你害怕的是什麼？簡談恐懼 ｜What are you afraid of? Introduction of FEAR

常常感覺到恐懼，不是嗎？這就是作為奴隸的體驗。
《銀翼殺手》(Blade Runner,1982) 人造人羅伊·貝迪(Roy Baty)如是說。

Quite an experience, to live in fear, isnt it?
Thats what it is to be a slave.
The replicant Roy Batty in Blade Runner (1982)

恐懼，可以話係人類喺生存上嘅基本感覺。恐懼亦都係《聖經》入面提到嘅，人類最初有嘅情緒，就係喺亞當食咗知善惡樹上面嘅果實之後，佢就發現自己全身赤裸，當時佢所感覺到嘅恐懼，比起羞恥之心更加強烈。換言之，喺恐懼入面，我哋先意識到外界某啲事物嘅存在。大體而言，呢啲事物都係我哋願望嘅相反一面。我哋害怕我哋所珍惜嘅嘢會被破壞或者被奪走，例如自由、尊嚴、健康、社會地位，甚或乎係生命。我們不但止害怕失去自己，同時亦都會害怕失去其他人，尤其係我哋所愛嘅人。一旦自己珍惜嘅嘢受到威脅，我哋嘅心入面就會產生恐懼。我們不斷咁想去保護自己，令到自己可以唔使受呢啲威脅所傷害，因此實際上，我哋人類總係生活喺恐懼之中，正如法國哲學家蒙田 (Montaigne) 所講：

人類嘅脆弱性意味著，我們更多嘅係想要逃離，而唔係想要爭取。
Our human frailty means that we have more to flee from than to strive for.

即使係咁都好，其實都係證明唔到恐懼就係觀察人類生活嘅最合適視角。或者可以話，對於恐懼所帶嚟嘅風險嘅敏感，甚至沉迷落去呢啲風險敏感行為，為我哋所帶嚟嘅傷害係大過任何實際存在嘅風險。當然，咁唔代表我哋係生活喺一個完全無任何危險嘅世界。例如，疫情顯然為我哋人類社會帶嚟嚴重嘅影響，又或者係細微到係喺橫穿馬路之前都要睇車，以免俾車撞到，呢啲都係風險嚟。而其實喺呢啲情況之下，我們都會抱有一種戰戰兢兢嘅謹慎態度。問題不在於有謹慎態度，而係「我們需要謹慎」呢樣嘢被誇大咗，以致我哋對一切事物都從恐懼嘅視角出發，加劇咗對於恐懼嘅敏感度。例如我哋身邊嘅媒體亦都不斷咁提醒我哋：呢個世界係點危險點危險，我哋又係點樣對呢啲嘢感到恐懼。呢啲嘢都表明咗喺主流社會入面都流行一種觀點，就係指現今我哋面臨著比以往更加多嘅危險，而且將來亦都會變得更加差更加大鑊。

毫無疑問，恐懼係現今媒體一個好重要嘅營銷手段，而且佢哋一直都製造出遠遠超出現實嘅恐懼感，佢哋向我哋灌輸各種傳聞，無論係關於致死嘅病毒、分離主義、有戀童癖嘅大律師、黑暗暴力嘅青年、遊戲嘅毒害、生態災難以及損害社會行為等等。媒體喺社會嘅日常生活入面有住舉足輕重嘅作用，而我哋亦都傾向相信佢哋所報道嘅任何危險或者災難。經常留意傳媒嘅人會更加容易懷疑佢哋身邊嘅人同事，佢哋會不期然咁相信唔同嘅風險都喺度增加緊，會認為自己置身於危險之中。而之所以會有呢種操作，就係因為對於當權者、唔同嘅政治黨派同埋利益團體嚟講，恐懼其實係一種好重要嘅政治資源。

