[獨裁者系列]20世紀最殘暴獨裁者－史太林｜見識最強權鬥術！偽裝列寧繼位人，再剷除所有黨內政敵！

今日，我哋就同大家講吓呢一位權鬥高手，在位期間發起大量嘅政治清洗、宗教及民族鎮壓，直接導致數以百萬計嘅平民死亡，但係又成功抵禦納粹入侵，令蘇聯一躍成為世界超級大國嘅大獨裁者 — 史太林。

史太林，原名約瑟夫·維薩里奧尼斯·澤·朱加什維尼，原來佢都係叫維尼。佢喺 1879 年 12 月 18 日出世，出生於格魯吉亞，父親係農民出身嘅皮鞋匠，母親係農奴嘅女兒。早期佢父親頗為富裕，但酗酒無度，之後仲經常家暴、毒打妻兒，及後家庭財政轉差。喺佢大約十歲時，父親喺一次酒後爭執中，被人用刀捅死。出奇嘅係，父親嘅死對史太林嚟講似乎並無咩影響。對佢嚟講，只係被稱作父親嘅人死咗，無令到史太林失去任何嘢。

曾有學者講過，家庭嘅不和、父親嘅殘暴、毫無溫暖可言嘅童年，令史太林日後嗰種猜忌、好權嘅性格，帶嚟咗深厚嘅影響。之後無幾耐, 史太林被馬車撞倒，左臂手肘嚴重受傷，傷口發炎潰爛，差啲死，亦因為呢個原因，以致長大後嘅史太林左肘唔易彎曲，而且左臂較短。同時亦因呢個小問題，而被視為殘疾。

1916 年第一次世界大戰爆發，沙皇徵召史太林入伍，但因左臂問題，而獲免除兵役，保得住條命。史太林十六歲時，進入第比利斯一所東正教中學讀書，佢成績優秀並獲得獎學金。期間佢接觸到一啲革命書籍，從此深受馬克思主義影響。1898 年 8 月，史太林加入咗俄國社會民主工黨，後嚟因其無法支付學費，而不得不放棄最終嘅考試，被學校開除，但其後史太林自稱因為喺校內宣傳馬克思主義而被校方開除。輟學後，史太林喺氣象觀測台搵到工作，亦同時積極參與革命活動。1903 年，俄國社會民主工黨分裂，佢選擇加入以列寧為首嘅布爾什維克嗰一邊。無幾耐之後，史太林就成為南高加索地區嘅主要革命活動者。布爾什維克喺俄語中意為「多數派」，係俄國社會民主工黨中嘅一個派別。領袖人物列寧認為社會民主工黨應該建立一個以少數「職業革命家」為核心、多數黨員對其絕對服從嘅組織模式，即所謂民主集中制。

1917年，布爾什維克通過十月革命，以暴力奪取咗俄國政權，最終喺日後成為蘇聯共產黨。雖然布爾什維克喺俄語當中嘅意思係多數派，但其實直到 1917 年十月革命嘅時候，布爾什維克喺俄國社會民主工黨中實際上一直係少數派。無錯，暴力革命係唔洗太多數民意，早兩集嘅墨索里尼都明白呢一點，當然希特拉都明白。1902 年 4 月 ~ 1913 年 3 月之間，史太林因參加革命活動而被逮捕七次，六次被流放到嚴寒嘅西伯利亞地區，但史太林先後五次從流放地逃出。1902 年，二十三歲嘅史太林，喺首次入獄時嘅檔案中記述，托洛斯基之後都有講過：話史太林左手總係戴住一隻厚手套，即使喺政治局會議上。

1905 年 6 月 3 日，上面提到名人榜第二名嘅斯托雷平解散第二屆國家杜馬，史稱「六三政變」。「六三政變」標誌住俄國1905 年革命嘅失敗，從此開始咗斯托雷平嘅管治。佢推行「先安內後改革」嘅方針，大力鎮壓社會主義革命運動。1908 年 3 月底，史太林與其他南高加索社會主義工黨領袖一同被捕，被囚禁於巴庫嘅監獄，同年被判放逐到俄羅斯西北部嘅沃洛格達省。四年之後1912 年 4 月 22日，已經從沃洛格達逃到聖彼德堡嘅史太林，喺列寧嘅指示下創辦咗《真理報》（我要同我個仔報仇！），並撰寫標題為〈我們的目的〉嘅報刊社論。有趣嘅係，就喺《真理報》創刊號出版嘅 4 月 22 日，史太林再次被捕，並被判流放到西伯利亞為期三年。

