用手賺的是辛苦錢，用腦賺錢的算是人上人，「真正的賺錢是用錢賺錢」！

第一，保本。炒股最緊要係把握機會，但把握機會有個先決條件就係手上要有錢。機會睇得再準無錢買貨就只係一場空。作者提出兩個保本嘅具體建議，分別係快速止蝕同埋唔好一次下注太多，有玩過股票嘅人肯定有以下兩種嘅經驗，第一種就係蝕錢。蝕少少錢嘅時候要止蝕好容易，但係蝕大錢嘅時候要認賠就好難，睇到少少上漲就以為佢會反彈，結果價格越跌越低。另一種就係賺錢嘅經驗，當手上有一隻股票飆升嘅時候第一時間會好開心，跟住腦入邊嘅貪念就會開始喺度講嘢「點解一開始唔買多啲呢」、「下次睇準左就要落重注」，結果下一次真係落重注但係就落咗喺錯誤嘅股票上面。記住快速止蝕同埋分批落注既觀念可以令你喺炒股嘅道路上走得更遠。

第二，不斷盈利。呢句說話聽起嚟好似廢話，但係無幾多個人可以做到。作者認為想要不斷盈利除咗知識同埋經驗，最緊要嘅心法係忍耐，好似獵人一樣等到獵物真係入咗射程範圍先開槍，只有股票符合自己嘅入場條件先入市，咁樣事後想檢討嘅時候都有個依據。

第三，賺大錢。真正專業嘅炒手唔係每一次次落注都可以賺，世界上都無咁樣嘅人存在。厲害嘅炒手只係追求一種境界，就係賺錢嘅時候賺大錢，蝕錢嘅時候蝕小錢。想要達到咁樣嘅境界必須要識得判斷股票嘅正常運動，作者係書中強調認識股票嘅正常運動係基本功。華爾街嘅將好手通常都善於跟住正常運動順勢操作，跟住我哋就嚟講吓所謂嘅正常運動到底係咩意思。

基本來講，股票被追捧嘅時候會上漲，被拋售嘅時候會下跌，就算過程中大戶介入操作，但大趨勢都唔會有太大嘅改變。漲跌趨勢中嘅起起落落就係所謂嘅正常運動。舉個例子，有隻$20嘅股票進入上升嘅走勢一路升到$27，過程中交易量隨之增加。幾日之後漲勢停止一路跌到$24，交易量比上漲嘅時候少，但係整體來講買盤大過賣盤。如果係正常運動咁股價就會喺$24徘徊幾日之後，應該會重新上漲並且好快就會衝破$27。如果炒手熟悉正常運動嘅規律就唔會喺下跌嘅時候離場，至於要點樣熟悉當然要有相關知識。

作者提出四個基本概念，第一個就係觀察股票嘅走勢同埋走勢線。喺正常嘅 升勢中，每個波浪嘅最高點應該比上個波浪嘅最高點要高，最低點亦都應該比上個最低點高。 反之亦然，正常嘅跌勢就係波浪一波低過一波。

第二個可以觀察支撐線同阻力線，一旦阻力線被突破，股價就有機會繼續升，就算回落亦唔應該跌到阻力線之下否則就係不正常運動。反之亦然，一旦跌破支撐線，股票應該會繼續跌，如果一跌破就反彈返支撐線之上，屬於不正常運動，咁可能就係買股既機會。

第三係睇雙肩同頭肩圖，一旦股價穿越突破點，勢頭應該能夠繼續否則就屬於不正常運動。最後係平均線，以二百日平均線為例，一個正常嘅升勢股價應該係平均線之上起伏，一個正常嘅跌勢就應該喺平均線之下波動。其實可唔可以正確咁察覺股票嘅運動，就係大家成日講嘅「盤感」。作者認為呢樣嘢係炒股最難學嘅，亦都係最關鍵嘅成功因素，睇到呢度有人可能會好奇要觀察盤感都應該有個指標嘅，點樣揀出想要炒嘅股票、價值分析好定係技術分析好。

以下睇吓作者嘅講法，先來睇吓價值分析。價值分析會計算股票嘅內在價值，如果高於市價就認為可以買入，但實際操作上價值分析投資人會研究企業嘅營收、盈利、資產以及品牌價值，亦都會比較一下類似企業嘅狀況。作者認為價值分析嘅好處在於可以揾出股價嘅參考點，投資人可以藉此判斷當前嘅股價會唔會太離譜，如果呢個參考點被普遍大眾接受，咁大眾有可能會出現想要低買或者高賣嘅情緒。情緒呢兩個字係作者嘅重點，佢認為一隻股票應該值幾多錢係無確實嘅答案，我哋要分析嘅應該係大眾對股價嘅情緒反應。

