩個人開，啱啱畢業個陣比較得閒就開始傾不如做吓生意。
二汶：你今年幾大呀
小吉：23歲
二汶：嘩即係21歲就做老闆娘！
小吉：差唔多啦
二汶：幾好喎！轉頭再問你創業嘅故事呀

迪奶fans(畫畫店主)：我係迪奶fans，全職經營網店三年，專賣客製產品
余迪偉：識嘢啊你改個咁嘅名
迪奶fans：我係做一啲畫畫嘅IG shop賣啲客製產品既，多數都係畫情侶或者寵物，我畫好咗就印喺產品上面。
余迪偉：既然你個名表明係我嘅fans做咩唔畫幅畫俾我。跟住呢位呢？

呀城(波鞋店主)：大家好我係啱啱成為二汶粉絲嘅阿城
二汶：唔該晒阿城
呀城：我做既網店今年踏入第七年，主要就係賣波鞋、潮流服飾，近兩年仲涉獵埋韓國服裝。當初會做呢門生意係因為喺波鞋街打工買波鞋，開始對呢方面有興趣跟住慢慢覺得原來賺到錢，自己亦都有興趣。當時仲係學生嘅我就已經做緊，賺錢咪當bonus 蝕錢又冇乜所謂，慢慢就做咗七年。
余迪偉：即係大家都抱着Nothing to lose嘅心態咁就開始咗，開始嘅時候難唔難？用咗幾多資金？點樣去擴大客源？

呀城：當初就真係好多謝身邊嘅朋友幫我去repost宣傳，有人就問我朋友啲鞋係邊度買，咁佢就介紹咗我間舖跟住一傳十，慢慢儲左一批客一路做到而家。
二汶：咁其實你揀嗰啲貨都好重要
呀城：其實都幾考眼光
余迪偉：咁你係波鞋街做咗幾多年？

呀城：我係波鞋街做咗好短，暑期工嚟嘅咋兩三個月左右
余迪偉：你以前個老闆有冇好憎你呢啲人，走來幫我打幾個月工跟住就自立門戶同佢搶生意，跟住你買啲嘢仲勁過佢
呀城：我希望佢唔會討厭我啦，因為我而家都開始改變左入貨嘅途徑，我依家都係以網上為主
二汶：其實你都叻喎，你做左七年如果好似你做到咁長其實已經可以經歷好多高低，犀利！陣間再請你分享
迪奶fans：一開始嘅時候就係幫朋友玩先嘅，跟住就覺得好好玩
余迪偉：即係你一畢業就學 design學畫畫？
迪奶fans：一畢業返過一份intern但係做咗一個月覺得唔係好啱就辭咗職，之後有畫下啲自己鍾意睇嘅戲或者畫下啲KOL

余迪偉：咁你初初話可能只係對住朋友隻狗覺得好得意跟住就畫咗佢出嚟，咁由隻狗張相變做產品例如手機殼電話套，咁變咗用另一個媒介難唔難？即係你點諗出嚟？
迪奶fans：嗰陣時畫完幅畫就覺得好似冇乜太大用途，然後就喺度望住個電話殼，諗到自己都成日換電話殼咁不如整個自己專屬嘅電話殼。跟住就發覺送俾啲朋友佢哋都好鍾意，跟住就覺得可能有得做喎。跟住越畫越多儲咗啲作品就開始越來越多客
二汶：咁最初最少嘅時候有幾多訂單？然後到而家慢慢穩定落嚟一個月大概有幾多訂單？

