Microsoft Surface三機齊發、解答疑難iPhone 13/iPad mini、發燒級數碼聲學Klipsch T5 II ANC TWS【Price Weekly #81 2021年9月】

至於 Surface Duo 2 的單邊螢幕尺寸，亦由5.6 吋增加到 5.8 吋，打開之後就變成8.3吋平板，提供 90Hz 刷新率。機身可以摺疊成不同的角度，方便睇書或者煲劇。而喺轉軸的外側仲可以睇到通知、時間與電量。規格上，搭載Snapdragon S888 支援 5G 上網和 NFC 功能，配備了1600 萬像素超廣角鏡頭、1200 萬像素廣角和1200 萬像素長焦鏡頭，售價約$1,500美元起。

除此之外，Microsoft還發表了一款全新的Laptop，叫做 Surface Laptop Studio。特別之處是螢幕的後方加了一條轉軸，只要把轉軸向前翻，螢幕就會變成傾斜，叫做 Studio mod，啱哂睇劇嘅時候用。另外亦都可以把電腦躺平變成 Stage Mode，方便jot notes或者畫圖。如果要打字或者開視像會議，就可以變返普通的Laptop mode。效能方面 Surface Laptop Studio 搭載Intel 第 11 代 Core H " Tiger Lake H35 "處理器，可選配 NVIDIA RTX 3050 Ti 獨立顯示卡，有 14.4 吋 PixelSense Flow 觸控式螢幕，支援 120Hz 更新率與 Dolby Vision，售價由$ 1,599 美金起。

之前我地都報導過，迪士尼旗下影視串流平台《​​Disney+》將會喺11月登陸香港。宜家日期終於確定啦﹗就係喺11月16日，比起台灣、韓國遲咗4日。另外，有傳媒引述迪士尼消息指，開台當日會有《尚氣與十環幫傳奇》同步免費上架。加埋迪士尼、彼思動畫、星球大戰、Marvel、國家地理頻道等唔同的頻道，相信唔少人都會課金去睇。不過到目前為止官方仍公布月費詳情，睇返美國宜家收緊 US7.99 月費，兌換港幣大約 $62 左右，價錢其實都幾吸引，唔知大家又會唔會Join 呢？

iPhone 13 今個禮拜先正式開賣，話咁快網上就傳出下一代手機的消息。著名Apple分析師郭明錤日前預測，下年 Apple 只會推出3款新機，其中2款會改用打孔芒設計，並同時配置 4800 萬拍攝像素相機。估計係iPhone 14 Pro 系列唔會再有「M 字額」，亦意味著 iPhone mini 版本將會消失。至於想有屏下TouchID的朋友，就要等到2023年先有機會喇。而摺機iPhone就要再下一年先正式面世，唔知大家又會唔會忍下手今年唔換機，等到下年或後年先至考慮入手呢？

講起電話，好耐都無喺香港出現的電話品牌 Motorola，宣佈推出2部電話，叫 Edge 20 Pro 同 Edge 20 Fusion。前者配備 1 億萬拍攝像素(108MP)鏡頭，透過 ultra pixel 技術拍出超高解像度相片。另外，佢亦同時擁有 5 倍光學變焦遠攝同超廣角鏡頭，其他規格包括有 6.7 吋、144Hz OLED 熒幕、Snapdragon 870 處理器、12GB RAM+256GB 儲存空間以及 4,500mAh 電池。即日起發售，定價 HK$4,499。

而另一部 Edge 20 Fusion 定位係中階型號，依然係採用3鏡頭設計，一樣都內置1個 1 億萬像素(108MP)主鏡頭同埋1 個超廣角鏡頭，但無咗遠攝鏡，取而代之係景深鏡頭。屏幕方面，都係 6.7 OLED 熒幕，但就只有 90Hz 刷新率。用上天璣 720處理器、8GB RAM、128GB 儲存空間同5,000mAh 電池。售價 HK$2,899，10月中正式推出。

傳統的電視頻道越來越少人睇，不少人都改為收看有線電視或串流平台。最近有傳 Google 打算推出免費串流電視頻道，吸引原本畀錢睇有線電視的觀眾。消息指， Google 已跟多家公司洽談，他們將會提供節目內容，並會在中途加插廣告。只要透過 Chromecast with Google TV的裝置，就可以免費收睇。估計最快會在今年秋季推出！

美國音響品牌 Kilpsch 推出新的T5 II ANC 真無線耳機，外形同上代 T5 II 差唔多，充電盒仍然係標誌的打火機造型。而主要升級就係加入混合式主動降噪技術，耳機前後都設有反饋收音咪去做出精準的降噪效果。此外，T5 II ANC更係全球第1款內置 Dirac HD SOUND 發燒級數碼聲學技術的True Wireless，通過校正音源的瞬態同頻幅響應，全面提升耳機的音場、清晰度、人聲、低音等等。另外，耳機亦支援 BRAGI MOVE 頭部動作操控技術，透過頭部動作去操控耳機。電池方面 T5 II ANC 本身最高有 7 小時續航力，連埋充電盒就會多 21 小時，可以連續聽足一整日，仲支援 Qi 無線充電。至於價錢 T5 II ANC 分設普通版同 McLaren Edition。售價分別$2,499 及$2,899，即日起已經有得賣。

Apple iPhone 13系列同iPad mini、iPad 2021喺9月24日正式開賣，雖然新機被外畀評為只係小改款。但喺各大Apple Store都有唔少人約咗排隊等買機，據聞天峰藍色都幾搶手，唔知大家見過實物之後又有冇興趣入手？

之前我地分別出左iPhone 13系列同iPad mini 的快速上手測試片，見到大家都問左唔少問題，等我喺度做過少少嘅Q&A啦！

見到有不少人都有問：戴口罩各能否可以解鎖？事實上是不可以的。最方便還是戴著同一個ID的APPLE WATCH才可以戴著口罩也能解鎖。
另外又有人問：會不會好像12pro max一樣，打機時會好熱，個芒會自動變暗？宜家即刻用13 Pro Max 去玩30分鐘《Call of Duty》！未玩前機身溫度係26度，玩完之後機身最熱位置就去到37度，而打機個陣亦暫時唔覺個芒會自動變暗。
也有觀眾想知如果全開5G耗電幾多，現在12pro 5G睇YouTube會好耗電！呢個真係好睇用家點用部機。我試過用足 iPhone 13 Pro 1日都仲有電，一般上網、睇下YouTube、Faecbook 咁，全開5G 一日都夠用。不過始終新地落地，電就點都襟用d。如果想有更多電量的話，建議用13 Pro Max。睇返我地上次的測試，佢真係比其他機耐用。

跟住就係關於physical sims的問題了。睇返我地手上4部電話，同上代一樣，都係得iPhone 13 mini 係單卡設計，其他版本都係 dual sim。

跟住就係關於iPad mini的問題，都有好多人想知道佢有冇過熱。係無用CASE嘅情況下 ，好似平時咁拎嚟上打機睇片，未玩前機身溫度係28度，玩左大約30分鐘，機身溫度就34度。我自己手感上都只係微暖，暫時都唔會有熱嘅感覺。

跟住就有人問iPad mini有冇120HZ的芒？好可惜應該就無啦，只係得iPhone 13pro系列，同iPad Pro有ProMotion，更新頻率自動適應技術，可以因應畫面自動調節最高去到120hz。

最後一個問題就係佢會唔會支援multi tasking？其實都唔洗擔心佢咁細部。其實佢係會支援ipadOS15，所以係介面係同其他ipad一樣做到多工操作。