今時今日，傳統嘅意識形態已經無辦法再煽動大眾，咁就令恐懼成為咗政治談判入面其中一種有力嘅武器，佢可以隨時隨地被用作打擊對手嘅工具，將對手排除喺政權之外。喺呢個概念上，政治人物就同大眾傳媒互相呼應。呢啲驚恐同危險無疑能夠吸引到好多唔同人嘅關注，所以報紙、電台、電視同埋各大小新媒體網媒自媒體等等都會靠呢啲題材搶熱度，無論任何時候都想優先咁報道最得人驚嘅消息，甚至連娛樂行業都參與其中，榨取熱度嘅價值。例如我哋都會經常聽到唔同嘅自然災害將會更加嚴重，但事實上，理論上嘅假設並不等於實際上一定會發生。呢啲說話其實蘊含咗從可能到現實嘅跳躍。但只要人沉浸喺呢啲可能性入面嘅話，其實所有嘅災難都係觸手可及嘅，就好似每時每刻都可以為下一秒潛在有機會發生嘅災難而驚惶失措。

無錯，好多事實都證明咗氣候變遷確實會對人類嘅生存構成威脅。但咁樣並不等於媒體報道入面其他無數嘅恐懼消息都係言之鑿鑿。只要呢啲資訊依然都係單向傳播，任何事情都會有信口雌黃嘅機會。媒體全盤接受咗一啲理想主義團體嘅觀點，亦都唔會加上任何嘅質疑，呢啲觀點就會帶有十分強烈嘅目的性同傾向。就好似佢哋有心要渲染一啲恐懼情緒，即使有少數人都重係會抱持謹慎態度，但都重係會有好多人諗都唔諗就聽信佢哋嘅言論。呢種宣傳重有住另一樣顯著嘅特色， 就是將潛在嘅危險描述成當下嘅事實。無可否認，世間本來就存在著各種嘅可能性。例如行行下街無啦啦會有人打你，一塊從天而降嘅雜物正好砸中你個頭，坐坐下飛機都會俾恐怖分子劫機等等。但如果成日都只係對呢啲危險有住咁多聯想嘅話，就未免太過杞人憂天，因為你諗得到嘅大多數危險可能永遠都無乜機會成真。

而事實上，恐懼係有傳染性嘅。一個人恐懼某一樣嘢，呢種恐懼就會立即感染周圍其他人，緊接著又會大規模咁擴散開去。即使起初恐懼係無任何合理來由，但呢種擴散情況依然會發生。換言之，即使有好多人都對某件事物感到恐懼，我哋亦都唔能夠因而斷定呢件事物確實係危險可怕嘅。

不過喺社會分層普及化嘅今日，恐懼係一種我哋擁有嘅共同情感，係對於生存嘅一致睇法，已經成為咗我哋成個文化嘅一個基本特點。正如英國社會學家富蘭克·富里迪 (Frank Furedi) 所講：

恐懼文化已經慢慢成為西方社會嘅主導。呢種文化嘅標誌就係：相信人類面臨著摧毀日常生存嘅強大力量。
Western societies are increasingly dominated by a culture of fear. The defining feature of this culture is the belief that humanity is confronted by powerful destructive forces that threaten our everyday existence.

而恐懼文化增長嘅其中一個原因，就係嚟自政治人物或者媒體所宣揚嘅邏輯。但同時，只係喺我哋相信媒體呢套邏輯嘅情況之下，恐懼文化先會發展起嚟。從自然嘅角度而言，人類係好容易受傷害嘅物種。我哋降生於一個我哋自己無辦法控制嘅世界入面，一出世就被拋入生存嘅不確定性之中，而我哋係無法自主自理。以至到我哋嘅恐懼，越來越唔受自身嘅經驗所支配。不過唔知點解，無論講緊嘅係氣候變化問題，定係肺炎病毒問題都好，最終唔知點解都會得出「末日將近」呢個結論。而且，每個人每日嘅每一項日常活動，都會無可避免咁被認為具有某種危險性，例如唔知點解出街食個飯睇場戲，多過某個人數就會好危險之類。

然而，事實上，每個時代都會瀰漫著各種因恐懼所帶嚟嘅情緒，只不過我哋恐懼嘅對象喺唔同時代都會有唔同咁解。喺現今世代，基本上都無乜人會恐懼世界末日，我哋而家最怕嘅可能係疫情、失去自由安穩嘅生活之類。但喺上一世代，每個人都十分恐懼核武器。當時嘅人普遍都相信，喺不久嘅將來將會有一場導致人類滅絕嘅核戰爭，呢樣嘢構成咗上一代人對未來嘅想象嘅其中一部分。時至今日，核武器雖然依然都係人類文明嘅重大威脅，但核武器對社會嘅震懾力經已大不如前。而家令人更加恐懼嘅，可能係蝙蝠，可能係地鐵入面放嘅毒氣，又或者可能係唔同嘅限制人權問題。問題係應該點樣限制呢啲恐懼影響我哋嘅日常生活呢？呢個就要從了解恐懼喺啲乜嘢開始講起喇。

----------------------------------------------------------------------------------------------------------------------------------------
痛苦有邊界，恐懼卻沒有。

Dolendi modus, timendi non item.
(To suffering there is a limit; to fearing, none.)

