17/9《圍爐取戀》- 我沒有六呎高......

東方昇：點解要我哋睇片咩今日？
（嗱，今日呢個街訪就話咗畀大家知，其實女仔都好介意男仔矮過自己㗎喎）
眾人：係呀，好正常
（今日嘅男事主呢，佢就因為身高呀，令到佢喺愛情路上就非常絕望，想大家畀啲希望佢呀！）

－今集主題：男人生得矮就溝唔到女？－

東方昇：嗯～其實幾慘㗎，因為我哋三個本身都唔係特別矮吖
專家Dickson：係
東方昇：但係我其實有時見到啲同學，可能佢靚靚仔仔，但係佢真係身型比較矮呢，我都戥佢擔心呀
利君牙：我所有friend呢全部喺度剔條件呢，第一個一定係話180
東方昇：係呀！好慘呀
利君牙：即係唔知點解唔使孝順…
東方昇：喂！我都……我咁高大都冇180啦！！
Kneta：你坐返低先啦！
專家Dickson：呢個其實真係證實咗女仔原來係真係好介意囉
東方昇：都介意
Kneta：我唔係好介意喎我講真…
專家Dickson：因為你都好矮吖嘛
Kneta：係呀
東方昇：即使你唔介意你男朋友矮過你？
專家Dickson：矮過你喎要
Kneta：Errr同我差唔多，因為其實矮過我都難嘅
專家Dickson：矮過你讀小學咁㗎喇喎
Kneta：唔係！我米6㗎喇喎
東方昇：因為郭富城講緊都係168咁上下
利君牙：165呀，其實係165
東方昇：165咋…？
利君牙：係呀
Kneta：你咩樣哈哈
Tom：又喺度攻擊人…
東方昇：唔係，如果佢有郭富城咁靚仔，郭富城咁有才華…
利君牙：但係155，你o唔ok呀？
專家Dickson：155即係幾高呀？
Kneta：差5cm係咪咁多到呀？
利君牙（指住Kneta）：去到你顴骨呢個位
Kneta：咁唔得喇…咁就尷尬喇…我覺得我底線就係同我一樣高囉
專家Dickson：咁你唔係…你都係接受唔到佢矮過你
利君牙：係～即係佢純粹覺得自己矮，所以覺得好難遇到啫
東方昇：同埋頭先𠴱度好有趣就係呢，分兩邊㗎，有啲直程自己都介意呀
專家Dickson：男仔係介意㗎
東方昇：男仔自己介意，所以佢唔會搵個高過佢嘅女仔
利君牙：好啦，咁我哋聽吓今日嗰個事主先啦
東方昇：係呀

