女巫真的都很邪惡嗎？歐洲近代最變態的集體運動，一本書引起的血腥殺戮！

正文開始之前，瑞森要糾正一個錯誤。一提到女巫，通常都要同歐洲中世紀畫上等號，嚴格黎講係唔準確嘅。喺歐洲基督教嘅歷史上，雖然針對巫術嘅指控同審判從歐洲古代同中世紀早期就已經開始咗，但係中世紀嘅教廷其實係唔承認女巫嘅存在嘅。首先大家要明白一個問題，女巫係咩黎。槪括黎講，女巫係掌握住超自然力量嘅人，但係喺教廷嘅觀念入面，掌握超自然力量嘅只可以係且必須要係全知全能嘅上帝。而家突然有班人出黎話佢都有咁嘅力量，吓？唔通你哋想同上帝分權？所以教廷係唔承認女巫嘅存在嘅。而且好似巫術呢一類嘅觀念嘅起源就係黎自地方嘅迷信，而教廷為咗維護自身嘅統治更加喺呢個過程入面扮演咗一個消除各類迷信嘅急先鋒角色。所以中世紀果時就有一幕神奇嘅畫面，地方嘅百姓拎住火把面色嚴肅地圍住一位女性講，呢個人係女巫，我哋要燒死佢，宗教裁判所嘅人就急急腳衝上前話，大家冷靜啲，女巫根本唔存在架，咩魔法都係假架。所以喺呢個時候，如果俾人污衊係女巫，直接向教養院求助就得架喇。而呢一個時期嘅教廷仲禁止捉女巫、審判女巫。凡係敢自稱女巫獵人嘅都應該處死。如果你作死自稱女巫搞呢搞路，就等住俾主嘅聖光消滅啦。

咁我哋認知中嘅教廷燒死女巫係咩時候呢？大多數學者認為係1450到1750年間，亦即係歐洲中世紀末期同近代初期。真正嘅高潮大約喺1550到1650年之間。剩係呢一世紀就差唔多有五萬人死於非命。關於獵巫運動興起嘅因，外國學者從社會轉型、文藝復興、啟蒙運動、小冰期嘅宗教改革、戰亂頻繁、基督教對異端嘅迫害等多方面進行解讀，到今日都未得出一個有共識嘅結論。

而瑞森用盡九牛二虎之力查咗大量文獻之後終於係疊紙入面總結出一句說話：「班大佬都講得啱」。唔係瑞森唔講原因俾大家聽，係歷史背景實在太過複雜，剩係講原因都夠瑞森講一期。為咗防止俾人話我灌水，就暫時唔多講喇。大家剩係需要知道1450至1750年間有大規模獵巫呢件事就得喇。如果真係有人係都要問你點解，就將之前講嘅從社會轉型、文藝復興、啟蒙運動、小冰期嘅宗教改革、戰亂頻繁等等掟俾佢就OK架喇，就好似我掟俾大家一樣。

講番正題，到咗15世紀未期，教會對巫術嘅睇法已經由原本嘅唔相信轉咗做認為巫術存在、而且係邪惡嘅。呢個觀點仲得到好多神學家嘅支持。當然啦，仲有一部分教會係否認巫術嘅存在嘅。好明顯，我哋一開始提到嘅裁判長克雷默就堅持認為巫術存在而且係邪惡嘅。為咗證明自己嘅觀點，佢開始發揮自己天馬行空嘅想像力，於是為歐洲女性帶黎無盡痛苦之書，出版咗《女巫之鎚》。

喺書嘅開頭，佢就明確地同讀者講，所有女巫都係異端，仲詳細列舉咗女巫係點樣同魔鬼交配，點樣縱慾食人，點樣騎住掃把飛天，又係點樣整爛男性嘅生殖器官，令男性陽痿，點樣殺死人哋肚人面嘅BB，又點樣施法摧毀農作物，引起冰雹風暴等自己災害等等。幾乎想像到嘅一切負面行為，喺呢本書度基本上都同女巫有關。關於點樣喺審判時鑑定女巫，以下係原文：「如果被告過住不道德嘅生活就當然可以證明佢同魔鬼有來往。而如果佢虔誠且舉止端莊，咁佢好明顯係扮緊野，方便佢哋用自己嘅虔誠黎打消人哋對佢同魔鬼來往並且喺夜晚參加巫魔會嘅懷疑。如果佢喺審問時好驚，好明顯佢係有罪嘅，因為良心令佢露出馬腳。如果佢相信自己無罪，保持鎮靜，咁佢好明顯係有罪嘅，因為女巫習慣恬不佑恥咁講大話。如果佢對提出嘅控告極端可怕而恐懼絕望，垂頭喪氣緘默不語，就已經係佢有罪嘅直接證據。如果一個不幸嘅女人喺受刑時因痛苦不堪而眼仔碌碌，咁即係話佢用緊對眼黎揾佢嘅魔鬼。而如果佢眼神呆滯，完全唔郁，就意味住佢已經見到自己嘅魔鬼，而且仲係望緊佢。如果發現佢有力量頂得住酷刑，就即係魔鬼令佢支撐到，所以必須更嚴厲地折磨佢。如果佢受唔住，喺刑罰下斷咗氣，就即係魔鬼整死佢，等佢唔會洩漏秘密。」