（Out！）不過，同年 9 月，史太林又成功從西伯利亞潛逃返彼得堡，繼續主持《真理報》嘅工作。（我要同我個仔報仇！）1913 年 3 月，史太林發表咗《馬克思主義和民族問題》一文，當中首次使用到「史太林」呢一個筆名，意思為「鋼鐵的人」。無錯，「史太林」係筆名嚟㗎！隨後無幾耐佢最後一次被捕，被判流放到著名嘅圖魯漢斯克流放區，為期四年，並受到當地警察嘅嚴密監視無法潛逃。

（家陣啲人可以打完又打，打完又打........唔好意思... 我阿媽有老人癡呆症，走喇走喇...）

直到 1916 年 12 月（口誤），由於兵員嚴重短缺嘅沙俄政府，將佢強征入伍參加一次世界大戰，之後被醫生檢查出左臂有傷，於是佢免於參與動員，被流放到阿欽斯克。1917 年俄國二月革命爆發，沙皇嘅羅曼洛夫俄王朝滅亡，史太林被釋放。佢於 3 月 25 日重返聖彼德堡，與加米涅夫、莫洛托夫等人繼續從事布爾什維克《真理報》嘅編輯工作，佢哋曾一度對總理亞歷山大 ‧ 克倫斯基嘅俄國臨時政府持支持態度。但喺 4 月召開嘅黨內會議中，列寧主張推翻臨時政府，史太林等人於是轉變立場支持列寧。會議上，佢被選為布爾什維克中央委員會成員。同年發生「七月事件」，列寧由於試圖發動革命，而被臨時政府所通緝，史太林協助佢逃往芬蘭。無幾耐列寧重返俄國，並策劃武裝起事推翻臨時政府，史太林成為領導團體嘅一員。最終布爾什維克喺十月革命中，成功奪取政權，史太林得以進入權力核心。

其後因列寧後期身體欠佳，佢無指定繼任人。但係因為托洛斯基曾經反對佢提倡嘅新經濟政策，所以就喺 1922 年，親自挑選咗史太林擔任總書記，令當時工廠同農業嘅貨物都會被國家沒收，而轉為允許個人經營小型企業。1922 年喺蘇共第十二次代表大會上，史太林當選為蘇共總書記，同季諾維也夫、加米涅夫，形成「三頭馬車」聯盟。三個人中季諾維也夫有政治野心，史太林則多數被認為係一個強有力嘅執行者，而並非有野心嘅政治領導人。加米涅夫則被認為有高尚嘅品格，而且係富有學識同智慧嘅調解者，但缺乏政治野心同手段。

史太林做咗總書記之後獲得巨大權力，不過佢都有好明顯嘅缺點，例如佢唔係一個犀利嘅演說家，講嘢一嚿嚿，好重鄉音。節奏亦都捉唔准，演講嘅時候幾乎無任何身體動作。而且同佢好多嘅政治高層唔同，無喺國外流亡多年嘅革命者光環。佢文筆好流利，但係無辦法詳細論述共產主義學說。所以佢用佢呢啲缺點，將自己塑造成一個謙虛嘅僕人，致力於促進國家更大嘅利益。同其他不斷追求鎂光燈嘅政治人物，形成強烈對比。史太林將自己描繪成一個務實嘅實踐家，而非革命嘅倡議者。大家都話佢有非凡嘅組織能力、工作能力、堅強意志。佢嘅對手將佢講到佢係一個好普通嘅行政官員，就好似托洛斯基曾經話過，佢係我哋黨內傑出嘅庸才。

然而，史太林其實係一個狡猾、肆無忌憚嘅操縱高手。佢利用別人嘅弱點，將佢哋變成一個心甘情願嘅幫凶。佢仲係一個天才嘅戰略思想家，政治觸覺敏銳。同希特拉一樣，佢關心身邊嘅人，無論佢哋嘅社會地位如何，佢都會記住佢哋個名、交談過嘅內容，因為佢知道如何等待時機。

