日本疫情還在燒！單日確診每天破2萬 奧運才結束帕運這時候開幕 真的沒關係嗎？

當地政府都因為呢單野緊急召開會議，拍板決定喺千葉大學附設醫院，增設COVID-19確診孕婦嘅專用病床，無條件收所有病況危急嘅確診孕婦。日本婦產科醫生學會就喺23號推出確診孕婦嘅就醫指南。如果確診孕婦喺屋企養病期間出現呢啲症狀就要即同婦產科醫生或者診所聯絡。
一小時內難以呼吸嘅狀況出現兩次以上
心跳每分鐘110次以上
血含氧量介乎喺93-94%，靜養一個鐘內都冇好轉
如果抖唔到氣到連簡單對話都唔得，血含氧量跌到92%以下就要即刻叫救護車。

好似呢名孕婦咁喺屋企養病期間隱性缺氧嘅患者其實好多，所以近期日本有唔少地方政府都決定要增設「氧氣站」。但咁樣係唔會完全解決到問題。最早喺今年2月就推出氧氣站嘅神奈川縣官員阿南英明醫師表示「氧氣站」係緊急醫療措施，只有喺醫療機構冇多嘅病床可以照顧確診者先會需要「氧氣站」，以空間黎換取時間。但從醫生嘅角度黎講，冇人會想演變成必須要設置「氧氣站」嘅局面。阿南英明醫生都擔心而家喺所有地方都開「氧氣站」會令民眾誤以為有咗「氧氣站」就冇問題。其實開「氧氣站」係需要醫護人員24小時從旁待命。而家疫情嚴峻，要另外揾到可以輪班嘅醫生或者護士係唔容易架。「氧氣站」真係最後嘅選擇。

日確診每天破兩萬例 政府：非東奧加劇疫情

呢啲事都突顯出日本而家嘅疫情已經進入醫療資源不足嘅階段。日本嘅疫情從東奧開始之前就好嚴重。搞完東奧之後，就算各地陸續發表緊急事態宣言，但係每日嘅確診數字都係冇減過，一日多過一日，而家已經每日過2萬單。一直都有聲音質疑東奧係唔係加速疫情散播嘅原因。不過對呢個講法，奧委會同日本政府都一口咬定東奧同疫情冇關係。真係咩...日本政府敢咁樣一口咬定，係睇東奧泡沫有冇破裂。根據日本國立感染症研究所20號公布嘅最新報告賽事期間確診嘅東奧相關人士有453宗，其中運動員只有80宗，得18%，剩低嘅82%都係大會相關人士。如果再用確診者嘅居住地黎睇，東奧相關嘅呢453宗入面，得147宗，即係1/3係境外移入，另外2/3都係本黎就住喺日本境內嘅工作人員。東奧期間唯一一單群眾聚集嘅感染都剩係得希臘嘅韻律泳隊。就咁睇黎，東奧相關人士嘅感染又真係唔似大家一開始擔心嘅，境外移入選手傳俾日本人，而係日本境內本土傳播傳番俾自己人為主。

雖然係咁，仲係有好多聲音認為就算東奧同日本疫情冇直接關係，都間接有關，包括相當於日本政府專家會議嘅COVID-19分科會會長尾身茂。尾身茂喺東奧前夕就一直呼籲日本政府舉辦奧運同要求民眾在家「自肅」係好矛盾嘅事，領導人傳遞俾人民嘅資訊一定要有整體性。東奧賽事期間尾身茂接受眾議院嘅諮詢果時都話，佢哋專家覺得搞奧運或多或少會影響到人民嘅諗法，間接令疫情擴散。

佛系「自肅」擋唔到病毒 帕奧加強防疫措施

或者係因為民眾對於東奧間接造成疫情擴散嘅主觀感受好深，所以即將喺今日舉辦嘅帕拉林匹運動會(殘疾人奧林匹克運動會)嘅防疫對策比奧運又嚴咗。原本日本境內嘅大會相關人士剩係每4日檢測一次就得，而家只要係會喺選手村出沒嘅日本人都要日日檢測。原本每一日驗一次嘅大會相關人士就變咗每4日驗一次。為咗帕運而入境日本嘅相關人士原本只要喺「奧運泡沫」入面停留夠14日就可以喺日本境內活動，但而家14日完咗之後都仲要喺「泡沫」入面生活。對比之下，國際奧委會主席巴赫喺東奧閉幕式嘅隔一日出境前仲可以去銀座散步真係開心。奇怪嘅係雖然絕大多數帕運嘅防疫措施都嚴過東奧，但就有一樣例外。今次帕運雖然同奧運一樣採取冇觀眾嘅比賽模式，但就開放俾學校帶學生集體去現場睇比賽。

Delta變種入侵日本之後，睇黎剩係靠日本舊年到而家一直頒布「緊急事態宣言」呢一招已經控制唔到疫情，令日本境內又再開始討論係咪應該「封城」。啱啱提到嘅尾身茂就呼籲要立法推出具有實質強制執行力嘅防疫對策，至少要有一條可以限制個人外出嘅法律。如果唔係，喺「緊急事態宣言」期間就只能夠「拜託」民眾冇事就唔好出街，或者要求商場舖頭開少幾個鐘舖，聽落好佛系囉。

但日本首相菅義偉喺上個月30號嘅記者會講到明「日本唔習慣封城，歐洲國家就算封城都解決唔到疫情，最後咪又係靠打針黎迴避議題」，主要都係擔心封城會影響經濟。但黨嘅眾議院議員下村博文就質疑唔可以用「日本唔習慣封城」黎迴避問題，將所有希望都寄託喺疫苗上都不切實際。萬一疫苗對抗唔到更新嘅變種都係問題。

今日呢單新聞真係睇到我勁心急，而家咩時候呀，仲傾緊「習唔習慣封城」，真係要嘅幾唔習慣都要封啦！再極端啲講，疫情對每個國家嘅考驗都係要揀病死定餓死，就係要壓縮經濟黎防止疫情擴散，定係為咗救經濟負擔疫情擴散嘅風險。每個政府都係喺度拉据緊，但各國民情都唔同，同樣嘅政策執行上都唔一樣，有時真係好似抽籤咁。希望日本可以快啲控制住疫情。今日我想請大家黎做吓事後孔明，你覺得奧運喺疫情期間搞到底啱唔啱呢？如果你鐘意呢個節目，快啲分享俾其他人睇，又可以訂閱LINE TODAY官方帳號，佢會每日將重要嘅新聞，包括呢個節目send去你電話度。萬一miss咗，去LINE TODAY嘅國際專欄度就有曬我哋嘅所有報導。范琪斐嘅《TODAY看世界》日日為你精選一單國際話題，帶你快速了解世界大事，我哋聽日見！