迪奶fans：一開始唔識定價畫得好辛苦，可能一個月連一萬蚊都冇得幾千蚊，好辛苦但係諗唔通是一個月又放棄，跟住後來調整返個價錢就慢慢可能一個月有三萬蚊左右
二汶：因為個成本係你，當然我哋計埋你啲工作坊
余迪偉：小吉呢？
小吉：我記得一開始就我同我partner兩個人就每人夾咗五千蚊買貨，一開始我哋買化妝品先嘅
余迪偉：喺邊度入呀啲化妝品
小吉：嗰陣時係因為識得一啲朋友喺化妝品專櫃度做有員工折扣，就用比較優惠嘅價錢買，但係嗰啲貨到而家都未買到，因為嗰陣時嘅眼光真係有啲差
余迪偉：唔識入貨，啲貨擺咗咁耐唔賣得㗎喇
小吉：都差唔多，應該要自己用。

呀城：一開始我都係靠朋友宣傳可能friend搭friend咁樣買，跟住我心諗點解全部客都係啲朋友介紹嘅客人無街客，心諗死啦！我記得到第三個月都剩係得八張訂單，然後就心諗係咪要完呢，跟住有一款我好鍾意嘅波鞋本身我自己想買嘅，跟住我就出post問吓有冇人買，點知反應幾好跟住就開拓左啲新嘅客源
余迪偉：跟住就慢慢上軌道啦，咁你哋客人嘅年齡層係點樣？

二汶：我諗都同買咩產品有好大關係例如波鞋咁樣
呀城：初初一開始客人嘅年齡都同我差唔多都係20頭咁樣，咁因為我而家都係賣差唔多嘅產品，所以啲客都係由20歲大學生到30幾歲嘅年齡層，對自己嘅衣着比較有要求，想trendy啲跟得上潮流，所以通常都係20至到35歲左右

迪奶fans：我就係由十幾歲到三十幾都有，跟住試過有個中學生睇落都係中三四左右，一次過買咗三千幾蚊野，跟住我諗佢係咪拍咗拖好耐慶祝啲咩節日呢？咁我哋有得加文字服務既，就發現佢寫咗句一個月快樂
二汶：嘩好重本呀！一個月快樂就三千蚊
迪奶fans：一個月就送三千蚊野，但係只係中三四嘅學生黎！好誇張！
二汶：但係嗰一個月係最甜蜜㗎啦
迪奶fans：係呀之後就冇再搵過我啦
余迪偉：即係分咗手囉！(眾人齊笑)

小吉：我嘅客人，其實多數都係女仔同佢(指中間)差唔多啦
二汶：咁我想問啦，最少一個月可以搵到幾多錢?最多一個月又可以搵到幾多錢?
余迪偉：每張單大約可以賺幾多錢?
小吉：每張單呢其實我最想就係around二三百蚊
二汶：賺到？
小吉：係呀係呀，而家個收入大概萬零蚊到，10,000至20,000依家個收入，最多就試過3、40,000囉，都係啲新年啦，聖誕節呀…
余迪偉：大時大節啦，呢個係成個網店嘅錢定係計埋你partner嘅錢？

小吉：成個網店嘅錢
余迪偉：咁都not bad呀
小吉：要再除2囉，因為我哋有兩個人
二汶：但你哋自己本身有其他工作？
小吉：係呀呢個係我副業嚟㗎，即係我本身有份正職嘅
二汶：咁都唔錯喎

余迪偉：咁其他呢？
迪奶fans：我就係平均搵30,000嘅，咁如果多嘅，例如話情人節 聖誕節嗰啲，可能去到五萬蚊咁囉
二汶：咁你都畫得好靚喎
迪奶fans：er…都係架

余迪偉：你呢？
呀城：我就冇佢哋單件裝貨品賺得咁多，不禁令我聯想我係咪有少少做爛市…我大概一件貨就賺60至$100左右
余迪偉：但係你賣得多，你訂單多
呀城：好難咁樣講嘅，呢啲都係需要累積客源，大概60至$100啦，可能一個月…因為我有門市，所以銷量會多少少，可能賣出幾百至一千件，平均來講一個月3、40,000都有嘅，最高峰期曾經賺接近100,000，但係確實好辛苦