1922 年 12 月中旬，列寧再次中風。22 日深夜，列寧健康狀況進一步惡化，右臂右腿癱瘓，但頭腦清楚，思維清晰，用口傳授咗一批畀黨嘅應屆代表大會嘅信。封信係專門談佢嘅戰友或接班人，分別係史太林、托洛斯基、季諾維也夫、加米涅夫、布哈林、李可夫等六人。記住呢 6 個人個名，佢哋並列為蘇聯共產黨主要嘅六名領導人。列寧喺信中有談到佢哋嘅優點，亦都指出佢哋嘅缺點。關於史太林，信中話：

1924 年 1 月（口誤），列寧去世後，原本呢封《給代表大會的信》嘅列寧遺囑係會公開。由於列寧係當時蘇聯嘅精神領袖，列寧嘅說話就係一切。如果佢對史太林嘅意見公開咗嘅話，史太林就一定做唔到總書記。所以加米涅夫發揮咗佢嘅調和能力，主導通過咗唔將遺囑公開嘅決議。及後，由於托洛斯基呢見唔對路，就發表咗《論列寧》與《十月的教訓》兩文，指出自己係同列寧並肩嘅領袖人物，以及直言不諱地批評季諾維也夫同加米涅夫喺十月革命之前嘅表現，呢個就令到自己更成為「三頭馬車」嘅眼中釘。托洛斯基認為，有必要喺世界範圍內進行不斷革命，斷言蘇聯嘅建設離唔開外部世界嘅援助，從而反對蘇聯實行「五年計劃」。托洛斯基主張工業專政，並且輕視農業生產，主張透過提高工業品價格，以提升生產力。

於是史太林等三人發表文章，稱「托洛斯基主義」並非真正嘅列寧主義。史太林仲表示「黨的任務就是要埋葬托洛斯基主義這一思潮」。原本手執蘇俄外交人民委員，再任蘇聯紅軍總司令，以為自己大權在握嘅托洛斯基，先被孤立，再係政治鬥爭中失敗，被解除軍權，之後再被開除出黨；1928 年更被流放，1929 年被逐出國，1932 年被取消蘇聯國籍。流亡期間，受到各進步團體嘅隆重歡迎。呢段期間一直進行著反史太林主義嘅活動，寫咗大量著作反對史太林，堅持同宣傳「不斷革命論」，亦即係大家成日聽到嘅「托派」。之後去到 1937 ~ 1938 年間，托洛斯基被足足三次缺席下被判處死刑。1940 年，托洛斯基喺墨西哥西家中，一個被佢當作朋友嘅蘇聯情報單位特務用冰斧殺害。後嚟隨著檔案嘅披露，證明呢次暗殺行動嘅指令，係由史太林親自發出。

另外，被列寧稱為「革命的金童」嘅布哈林任《真理報》主編，佢係主管蘇共意識形態嘅理論權威。1919 年 3 月，布哈林成為共産國際執行委員會委員。1924 年列寧死後，布哈林成為史太林嘅重要盟友，與托洛斯基嘅左翼反對派對抗。「一國社會主義」嘅構想，就係由布哈林提出，後嚟由史太林喺 1924 年實現。一國社會主義，即係單憑一國之力，足以建設社會主義過渡期，並以保存蘇俄國土安全，為最大嘅行政同軍事考量，而唔係托派嘅不斷革命。史太林支持布哈林嘅意見，延續新經濟政策，減少約束農民。而當日「三頭馬車」嘅另兩位加米涅夫同季諾維也夫就反對放大新經濟政策，並擁護世界革命嘅主張，佢哋形成「新反對派」。史達林充分利用中央權力打壓反對派。1927 年 12 月黨嘅第十五次代表大會後，托洛斯基、季諾維也夫、加米涅夫等人被先後開除出黨。1927 年年尾，蘇聯穀物短缺，史達林認為其為富農囤積嘅後果，並開始推出農業集體化政策，亦即係季諾維也夫、加米涅夫當初嘅主張。