弗朗西斯·培根 (Francisc Bacon) ：《論謀叛與動亂》 (Of Seditions and Troubles) ，《文集》 (Essays, 1625)
Francis Bacon: ‘Of Seditions and Troubles’, Essays (1625)
----------------------------------------------------------------------------------------------------------------------------------------

好多人都會問「乜嘢叫恐懼」，總體嚟講，恐懼係一種受文化影響嘅「習慣」。但真係要答呢個問題，我哋就必先要搞清楚恐懼同情緒嘅關係。咁乜嘢叫做「情緒」呢？

「情緒」喺呢度嘅理解係用嚟涵蓋一系列不同種類嘅現像：從生理感受為主嘅痛楚、饑餓、口渴至到驕傲、妒忌、愛恨等等嘅認知概念，其實都可以係情緒嘅一種，但係前者生理感受明顯偏重於物理上，後者認知概念就會偏重於精神上。但到底我哋係以乜嘢為標準去判斷一個特定狀態係屬於感覺 Feelings 定係情緒 Emotions 呢？其實到現時為止，都重未有一個公論。

美國社會人類學家保羅·埃克曼 (Paul Ekman) 指出咗我哋人類嘅一系列基本情緒，呢啲情緒係喺所有文化入面都能夠揾到，係我哋人類先天而非習得嘅情緒。好多人都支持人類係有「基本情緒」，但係當講到有幾多種情緒先係基本情緒同點樣先算係基本情緒，呢個就真係各有各講法喇。大部分人都會認為基本情緒係包括憤怒、恐懼、快樂、厭惡同驚訝，但其實都係無達成任何共識。曾經有唔少人都列出咗佢哋認為嘅「基本情緒」列表，但係呢啲列表好多時都係無任何交集。因為喺不同嘅文化背景之下，情緒嘅表達方式都會係各式各樣。邊啲情緒能夠被表達出嚟，又或者表達出嚟果陣嘅強度係點，完全係取決於果個文化嘅基本詞彙。情緒同表達係密不可分嘅，但後者又會因為文化嘅不同而有唔同嘅表達方式，所以其實我哋就會見到，我哋嘅情緒亦都同我哋嘅文化密不可分。

當然，每個人都可以掩飾自己嘅情緒，又或者隱藏自己嘅情緒，但係隱藏情緒嘅同時，其實都會係以本身能夠外顯嘅情緒為前提。法國現象學哲學家梅洛－龐蒂認為：情緒、情緒嘅表達以及二者嘅關係都係靈活多變嘅。他亦都認為，情緒嘅表達隨著文化嘅不同而有所差異，佢就咁講嘅：

事實上，同樣出於憤怒或者喜愛嘅情緒，日本人同西方人表現出來嘅行為就好唔同喇。呢種行為嘅唔同反映咗所體驗到嘅情緒強度嘅差異。除了姿勢之外，我們嘅習俗亦都同我哋嘅人體構造密切相關。而人類正正就係生活喺習俗之中。並借習俗嚟傳達情緒。

正如梅洛－龐蒂所講，情緒及其表達嘅「自然」層面同「習俗」層面係難以區分嘅。兩者從來都係天衣無縫咁交織起嚟。

同時，情緒亦都可以分為三個層面：生理、心理同社會三個層面。呢啲層面都係互相交織，錯綜複雜。而如果我哋要正確理解他人情緒，必須綜合考察呢三樣嘢。情緒唔係全部都係直接嘅生理反應，亦都係我哋社會文化嘅產物。就某一特定情緒而言，喺乜嘢情況之下應該被感覺到，喺乜嘢時候可以被表達出來，都係由我哋嘅社會規範所決定。隨著文化觀念唔同或者地位高低之差，我哋所遵循嘅社會規範亦都唔同。與之類似嘅現象就例如我哋人類嘅語言習得概念，其實同樣都係以生理特徵為基礎，但句法習慣都會隨文化同個人而有所不同。因此，我們應該恐懼啲乜、強度係點，亦都取決於我哋嘅世界觀，以及係點樣看待危險並且有幾想保護自己。對於情緒嘅體驗同認識，從來都脫離唔到相應嘅社會語境。換言之，恐懼實際上同我哋嘅文化亦都係密不可分嘅。

