日本一個平平無奇的荒廢的小村，卻靠一樣普通物翻身年賺2億！

但呢一切美譽係有代價嘅。要保持古老山村嘅面貌代表冇受到太多現代文明嘅洗禮。後生仔因為村入面嘅就業機會唔多，只能一個個離鄉去外地揾食。漸漸，上勝町只係留低一班走唔到嘅老人家，有一半人口超過65歳，更有2成都係80歳以上嘅老人。人口外流形成惡性循環，後生仔因為冇工開離開村落，少咗後生仔，村入面更加好難有咩發展。上勝町嘅老人家只能夠以種柑橘維生，冇諗到1981年一場決定性嘅天災連佢哋最後嘅謀生手段都奪走埋。

1981年2月，上勝町發生空前嘅嚴寒，本來即將收成嘅柑橘樹幾乎全部都凍死曬，老人家辛苦咗成年嘅努力化為泡影。面對嚴重嘅打擊，出外打拼嘅後生仔唔得番去重建家園，沮喪嘅老人家都無力令村莊繼續運作落去，上勝町走向廢村嘅邊緣。喺一片愁雲慘霧入面，只有一個男人冇放棄到，反而因為呢場天災令佢掌握扭轉村莊命運嘅機會。

呢個人叫橫石知二，佢唔係上勝町人，而係喺當年大學畢業之後走去上勝町做農事指導員，類似係農會嘅公務員。雖然唔係自己嘅家鄉，但當時後生熱血嘅橫石覺得自己應該為條村出番一分力，所以絞盡腦汁想諗出令條村可以延續發展嘅方法。根據佢嘅觀察，當時上勝町基本上冇乜後生仔，至於留低嘅居民剩係顧掂個肚已經好辛苦，對條村嘅發展唔會提出到太多諗法。根根據佢本人嘅講法，曾經喺村度聽到一個媽媽同細路講，你如果唔好好讀書嘅話，以後就只能夠留喺度哦。呢樣野令佢嗰吓相當震撼，腦入面浮現嘅諗法係，咁樣落去呢條村真係玩完。橫石每日除咗認真做野，仲搏命思考村嘅未來，但難解嘅問題令佢多次想揀放棄。直到有一日，一件事敲醒咗佢，令佢睇到條村存續嘅契機。

果年係1986年，距離當年幾乎滅村嘅嚴寒已經過咗5年時間。有一日橫石一如往常將村入面嘅農作物帶去大阪青果市場，交貨之後去咗附近嘅壽司舖食飯。就喺佢食到一半果時，突然聽到隔離一個女仔喺度驚叫「哇好靚呀」。原來佢係講緊伴碟嘅楓葉。跟住個女仔拎條手巾出黎將塊葉小心翼翼咁包好帶番屋企。呢間事令橫石非常驚訝。佢第一個諗法係「呢種葉有咩咁特別，我哋村度求其都執到」。但佢腦海中即刻浮現第二個諗法，「不如請村民執啲葉黎賣，睇吓會點。如果真係賣得成，咁就幾乎係挖到源源不絕嘅金礦」。於是橫石即刻走去問舖頭師傅有關塊葉嘅細節。原來呢啲葉叫做妻物，係料理必備嘅配角。喺度同大家介紹吓，日料相當重視所謂嘅節令，根據唔同季節會推出唔同嘅食材。為咗講究，伴碟嘅植物當然都會依照四季變化，營造出高雅嘅用餐氣氛。舉個例，大家成日喺日本料理上見到嘅白蘿蔔就係相當有代表性嘅妻物。一方面可以令味覺清新，一方面都增添餐盤嘅美感。更加講究嘅會放上故事入面嘅楓葉，甚至於連櫻花都會出現喺碟上面。至於妻物喺邊度入貨，師傅嘅答案令橫石更激動喇。佢話呢啲葉都係佢地自己喺山上面摘嘅，市面上冇得賣。用現代嘅形容詞黎講，橫石發現咗一片巨大嘅藍海，有硬需求，但就冇人供應。

佢好興奮咁番條村度報告呢個好消息，但村民嘅回應令佢好意外。根據橫石嘅回憶，佢哋唔但止有讚美，反而嘲笑咗佢一輪，有個呀嬋仲笑佢係狸貓，妄想將樹葉變黃金。根本冇人肯認真看待呢個方案。