之後 1928 年起，布哈林堅持蘇聯應以發展農業為主，建設成一個農業大國，發揮蘇聯嘅國際經濟比較優勢，大量出口農產品，反對史太林嘅國家高速工業化與農業集體化嘅主張，而受到史太林嘅批判。1928 年至 1929 年，布哈林與李可夫等結成聯盟，提倡富農「和平長入社會主義」，反對全面實行農業集體化。1929 年 1 月至 4 月，喺蘇共中央召開嘅兩次重要會議上，史太林嚴厲地批判咗布哈林等人。同年 11 月，史太林以「右傾投降主義集團」嘅罪名，整肅咗布哈林與李可夫，解除兩人喺蘇共中央政治局委員職位，同時又免去布哈林《真理報》主編嘅職務。大家無聽錯，史太林嘅立場可以話係不斷漂移，時左時右。不過，總之唔跟住漂移，就要收皮。

去到呢度，史太林幾乎已將所有當年列寧遺囑中提及嘅其他五名重要繼承者，即托洛斯基、加米涅夫、季諾維也夫、布哈林、李可夫，全數收皮，蘇聯內外已再無其佢政治人物可以與史太林分享權力。史太林全面掌權後，積極推行共產主義社會建設，以五年為周期推行全方位嘅經濟改革，呢個就係著名嘅「五年計劃」。而第一個「五年計劃」係喺 1928 年至 1932 年推行，其主要目標係發展農業集體化，簡單講即係共產咗成個農業，將小農莊合併成大型集體農場，推動現代化耕作方法。由 1929 年開始，集體農場嘅數目有五萬七千個，至翌年則增加至八萬幾個。此後，自 1931 年開始，國營集體農場數目一直維持至二十萬個以上。然而共產咗成個農業，農民、特別係富農就梗係反對啦。農民唔願將土地及農產品交予政府，以及唔願喺政府嘅控制計畫下進行生產。於是大批農民屠宰家畜、燒毀農作物，以免被政府充公，引致農產量嘅急劇下降。唯政府無視農民反抗，繼續推行第一個「五年計劃」，並對反抗者加以鎮壓。喺農業集體化代替新經濟政策嘅過程中，集體農莊嘅農民無法忍受農產品義務上繳中央嘅重擔，以「罷種罷收」嚟消極抵抗，糧食產量喺度下降，但出口嘅糧食逐年提高。目的係以獲取資金推進工業化。

如此作為之下，1930 ~ 1931 年糧食不足問題已經顯現出嚟。1932 年秋天，蘇聯國內廣大地區普遍遭受咗嚴重嘅饑荒。喺烏克蘭南部、伏爾加河中游等地區饑荒最嚴重。蘇聯官方對國內同國際社會掩蓋真相，以致使饑民得不到任何國際救援。而且大饑荒期間，蘇聯仍堅持向國外出口糧食。1932 ~ 1933 年烏克蘭出現大饑荒，當時極左嘅農業集體化運動導致烏克蘭糧食產量急劇下降，而喺俄羅斯西部同烏克蘭大部分地區出現嘅乾旱進一步加重咗饑荒嘅程度。

第二個「五年計劃」係喺 1933 ~ 1937 年推行，主要目標則由農業轉為發展重工業。史太林為煤、鐵、鋼等工業生產定下高額生產目標，並且下令興建發電站、礦井及油田，又改進運輸設施。結果喺短短數年間，工業產量有大幅度提升。以鋼產量為例，蘇聯喺 1938 年嘅鋼產量只僅次於美國，比英國同法國嘅產量總和高，位居歐洲第一、世界第二；同年蘇聯喺世界製造業產量嘅佔有率僅次於美國、德國及英國，位列第四；工業產量嘅提升帶動能源耗用量比同樣僅次於美國、德國、英國。

其後 1938 年開始嘅第三個「五年計劃」則集中發展軍事工業。史太林通過發展一啲同軍工業近似嘅民用工業，以為即將到嚟嘅戰爭作準備。1938 年開始，蘇聯嘅飛機生產較上年度增加一倍有餘，達七千五百架，翌年開始更保持喺一萬架以上。1940 年蘇聯嘅武器生產額僅次於德國，達五十億美元，已等同於英美兩國武器生產額嘅總和。之後蘇聯就成為繼美國同德國之後世界第三強工業國。不過，蘇聯因為集中發展對國防有利及國家有需求嘅重工業，而忽視生產日常消費品嘅輕工業之發展。人均工業化嘅成果，喺蘇聯龐大嘅人口下都被抵銷。相比起資本主義陣營工業較弱嘅國家，如意大利同日本仍猶有不及，更無法同英美等國相比，人民無法享受到工業化帶嚟嘅成果。

