[阿富汗撤軍前傳] 西貢淪陷(Fall of Saigon)懶人包

首先講少少背景資料先，越南戰爭 — 簡單講就係由中共同蘇聯等國家支持嘅北越，對抗受美國等國家支持嘅南越，並發生喺冷戰時期嘅一場戰爭。係二戰之後美國參戰人數最多嘅戰爭，影響極為深遠。美國喺越南戰爭入面不堪消耗，所以逐步將軍隊撤出越南，最終北越擊敗南越，並且統一越南。最先開始援助南越嘅，係美國總統係艾森豪威爾，之後從甘迺迪開始支持越南作戰。甘迺迪死後，副總統詹森繼位，將戰爭擴大。不過迫於國內不斷反戰嘅運動、前線戰事嘅傷亡，同埋同蘇聯長期對抗嘅需要，所以喺 1969 年上任嘅美國總統尼克遜，佢嘅政策係盡快喺越南抽身。之後就同北越談判，即係喺 1973 年 1 月 27 日簽訂嘅《巴黎和平協約》，談判結果就係美軍撤出南越，同時北越唔好打過南越；而且承諾南越，如果北越打過嚟嘅話，美軍會派兵幫拖。隨後兩個月內，駐越美軍全部撤出南越，只係留返低海軍陸戰隊使館衛兵等小規模嘅部隊。喺駐越南美國大使館入面，同時推行「越南化」政策，美軍提供錢、裝備、訓練，打仗就係用亞洲人打亞洲人嘅「新亞洲政策」，大大減少美軍傷亡。喺撤軍初期，即1973 ~ 1974 年，北越都無乜動作，因為佢哋都驚如果佢真係進攻南越嘅話，尼克遜會還拖。

不過去到1974年秋天，總統尼克遜受到國內「水門事件」影響，之後仲辭埋職，由副總統福特繼位。北越嘅越南共產黨就趁機試吓水溫，睇吓新總統福特有無尼克遜咁強硬。喺好多唔同嘅小動作之後，北越發覺福特無乜反應，所以就決定喺1974年年尾大舉進攻南越。同時間，美國國會唔願意再批錢畀美軍去越南出兵救人。而喺呢個美國國會入面，就有一位新晉嘅參議員，嚟自德拉維爾州嘅 Joe Biden — 拜登嘅競選政綱主要集中從越南撤軍，佢當然有份決定唔批錢畀美軍救越南人啦。之後北越就放心繼續強攻南越，而美國扶植嘅南越政權，又同而家嘅阿富汗政府一樣極端腐敗，都係貪污舞弊到不得了，完全抵抗唔到北越嘅攻擊。然後每一次嘅行動升級，美國都無回應。去到 1975 年 4 月，北越共產黨已經去到十分接近西貢嘅位置，之後正式開始講西貢淪陷。

咁西貢就梗係唔係講緊香港個西貢啦，而係講緊而家越南嘅胡志明市。當年南越嘅首府，喺北越大軍壓境嘅情況底下，除咗諗撤退之外，另一個問題就係問 — 邊個可以走？邊個要留？喺呢個時候，成個越南大約有 5 千 ~ 7 千個美國人，係美國政府派過去做嘢嘅，例如 CIA、大使館職員、一啲基建設備嘅承包商、維修飛機人員等等。同時間有好多人，因為長期逗留喺越南，已經喺當地結婚生仔。當時嘅美國大使館大使，叫做 Graham Martin 葛雷恩馬田。佢之前喺越南作戰嘅時候，喪失咗一個養子，所以佢可以話係極度憎恨北越共產黨。

同時間，南越嘅人民亦都十分之懼怕北越共產黨。因為喺整個越南戰爭入面，佢哋嘅行為真係極度兇殘，只要你有少少社會地位，例如老師，都會被視為反共分子，然後被處決，有啲甚至會被活埋。所以喺呢個心理恐懼底下，數以千萬計嘅越南難民向南進發，尋求庇護，希望逃離共產黨嘅魔爪。甚至喺峴港，即係畀西貢較北嘅地區，喺較早時間淪陷嘅時候，出現咗今日阿富汗人爬上飛機然後墮下嘅一幕 — —

「高度上升了之後
We're pulling up with me

舷梯上的人掉了下去
People are falling off the air stairs !

