Apple發佈會懶人包﹗萬四蚊1TB史上最貴iPhone｜iPhone 13系列｜全新iPad mini｜Apple Watch S7 ｜功能、售價、推出日期速報【Price.com.hk產品情報】

不如講下有咩「無」先，今次好多傳聞嘅消息，例如Touch ID無出現到，而傳到似層層嘅口罩Face ID一樣無，亦都未支援的Wi-Fi 6E規格，所謂嘅天文攝影功能發佈會都無提過，不過120hz螢幕就實現咗，iPhone 13 Pro 同 Pro max 有ProMotion，採用自動適應更新頻率技術，最高可以去到高達 120Hz，打機的時候熒幕就用高刷新率，一般上網就可以校慢啲，咁樣做就可以兼顧到有流暢畫面，又可以慳電。

另外，因為前鏡頭重新設計過，大家之前好唔鐘意嘅M字額都收窄咗好多；電池使用時間比上代多咗 1.5 - 2.5 小時，唔知大家收唔收貨呢？

4 部新機都係用咗A15 Bonic Chip，分別配備6核心CPU同4核心GPU，亦將神經網絡引擎由 8 核心增加至16 核心，核心數量同上代一樣，不過就用全新。唔知大家仲記唔記得，前幾日Apple先警告完我哋，手機鏡頭有可能會被強烈的震動損壞，不建議將手機安裝在電單車手把或車身上，因為這樣會令引擎震動直接傳到手機上造成損害，但發佈會入面條傳宣片情節正正就係一位速遞員將iPhone 13，放係電單車手把到揸車周圍去，可能想同大家講已經改良咗呢個問題。

iPhone 13同mini嘅鏡頭組合都係一樣，1200 萬像素雙相機系統、1.6 光圈廣角 2.4 光圈120度超廣角、2 倍光學變焦縮小、多達 5 倍數碼變焦、有散景景深嘅人像mode、1200萬像素2.2 光圈前鏡頭；而上代 12 Pro Max 先至有的sensor shift今次13同mini都有呢個配備，即係佢地都影到night mode，而攝力都有好多新野玩，好似全新的Photographic Styles，令相機app 可以更加個人化，仲有Cinematic Mode 做到景深過場效果，攝錄人物、寵物或物件時或於拍攝後就可改變焦點，還可以在「相片」app及 iOS 版 iMovie 中調整散景程度，兩款型號均備有 Dolby Vision HDR 攝錄功能，支援高達 60 fps 4K 拍攝。聽起上嚟；就算只係揸住13系列，都可以有好大嘅創作空間。不過頭先講嘅攝影配置，13同13 Pro系列都有，究竟13 Pro多咗啲咩呢？就係全新光線感應器嘅鏡頭組合，仍然有Deep Fusion、Apple ProRAW，仲有新超廣角相機嘅微距拍攝，同埋 77 毫米長焦距相機，提供 3 倍光學變焦放大，2 倍光學變焦縮小，合共 6 倍的光學變焦範圍

另外，支援在廣告和電影製作用的 ProRes 格式，提高的色彩逼真度及減少壓縮失真，所以即係今次Pro系列，又更加走向專業用途。

傳聞最熱烈嘅平整設計Apple Watch S7，大家可能要幻想多陣啦。今代 Apple Watch主要提升錶身的耐用程度，同有更快的充電表現，外形都仍然係採用渾圓邊角的設計，不過今次邊框進一步收窄，做到同上代一樣的Size，但熒幕就加大近20％，變成41mm同45mm錶殼；而新錶的玻璃錶面經過重新設計，錶面比上代加厚50%，亦有更強的抗裂能力，加上IP6X 防塵認證同50 米防水等級，令錶身更加襟用。電池方面 官方表示一次叉電可以用到18 小時，而隨錶會附上新的USB-C 磁力充電線，令新錶充電速度比上代快33％。Apple Watch Series 7 將於秋季末推出，有鋁金屬、不鏽鋼同Watch Edition版本，當中鋁金屬錶殼會有午夜暗、星光、綠、藍、紅 5隻顏色，而價錢就要等官方稍後公佈。

發佈會仲有久別重逢的iPad Mini，新機係同最新iPad Air設計一樣，將TouchID放左上開關掣上面，令到Liquid Retina熒幕Size由7.9吋變大去到8.3吋，而喺效能上就用上 A15 Bonic晶片、5G上網，支援第2代Apple Pencil 加USB-C連接埠，都係令人期待的升級。顏色方面今代有4隻色畀你揀，分別係太空灰、粉紅、紫同星光色，有64GB、256GB 2個容量版本，售價 3,999 起。除左 iPad mini ，Apple 亦更新左入門iPad的規格，配備比上代快20%的 A13 Bonic 晶片，今次有埋ipad pro嘅人物置中功能，1200萬超廣角前置相機，有灰、銀2隻色，64GB WiFi 版賣 $2,599 起，LTE 版就貴多 $1,000，兩部新iPad 都係即日接受訂購，9月24日正式發售。