1
東京奧運：中港台三地其中5位矚目的奧運選手－ BBC News 中文
BBC News 中文 | 時政類 | Aug 8, 2021
此影片謄本由Sa製作
★非作商業用途，本檔案版權歸版權持有人獨有★
東京奧運嚟到尾聲，好多人都估唔到喺疫情陰霾以及缺乏現場觀眾之下坊間對奧運嘅關注度反而比以往更熱烈，賽程、賽果、賽事精華只要一打開社交媒體就一定會見到。如果你都有呢種感覺，可能係因為香港同埋台灣嘅運動員創下歷史性佳績，參賽選手成為民眾嘅焦點。
我係BBC中文嘅雷展程，今集節目會同大家介紹今屆奧運中港台三地矚目嘅其中五位運動員。
第一位介紹嘅係香港嘅張家朗，被香港媒體稱為少年劍神嘅佢喺今屆東京奧運奪得男子花劍項目冠軍。係繼1996年滑浪風帆選手李麗珊為香港奪得金牌25年後再次有香港運動員取得金牌。
當年李麗珊奪金由美國亞特蘭大返到香港一句「香港嘅運動員唔係垃圾」令人回味至今。如今張家朗為香港人留低嘅一句係「大家要堅持，唔好咁易放棄！縮喺後面，再褪落去都唔係辦法，要上前盡力打好每一劍。」呢種體育精神可能係由父母身上遺傳嘅，張家朗嘅爸爸張子倫曾經係香港前甲一籃球隊成員，媽媽陳雪玲就係香港青年籃球代表，曾經效力女子甲組籃球聯賽，亦都曾經攞過聯賽冠軍。遺傳咗兩位籃球員嘅基因，身高193厘米嘅張家朗由小學四年級開始玩劍擊，到今屆奧運以15比11擊敗上屆2016年里約熱內盧奧運男子花劍個人項目冠軍意大利選手加羅佐，為香港奪得史上嘅第二面奧運金牌。
下載檔案
下載檔案
1
1
所有資料非作商業用途，若有內容侵權，請即通知我們移除。
1
香港歷史上從來都未試過喺一屆奧運奪得超過一面獎牌，不過今屆東京奧運，今年23歲綽號小美人魚嘅何詩蓓一個人就喺女子100米同埋200米自由泳項目獨攬兩面嘅銀牌。亦都係首位喺奧運游泳比賽晉身決賽並且獲得獎牌嘅香港泳手。
經過今屆奧運之後相信好多香港人都會記得何詩蓓呢個名，不過佢嘅英文名可能就冇咁容易記喇。何思培嘅英文姓氏Haughey嚟自愛爾蘭藉嘅爸爸。Haughey首個發音同「何」相似，而佢個名Siobhan Bernadette嘅頭兩個英文字母又同「詩蓓」差唔多，所以取名「何詩蓓」。另外何詩蓓嘅家族背景亦都相當顯赫，佢同兩位愛爾蘭前總理都有親戚關係，愛爾蘭已故前總理查爾斯豪伊係佢嘅叔公，而佢亦都係另一位前總理史恩利馬斯嘅曾外甥孫。雖然家族背景顯赫，不過能夠喺一屆奧運奪得兩面獎牌，背後付出嘅努力唔係一般人可以想像嘅。由於要兼顧學業，中學時期嘅何詩蓓每日五點鐘就起身練習游水，有時甚至要喺凌晨三點起身做功課，返學前後去嘅地方就係游泳池。不過呢一切嘅努力都係有回報嘅，何思培喺200米自由泳決賽以1:53:92完成獲得銀牌創下亞洲紀錄，而佢喺100米自由泳決賽就以52:27完成獲得個人第二面奧運獎牌，成為史上首位奪得兩面奧運獎嘅香港運動員。
1
1
除咗香港運動員喺今屆奧運創下紀錄之外，代表中華台北隊選手戴資穎亦都創下台灣嘅紀錄成為台灣首位喺奧運羽毛球單打項目攞到獎牌嘅選手。今年27歲世界排名第一嘅戴資穎由幼稚園開始接觸羽毛球，佢嘅爸爸戴楠凱係一名消防員，身兼高雄市羽毛球委員會總幹事。小學六年級嘅時候佢已經打遍高雄，奪得台灣羽毛球排名賽乙組冠軍，攞到升上甲組資格並且成為台灣羽毛史上最年輕嘅甲組選手。有假動作女王之稱嘅佢，由佢15歲2009年嘅時候開始就不斷喺國際賽奪得獎牌，不過就從未獲得世錦賽冠軍同埋奧運冠軍。可能因為戴資穎細個嘅時候成日都要同年紀比佢大好多嘅選手打波，所以佢發展出好多變化多端嘅球路。
