iPhone 13 駕到？！首批預載Windows 11手提電腦面世、aptX Lossless 無損格式料明年正式推出｜廣東話【Price Weekly #79 2021年9月 】

期待已久的Apple Event即將舉行，Apple正式宣佈將會喺香港時間9月15日凌晨一點，以網上直播的形式舉行第一場秋季發佈會。每年發佈會的邀請函都會有所暗示，今年也不例外，今次的宣傳海報是第一次以風景作為背景，仲係一個粉紅色的天空，中間就有一個螢光的Apple logo。有人就話意味住將會推出粉紅色的iPhone 13，又或者新的相機功能可以拍攝到螢光效果。

最估唔到嘅係，原來用iPhone係可以撳入呢個logo，仲有AR小遊戲玩。呢個螢光的蘋果就會出現喺你眼前，慢慢放大就可以睇哂成個風景同發佈會的日期，仔細啲睇仲會見到天上啲星星，所以有人就估iPhone 13夜拍將會大大升級，勁到連星星都影到。

集合之前的傳聞，iPhone 13的陣容將會同上代一樣，有4個型號。其中 Pro同Pro Max將會採用120Hz ProMotion OLED 熒幕以及加入Always On 模式，機身厚度有機會增加，鏡頭模組亦可能會加大。至於M字額則有望縮細，不過Touch ID就未必會有。

除此之外亦都有傳 iPhone 13 系列將會加入低軌道衛星通訊功能，意思即係當你喺緊急情況之下收唔到訊號，就可以透過衛星打電話或者send message。在處理器方面好大機會採用A15 Bionic chip以及加入WI-FI6E制式。而 13 Pro 就有機會取消256GB的版本，並以 1TB 代替，價錢可能會是有史以來最貴。

除了iPhone 之外，AirPods 3、Apple Watch Series 7或者iPad Mini 6亦都有機會登場。傳聞話第三代AirPods有機會加入心率監測、步數計等健康追蹤功能，但就冇主動降噪。而Apple Watch 就會有 41 和45mm 兩個版本，後者的屏幕有機會加大到 1.9 吋。

至於iPad就可能會採用更窄邊框，螢幕會由7.9吋加大至8.3至8.9吋。

仲有唔夠一個禮拜就到發佈會喇，我哋Price會為大家緊貼住最新的消息。新機到手之後就會即刻為大家評測。千祈唔好錯過喇。

Lenovo 在 Tech World 2021網上發佈會，推出了一系列針對商務用家的新product。而當中 Yoga Slim 7 Carbon 和 Yoga Slim 7 Pro將會是首批預載 Windows 11 的Laptop。

先睇下呢部全球最輕的14吋 Laptop Yoga Slim 7 Carbon。機身採用碳纖和鎂合金物料，只係重1.1kg、厚14.9mm，但同時通過 MIL-STD 810H 軍規標準，配備 4 個支援 Dolby Atmos 的喇叭。

規格方面，最高搭載AMD Ryzen 7 5800U 系列處理器，可以選配 NVIDIA GeForce MX450 顯示卡，提供最高 16GB LPDDR4x RAM和 1TB PCIe M.2 SSD，售價是1,290 美元，約HK$10,028。至於 Yoga Slim 7 Pro就比較著重效能，主要是在辦公室或屋企使用，機身重 2.1kg、厚17.4mm，以 Desktop Replacement 來說都算輕薄，配備了紅外線相機、智能消噪收音咪以及 Dolby Atmos 喇叭。另外採用 16 吋 QHD IPS 螢幕，最高搭載 AMD Ryzen 7 5800H 處理器以及 NVIDIA GeForce RTX3050 顯示卡，可以選配 16GB DDR4 RAM和最高 1TB PCIe M.2 SSD，售價是1,450 美元，約HK$11,000。

兩部Laptop下個月將會率先喺北美市場上市，暫時未知幾時喺香港推出。

跟住睇下家用遊戲機嘅消息，任天堂最新宣布OLED版Switch將於今個月24日接受預訂，10月8日正式發售。新款Switch設有白色底座和白色Joy-Con，機身大小同之前差唔多，但屏幕就加大至7吋。官方話會呈現更鮮豔的色彩和更高的對比度，內建64GB儲存空間，售價不變，都係賣$2,680，仲有經典的紅藍版本可以揀。