余迪偉：但係你有門市就變咗要交租喎
呀城：係呀，有門市要交租，燈油火蠟，冇咁容易放棄唔做
余迪偉：係樓上舖？
呀城：無錯，係樓上舖，門市位於旺角
二汶：咁嗰個門市就係等於你個倉啦，可唔可以咁講呀？
呀城：可以咁講
二汶：反正都要租個倉，不如做個門市，而且感覺上老實啲
呀城：係㗎，其實我曾經搬遷過一次…比較細間嘅鋪，真係好似貨倉咁。咁賺到更加多錢之後，希望門面好睇啲，客人上黎同時都係買緊份信心。佢哋上到嚟，我都希望可以為佢哋提供服務

余迪偉：咁呢係外國入嗰啲波鞋呢，可能喺香港已經絕版，相對係咪會賺得多啲？
呀城：其實我舖頭並唔係以限量運動鞋為主，而係比較日常啲大眾化啲，大家都負擔到嘅產品。去到限量版嗰啲四五千嘅波鞋，我確實都略懂一二。可能你見到個發售價$600，然後炒到而家$3000。實際上唔係賺咗二千幾蚊嘅每對鞋，都係加價出售。好似喺度推測緊個潮流，例如我係賣波鞋店主，我可能加價$1500等你購入。咁我購入，之後$3000咁賣出，咁就會賺好多。但有可能個市場出嚟都反應唔好，只係賣千二蚊，咁每對鞋就要蝕$300，所以就好講求眼光，同埋睇埋買果時夠唔夠狠。

余迪偉：某程度上賭博成份幾高
呀城：係
二汶：如果你從事運動鞋行業好耐，你可能大概都會估到當中嘅起跌，邊啲款特別受歡迎。經驗越多，資訊方面嘅優勢就越多。
呀城：係呀，冇錯冇錯，尤其是係買波鞋同埋潮流服飾。我哋有好多同行，今日都遇到一個（指小吉），競爭好大。如果你喺其他方面冇其他比人優勝嘅優勢，例如話價錢方面取勝，慢慢就會壓縮左可以賺錢嘅範圍，越嚟越細。

余迪偉：你討厭她了嗎？
呀城：開始有少少
二汶：她比較憎她
小吉：我好羨慕你賺咁多錢

余迪偉：三個都做咗一段時間，咁喺網上面追蹤你哋嘅人大概有幾多呢？
呀城：咁呢個其實係我第二個帳號嚟嘅，我第一個Account，等陣我可以分享吓呢個故事。第二個Account大概有45,000千人左右。
余迪偉：好勁喎
呀城：唔係嘅
二汶：但你咁樣追蹤人數，同埋買貨。如果呢幾萬人可以一直幫你推廣，等你一直營運落去。咁你唔貪心，因為你唔係從事幕前演出，你唔需要有好多追蹤者，然後嗰啲人真係追蹤你，當中好多都係買家。
余迪偉：追蹤你果啲都係買家黎架嘛
呀城：但係其實好難咁樣講，追蹤者的確很重要。如果有一個新客人，見到你有好多追蹤者，信心就會增加，所以如果話追蹤者係咪咁重要？對我哋店主來講確實係好重要。
二汶：都係一個分數嚟嘅

余迪偉：其他人有幾多？
迪奶fans：我而家就10,000囉，但係我都覺得追蹤者好緊要，因為有時你睇嗰啲網店同類嘅舖頭，有好多有啲可能只有幾百名追蹤者，我諗客人嘅信心都冇咁大
小吉：而家我又五千人左右
二汶：咁而家呢好多網店都會買追蹤者，你哋有冇試過？
小吉：我就有試過嘅
二汶：點買㗎其實？
小吉：有一個買手，然後我就聯絡佢，佢會列出唔同嘅價錢。咁有好多嘅包括香港同外國嘅追蹤者，有好多唔同種類，按價錢而定
二汶：嗰啲係假帳戶嚟㗎嘛？係充數嘅啫，唔係真係人黎架嘛
小吉：我諗佢全部都係假帳戶嚟嘅，但係係有分別嘅。一開始我試過買外國嘅追蹤者，好平好平好似一毫子有一兩個，點知追蹤咗我嘅人嘅頭像全部都好似證件相，連名嘅模式全部都係一模一樣嘅。一睇就知係假，過咗一個月，咁嗰啲追蹤者就被社交平台刪除晒啦已經發現左，唔好買太平。姐係我而家有陣時都會keep 住買，學佢哋話齋，追蹤者都好緊要，但係我唔敢買太多，只係100 100咁樣買，一個月到買100個，我會慢慢咁增加。