為咗證明佢嘅諗法係啱嘅，橫石只能夠硬住頭皮自己做。結果第二個挫折即刻出現。佢以為造成妻物嘅植物最好係維持天然個樣，所以將摘番黎嘅菊花同楓葉包裝起黎就直接拎去大阪嘅市場度賣，結果完全賣唔出。甚至於有廚師睇咗一眼就同佢講，我絕對唔會拎呢啲野黎用。受到打擊嘅橫石好疑惑。為咗知道自己嘅產品到底邊度出錯，從來冇去過高檔日式舖頭嘅佢開始請人介紹佢去名店食飯，花咗兩年時間同好多錢，邊食邊記錄低咩野食要配咩植物，食到連舖頭入面嘅師傅都俾佢感動到，決定帶佢入廚房，詳細介紹同妻物有關嘅知識。

橫石終於解開到兩年前嘅疑惑。原來啲葉離遠睇每一塊都生得好靚，但拎上手仔細睇，會發現上面好多蛀痕或者斑點。葉嘅大細都好緊要，唔可以大到突出個容器，又唔可以細到視覺效果唔均衡。花咗兩年時間叉電嘅橫石幾乎變咗妻物專家，帶住滿滿嘅知識番番條村，用手繪嘅方式將需要嘅葉全部畫出黎，又製訂嚴格嘅品質要求，仲開研討會提升居民對妻物嘅知識。

結果上勝町嘅葉越賣越好，價錢由一包5日圓，10日圓升到一包可以賣到200日圓，宜家一包最高更加可以賣到3850日圓(35美元，980蚊台幣)。呢份工都係村入面傳開，老人家漸漸知道葉就可以賣錢，越黎越多人加入賣葉嘅行列。條村更加成立咗間公司「彩株式會社」，業績不斷上升，剩係一年就可以賺到超過2億日圓。村內唔少老人家因為咁發咗達。佢哋平均收入達到200萬日圓(18000美元，51萬蚊台幣)。犀利啲嘅一年賺千萬日圓(91000美元，254萬蚊台幣)都有。

睇吓宜家嘅上勝町，已經好難令人想像到當年瀕臨廢材嘅慘況。老人家除咗可以獨立揾食，仲學識咗好多現代嘅技能，個個都識用平板查詢當日要摘咩樹葉。有咗工作同收入，老人家嘅身體都健康咗。呢度嘅醫療費係全縣最低，村入面嘅老人院因為冇人需要住，喺2007年執咗笠。

有咗值得驕傲嘅事業，成個上勝町進入正向嘅循環，村民都更加有信心令條村變得更好。2003年，上勝町決定創下一個奇蹟叫出「零垃圾宣言」，要將所有需要掩埋同焚化嘅垃圾歸零。之所以為自己設一個咁艱難嘅挑戰，原因同一開始提到呢度係勝浦川嘅上游有關。村民覺得將上游嘅環境整污糟對下游嘅人黎講唔係咁好。另一個原因同佢哋賣樹葉嘅生意有關。如果可以主打佢哋嘅葉同農作物黎自冇垃圾嘅美麗環境，就係最強大嘅廣告。為咗達到「零垃圾宣言」，村民從垃圾分類回收落手。佢哋製訂出全國最詳細嘅分類方式，多達34項，家家戶戶仲自備廚餘機。回收唔到嘅垃圾就集中喺鎮上唯一嘅收集站。結果相當驚人，上勝町每人每日製造出黎嘅垃圾量比日本全國平均少咗三分之一，而且有八成嘅垃圾都可以回收。美好嘅山材風景加上可以賣樹葉賺錢嘅奇蹟，宜家嘅上勝町已經離廢村越黎越遙遠，每年平均有20到30人申請移入，仲俾人寫成書，拍成電影，成為日本偏鄉重生嘅經典故事。

回顧呢段辛苦但甜美嘅過程，橫石知二話佢20歲喺農協番工後，將人工花曬喺份工度，從來冇拎過錢番屋企。但佢老婆一句怨言都冇，仲喺背後默默地支援佢。果段時間因為佢太窮，生活費多數靠父母接濟，如今可以得到美好嘅果實，橫石知二好想多謝老婆同父母。至於點樣看待宜家嘅上勝町，橫石話只要見到啲婆婆面上嘅笑容就知道我哋已經達成咗目標。

好喇，今集嘅窮奢就到呢度，對呢個話題有興趣嘅朋友不妨喺下面留言，講吓你哋嘅諗法。如果鍾意我哋嘅頻道，記得訂閱，讚好同分享。我哋下集再見，88~