至於技術分析，簡單來講就係睇圖。而常用既圖好似走勢圖、支撐線同阻力線、平均線等等，背後都建立喺「人性相近」呢個假設，作者話技術分析係佢買入買出嘅主要參考，但係想淨係睇圖就賺錢嘅難道相當高。因為頭先講技術分析背後嘅假設係人性但人係好複雜嘅，股價嘅變動雖然有規律但唔會每次都一樣，呢樣亦都係點解高手追求嘅並唔係每次都贏錢，而係贏多於輸。

除咗以上兩者，作者亦提出大市嘅重要性，大市指就係大盤，順着大盤趨勢操作先可以提升贏率，呢個亦都係好多新手容易犯嘅錯誤。新手會花心思研究個股，認為好嘅市場會有股票跌，差嘅市場亦都會有股票升。但係唔記得咗最重要嘅一件事就係要喺趨勢中揀出逆勢嘅股票簡直就好似喺沙中掘金咁一樣咁難，因此作者強調一個專業炒手一定會將大市同個股結合一齊考慮，佢亦都提出判斷大市時應該注意嘅六個重點。

第一，大嘅政治同經濟環境有啲咩變動，其他國家嘅政治同經濟危機會點樣影響本國市場。
第二，本國嘅經濟大勢。通脹狀況係點、匯率係咪有變動嘅可能性、央行係咪有調整利率嘅打算。
第三，股市龍頭有咩表現。一般來講股市到頂之前，龍頭會率先開始疲軟。
第四，垃圾股有咩表現，喺股市到頂前一段時間一啲平時無人問津嘅小股票會變得活躍，因為龍頭已經貴到買唔落手，熱錢開始湧向第三四線嘅股票。
第五，每日收盤嘅時候有幾多隻上升嘅股票，有幾多隻下跌嘅股票，觀察呢個係為咗不被權重分配不均所蒙蔽。一個大權重嘅股票偶爾會影響大盤嘅走勢，例如某日有¼嘅股票跌¾嘅股票升，但喺¼嘅裏邊有大型股，大盤嘅真實走向會因此而受到影響。
第六，考慮個別股嘅走勢。例如睇吓金融、電子、房產類股票嘅走勢，大盤喺升嘅時候唔一定每個類別都升，可能係電子股表現差金融股表現好，呢個亦係買賣某股票時嘅重要考量。

睇完上面嘅炒股知識唔少人應該會想小試一下身手，作者依照自身嘅經驗將學炒股分成四個階段，大家可以參考睇吓自己而家處於邊一個階段。

最初階嘅係蠻幹階段，買賣股票嘅原因完全受到人哋或者自己嘅衝動影響，而且呢個階段嘅投資者有兩個特質：不貪同不怕。聽起來好正面，但係呢度所講嘅不貪係有少少利潤就賣股，賺個午餐錢都好開心。至於不怕係咩呢，就係說服自己啲錢都唔急用或者即刻變身長線投資人。

上一級就係摸索階段，投資人開始幫自己定下規矩，搵適合自己嘅玩法，好似作者就試過價值分析同技術分析，但不停以止蝕離場。呢個階段嘅特點係知道要止蝕亦知道要提高利潤，但具體上就唔知點做，有時候做到有時候又失敗。

跟住就係體驗風險階段，唔少人會大幅進步係因為蝕左一兩次大錢，蝕到唔想食飯嘅時候先會真正反思炒股點解會有止蝕之類嘅規矩。作者就係因為有次爆蝕之後重整思路，歸納出呢本書嘅操作概念先踏上穩定獲利嘅道路。

最後係久賭必贏階段，呢個階段嘅投資人唔會對蝕錢同賺錢有太大嘅情緒波動，而係將注意力放喺正確嘅時間做正確嘅事，將炒股呢件事視為機率嘅遊戲，唔再執着喺本益比或盈利之類嘅單一指標，而係用機率思考問題，好似判斷大盤有冇提高贏率、本益比有冇提高贏率、股票走勢有冇提高贏率，用呢種方式思考先知道自己點解會賺錢或者蝕錢，有能力以炒股為生，至於可唔可以賺到超乎尋常嘅大錢就要睇運氣啦。

好啦！今集嘅窮侈就嚟到呢度。
我哋下一集再見，拜拜！