二汶：姐係有plan嘅，一個月更新一次
余迪偉：但係你咁樣加法，未必代表嗰啲追蹤者嘅帳號係真嘅，只係數字上升，但係嗰啲帳號全部都係假，可能係外國人。
小吉：我會買本地粉嘅，即係香港嘅追蹤者，但係都係假嘅，但係呢嗰啲照片就會比較真實，係睇唔到樣貌嘅女仔，可能係側面背面嘅照片。俾人嘅感覺會比較真。
余迪偉：呢啲價錢較高嘅要幾多錢左右啊？
小吉：沒有固定，有時可能兩毫子至三毫子一個，但係我都見過一蚊一個香港嘅追蹤者
二汶：但係互動率係冇得賣㗎嘛，即係例如like果啲?
小吉：都有架
二汶：另外兩位呢?
迪奶fans：我冇買過追蹤者，因為我聽過有啲人買得多嘅，社交平台嘅帳號會被禁用，所以我好驚。

余迪偉：你有冇試過啊？
呀城：我冇試過！點解你覺得我好似有咁呢？！
大家：哈哈哈哈😂😂🤣🤣🤣
余迪偉：你話你個IG ban過，話你買followers吖嘛。
呀城：係～但我冇買過🤣，唔夠薑。即係點解ban咗我之前account ?我之前account 其實大概用咗四五年左右。咁突然間有一日，我想po一樣嘢，發現我log in唔到。兜兜轉轉去搵答案，其實佢（ig)冇同我講過個答案，係我自己去搵㗎喎！我搵到原來我賣嘅一間舖頭嘅產品，其實係一個國際大牌子，個大牌子就有一個legal team去ig投訴，話「你唔可以resell我啲嘢㗎喎！」咁我嗰陣先發覺，原來唔得㗎。
余迪偉：即刻成個account (ban咗）？

呀城：冇咗！冇咗！然後我用盡方法去聯絡Instagram (字幕君：OMG!好崩潰），佢哋完全冇回音㗎！
余迪偉：嗰陣有幾多followers㗎？
呀城：嗰陣同而家差唔多， 4萬幾人左右（字：儲得咁辛苦，冇晒....）嗰陣真係好傷，因為嗰陣我咁岩由一個細細地嘅舖頭，搬去一個稍為大啲，即係而家嘅舖頭，租金跳咗一倍啦！又要人事成本全部都喺度，突然間一夜之間冇晒，啲客完全唔知我去咗邊，我post嘅嘢完全睇唔到，等於收入完全減半。
余迪偉：係咪因為大牌子就有咁嘅牙力，要IG去cut你嘅Account，同證明呢件係真事呢？
呀城：其實應該係。
余迪偉：即係有冇人去investigate（調查）呢？或者佢篤人哋咁點算呢？

呀城：其實我So far淨係聽過超級大時裝品牌先會咁樣做，我賣嗰個牌子又未去到嗰個level，所以我而家好憎嗰個牌子
余迪偉：但佢又夠牙力去cut咗你個account！
呀城：可能人哋真係有一個legal Team投訴我。其實當時我有幾個同行，佢哋同樣都係賣呢個牌子，所以之後我都有friendly remind 其他鋪頭，見到佢哋賣，我就話就話唔好賣呀會後悔㗎。
二汶：咁後來你點樣重拾返起呢個....
余迪偉：由零開始囉，唔係點啊
呀城：冇辦法，因為開咗門市，你確實有個支出係到，有人手，你一定要頂硬上。連夜去電話whatsapp佢地囉，遂個遂個同佢講「哎呀，我Instagram 唔見咗啊！我而家開咗個新嫁，你唔介意follow 返我啊！我冇走佬嫁！即係我都好驚有啲比咗錢我，但我唔見咗，以為我著咗草。