飛機起飛了
The plane is taking off」

所以當時只要係向南開嘅船、飛機，都會圍住想出走嘅越南人。據統計，當時大約有 50 萬名難民擁向西貢，而喺呢啲難民背後嘅，就係16萬名武裝嘅北越軍人。當時北越軍隊大約只需要多一個月時間就會到達西貢，而大使館本身制定嘅緊急撤離計劃，當中只係提到 6 千名喺越南嘅美國人可以撤離，但係南越人唔可以同佢哋一齊離開。其實當地有好多南越人同美國都有關係，人數大約 15 ~ 20 萬，當中包括幫美國做嘢嘅南越政府嘅當地僱員、通訊社僱員、承辦商職員，仲未包括佢哋嘅屋企人。呢啲人，如果佢哋離唔開越南嘅話，就一定係首當其衝遭到共產黨迫害，但係當時南越軍隊已經超過一半瓦解咗。不過美國大使馬田去到呢一刻仍然覺得佢可以搞掂呢件事，無設定撤離嘅計劃 — —

「如果你問的是
If you mean, "Is South Vietnam

南越是否在坍塌的邊緣
on the imminet verge of collapse ?

我認為回答一定是 : 不
I think the answer is quite definitely no」

之後見到情況完全唔對路，大使館嘅年輕官員開始動員一個隱蔽嘅計劃。佢哋利用靈活嘅貨機，喺大使館嘅雷達偵測唔到嘅情況底下組織自行嘅撤離計劃。當時佢哋嘅行動暗號係「我哋去燒嘢食」，意味住要去一個特定嘅地方，要帶埋屋企人同埋一個行李箱，去開 party，而呢個 party 就係呢啲大使館職員送當地嘅越南人離開越南呢個秘密行動。本質上係完全違反咗大使館嘅規定，所以如果呢啲大使館職員畀人捉到嘅話，佢哋有機會被美國驅逐出境，而呢啲官員當然完全知道風險。不過對佢哋嚟講，呢個唔係合唔合法嘅問題，而係正唔正確嘅問題，最終呢啲被救嘅人，全部都係喺無任何批准、任何移民文件、護照，乜都無嘅情況底下，成功去咗菲律賓。最終畀美國大使馬田知道咗之後，一怒之下炒咗好多有份組織呢啲撤離活動嘅人。不過好彩嘅係，呢啲臨時空運計劃仍然繼續有運作，無視呢個馬田。

而喺呢個時候，北越共產黨已經成功侵佔比西貢更南嘅城市，令西貢即將面臨兩面被夾攻。而南越軍隊嘅物資出現咗嚴重短缺，唔單止係炮彈，連最基本嘅鐵絲網、袋沙嘅袋，甚至係崩帶都出現短缺。同時，美國國會唔肯再批錢畀美軍，所以唔會再有軍隊、錢同物資提供，令情況雪上加霜。平時唔係好講粗口嘅總統福特，私底下都忍唔住話國會班人係「Those sons of the bitches」。

去到 1975 年 4 月 18 日，喺越南對出嘅南海有 50 艘船等待撤離嘅美國人。而邊個可以走？其實大使遲遲唔訂出撤離計劃底下，係無明確嘅人名單，所以你能唔能夠走就好講關係喇。但係當個情況去到呢度，就會有好多騙子冒充係一個美國大使館內部嘅人，收你一筆錢，約你邊日喺邊度等，話你聽你有得走，但係結果當然係去到咩都無啦。

去到 4 月 29 日，原本可以畀大型載客飛機升降嘅新山機場，都被北越軍隊攻擊，最後只能夠用大型直升機慢慢逐少逐少咁運走啲人。但係美國大使馬田仍然充耳不聞，唔信個情況咁惡劣，成班都九唔搭八，你慢慢陪佢捉鬼吖，我返屋企沖涼呀。佢決定親自揸車去睇一轉，之後佢終於了解到真相，原來去軍事機場嘅路，已經畀北越軍隊打爆晒，呢…睇死你返轉頭。對唔住呀，頭先語氣重咗少少，唔好意思！最終佢同總統福特通完電話之後，就決定真係要撤離。

之後喺 4 月 30 日朝早，美國大使馬田收到電報，通知佢哋美國大使館要喺 24 小時內關閉，同時亦都意味住呢 24 小時係佢哋最後離開嘅機會。喺呢個時候，基本上成個西貢嘅人都想衝入去美國大使館，希望可以趕上尾班車逃離共產黨。經典嘅一幕 — 直升機喺 CIA 辦公室嘅頂樓降落，啲人就沿住建築物爬上去頂樓，隨時準備上直升機走人。好多人見到呢一幕以為係大使館，其實原來係 CIA 嘅辦公室，可見當其時係非常之混亂。而逗留喺美國大使館入面嘅人，人數十分之多，有差唔多成 3 千人迫喺入面。有美國士兵講過，其實有好多人係好需要走，例如幫佢哋製造制服，以外嘅便服嘅裁縫，同埋佢哋嘅屋企人，甚至幫佢哋煮嘢食嘅廚師，同埋佢哋嘅屋企人。呢度有個小插曲，越南大使館入面有棵大樹，美國大使馬田成日都拎呢棵樹嚟做比喻 — 代表住美越之間堅定不移嘅承諾。不過去到呢一日，當地 CIA 阿頭就同美國大使 Martin 講，我哋要斬咗呢棵樹，因為要畀大型直升機降落。所以，美越之間堅定不移嘅承諾，亦都隨住呢棵樹而倒下。之前一直無斬呢棵樹嘅原因，係因為唔想畀人知佢哋有撤離計劃，以免造成當地恐慌。另外就係要燒文件，因為如果係咁燒文件嘅話，就會好大煙，同時都會畀人知道佢哋係想撤離，就好似之前中國駐侯斯頓大使館咁。