雖然球路變化多端但係有一樣嘢係永恆不變嘅，就係戴資穎嘅羽毛球拍。咁多年黎由細到大戴資穎嘅出戰球拍都係由爸爸同埋嫲嫲連夜趕工製作，爸爸一手包辦穿線，嫲嫲就負責握把皮，完工之後嘅姓名貼紙亦都有阿姨幫忙貼上，希望可以為佢帶嚟好運。最終戴資穎打錯咗上兩屆奧運16強止步嘅宿命，成功殺入決賽。可惜不敵世界排名第二嘅中國選手陳雨菲，總局數2比1飲恨奪奧運羽毛球女子單打銀牌。戴資穎曾經透露自己嘅目標，佢希望喺東京奧運奪得獎牌之後就退休。而家佢成功奪得銀牌，未知佢係唔係會為自己嘅羽毛球生涯劃上句號。
1
1
喺1986年之前從來都未有奧運選手可以喺十秒之內完成100米嘅田徑項目，不過隨著第一人成功破十之後，能夠衝破十秒大關嘅田徑選手迅速增加。黎到2021年中國嘅田徑選手蘇炳添以9:83嘅成績成為第一位進入男子100米短跑項決賽嘅中國選手。呢個係繼日本選手吉岡隆德晉級1932年奧運男子100米短跑項目決賽之後黃種人第二次躋身奧運會100米短跑項目決賽。
蘇炳添喺賽前為自己定咗一個目標︰無論決賽排第幾，目標就係要突破十秒。因為咁樣對佢嚟講係另一個自我飛躍。2012年倫敦奧運會蘇炳添跑出10:19，2016里約奧運會佢跑出10:08，今年東京奧運會決賽佢跑出9:98嘅成績。雖然未有贏得獎牌但係佢贏咗自己。
擔任咗蘇炳添教練將近10年嘅袁國強形容蘇炳添係佢帶過最自覺嘅隊員，從來都唔偷懶唔煙唔酒，亦都冇夜不歸宿等等嘅不良習慣。佢認為呢種自律同埋職業運動員嘅質素喺大部分中國運動員仍然要學習嘅。順帶一提蘇炳添係廣東中山人，母語係廣東話，重曾經同香港歌手李克勤喺舞台上用廣東話合唱過《紅日》。
楊倩係今屆東京奧運第一名為中國奪金嘅選手，佢唔單止為中國隊出戰東京奧運揭開序幕，亦都令自己嘅運動員生涯有個好開始。年僅21歲嘅佢十歲嘅時候就開始練習射擊，喺奧運會官方網站上目標嗰一欄填上咗喺2020東京奧運競技，點知佢首次出征奧運就攞到兩面嘅金牌。佢喺女子十米氣步槍項目以破奧運紀錄251.8環嘅成績為中國取得第一面金牌，然後又喺十米氣步槍團體賽再添一金。除咗手中多咗兩面獎牌，佢嘅社交媒體粉絲數量亦都突然暴漲，短短幾日之內由2萬升至230萬。
1
1
楊倩咁受歡迎並唔係冇原因㗎，佢喺奪得女子十米氣步槍金牌之後領獎嘅時候用雙手比一個大心心流露出真摯一面。不過呢個同楊倩比賽時候冷靜沉實嘅一面形成極大對比。佢喺女子十米氣步槍決賽最後一槍前仍然落後於俄羅斯奧委會選手加拉什娜0.2環，佢沉著應戰深呼吸一口氣然後拎起槍射出最後一發子彈反勝，心理質素好到令人佩服。順利奪金度過咗一個精彩嘅暑假之後楊倩將要返番去就讀嘅清華大學繼續學業。佢嘅校園生活將會因為兩面金牌而變得不一樣。
由於節目所限仲有好多其他出色嘅運動員未能夠一一盡錄，大家可以喺我哋嘅官方網站留意最新報導，亦都歡迎留言話畀我哋知你最欣賞嘅運動員係邊個呢？
1
牆內能夠接觸外間資訊的渠道寥寥可數，Youtube 機頂盒為每星期從 Youtube 上挑選不同種類的專題影片並製作成謄本、印刷成信件的長期計劃。
其他最新謄本
💥腦筋急轉彎2片尾解析＋12大彩蛋｜小彬彬竟然出現？霹靂包原型？AC113？留言抽官方贈品
那些電影教我的事 Lessons from Movies | 電影類
💥戰勝阿焦大作戰！腦筋急轉彎2最強指南｜4招把阿焦變成神隊友｜劇透｜Inside Out 2｜留言抽好書
那些電影教我的事 Lessons from Movies | 電影類
💥腦筋急轉彎2無雷解析｜小心你的情緒內戰！5招搞懂你的腦｜留言抽好書｜Inside Out 2
那些電影教我的事 Lessons from Movies | 電影類
#MM｜返工成日聽到「一代不如一代」 係源於心理偏見？社會學分析不同年代人特徵 點解00後會衝擊職場生態？｜#Pantry有嘢斟 #4K
Mill MILK | 心理類
#MM｜00後擲廿萬創業開韓式自拍館 半年回本開分店 月打4份工返茶餐廳做樓面 拍Reels過900萬觀看次數 00後鍾意創業搵滿足感 抗拒朝9晚5？｜#700萬種生活 #4K
Mill MILK | 社文類
0