咁你可能會問，既然恐懼係同我哋嘅文化有關，咁係咪姐係代表我哋感覺到嘅恐懼，只有喺人類身上係獨有，而其他動物係感覺唔到呢？

喺生理上嚟講，我哋感知恐懼嘅器官其實同其他動物一樣，但分別在於人類係有住認知、語言同埋抽象嘅思維能力，所以可以激起我哋恐懼嘅事物係遠超於其他動物。舉個例子，一隻身處Ringo屋企嘅兔仔係唔會恐懼身處喺西伯利亞嘅西伯利亞虎，佢哋亦都唔會擔心佢哋嘅食嘅生菜紅蘿蔔入面會唔會有殘餘嘅農藥，因為兔仔嘅恐懼必然係嚟自佢可以喺此時此地物理上睇到感覺到嘅事物，但人類就完全唔同。就係因為呢一種差異，決定咗我哋人類嘅恐懼係同動物唔同，而呢一樣嘢唔係嚟自於我哋生理特徵上嘅差異。

人類就係具有語言同抽象思維嘅能力，呢啲能力令到人類能夠用符號嚟代替相關事物，一定程度上獨立於我哋所生活嘅現實世界。所以能夠感知到嘅恐懼就會比其他任何動物都多。因此當我哋一旦聽到有某啲危險，即使係喺千里之外，都會將佢視之為對自己嘅威脅。我們嘅想像之中虛構出無數嘅危險，呢個或者就可以解釋咗人類之間點解會自相殘殺，因為恐懼往往會導致進攻性嘅行為。

恐懼經常伴隨著逃離或者進攻。但亦都唔完全係咁這樣，有時可能會出於一啲特殊考慮，我哋亦都可能會選擇唔表露自己嘅情緒。例如當你中意咗一個人，但就無辦法用任何表情或者姿勢嚟向佢表達你嘅愛戀感覺，因為唔確定對方嘅反應會點，唔想做兵。又或者喺比賽入面嘅千鈞一髮之際，我們會怕，但我哋都明白喺呢個時候恐懼都於事無補，所以就會決定壓抑自己嘅負面情緒。喺上述呢兩個情景之下，其實我哋都無透過行動嚟表達情緒，但如果因而斷定我哋喺呢啲情景之下嘅情緒係無任何變化，亦都係十分唔合理。因此我哋會得出一個結論，就係情緒係會激發行動，但情緒並不必然導致行動嘅出現。亦姐係話恐懼雖然經常伴隨著逃離，但有時亦都會因為恐懼嘅泰山壓頂反而令到我哋束手無策，無動於衷。

就正如我一開始咁講，當人恐懼果陣，人通常會試圖逃走，或者係避開危及自身生命、健康同利益嘅事物。因此，對應恐懼嘅典型行為模式就係逃避，盡可能遠離恐懼嘅對象，令到自己可以置身喺危險之外。但係，逃避都唔一定係意味著會逃走。人可以喺恐懼對象同自身之間設置屏障，例如用武器保護自己或者係躲藏起嚟，呢啲都係一種逃避行為，目的係通過各種手段令到自己唔會受傷害。然而，呢啲情緒既可能帶嚟好處，但同時亦都可能會帶嚟壞處。無錯，當人見到確實係有某種危險性嘅事物果陣，大多數人都可能會感到萬分驚恐。但實際上，呢種恐懼或者會出現過分誇張嘅情況，甚至係無直接指向果樣事物嘅真正危險之處。好多人都會以為，恐懼之類嘅情緒係可以被理性分析，姐係如果眼前嘅事物確實危險， 恐懼就係正確嘅觀察，而箇中危險性越大，恐懼感就會越強，但事實上當然無咁簡單。