另外就係美國大使館入面有超過價值 100 萬美金嘅現金，本身用嚟出人工畀當地嘅越南人，最後都係要即日燒晒。當日有唔同嘅戰艦，原本係用嚟保護、監視住會飛去航空母艦嘅直升機。但係突然之間啲直升機喺佢哋架戰艦上面徘徊，佢哋諗會唔會係敵人嚟呢？但係由於佢哋喺上面盤旋得太耐，之後就搵啲識越南文嘅軍人，同呢啲直升機聯絡。之後先發現，原來佢哋係想逃離越南嘅越南人，呢個戰艦嘅艦長心諗，如果我救到一架直升機，就可以救到入面 15 ~ 20 個人，所以就畀佢哋喺呢架戰艦上面降落。救完呢十幾個人之後，先發覺原來佢哋全部都係南越軍隊嘅高級官員。

之後佢哋救完一架之後，發覺仲有六、七架直升機喺佢哋個艦上面盤旋，等待著陸。但係由於甲板得一個，只可以畀一架直升機降落，為咗可以畀更加多直升機降落，佢哋就要將已經降落咗啲直升機，直接推落海 — 一架接一架咁推落海。當中都不乏一啲驚險場面，例如有一架巨型嘅直升機，同樣都係搵緊戰艦畀佢降落，但係由於機身太大，架戰艦唔夠位畀佢降落，如果夾硬嚟嘅話，應該係會爆炸冚機剷。本身架戰艦就諗住呢架直升機會去搵另一架船降落，但係隔咗一陣之後，呢個係直升機都繼續喺佢上空盤旋無走到。之後喺通訊設備傳嚟一個壞消息，就係呢㗎直升機就嚟無油，最癲嘅事情終於發生！船上面嘅人，見到呢架直升機左側門打開咗！入面嘅乘客一個一個咁跳落海，再游埋架戰艦度，有啲更加係個阿媽，抱住個手抱嬰兒跳落海。最大個問題嚟喇，個機師點樣走呢？最終搞咗一輪之後，佢將架直升機 (口誤) 向右旋轉，然後從左機門跳出，成功逃出生天，當中嘅過程可以話係驚險萬分。

返返去大使館先，救援嘅直升機陸陸續續以每 10 分鐘一㗎咁飛去大使館，成功入到大使館嘅越南人，就分批咁迫入直升機。由於當地嘅美軍想盡量救得幾多越南人，就救得幾多個，所以每一架直升機嚟到幾時候，佢哋只係上一兩個美國人，然後盡量上晒越南人。但係因為來回次數太多，基本上連飛機師都係筋疲力盡，同時亦都造成越嚟越多人，想衝入美國大使館。不過最終佢哋都只能夠見住一架一架嘅直升機飛離越南，直到 5 月 1 日朝早 7 點 45 分嘅最後一架直升機離開。

同時間，北越軍隊已經攻入西貢主要街道，南越士兵最後只能夠除低軍服，真係誇到就咁著住條底褲 — 為嘅就係唔畀共產黨認到佢係南越嘅人。越戰最後嗰幾日，大約有 13 萬人要出逃，最後走唔到要留低嘅人，大部分送咗去再教育營，好多人死於疾病或者飢餓，仲有啲不知名嘅被槍決。

今次阿富汗事件，大家都應該感受到歷史不斷重演 — 同樣打咗 20 年仗都毫無寸進，同樣扶植咗一個貪污腐敗嘅政權，同樣輸咗畀恐怖組織。重點係轉咗總統之後，恐怖組織就係因為新總統嘅無能而肆無忌憚。不過今次再嚴重啲嘅係更加少嘅人被救出，同埋以拜登為首嘅美國政府一方，相比起當年嘅福特總統更加不負責任咁撤離。今次條片就嚟到呢度，多謝大家收睇。鍾意我哋嘅影片不妨 Like、Share、Comment，記得 Subscribe 我哋嘅 Channel，撳埋隔離個鈴鈴。我哋逢星期四出片，星期二可能出片，星期五夜晚九點鐘會喺 YouTube 直播，分享時事、政治。我哋已經喺我哋嘅網頁開咗會員，希望大家可以多多支持，我哋下條片再見，Bye Bye！