東方昇：阿Lock你好～
阿Lock：你好你好你好～
東方昇：阿Lock係喺英國㗎依家係咪？
阿Lock：係呀係呀，依家喺英國
東方昇：好呀，講吓你關心嘅問題吖
阿Lock：其實就想講吓身高喺受情入面，係咪真係咁重要㗎呢？即係自己唔係話好高啦，即係165咁樣
東方昇：165…
阿Lock：即係中學嗰陣睇嘅，係係，咁自己睇住啲同學呢，即係由唔係話好高啦全部都，依家全部高哂喇，即係仲要高過我一個頭咁樣，即係依家自己差唔多20左右啦，其實都冇乜可能會再高㗎喇
東方昇：咦唔係喎，等陣先等陣先等陣先
Kneta：男仔好似22歲都…
東方昇：我真係識啲人廿歲都仲有得高喎
專家Dickson：嗱，我以前啲朋友教打多啲籃球，伸直啲個人
東方昇：Err冇乜關係
專家Dickson：係咩
Tom：前排有發明啲增高丸㗎
專家Dickson：嗰啲唔好試呀…即係啲咩…
Tom：係唔ok！係唔work㗎！
阿Lock：其實有…有諗過嘅，即係呢啲咩增高嗰啲呢，其實係冇咩用㗎
東方昇：咁對你好困擾喇
阿Lock：都幾嘅～即係你會冇乜信心咁樣
東方昇：嗱我咁講，有冇愛情上試過真係另一半嫌你矮呢？
阿Lock：Err咁有兩次都覺得關事嘅，咁第一次呢就，原本有個幾friend嘅friend啦，咁就鍾意咗佢，即係有啲行動呀咁樣啦，咁後尾就覺得可能係因為自己矮或者咩咁樣，跟住就唔係好想理我咁樣，跟住佢係甚至搵一班朋友，一個就扮佢男朋友，然之後其他呢，就好似過嚟安慰我咁樣啦，咁其實假嘅，玩嘢嘅。即係背後笑你，譬如話咩「死矮仔冇人要你呀」咁樣。
東方昇：咁我問個問題，佢幾高吖？佢好高嘅？
阿Lock：嗰陣佢15幾咋都係
眾人：唓！！！！X！！！
專家Dickson：咁佢一定唔係會因為你嘅身高，所以先會產生呢個狀況囉，15幾係好難歧視16幾㗎
利君牙：唔係，唔係，真係唔係！
東方昇：真係唔係！佢矮都可以歧視矮嘅，係冇關係嘅
利君牙：我都有啲朋友係155，但係佢目標個男朋友要190嘅，都有嘅
專家Dickson：即係小學一年班歧視中學一年班…
東方昇：係呀，仲有冇第二個例子呢？
阿Lock：Err咁第二個例子就係升到高中啦，跟住已經有個曖昧緊嘅女仔㗎喇，其實得埋㗎啦，但係最尾都係唔得，點解會分手就係話，「Err其實你幾好人嘅，不過就係太矮囉」
東方昇：嘩……
利君牙：嗱，呢個講到出口
專家Dickson：呢個就有point喇
Kneta：我覺得佢話嫌佢矮呢，係有機會之後發現唔鍾意佢，先搵一個藉口
專家Dickson：係喎，係喎，我就冇諗到呢點喎，其實佢係同佢拍咗之後，然後先再飛佢，然後話佢矮吖嘛
Kneta：佢一早已經知佢矮㗎啦！！點會唔知啫
專家Dickson：一開始佢…
東方昇：可能遠睇冇咁矮！近睇真係好矮！
Kneta：遠睇真係勁高，過嚟之後矮咗勁多
Tom（向阿Lock）：我哋唔係攻擊你㗎！我哋唔係攻擊你㗎！
東方昇：所以唔合理囉，所以矮唔係個主因囉，仲有啲咩辛酸呢？即係好似你話齋，就算可能你觀察到一個女仔外表呀，性格幾好，但係你都因為覺得佢可能太高，你就因為咁樣而唔追佢喇，係咪會咁樣㗎？
阿Lock：其實有個高過我嘅，都係學校嗰陣啦，都係幾靚女嘅，跟住就話「Err其實如果你高啲我會揀你囉」，仲要唔止一個喎，你話樣呀，又唔係太差，即係算中等啦，才藝嗰啲我又唔係冇喎，即係小提琴、鋼琴我都識，溜冰都識喇喎咁樣，係咪先。咁性格都ok嘅，即係身邊啲人緣都算好嘅，所以我就覺得好似…淨係畀個身高限死咗咁樣囉
專家Dickson：嗱但係呢樣嘢呢係我近期發現㗎，即係呢原來個人係唔係鍾意你呢，其實唔係逐忽逐忽咁計㗎喎，有陣時唔係我逐個逐個對比，我依樣有問題、嗰樣冇問題、嗰樣冇問題，到最後歸納出原來係身高有問題咁樣
利君牙：我而家咁樣聽落呢，即係你話自己唯一個問題個身高啦，但係我聽落呢，你唯一一個問題好似係自卑喎
Kneta：係呀
東方昇：啱呀，呢個係…
阿Lock：呢個我都知道嘅
專家Dickson：咁譬如你會唔會喺你同你女朋友相處嘅時候，一談論到一啲類似身高嘅嘢，你就會好敏感，或者係出現一啲好尷尬嘅情況吖？
阿Lock：Errrr都會有嘅，即係譬如佢講笑嗰啲咁樣，講身高嗰啲啦，咁就唔知點覆咁樣囉，淨係「哈哈哈」咁樣
利君牙：哦～即係你自己會受傷嘅，佢以為講笑，點知擊中咗你嘅要害
阿Lock：係呀
利君牙（指住東方昇）：咁我覺得你可以教吓佢喎，佢應該要學識笑咗佢
東方昇：我就想講呀，因為你冇辦法，你改變唔到呢啲客觀嘅嘢呢…
Kneta：要接受囉
東方昇：你要轉變心態，你要學識唔介意啦，甚至乎最高境界係你要識得自嘲
阿Lock：即係點呀，係咪同「你唔尷尬就係佢尷尬」…
眾人：係呀！！！！
專家Dickson：同埋根本就無需要尷尬，因為一定係有高，一定係有矮，一定係有肥，有瘦㗎啦
東方昇：同埋佢care嗰個高矮問題，我再諗深啲就係，小朋友會咁諗囉，因為我哋可能細個嗰時我哋去搵女朋友都係搵個要靚…
Kneta：大波！
東方昇：身材好，淨係透過啲外在嘅嘢，但係其實隨住年紀大呢，你就發覺…
利君牙：唔係指住我！
眾人：哈哈哈
東方昇：發覺其實外觀係唔重要㗎
專家Dickson：最重要就係你嗰啲身家疊起嚟嘅嗰啲銀紙嘅高矮呀
東方昇：係呀，嗰個先係重要呀。你要知道佢鍾意你啲乜嘢吖嘛
利君牙：即係咁樣拋開好難嘅，雖然咁講
專家Dickson：唔係呀，唔難㗎，我日日咁樣照鏡我都照到
眾人：哈哈哈哈
專家Dickson：有時都仲搵吓自己幾靚仔嘅地方嘅
東方昇：人哋唔揀你係人哋唔識貨啫
專家Dickson：咁擺明就係啦～
眾人：哈哈哈哈
東方昇：梗係啦，你睇吓Dickson幾自信！！
專家Dickson：咪係囉
東方昇：嗱，畀你揀喇，你寧願要165吖，定係Dickson咁嘅樣呀？
眾人：哈哈哈哈哈(&^^&@^#)_@$*]
利君牙：你有無諗過Dickson嘅感受呀？
專家Dickson：嗱又欺凌喇又欺凌喇…
東方昇：你明唔明呀，你都會要返你自己啦
眾人：哈哈哈哈哈哈哈哈
專家Dickson：咁我祝福你喺英國…我祝福你喺英國搵到個好嘅伴侶啦
東方昇：係吖，同埋外國可能唔係咁介意高度嘅，我覺得外國人係比較開放啲嘅
阿Lock：好吖
東方昇： 好啦好啦
Kneta：加油呀
阿Lock：好吖，我會㗎喇
東方昇：好！！！拜拜～