大家聽到呢到應該都覺得佢好痴線，完全唔理人民嘅死活，強行要個國家執行佢想做嘅野。不過更加痴線嘅陸續有嚟！1934 年 12 月，蘇共中央政治局委員、列寧格勒市委書記基洛夫被暗殺，史太林同蘇共中央政治局希望藉此作為消滅反對史太林個人專制統治嘅借口。開始時，史太林藉住偵查基洛夫被刺殺一案，開始清洗昔日老布爾什維克內嘅反派。首先已經失勢嘅季諾維也夫、 加米涅夫，佢哋先後被捕。而喺史太林嘅授意下，蘇聯刑法作出如下修改：罪無可恕、無須審判、即時槍決。

1936 年 8 月 19 日，第一次莫斯科審判嘅對象就係季諾維也夫、加米涅夫等十六名前反對派分子。罪名係佢哋喺托洛斯基指使下組織咗「列寧格勒總部」、「莫斯科總部」等地下反革命組織，陰謀暗殺史太林等黨同國家領導人，基洛夫被刺殺都係佢哋策劃嘅。呢啲被告 1936 年 8 月被判處死刑，立即執行。此後，清洗鎮壓嘅規模迅速擴大，全國掀起咗一場「揭發剷除人民敵人」嘅運動。1937 年蘇聯肅反運動嚟到高潮，受托洛斯基案牽連，布哈林以「人民公敵」嘅罪名被捕入獄，並被開除出蘇聯共產黨。1938 年 2 月，蘇聯成立咗特別軍事法庭，對布哈林、李可夫為首嘅「右派和托洛斯基聯盟陰謀集團」進行公開審訊，喺沒有證據、只有被告口供嘅情況下，法官以「叛國罪」判處布哈林等被告死刑。1938 年 3 月 15 日，布哈林同李可夫等人一併被秘密槍決處死。呢一場肅反運動令好多無辜者遭到逮捕同殺害，出現咗大量冤、假、錯案，嚴重破壞咗社會主義法制，令國家同人民造成咗巨大損失。當年著名嘅列寧遺囑中，提到咗六名蘇共領導人，最後除史太林外，其餘五個都喺三次大審判中被處決，托洛斯基就喺海外被刺殺。

此外，史太林咁樣大量清洗識打仗嘅人，直接令到佢睇第二次世界大戰開頭比納粹打到仆街。1938 年夏天史太林同佢嘅親信都意識到大清洗過頭，當年為史太林全力進行清洗行動嘅內政部長兼秘密員警首領葉若夫被解除職務，最後其本人亦成為被清洗嘅對象。史太林嘅同鄉貝利亞繼任為秘密員警首腦後，命令取消大多數秘密員警大規模活動，放棄咗死刑嘅應用，呢個就係大清洗結束嘅標誌。

影片嚟到最後，就咁聽完，大家都會覺得史太林絕對係一個魔鬼。但係點解佢都最終可以喺而家嘅俄國名人榜上排第三呢？史太林又如何殺晒識打仗嘅人之後，第二次世界大戰令到蘇聯戰勝納粹德國呢？之後史太林、邱吉爾、羅斯福三巨頭會面，太公分豬肉咁瓜分德國，之後共產鐵幕、冷戰如何形成，史太林嘅下場最後又係點呢？由於想講嘅於內容真係太多，以上內容全部都會喺...下一集再同大家講！會員後續精華會講返佢哋喺權鬥期間入邊嘅詳細嘅鬥爭經過，希望大家可以多多支持！今次條片就嚟到呢度，多謝大家收睇。鍾意我哋嘅影片不妨 Like、Share、Comment，記得 Subscribe 我哋嘅 Channel，撳埋隔離個鈴鈴。我哋已經喺我哋嘅網頁、Patreon 開咗會員系統，希望大家可以多多支持。我哋逢星期四出片、星期二可能出片，星期五夜晚九點鐘會喺 YouTube 直播，希望到時可以見到大家。我哋下條片再見，Bye Bye！