德國哲學家海德格就有一個幾好嘅講法，佢認為處於恐懼中嘅人總係會手足無措，其中一個例子就係一但自己間屋著火果陣，人通常都係會捉住離自己最近嘅物品就往外面衝，但實際上佢哋攞嘅嘢經常都係一啲雞毛蒜皮嘅嘢嚟。因為情緒總係對應住特定嘅行為模式。一但某種情緒完全爆發，相應嘅行為模式就會產生作用，然後理性就會被拋諸腦後。喺呢啲情況之下，我哋根本無辦法安排到有條理嘅行動步驟。因此我哋衝動之下嘅行為，往往同深思熟慮之後嘅行為好唔一樣。

諸如此類對於恐懼呢類情感妨礙理性思考嘅批評，咁係咪姐係暗示緊，如果人類可以有住不被任何情緒影響嘅純粹理性狀態，會更有利於我哋嘅生活呢？

事實上，我哋的確係可以通過藥物嘅化學作用嚟緩解恐懼。一般嚟講，人類腦部有個叫做杏仁核嘅部分，係同我哋感知恐懼有關。而杏仁核受損嘅人，即使喺面臨生命危險，都感覺唔到恐懼，同時佢哋亦都認知唔到他人嘅恐懼。因此，其中一個消除恐懼嘅方法，就是控制杏仁核嘅機能，令其無法運作。咁姐係代表杏仁核受損嘅人，其實係感覺唔到恐懼，咁佢哋咪係真正擁有免於恐懼嘅能力，咁樣咪可以進入不受恐懼影響嘅純粹理性狀態呢？

咁就當然唔係咁啦。倘若人無情緒嘅話，實際上所做出嘅決定其實一樣都係唔理智嘅。就好似之前咁講，杏仁核受損嘅人，面臨生命威脅亦都感受唔到恐懼，從而無法察覺到危險，所以佢哋亦都唔會採取到適當嘅措施轉危為安。而呢個其實亦都係一種唔理智嘅行為，因此，當我哋離開情緒果陣，我們一樣係無辦法對周圍環境作出正確嘅判斷，進而理性咁行動。

但對一個杏仁核運作正常嘅人嚟講，一旦產生恐懼，我哋係幾乎係無法克制。我哋係無辦法一相情願咁決定我哋唔怕，因為理性已經完全被杏仁核所征服，雖然我哋唔能夠單靠意志去消除恐懼，但我哋可以經由長期嘅訓練，改變自己對恐懼嘅反應模式，又或者有意令自己去適應危險嘅事物，逐漸養成鎮定嘅心態。克服恐懼心理，呢個先至係真正可以有利於我哋生活嘅方法。

事實上，恐懼係令到我哋嘅世界變得多姿多彩。無咗恐懼，我哋嘅生活會變得好無趣，從生理解度嚟講，恐懼總係同好奇心聯繫埋一齊，就係因為我哋有好奇心，我哋先至會恐怖題材嘅作品或刺激性的體驗有興趣。例如無論係睇恐怖電影定係玩恐怖遊戲，都係體驗危險嘅安全方式。

雖然喺體驗文化創作嘅時候，我哋都可以享受到恐懼為我哋帶嚟嘅美感，但都重係有好多人中意實地體驗虎口脫險嘅刺激，最為人熟悉嘅例子就係所謂嘅極限運動。極限運動嘅魅力所在之處，就係情況越危急，樂趣就越多，小則就係身體受傷，大則會性命不保，但係這種危險能夠帶嚟全新嘅生命感受，因為參與者必須擁有一種自主感，佢哋需要認知到唔係命運喺度掌控一切，而係佢哋自己。因此喺呢個角度嚟睇嘅話，極限運動並唔係單純嘅玩命，唔係一種對死亡嘅嚮往，而係一種對生命嘅追求，呢個亦都係點解好多人都會痴迷喺一啲高風險嘅運動。換言之，極限運動實際上體現咗一種樂觀嘅生活態度，激發自身對苦難嘅恐懼，經歷一切苦難最後都重生存到落嚟就成為咗一種趣味，從而令到人可以以一種全新嘅角度看待生命與生活。