余迪偉：係喎，第2日去去鋪頭，淋你紅油咪死。
呀城：係啊！但嗰陣都靜咗起碼3個月啊！之後先慢慢返嚟，但3個月真係足以令之前賺啲錢嘔晒出去。
二汶：嘩
余迪偉：咁但係你作為行內人係咪知道邊啲大品牌唔可以resell呢？之後
呀城：er其實以我所知就係嗰一個啦，同埋有幾個行理箱嘅牌子，最大行理箱牌子唔得。如果你話可以年輕人買嘅牌子，咁就冇啦，得嗰個，我咁啱就係中咗嗰個，
二汶：哦！你有冇決心成為以後最大嘅代理商
呀城：冇，因為佢香港有代理架。我嗰陣係癲到直程去搵香港代理商，「你可唔可以同佢聯絡下ig 啊？我唔知嫁，我冇心嫁」冇回音，完全冇回音。
余迪偉：佢咁大有legal team又剩，佢理得係網店仔。你賣緊我啲嘢，我有代理商，有自己門市部。

呀城：係啊！即係都明白嘅，明白佢咁做嘅原因，但我都偷偷地憎佢地。
余迪偉：網店如果想增加收入啦，增加followers啦仲有咩方法呢？
二汶：吸引人
迪奶fans：賣廣告一定係
二汶：一定係廣告？
迪奶fans：我覺得一定係囉！
余迪偉：即係boost嗰post啦喎？
迪奶fans：係啊！有時啲story啊入面影啲product 就要boost囉！可能1個星期我用100：200咁啦！初期係超級有效嘅，差唔多係一蚊就多一個follower，好似幾容易run喎，跟住去到而家做咗一段時間呢，可能俾$200都冇10個follower。但係你唔落呢，好似0啊！
小吉：我通常都係有promotion 呢，就去落廣告去谷佢，每個月都落千零二千蚊落廣告到，每次又係80至100度，就一日嘅。（字：落廣告都唔少錢）仲有就係我會like差唔多舖頭嘅ig shop，即係可能我都like咗你嗰間，跟住再like佢嘅followers。

余迪偉：搶佢嘅followers過嚟，咁你（阿城）又多一個真佢嘅原因。
呀城：如果講ig賣廣告， 我都想分享一個以前我舖頭隔離有一個前輩，開咗10幾年，同我分享「Instagram 最初可以賣廣告嗰陣，係你投放三毫子，就會有一個人」早兩年，佢同我講「就唔好再落，再係你落得精準啲，行啲，多啲，如果唔係就唔好落」因為而家去到$5 $6先得一個人。其實呢個成本係好大，仲要嗰個人follow咗你，過兩日可能覺得唔啱就唔follow，咁你個錢就揼咗落鹹水海，所以其實我而家都有follow啲，教你點樣落廣告呀（嘅ig ac)，因為你頭先講ig 嘅engagement 其實好重要。即係個客入去你嗰到，有冇share你個PO啊，有冇比佢啲朋友，dm話我想買啊，其實都係數據嚟嫁，會唔會推理去更加上面，比其他客人先見到呢個post呢！呢啲都係一個好大嘅學問，所以都必要落嘅！
二汶：因為嗰個廣告，係俾多啲人立眼見到你嘅啫，始終令到啲客人留低或者再入嚟嘅，都係個content。

