M1X MacBook Pro 10月中登場？PS5終支援M.2 SSD、GoPro Hero10 Black正式上市 | 廣東話【Price Weekly #80 2021年9月 】

而對於AirPods 3 同 M1X MacBook pro仍未見縱影，不少果粉都有些失望，不過大家都不用太擔心，因為有傳Apple即將舉辦多一場發布會，新MacBook Pro最快喺下個月中亮相，傳聞話新機將會有14"和16"兩個型號，好大機會搭載M1X晶片配備HDMI、SD卡槽，以及Magsafe磁吸充電，但未知會唔會有mini LED熒幕；至於AirPods 3，傳聞話會沿用上代的H1晶片，支援Dolby Atmos 及 Spatial Audio，睇Netflix時更加會有360度聲音指向定位，而續航力亦有望提升，並且會加強防水性能，但就冇主動降噪，相信都應該會喺今年內推出。

而喺 Apple Event 同步登場的還有 iOS 15，9月20日就可以更新，今次最主要的升級是FaceTime功能，以往Facetime只限於Apple用家之間才用到，但遲啲只要透過一條link就可以同Android或者Windows機的朋殺一齊開會，不用額外download其他通訊App，方便好多。另外還加入了Spatial audio和環境降噪功能，令到通話音質大大提升，如果想對方更加集中同你聊天，仲可以打開人像模式，做到前清後蒙的效果；而以前的「勿擾模式」就改為「專注模式」，用家可以按照個人喜好，選擇關閉某些聯絡人或者App的通知。另外亦都有全新的通知頁面，以及新加的Live Text功能，可以在相片中辨識出文字，直接複製或者翻譯，想知道以上效果如何，我們之前都試用過 IOS15 Beta版，大家可以睇片重溫一下。

Playstation宣布由即日起，推出PS5第二輪重大系統更新，包括專為電視內置喇叭而設的3D音效支援、加強Game Base功能，並加入更多個人化設定內容，仲有PS Remote Play，終於可以用流動數據連線。而最吸引的相信就是支援M.2 SSD擴充，可以直接用M.2 SSD 下載、複製、開啟遊戲和多媒體應用程式，裝多幾隻大Game都唔怕唔夠位。根據官方提供的資料，PS5 擴充專用的 M.2 SSD需要係 PCIe Gen 4，並有至少 5,500 MB/s 傳輸速度，容量就要 250GB 到最多 4TB。各位PS5用家又會唔會升級？

接下來介紹兩隻剛推出的真無線耳機，先講下Sennheiser CX Plus，呢隻耳機暫時係佢哋旗下最平的ANC True wireless，售價是 HK$1,399，外型方面同剛推出的 CX 無乜分別，機身都係比較方正，連埋充電盒重47，達到IPX4防水等級，另外支援藍牙5.2以及SBC、AAC、aptX和aptX Adaptive編碼。除了主動降噪之外，亦都有transparency mode和入耳偵測功能，規格基本上都拍得住旗艦級Momentum True Wireless 2；而音質方面就配備了7mm動圈驅動單元，加埋充電盒一共可以用到24小時，充電10分鐘就用到1小時，顏色方面一樣有黑、白兩隻色，而家已經可以預訂，9月28日正式上市。

而 Marshall 亦都發表了兩款真無線耳機，分別是 Motif ANC 和 Minor III，前者是 Marshall 旗下第一款True wireless，配備 6mm 驅動單元，機身採用入耳式短柄設計，擁有 IPX5 防水等級，總續航力達到 20 小時，售價是$1,599。至於 Minor III 的外形就有啲似 AirPods 2，不過就採用全黑色的設計，而且兩隻耳機在充電盒和耳柄位置，都用上凹凸紋理，望落非常有質感。在規格上
Minor III 用上 12mm 驅動單元，支援IPX4防水，連埋充電盒可以用到25小時，支援 Qi 無線充電，售價是$1,099。

GoPro Hero10 Black正式登場，機身比上代輕5g，而尺寸一樣，機面同樣配備 1.4 吋彩色屏幕，不過Logo 就變成了藍色，規格方面搭載GP2 晶片，以往最多可錄製 30fps 的 5K 影片，現時則升級至 60fps 的 5.3K 解像度，也可錄影 120fps 的 4K 影片，240fps 的 2.7K 慢動作影片另外可以影到2,300萬像素相片。而低光拍攝效果亦都有所提升，並且支援 HyperSmooth 4.0 穩定系統，今代更可 USB 線與手機連接，過片至手機就快好多喇，定價為$499美金。

Dyson喺8月頭先出完新Product，前幾日又有新的吸塵機推出—V12 Detect Slim，同樣走輕細路線，去年開始Dyson將隙縫吸頭加入 LED 燈，清潔隙縫時就可提供燈光照明，而今次還加入了智能雷射輕量軟絨毛滾筒吸頭，特別之處是吸頭側邊加入了雷射光線裝置，吸塵時會發出綠色雷射光，將肉眼看不見的塵垢、碎屑完全顯現出來，等你徹底清潔。另外，雷射滾筒吸頭會因應灰塵的數量自動調節吸力，而且新機亦內置了壓電式聲學感應器，可以計算灰塵和微粒的數量及體積，然後喺機頂的彩色圓形 LCD 屏幕顯示出來。至於更高階型號仲會有埋防纏結螺旋吸頭，可以將毛髮完全吸入集塵筒，避免纏住吸頭，若家中有貓貓狗狗的話，這個吸頭實在十分有用。V12 Detect Slim 一共有三個版本，售價由5,180起。