無可否認，恐懼係證明人存在於世嘅一種方式，但另一方面，一個你所恐懼嘅世界，係一定無辦法俾到你歸屬感。當人僅僅專注喺現時嘅恐懼威脅之下果陣，就會睇唔到未來所具有嘅無限可能性。執迷喺引起危險嘅事物上面果陣，人就會喪失自我。當自我會被封閉喺某個情境之中果陣，就會令到我哋喪失咗一定嘅自由。而唯有正視恐懼，克服恐懼，先可以令我哋真正感受到生命嘅真締。

----------------------------------------------------------------------------------------------------------------------------------------
恐懼是迷信的主要來源，也是殘酷的重要原因之一。
戰勝恐懼才是智慧的開始，之後才能過上一種有意義的生活，尋求永恆的真理。
——伯特蘭·羅素(Bertrand Russell) 《思想誤區概論》 (An Outline of Intellectual Rubbish)
----------------------------------------------------------------------------------------------------------------------------------------

恐懼係無法避免嘅，呢個世界上面總係有好多嘢會令到我哋恐懼。例如喺香港，戰後年代我哋就怕無飯食無屋住；九十年代我哋就怕政權交接後嘅境況；二十一世紀頭十年就怕揾錢唔夠快；之後果十年就怕失去自由；最近我哋就怕肺炎怕病毒。恐懼嘅對象不斷改變，但係恐懼呢一樣嘢就一直存在住。因此，我哋想要生活喺一個無恐懼嘅世界，基本上係完全無可能。

而事實上，恐懼係無乜點幫到我哋去正確認識我哋所恐懼嘅嘢。但為咗防禦自身恐懼嘅嘢所帶嚟嘅危險，在此其中去保護自己，無論係社會定係我哋個人都做咗好多嘢，但呢啲嘢可能同我哋想要防範嘅危險係毫無關係。恐懼所能夠說明嘅嘢，更多係我哋自身，而唔係恐懼嘅對象。我們恐懼某啲嘢，但呢啲恐懼有可能係無必要嘅。然而，就係因為我哋嘅恐懼，政府就會傾向採取某啲措施，呢啲措施，不但止無令到我哋嘅處境變得更加安全，重經常係限制咗民眾嘅自由。每一個人都會怕有唔同嘅風險，但咁樣從來都唔意味著政府所作所為就係降低風險，又或者係必須降低風險。

我們必需要認知到，恐懼並唔係現實嘅客觀反映，唔同嘅利益驅動亦都會影響著恐懼嘅指向。恐懼係一樣好重要嘅權力工具，喺現今社會入面，邊個能夠控制恐懼嘅指向，邊個就可以領導社會。按照意大利哲學家吉奧喬·阿甘本嘅觀點，或者可以話，我哋現今生活喺一個持續嘅緊急狀態入面，關於重大危險嘅言論總係可以成為眾人嘅焦點，甚至戰勝對自由民主權利等普世價值觀念嘅追求。最廣為流傳有關恐懼嘅論述，可能就係富蘭克林．D．羅斯福 (Franklin D Roosevelt) 喺1933年嘅一個演講入面嘅一句說話。羅斯福當時就話：

我們唯一應該恐懼嘅，就係恐懼本身。

我們係應該恐懼恐懼呢一樣嘢，因為佢真係損害咗日常生活之中好多真正重要嘅嘢。又或者好似諾貝爾文學獎得主渥雷·索因卡 (Wole Soyinka) 曾經講過：

人類應該致力於驅散恐懼嘅迷霧，而唔係沉溺於其中。

呢句說話亦都講得無錯，問題係，我哋應該點樣著手去做呢？或者最重要嘢就係在於，喺涉及恐懼問題果陣，我哋每一個人都必須承擔更多嘅社會責任。亦即係話，無論出發點有幾「好」都好，都唔能夠對危險過於誇大，特別係大眾傳媒。媒體只要依然都將恐懼當成係完美嘅營銷手段嘅話，就無可能採取一種更負責任嘅態度。我哋必需畏意識到，誇大危險呢一件事可能會導致嚴重嘅後果，就係會造成恐懼嘅泛濫。

