甚麼是 FBI 聯邦調查局? 與CIA中央情報局的分別?

FBI 全寫係Federal Bureau of Investigation，中文就真係可以直譯為聯邦 調查 局。喺FBI嘅官方網站上面佢哋嘅簡介喺咁樣寫嘅；聯邦調查局係一個以情報主導，集中於威脅國家安全，職責兼具情報收集同埋執法嘅部門，係隸屬美國司法部嘅主要執法機關，同時亦都係美國情報體系嘅成員。聯邦調查局有權力同埋責任去對特定嘅罪行作出調查，並為其他嘅執法機構提供合作服務例如指紋辨識、化驗同埋培訓。聯邦調查局會為自己同埋合作夥伴嘅調查去收集、分析同埋共享情報，從而更好咁樣了解同應對係美國面臨嘅安全威脅。

從依段文字就大概可以了解到FBI同時係司法部嘅執法機關同埋情報部門，主要針對國家安全同埋特定嘅罪行，但係職能上同州警察或者CIA 中央情報局又有咩分別呢？要完全明白依一段文字，就必先要理解兩個美國政治架構相關嘅概念。 「聯邦執法部門」同「美國情報體系」。

要知道乜野係聯邦執法部門，我先會用最皮毛嘅角度去解釋一下構成美國嘅聯邦制。美國係一個由50個州組成嘅聯邦國家，可以理解為50個小國共享主權而成嘅國家，各個州政府都係一個政治實體。由行政、立法，到執法都有一定程度嘅自主權，範圍包括治安、教育、醫療、交通同基建等等。所以各個州都有各自嘅州警察、市警察作為執法部門去執行地方法律，亦因為咁，係美國某一啲事情喺某一啲州係合法，但係其他州就係非法；例如其中9個州就實行緊娛樂用大麻合法化。而憲法同時授權聯邦政府處理全國性事務；例如係對外貿易、國家安全、邊防管制等。聯邦政府嘅行政、司法、執法部門嘅職能，理論上就同州政府並唔重疊。

所以聯邦政府亦都有自己嘅執法調查部門去執行聯邦法律。喺美國就有幾十個專門負責唔同範疇嘅聯邦執法部門，主要隸屬於司法部同埋國土安全部，其次嘅就包括內政部、國防部、國務院、商務部，甚至係教育部等，而FBI就係美國司法部嘅主要執法部門。除咗恐怖活動之外仲專責處理聯邦法律入面嘅200幾項聯邦罪行；例如係網絡犯罪、洗黑錢、販毒、兒童色情，以致賄賂運動員等。有時亦都會負責處理某啲地方罪行或者州警察唔能夠處理嘅案件，例如喺跨州謀殺或者械劫案。

FBI嘅另一個主要職能就係負責美國國內嘅情報收集工作，聯邦調查局情報處係美國情報體系入面嘅17個情報組織之一，同樣地「理論上」各個情報部門都有專門負責嘅範圍。除咗FBI之外，當中最為人知嘅美國情報組織當然係CIA 中央情報局。咁你又可能會問，究竟FBI同CIA又有咩分別呢？同樣以最皮毛嘅角度去解釋，FBI就係專門負責國內嘅情報工作，而CIA就係處理國外嘅情報。其次係FBI係法定執法部門，可以按法律賦予嘅權力對指定嘅聯邦罪行同國家安全案件作出刑事偵緝同埋拘捕行動，至於中央情報局就單純係收集情報嘅機構，並冇執法嘅權力。順帶一提，喺2016年懷疑俄羅斯干預美國總統選舉嘅事件入面就突顯出兩者嘅分別。

CIA就單純按情報角度出發對Trump作出指控，而FBI就以法律原則去提出異議。至於乜野係CIA，我會另外做一條片同大家再分享。好喇，今日條片就嚟到依到。可能因為電影同流行文化嘅渲染或者美國政府嘅透明度，關於FBI嘅都市傳說或者陰謀論由外星人去到刺殺外國政要包羅萬有，大家又對FBI有咩印象呢？