除此之外亦都有傳任天堂將會喺Switch Online加入 Game Boy 和 Game Boy Color 遊戲，並且會在短期內登陸。Switch Online係一個月費訂閱服務，而家有大約 80 款紅白機遊戲和 50 款的超級任天堂遊戲作品。訂閱咗嘅朋友就可以直接用 Switch主機玩呢D經典遊戲，不過嚟緊會有邊D新game加入呢？暫時都未有消息。

嚟到9月真係有唔少發佈會。Playstation 亦都喺網上介紹咗即將推出的遊戲陣容，其中幾款大作包括Gran Turismo 7、The City Where Play Has No Limits、God of War Ragnarök 都有宣傳片同埋更多遊戲畫面。雖然今次發佈會上就無提及 Pro 版的消息，但就有YouTuber 爆料話 PS5 Pro 正在噝開發當中，預料新機將會配備性能更勁的 AMD SoC 晶片，最高支援 8K 解像，將會喺 2023 或 2024 年推出，但售價就比PS5貴少少，要USD600 至 USD700，即大約HK$4,665 至 HK$5443。

下一件要介紹的Product就啱哂鍾意拍vlog嘅朋友仔喇。DJI 推出新一代的手機穩定器 OM 5，唔單止細咗、輕咗 亦都長咗，OM 5 比上一代輕了 25%，摺埋之後的尺寸更細咗三分之一，同隻手掌差唔多大，沿用多段式的伸縮設計，拉到最長可以去到215mm，取景更靈活、方便。除了延續DJI的三軸雲台增穩技術，今次的磁吸式手機夾亦有所升級，兼容到更多大芒手機。至於《DJI Mimo》的手機App就加入「拍攝指導」新功能，喺你唔知點拍嘅時候，佢就會幫你辨認周圍環境兼推薦合適的拍攝手法，仲可以用「一鍵剪輯」的功能即時剪埋片。而為了加強拍攝水準，OM 5亦升級了「ActiveTrack 4.0」，提供更精準的速度及反應。呢個手機雲台有雅典灰及日落白兩種顏色，售價為 HK$1,229，跟機會送埋磁吸手機夾及手持三腳架等。

同場 DJI 仲推出咗一款OM 系列用到的補光燈手機夾，有3種色溫同3段亮度可以揀，方便喺室內或者低光環境下拍攝，售價係 $369。

而家唔少串流音樂平台好似Tidal、Moov、Kkbox等都提供無損音質服務，不過近年相信好多人都用慣TWS耳機聽歌，想用藍牙聽無損歌曲，目前就只有支援LDAC編碼的耳機先做到。而日前 Qualcomm 就公佈咗一款新的編碼格式叫做aptX Lossless，可以話係 aptX Adaptive 的加強版。官方話呢個制式將會支援16-bit / 44.1kHz 無損 CD 音質，而傳輸率就高達 1Mbps，配合Qualcomm的無損壓縮技術，可以實現 bit-for-bit 音質。雖然就去唔到 24bit / 96kHz 音質，但點都靚聲咗，相信日後會有更多TWS耳機支援aptX Lossless，但最快都應該要下年先正式推出。

不少貓奴都會拍片紀錄主子的日常生活，甚至幫佢哋配音或者配字幕。日本一隻叫做麻糬丸的蘇格蘭摺耳「貓Tuber」最近成為了「YouTube 上最高收視的貓」。牠的youtube channel有超過142萬subscribers，截至 8 月 12 日，總播放次數超過 6 億。懶洋洋的睡姿、肥嘟嘟的身型，睇到都覺得治癒，唔怪得有咁多fans啦。呢個channel成立兩年左右今年曾經奪得日本國內竉物類別影片的第一位，麻糬丸上個月就比一間叫做 FREE 的經理人公司簽咗。除了youtube之外，牠的 Twitter 亦有 30 萬 followers。