余迪偉：除非你係大生意，畀得起錢，賣啲勁嘅廣告就係，你作為小店呢，每個月只可以afford度let's say二三千蚊嘅，都多你地1-2倍，個成效都未必夠大！
嘉賓s：係吖！
余迪偉：咁搵我地代言好啲啦即係話！（字：金主識做啦！）
呀城：可能係！但係你就唔係2-3千蚊啦！
余迪偉：有得傾嘅！
呀城：好！
余迪偉：咁而家經濟差咗啦，對你地網店影響大唔大呢？
迪奶fans：我覺得一開始呢，就冇咩嘢，反而你慢慢見到，真係謹慎咗少少喇。但香港人嘅購買力我覺得係好強嘅，特別係貓奴。因為我我哋有一半客都係畫寵物嘅，但畫貓同畫狗已經好大分別，貓嗰啲係真係一兩個月就可以嚟換嗰手機殼，唔係送禮物俾人，全部都係自己。（字：「奴才」消費力好強）仲會發晒掛畫，拼圖，手機殼，所有嘢都係自己嘅貓。

二汶：好obsessed 嫁！養貓！
迪奶fans：係啊！
二汶：多謝啲貓啦
迪奶fans：好！多謝貓奴！
余迪偉：其他呢？
呀城：頭兩三個月，嘅影響比較大，可能大家都已經唔出門口，咁你有門市其實冇用，佢哋唔上嚟。
余迪偉：你仲要喺旺角。
阿城：係啦係啦！根本都冇人行街，好靜嘅，拍烏蠅嘅。咁之後就慢慢上返去之前咁。
二汶：有冇試過俾人抄自己間舖頭？
小吉：咁有一間ig shop呢，我哋出咩佢就出咩啦，咁一開始已經有ig direct佢同佢講「你同我哋好似喎啲嘢」咁樣啦，對方死口唔認啦！佢即刻block晒我地啦，block咗我地ac啦！點知講完之後，佢抄得中風，直頭係我哋出名promotion，佢就出，我哋出咩product，佢就出。
林：追住黎打。

小吉：去到而家，直頭將我哋出咗嘅story，我地有字啦，佢搵啲字遮咗佢！再一模一樣咁出返。（字：連圖都照抄好離譜！）
余迪偉：即係用返你張相添啊？！
小吉：係呀，直頭用我的張相！
余迪偉：嘩！但呢啲真係擋唔到㗎喎！
小吉：係啊！
余迪偉：你地呢？
迪奶fans：er我覺得畫畫容易啲遇到你啲問題，嗰時開始，因為我自己做呢啲客製嘅shop呢，我嗰時覺得身邊冇咩人做呢樣嘢嘅，成個ig shop，開始左之後呢，就越來越多啦，跟住畫風都類近，同埋頭先咪講咗有一招係like對方嘅shop嘅！嘅客嫁嘛！跟住我係勁憎人咁做而家係。
余：又憎你多啲喇！

嘉賓：淨係憎佢（小吉）多
小吉：因為我有好多friend都有follow返我間shop，跟住成日話「又有呢間follow又有嗰間follow」我見到我會block佢哋，都block咗4-50間，真係好多，同埋可能我畫一張二三百蚊，其他人可能係二三十囉！（字：做爛市可恥！）跟住又follow返我啲客。有啲客可能唔識分，係咪真係靚咁多，但係平10倍喎？
余迪偉：咁始終你個畫風，人哋要抄，都唔係咁容易抄到嫁！
小吉：即係有啲可能我改少少，譬如我畫人頭，可能印好多粒，即係呢個唔係好unique，但可能我望住有間shop，成日同我啲嘢都好同步，跟住我今日出咗，聽日就見到佢出呢個。就好似唔使諗咁個腦！
余迪偉：哦！明啦明啦！啊城呢？
呀城：我覺得抄襲一定有！譬如抄襲一件product，其實市場一定夠大，如果你做好自己，我相信啲客係會先揀我。但只能夠默默去憎恨佢！