恐懼嘅泛濫，危及我哋根本嘅安全感。正正係呢種根本嘅安全感，保證我哋擁有正常嘅生活。喺風險文化入面，我哋所有人都係犧牲品。因為我哋每個人都會變到好「悲慘」，好似被變成「受難者」或者消極嘅「接受者」。恐懼剝奪咗我哋嘅自由，呢種自由喺日常生活入面本來係理所當然嘅嘢，但而家就好似被不安全感所限制。當悲觀主義已經發展成相當普遍嘅情緒，進步嘅觀念反而被視為幼稚、愚蠢之舉。就好似波蘭社會學家齊格蒙特·鮑曼咁講：

「進步」並唔係一個指涉歷史嘅概念，而係對當下狀況嘅自信。進步最深層嘅意思，或者亦係唯一嘅意思，係由兩個密切相關嘅信念所組成。其一，「時間係眷顧我哋嘅」；其二，是我哋「決定咗事情嘅發生」。……對於果啲自信有能力改變情況嘅人嚟講，「進步」係一個好自然嘅概念。而果啲感覺到無力把握任何事物嘅人，根本唔可能諗得到有進步嘅存在；即使有人提出呢個概念，都會被佢哋當成係荒謬絕倫嘅事。

喺一個瀰漫住恐懼情緒、到處都係「受難者」嘅文化入面，你係唔會想像到進步嘅概念。喺呢個文化入面生活嘅人最多都只係會相信，佢哋或者只能夠令到情況唔會變得更加差。一個人如果體驗唔到真實嘅存在感，亦都會缺乏改善世界嘅信心，咁樣未來對於佢講就會毫無意義。無錯，人類似乎更加傾向相信所有事都會有壞嘅結果，我哋始終心懷恐懼，從害怕一樣嘢轉移去到害怕另一樣嘢，就好似永遠都處於緊張憂慮嘅狀態。當我哋習慣咗生活喺恐懼之中，就好難會感覺到快樂。我哋通常嘅諗法係：我哋今日將要面臨著前所未有嘅危險，明天世界會變得更加不堪。然而，我哋能否感到幸福，其實係取決於我哋點樣看待我哋嘅未來。一般嚟講，身處困境而對未來充滿樂觀睇法嘅人，比起養尊處優但喪生生活信心嘅人，更加容易感覺到滿足。對於將來嘅憂慮，令到當下做嘅任何事情都會變得黯然失色。而事實上，比起一百年前，我哋要對面嘅困難其實已經好好多。因此，恐懼能夠喺生命入面發揮啲乜嘢作用，取決於我哋自身嘅意志。我哋可以試下對抗恐懼，亦都可以盡力以希望嚟取代恐懼。

希望，係我為大家寫下有關解決恐懼嘅答案，但追尋呢個答案，其實可以有更多嘅方法，例如同你身邊嘅人，一齊感受一次探索自身恐懼嘅旅程，一個極盡視聽味之餘嘅夜晚。

由Raven and the Sea 天黑音樂主辦及製作，Freespace 自由空間聯合主辦，Olivier Cong 江逸天 I AM AFRAID OF ... CONCERT將會喺今年嘅10月20日同10月21日喺西九文化區藝術公園自由空間嘅大盒，同大家一齊探討我哋心底裡恐懼嘅或者害怕嘅究竟係乜嘢。

喺呢度簡單介紹下Olivier Cong 江逸天先，如果呢排有聽我直播嘅弟兄。應該都會聽到，我呢排都喺度狂播佢嘅歌，無錯喇，就係果位我稱之為好有才華嘅音樂人朋友。Oli係香港首位喺Apple Music上面嘅矚目新人，佢亦都曾經受邀為 Cigarettes After Sex 嘅香港演唱會做開場。我對音樂嘢就唔太熟悉，但係我聽過Oli嘅創作之後都十分中意佢嘅作品，原因係佢有我中意嘅一陣文學味。喺呢度是但舉三兩個例子啦：

佢嘅第一張專輯《A Ghost and His Paintings》入面有一首叫做Beginners (What We Talk About When We Talk About Love) 嘅歌，歌名係嚟自美國作家Raymond Carver嘅著名同名短篇故事。故事係講述四個人喺屋入面討論乜嘢係Love。Raymond Carver嘅故事俾唔少人改編過，最近最令人深刻嘅就係奧斯卡最佳電影，Alejandro Iñárritu嘅Birdman，而Oli嘅切入點實際上同Birdman入面呈現嘅重要場景有一種異曲同工之妙。

