外國人說 'HI, how are you?' 並不是真的想問候你!? 如何用英文正確地打招呼!!

相信對大家嚟講，"How are you？” ”I’m good, and you？” 同埋 "I’m fine, thank you." 都必然係細個嘅時候英文堂最早教嘅一個對答。的而且確，當你喺外國公司做野、留學或者移居英語國家生活都必然會發覺你每日講 "How are you？” 嘅次數同 "Hi" & "Bye" 一樣咁多。因為絕大部份時間 "How are you？” 根本就係等如say hi，西人經常掛係口邊嘅 "How are you？” 根本就冇字面上面向你問好嘅意圖。

外國人好習慣用 "Hi, how are you？” 作為開場白，但係全句其實只有 "Hi" 嘅意思，而 "How are you？” 大多時都冇咩特別意義，就好似「今日天氣好好」或者「你食左飯未？」一樣，根本就冇想同你討論今日嘅天氣或者想知道你食過飯未嘅意圖。喺日常生活入面無論係超市收銀員、麥當勞職員、電話客戶服務熱線，以至街上隨便一個唔相識嘅陌生人，只要一開口嘅第一句說話通常都係 "Hi, how are you？” 或者同一個意思嘅句子。咁實際上要點樣對答呢，我就大概分成咗兩個情況之下各有兩個回答方式。情況一係面對陌生人，例如係銀行職員或者商店嘅售貨員，如果你好趕時間就只需要答 "I'm good, thanks." 之後就隨即進入你個話題走可以喇。第二種對答係，如果你唔係好趕時間或者個舖頭入面冇太多其他嘅客人，你就可以多反問一句，回應番 "I'm good, how are you？" 對方就通常會答番你 "I’m good, thanks.”之類，之後就可以正式開始你哋嘅對話，如果情況許可有時又真係可以吹幾句。

至於情況二就係互相認識嘅人，例如係鄰居、同事、朋友，要點樣答真係要視乎情況，如果係每日或者經常都見嘅人，例如係番工嘅時候見到同事，依個相信都只係say hi嘅意思。因為大家係識嘅，所以用番頭先所講問番對方 "how are you？" 嘅方式就會比較有禮貌。其次就真係朋友想關心你，問問你嘅近況，依個通常都係發生喺一段時間冇見，長假期之後，或者知道你近來發生左一啲事，咁依個隨心對答就可以喇。不過如果係出於關心嘅問題通常都會有一啲延伸，例如係"Hi, how was holiday？” 或者想問候下你屋企嘅小BB "Hi, how is your little one？”

至於可以點樣用另一個方式問同埋答 “How are you？” 呢？雖然依個唔係英語教學頻道，而且又經常俾網友取笑我嘅英文發音，但係我都拋磚引玉，姑且舉一啲例子俾大家參考。首先正如好多人咁講，喺一般嘅情況之下都唔會再講 “I am fine” ，一來就太過正規同埋拘謹，二來感覺上就有啲負面，取而代之嘅通常都會講 "I'm good.” “I am well.” “I’m alright.” “I am OK.”，長一啲就可以講 "I am doing well"，再複雜一啲就有 “I’ve never been better.”。如果真係過得麻麻地講唔出 “I’m good.” 就可以試下講 "So so” “Not too bad.” 或者 “Could be better." 等等。

至於點樣用另一個方式去問 "How are you？” 喺唔同處境都有唔同嘅問法，但如果係應用喺打招呼嘅情況，最常見嘅係 "Hi, how’s it going？” “Hi, how are you doing？” 或者 "Hi, you all right？”。另外坊間好多人都會教唔好再講 "How are you？”，理由同樣係話講 "How are you？" 太過正規，已經冇乜人再用。的確以前喺美國公司做野嘅時候就真係冇人講 "How are you？" 但係嚟到澳洲之後又發覺喺依一邊仍然係好流行講 "Hi, how are you？" 起碼我生活嘅南澳係咁樣，相信依啲都係視乎地區而定，唔可以一概而論。

最後分享一下個人經驗，喺離開香港之前我喺充滿住外國人嘅公司做咗超過10年野，初時真係以為啲西人同事咁熱情，每日朝早第一句就關心你嘅近況，每日都會同你講 "How are you？" 果時仲真係會將自己嘅心情長篇大論咁樣講晒出嚟，依家諗番轉頭都覺得有啲尷尬，但喺後來觀察多咗西人之間嘅對答，先至慢慢明白佢地講 "How are you？" 或者 "How’s it going？" 都只係禮貌上嘅問候語，但係大家始終都係識左好多年嘅同事朋友，有時佢地又真係字面上面嘅意思想問下你嘅近況，不過以前嘅同事來自五湖四海，英美澳加紐都有，佢哋嘅打招呼習慣都有啲唔同。一個有趣嘅發現係，喺依個處境之下，來自唔同地方嘅英語母語者嘅講說話方式久而久之都會有唔同程度嘅美國化，其實我同啲西人一齊緊密咁樣工作咗10年之後，每次面對 "Hi, how are you？" 都仍然係有啲怪怪既感覺 ，不過依家喺外國生活咗一段時間之後先至慢慢習慣依種打招呼嘅方式。好喇！今日條片就嚟到依到，之後有機會再同大家分享下喺日常生活入面點樣say goodbye。最後老土啲都要講，英文如果有英語生活嘅環境就真係容易啲學得好，大家又有冇遇過一啲英文對答嘅趣事呢？