德州嚴厲反墮胎法 懷孕6週禁墮胎 人人可舉報勝訴還能賺27萬 女性的生育權在哪裡？ 【TODAY 看世界】

大家好我係范琪斐，歡迎收睇范琪斐嘅《TODAY看世界》。我哋先簡單解釋吓《羅訴韋德案》。1970年，一位化名羅嘅女侍應指控德州「禁止墮胎」嘅法律侵犯佢嘅私隱權，之後上訴去到最高法院。1973年高院以7比2裁定德州限制婦墮胎權違憲，被視為重大里程碑。當時具有醫學背景嘅共和黨大法官布萊克蒙(Harry Blackmun)提出咗知名嘅「三孕期論」(trimester standard)。喺第一孕期、頭三個月就係胚胎，一旦脫離母體就冇可能獨立生存，所以婦女應該享有完整嘅墮胎自主權。第二孕期、四到六個月時胚胎逐漸成形，墮胎可能會傷害母體，州政府可以基於保護婦女身體健康為由限制墮胎行為。第三孕期、七到九個月，呢個時候個胎已經大到唔墮得。所以州政府可以採取必要措施黎保護胎兒嘅生命權。

「三孕期論」成為往後幾十年各州修定墮胎相關法律嘅重要依據，但美國嘅「撐墮派」同「反墮派」仲係一直爭論緊胚胎幾時先算有生命。贊成派覺得至少要到懷孕六個月或者離開呀娜個肚之後先算，但係反墮胎保守派就主張胚胎生到六、七週有心跳果時就算係有生命喇。半世紀以黎保守派時不時就喺各州發起「心跳法案」，顧名思義就係只要胚胎生到可以驗到心跳墮胎就係犯法。北達科塔州(North Dakota) 2013年率先通過心跳法案，但因為同《羅訴韋德案》相牴觸而被視為違憲。後黎好多州份都通過嘅心跳法案都多數俾法院廢除或者係冷凍擱置。除咗有侵犯人權嘅疑慮，大多數婦女發現自己懷孕果時都已經超過咗六週，根本就趕唔切墮胎。

德州墮胎法全美最嚴 全民當抓耙子擋墮胎

不過呢條鐵則而家俾人打破咗。德州共和黨州議會設計咗一份《德州心跳法案》(Texas Heartbeat Act) ，喺5月19日由共和黨籍嘅州長阿博特 Greg Abbott 簽名通過咗。法案同樣都係主張母體內嘅胚胎喺孕期第六週就會出現心跳，應該被認定為生命。所以只要超過六週，除非係出現緊急醫療需求，如果唔係，就算係因為亂倫、強姦、性犯罪而懷孕，都全部唔墮得。呢條堪稱全美最嚴厲嘅墮胎限制法案。但老實講，就算真係一定要尋求醫療專業評估，都趕唔切喺六週內拎到結果。所以呢個除非恐怕只係裝飾品，點睇都係零死角禁止墮胎法。但啱啱唔係提過呢種法案通常都唔會過嘅，德州今次就好高招，冇直接下令禁止六週以上嘅墮胎行為，而係允許所有人做抓耙子(告密者)。唔理係前前前男友、隔離屋老王或者完全唔關事嘅陌生人都可以喺州立法院對協助或者教唆墮胎嘅診所同民眾提出「民事訴訟」。如果勝訴就可以獲得至少一萬美元獎金，仲可以報銷堂費，就算敗訴都唔需要交罰款，鼓勵全民督灰，意思即係，我哋政府冇侵犯人權，係有人睇唔眼所以舉報你索償咋，我哋都冇計呀。

呢個方式就成功兜過咗以往「由政府出手禁止」嘅法律局限，都令想阻止法案嘅公民團體全部束手無策。而過去負責擋呢類法案嘅美國最高法院都喺9月1日半夜大限之前緊急表決，但最後以5比4嘅票數拒絕禁止呢項法案上路。投咗反對票嘅五位保守派大法官就包括咗美國前總統川普喺卸任前提名嘅艾米‧康尼‧巴雷特(Amy Coney Barrett)。但班法官就話唔出禁制令係因為技術問題，同立場無關。但我諗應該冇人會信啦。如果自由派大法官金斯伯格仲在生嘅話，點可能俾你咁樣判？

德州優生診所執笠 墮胎難民湧入各州

唔少民眾砲轟法案係將德州打回「羅前時代」，為咗避免官司纏身、影響生計，德州十一間墮胎診所只能夠停止六週以上嘅墮胎手術。喺法案生效前夕，德州一間診所塞滿大量等做手術嘅婦女、啱啱做完手術嘅女人，仲有好多塞唔到入黎嘅只能夠坐喺出面車度，俾反墮胎嘅民眾團團包圍。醫護加班到半夜，趕喺短短十七個鐘入面做咗六十七次手術。根據統計，德州有85%到90%需要墮胎嘅婦女懷孕已經超過六週，呢啲「墮胎難民」開始湧入隔離州。《紐約雜誌》報導路易斯安那州一間診所接電話接到手軟，醫護只能夠一次又一次安撫電話另一邊苦緊嘅婦女，你唔好喊住先，抖啖氣，我哋會幫你嘅，你冷靜啲先。受到颶風艾達侵襲，路州剩係得番一間墮胎診所仲有電可以開門，未來三四個禮拜都塞滿曬，仲要係第一次見醫生咋。

美國大部分嘅州政府規定墮胎必須要有一段「沉澱期」，俾孕婦諗清楚係咪真係有必要咁樣做同埋獲得充分嘅衛生教育資訊。有啲州仲規定你一定要去診所諮詢兩次先可以墮胎，成個流程唔快得。當然呢啲規定都係保守派搞出黎架啦。而家新墨西哥、科羅拉多、堪薩斯等州都被大量孕婦淹沒，奧克拉荷馬州嘅診所仲要緊急跨州調派醫生過去。

經濟條件比較好嘅女人都仲可以跨區墮胎，但最需要墮胎權保護嘅本來就係最窮、教育程度最低、最冇資源果班女性。呢啲女性好多都係靠打散工維生、收入微薄或者係請唔到假，有啲係單親媽咪自己湊仔，幾乎唔可能移動去另外一個州。呢啲孕婦最後就只能夠求助風險超高嘅「後巷墮胎」(back alley abortion)，即係非法墮胎。有醫生話，佢後生果時遇過三個青少女就係死於非法墮胎嘅感染性休克同器官衰竭。

目前大家都等緊睇其他保守州會唔會跟住用民事訴訟嘅方式將手伸入女人嘅子宫入面。令次德州用全民督灰嘅方式都令我覺得真係可以咁架咩？？女人大肚本來就係佢個人嘅事，而家唔止政府可以有意見，隔離屋唔關事嘅呀茂阿壽都可以有意見。而且明明係憲法保障嘅權益，竟然可以用一個法律技巧就避開咗，咁對法治槪念真係唔會有長遠嘅影響咩？

如果你鐘意呢個節目，快啲分享俾其他人睇，又可以訂閱LINE TODAY官方帳號，佢會每日將重要嘅新聞，包括呢個節目send去你電話度。萬一miss咗，去LINE TODAY嘅國際專欄度就有曬我哋嘅所有報導。范琪斐嘅《TODAY看世界》日日為你精選一單國際話題，帶你快速了解世界大事，我哋聽日見！