又或者係佢喺A Thousand Winds 入面Adapt咗同名嘅果首悼念詩，加上自己少少嘅修飾同埋引人入勝嘅音樂襯托之下，將呢首悼念詩嘅整個意象好立體咁呈現咗出嚟。

又或者係佢之前喺聖安德烈堂嘅Show名叫做Through the Window I See No Star，呢個係出自英國著名詩人Ted Hughes嘅詩 The Thought Fox，講嘅就係創作嘅概念係點樣突破時間同空間。由一開始指出孤獨loneliness 同埋黑暗 darkness 都係我哋生命入面嘅過程，到後嚟嘅唔同雪景夜景嘅意象，實際上都同Oli喺佢《A Ghost and His Paintings》入面整個北歐森林意象相對照。

總括嚟講嘅就係，Oli嘅音樂本來已經有種如詩如畫嘅臨場感，再加上錦上添花詩意濃厚嘅歌詞，構成咗一個又一個具象嘅情景，而事實上，可能我真係孤陋寡聞，我的確無試過喺任何香港創作人身上感受到呢種味道。因此喺Oli嚟揾我傾合作果陣，基本上我係二話不說就答應咗佢，因為佢的而且確係值得得到更多嘅支持。

今次I AM AFRAID OF ... CONCERT，我哋Kongner除咗係Media Partner媒體夥伴之外，我哋亦都會有呢個Concert嘅Merch同Early Bird Package俾大家用你哋嘅行動力去支持一個咁值得支持嘅本地創作人。

先講下今次Concert嘅Merch先，今次Merch嘅系列係名為The Kongner X Olivier Cong I AM AFRAID OF ... CONCERT，係由我哋Kongner同Oli聯乘合作推出嘅Merch嚟嘅，分別有Tee、Tote Bag同埋一個好精美嘅Badge，任君選擇。

至於Early Bird Package就會包含一張飛同三款I AM AFRAID OF ... CONCERT Merch嘅其中一件，大家可以喺我哋嘅Kongner Shop入面慢慢配搭。喺呢度提一提大家先。Early Bird Package嘅飛同Merch都係會喺Concert當日喺現場自取，

而單買Merch嘅朋友只能夠喺現場攞，只有海外朋友係會有郵寄服務嘅，敬請留意喇。
而單買Merch嘅朋友亦都可以喺現場攞，亦都可以只有選擇郵寄服務嘅，敬請留意喇。
而單買Merch嘅朋友就要喺Concert之後先可以透過郵寄服務收到貨，敬請留意喇。


Kongner作為引路人，一直都致力為大家帶嚟希望，創造一個屬於我哋自己嘅未來，因為呢個係我哋克服目前面對嘅恐懼嘅唯一方法。就好似德國哲學家恩斯特·布洛赫 (Ernst Bloch) 喺佢論述希望嘅巨著《希望原理》The Principle of Hope入面一開波就已經咁樣寫：

關鍵在於學識點樣帶出希望。希望嘅光芒重未消失，佢伴隨著成功而非失敗。希望高於恐懼，原因在於：佢唔會帶來消極，亦唔會墮入虛無。希望能夠舒展人嘅心胸，而非限制佢哋嘅視野。

無錯，恐懼係無辦法消除嘅，佢永遠都會存在。恐懼或者能夠表明，我哋生活中確實有好多我哋都會珍惜嘅人與事。人恐懼嘅對象，往往喺某啲方面對呢啲嘢構成威脅。而的而且確，呢個世界從來都未去到盡善盡美，但我哋行嘅路，遠比以往好多時候都已經進步咗好多。如果可以俾我自由決定生活喺歷史嘅任何一刻，我都會覺得生於當下嘅香港都依然係最好嘅選擇。當然，我哋喺呢個時代亦都面臨著好多嚴峻嘅挑戰：文化承傳，自由權利，身份認同，政治同社會衝突等等。但我哋所需要嘅，係對人類能力嘅信任。相信我哋自身能夠逐步解決呢啲問題，從錯誤之中汲取教訓，創造一個更美好嘅未來。

因為只有最漆黑嘅晚上，我哋先可以見到最耀眼嘅星光。

我喺米迦，希望到時喺大盒度見到大家啦。