專家Dickson：嗱，咁頭先我𠿚講到charm嗰個問題，你哋女仔點樣先會覺得男仔係charm呢？
利君牙：我就係睇男仔著衫嘅，而我係好簡單㗎啫。著衫呀，因為你平時唔著衫呀嘛！所以我係唔會鍾意你！
東方昇：就差啲喇唔著衫！哎呀真係
利君牙：我就好簡單嘅，只要一見到著白色裇衫嘅男仔呢…
東方昇：就吸引喇
利君牙：我就好鍾意喇！如果我第一次…
東方昇：著壽衣嗰啲…
眾人：哈哈哈哈哈哈
專家Dickson：原因係因為斯文啲？
利君牙：係呀
東方昇：即係白馬王子
利君牙：係呀！好正呀～
Kneta：其實我都係睇著衫先嘅，因為我覺得衫係好代表到嗰個人嘅潛在性格嘅。因為我唔鍾意男仔係好麻煩，我鍾意簡單呀，細心嗰啲。如果你平時嘅話，即係可能東方昇呀，阿Tom呢啲，我已經ok㗎喇，我唔鍾意男仔著太多衫。
專家Dickson：即係點解你唔舉例我…
Kneta：嗱！！！點解呢？多咗件褸呀！！！你多咗件褸呀！！！
利君牙：你除咗佢啦

東方昇：反而你哋講charm個問題，我會提出一樣嘢呢，反而我會知道乜嘢係唔charm。如果我見到嗰個人啦，佢真係care自己一啲嘢呢，嗰個嘢就好唔charm。我聽過一個男仔啦，佢參加一個casting啦，佢矮呀，佢成程casting可能四個鐘，佢一路趷高隻腳
專家Dickson：但係其實佢應該係cast健力士世界大全
Kneta：四個鐘趷腳
專家Dickson：趷高隻腳四個鐘頭喎
利君牙：即係又係嗰個問題囉，如果佢自己踩實個地下嘅話，其實冇人會留意到
東方昇：係呀！冇人留意㗎！就係因為你care，所以我會care咗你care呀
專家Dickson：因為人嘅怪就係在於你掩飾一啲其實大家都覺得冇問題嘅嘢吖嘛，所以大家都唔好遮遮掩掩喇
東方昇：係呀
利君牙：要接受囉
專家Dickson：我哋坦蕩蕩咁樣出嚟接受自己啦！
Tom：各花入各眼，總有人會鍾意自己嘅～
眾人：哈哈哈哈哈
專家Dickson：敬愛自己！再見！
眾人：愛自己！愛自己！愛自己！愛自己！愛自己！愛自己！拜拜！！