除此之外，佢仲提出咗幾種常規嘅判斷女巫嘅方法，一係火燒鑑定，就係要被告拎住燒紅咗嘅鐵跑一段距離，或者赤腳行過燒紅嘅鐵，三日後如果手腳有傷就證明被告有罪，如果冇，被告就可以釋放。二係水淹鑑定，比較通俗嘅做法係綁住被告嘅手腳再加條繩，跟住將被告掟入池塘或者河入面，如果被告浮起就證明佢係女巫，因為女巫體重輕係眾所周知嘅。如果被告沉咗落去就無罪。三係體重鑑定。傳說女巫可以喺夜晚騎住掃把飛黎飛去，所以當時嘅人相信女巫嘅體重好輕，唔會超過5公斤。如果一個身高正常嘅女人上秤唔夠5公斤就一定係女巫。如果超過咗5公斤都唔一定即係被告唔係女巫。因為女巫可以用魔鬼賦予嘅魔力事先令秤中咗魔法。除此之外仲有眼淚鑑定法、針刺鑑定法。本質上對於佢書入面嘅種種說法，我哋可以用八個字就可以槪括：欲加之罪何患無辭。

《女巫之鎚》呢本書喺1486年首版付印，到1500年已經有版面世。20年後再版5次，直到1669年一共發行咗25版。由此可見，喺當時，女巫呢個槪念已經深入人心。咁仲未完，從1906年開始，呢本書又開始再版，到2009年一共發行咗41版。

其實喺當時唔單止有女巫被燒死，仲有啲男巫一樣難逃厄運。喺某啲地區，男巫嘅比例甚至於超過咗女巫嘅規模。但大多數情況下被控女巫嘅數量都係高過男巫嘅。除咗身為女性之外，巫仲表現出其他特徵，例如大多數係中老年人，50歲以上嘅女巫通常佔總數一半以上，甚至有啲被審判嘅女巫已經七八十歲，半隻腳已經入咗棺材，仲要多數都係窮人，但係唔代表有錢地位高果班可以倖免。例如夫妻同仔女之間不和、或者妻子捲入有關財產分配嘅糾紛，一樣會被指控係女巫。

咁講大家都知童話故事入面生鷹鉤鼻、成面膿瘡嘅老巫婆係點黎架啦。女巫俾人捉咗之後，為咗要佢哋承認自己係女巫，等緊佢哋嘅通常都係慘無人道嘅酷刑。輕則隔離、mung指甲、鞭刑，重則拷刑、水刑、輪刑。最嚴重嘅就係吊刑，至於點樣行刑，瑞森就唔講喇，過程實在係太過殘忍。等到女巫喺行刑中招供，不得不承認自己係女巫嘅時，死刑亦隨之而黎。呢個時候嘅死刑分好多種，有斬首、絞刑，當然最多嘅係火刑。當時嘅人認為如果留低屍體就一定會污染土地，尤其係女巫嘅屍體，話唔定會令土地寸草不生，甚至連周邊嘅農作物都會被污染，只有火先可以淨化世間嘅一切。喺火刑行刑期間， 女巫犯過嘅各種罪行同細節都會被宣讀出黎，當然多數都係假嘅。而被施行火刑嘅女巫痛苦地扭曲，就好似馬戲團嘅動物表演咁，成日都吸引大量觀眾黎睇，甚至萬人空巷。喺人群不斷發出「燒死佢」嘅叫聲中，女巫裸露住身體，痛苦地呻吟或許尖叫，不停徒勞地扭動身軀，想減少火焰帶黎嘅痛楚。

有咗呢班睇熱鬧嘅觀眾，做生意嘅人都自然聚集咗過黎，啲小販就好似趕市集咁。而呢個場景喺德意志地區全民揭發巫師嘅時期，數以千計嘅村度不停上演。但即使係咁，就算係喺獵巫運動嘅巔峰時期，對巫術審判嘅質疑同反對聲音從來都冇停過。就算喺一片獵巫嘅叫囂聲入面，質疑嘅聲音幾乎被完全淹沒。

1580年代英國獵巫連動漸入高潮，理論家雷吉納‧斯科特就對撒旦同巫士嘅威力持懷疑態度，仲質疑獵巫嘅正當性同合法性。16世紀，對巫術信仰同巫術審判攻擊得最勁嘅仲有鬼神學家兼牧師約翰‧威爾。而佢抨擊嘅角度仲好有意思。威爾覺得雖然魔鬼撤旦嘅威力同破壞力比大家想像中仲勁，但係從羅馬法嘅角度黎講，巫師同撤旦之間嘅盟約係無效嘅，因此巫術罪行都係唔成立嘅。用世俗嘅法律黎否定魔鬼嘅契約，條友真係勇咗啲。

巔峰之後就係低谷，從17世紀晚期到18世紀早期，獵巫運動喺西歐各國進入衰亡階段。至於衰亡嘅原因，目前嘅主流觀點係現代化。總括而言，越早進入現代化同實行宗教寛容嘅國家，獵巫運動嘅消亡就越快。而越遲現代化嘅國家，獵巫運動嘅消亡就越慢。1782年，當工業革命就好似當年獵巫運動一樣席捲西歐嘅時候，瑞士嘅格拉魯斯發生咗近代歐洲嘅最後一單獵巫事件。對歐洲女性長達幾個世紀嘅女巫式迫害終於結束。

好喇，呢條片就到呢度，如果大家有自己嘅睇法，或者覺得條片有啲地方唔啱嘅話，歡迎喺下面留言討論。如果覺得條片幫到你嘅話，歡迎訂閱同俾like，我哋下期不見不散。